សាកសពទាំង៣នោះត្រូវបានគេដឹង ថា ជាសមាជិកក្នុងគ្រួសារមួយនៅតំបន់ភាគខាងជើងទីក្រុងតូក្យូ ។ តាមការស្រាវជ្រាវឃើញថា អគ្គិសនី ហ្គាស ត្រូវបានកាត់ផ្ដាច់ ទូទឹកកកទទេស្អាតគ្មានអាហារ ហើយនៅក្នុងផ្ទះបានរកឃើញប្រាក់តែប៉ុន្មានយ៉េនប៉ុណ្ណោះ ។
សារព័ត៌មាន BBC បានផ្សព្វផ្សាយទៀតថា ពេលប៉ូលិសចូលដល់ផ្ទះនោះបានប្រទះឃើញសាកសពទាំង៣នោះក្រៀមទៅហើយ ។ តