តារាសម្តែងដែលរមែងពើបប្រទះនឹងរឿងអាស្រូវមិនចេះចប់មិនចេះ ហើយតារាសម្តែងដែលរមែងពើបប្រទះនឹងរឿងអាស្រូវមិនចេះចប់មិនចេះ ហើយ កុល ដាវី បាននិយាយដោយឆេះដុំរាប់ពាន់អង្សាថា មុននេះបន្តិចមានព័ត៌មានគ្មានការពិតមួយបាននិយាយបរិហារកេរ្តិ៍ ពីនាងថា នាងបានធ្វើជាភ្ជាប់ទំនាក់ទំនងស្នេហ៍ក្លែងក្លាយជាមួយបុរស អាណិកជនខ្មែរម្នាក់រស់នៅសហរដ្ឋអាមេរិក ដែលបានធ្វើឲ្យបុរសរូបនោះស្ទើរឆ្កួតចិត្ត ដោយសារតែចាញ់បោកនាង បង់ទាំងចិត្ត អស់ទាំងទ្រព្យសម្បត្តិ។
ពិធីការិនីវាតទីគ្រងតំណែង៤ស្ថានីយទូរទស្សន៍ កុល ដាវី បាននិយាយដោយខឹងសម្បានឹងព័ត៌មានគ្មានធាតុពិតថា៖«សុំទោសបង! ខ្ញុំរាងខឹងបន្តិច ខាងព័ត៌មានហ្នឹងមិនដឹងជាគេដឹងពីណា បានជាគេចុះគ្មានការពិតសូម្បីបន្តិចសោះថា ខ្ញុំហ្នឹងបានធ្វើឲ្យបុរសអាមេរិកម្នាក់លង់ខ្លួន ហើយគេថែមទាំងថា អ្នកអាមេរិកហ្នឹងឧបត្ថម្ភខ្ញុំ តាំងពីទិញផ្ទះ ឡានទំនើប និងរបស់របរផ្សេងៗ បង់ប្រាក់អស់មិនតិចទេ តើគេដឹងពីណា បើគ្មានការពិតហ្នឹង?»។
ពាក់ព័ន្ធនឹងព័ត៌មានថា កុល ដាវី បោកចិត្ត បោកទ្រព្យនោះ តារាដែលរវល់សឹងតែគ្មានពេលចូលបន្ទប់ទឹកម្នាក់នេះ បានប្រាប់ថា នាងសូមបញ្ជាក់នៅពេលនេះថា នាងសូមបដិសេធទាំងស្រុងចំពោះព័ត៌មាននេះ។ នាងបន្តថា នាងមិនបានដឹងខ្លួនសូម្បីបន្តិច ហើយក៏មិនធ្លាប់ស្គាល់អ្នកអាមេរិកណាដែរ ព័ត៌មានដែលគេបានធ្វើការផ្សព្វផ្សាយនោះ គ្មានប្រភពច្បាស់ទាល់តែសោះ ពោលគឺវាអាចជាការប្រឌិតច្រើនជាង។
ដើម្បីសបញ្ជាក់ពីភាពស្អាតស្អំក្នុងនាមជាតារាមានភាពថ្លៃ ថ្នូរ ម្នាក់ ដែលបានទទួលរងថ្មបាក់ កុល ដាវី បានខិតខំស្វះស្វែងរត់រកក្រសួងព័ត៌មានដែលជាឪពុកម្តាយឲ្យជួយ អន្តរាគមន៍នៅក្នុងរឿងនេះ និងធ្វើការកែតម្រូវនូវរាល់ព័ត៌មានខុសពីការពិតទាំងនោះ ដែលស្ថាប័នព័ត៌មានមួយចំនួនបានធ្វើការចុះផ្សាយ។
នាងបាននិយាយថា៖«ចំពោះព័ត៌មានដែលថា ខ្ញុំបោកប្រាស់ទ្រព្យសម្បត្តិ លុយកាក់គេយ៉ាងសន្ធឹកនោះ ខ្ញុំសូមធ្វើការបដិសេធទាំងស្រុង ហើយដើម្បីបញ្ជាក់ពីភាពស្អាតស្អំ ខ្ញុំបានសុំឲ្យក្រសួងព័ត៌មានជួយអន្តរាគមន៍ និងឲ្យសារព័ត៌មាននោះ ជួយបកស្រាយឲ្យខ្ញុំវិញ»។ តារារូបនេះបានបន្តថា៖«ធម្មតាខ្ញុំមានភាពថ្លៃថ្នូររបស់ខ្ញុំ ខ្ញុំប្រាកដណាស់ថា ខ្ញុំមិនដែលបានធ្វើរឿងបែបនេះទេ»។
ជាការគាប់ជួនគ្នានឹងការផ្ទុះព័ត៌មានថា តារារូបនេះបានទទួលការឧបត្ថម្ភពីបុរសអាមេរិក ហើយក៏បានទាត់គេចោលដូចបាល់នោះ បានកើតឡើងនៅខណៈពេលដែលពិធីការិនី កុល ដាវី កំពុងតែកាក់កបនៅក្នុងអាជីពរបស់ខ្លួន មានលុយកាក់ទិញផ្ទះមួយល្វែងនៅម្តុំព្រលានយន្តហោះភ្នំពេញ និងប្តូរមកជិះរថយន្តទំនើបម៉ាកឡិចស៊ីស៤៧០យ៉ាងហ៊ឺហា។
ចំណូលដែលទទួលបាន ធ្វើឲ្យតារារូបនេះអាចមានលទ្ធភាពប្រើប្រាស់របស់របរ និងយានជំនិះទំនើបនេះ ត្រូវបាន កុល ដាវី បញ្ជាក់ឲ្យដឹងថា គឺជាការខិតខំរកចំណូលដោយខ្លួនឯងទាំងយប់ទាំងថ្ងៃ ទោះបីជាស្ថិតក្រោមកម្តៅថ្ងៃ និងភ្លៀងផ្គរក៏ដោយ ដោយមិនមានការជួយទំនុកបម្រុងពីបុរសណាឡើយ។ ជាការពិតថ្វីដ្បិតតែ កុល ដាវី មិនល្បីផ្តាច់គេទាំងអាជីពសម្តែង និងពិធីការិនី តែគេសង្កេតឃើញថា តារារូបនេះហាក់ដូចជាទទួលបានការងារច្រើនពីអាជីពរបស់ខ្លួន ពិសេសពីអាជីពជាពិធីការិនី។
នាងបាននិយាយថា៖«បងឯងគិតមើល! គេថា គេឲ្យផ្ទះ ផ្ទះណា? ផ្ទះរបស់ខ្ញុំហ្នឹងទិញយូរហើយ គឺទិញបង់រំលស់ រកលុយបង់ឲ្យធនាគារ២ឆ្នាំចង់ដាច់ខ្យល់ហើយហ្នឹង។ រីឯឡាន ខ្ញុំរកលុយទិញខ្លួនឯងកាលពីប៉ុន្មានខែមុននេះ ខ្ញុំមានលទ្ធភាព! មួយថ្ងៃៗ ខ្ញុំធ្វើការ ខ្ញុំទៅថតស្ទើរតែគ្មានពេលញាំបាយផង។ ខ្ញុំចុះទៅធ្វើពិធីករតាមខេត្ត និងកម្មវិធីផ្សេងៗស្ទើររាល់ថ្ងៃ តែពេលខ្ញុំឃើញគេបង្ខូចកិត្តិយស កេរ្តិ៍ឈ្មោះខ្ញុំអ៊ីចឹង ខ្ញុំពិបាកចិត្តណាស់ តែខ្ញុំក៏អរគុណដែរដែលបងប្អូនទស្សនិកជន ពិសេសនៅតាម Facebook គាត់ជឿខ្ញុំ នៅតែគាំទ្រខ្ញុំ តែខ្ញុំក៏សូមប្រាប់ពួកគាត់ថា ខ្ញុំស្អាតស្អំ១០០ភាគរយ»។
ដាវី បញ្ជាក់ថា៖«បើអ្នកណាគេច្បាស់ថា គេចង់ចេញមុខតទល់គ្នា ខ្ញុំពិតជាអត់ខ្លាចទេ ខ្ញុំស្វាគមន៍ ខ្ញុំនឹងធ្វើឲ្យគេមើល!»។
ជាមួយគ្នានេះ កុល ដាវី ក៏ត្រៀមឯកសាររួចជាស្រេចដើម្បីដាក់ពាក្យបណ្តឹងជុំវិញការចុះ ផ្សាយមួលបង្កាច់កិត្តិយសកេរ្តិ៍នាងផងដែរ ដោយតារារូបនេះបានឲ្យដឹងថា ប្រសិនបើស្ថាប័នមួយនោះមិនព្រមបកស្រាយពីភាពស្អាតស្អំឲ្យនាង វិញទេនោះ។
តារាដែលអ្នកណាៗក៏សរសើរពីសម្រស់ដើមទ្រូងរបស់នាងនោះ បាននិយាយថា៖«ខ្ញុំមានឯកសារអស់ហើយបង! បើគាត់មិនបកស្រាយឲ្យខ្ញុំវិញទេ ខ្ញុំនឹងដាក់ពាក្យបណ្តឹងទៅតុលាការ ព្រោះរឿងនេះមិនត្រឹមតែប៉ះពាល់ខ្លាំងសម្រាប់ខ្ញុំនោះទេ គឺវាប៉ះពាល់ទាំងអស់ ទាំងម្តាយខ្ញុំ បងប្អូន ជីដូន ជីតាខ្ញុំទៀតផង»៕(PK)
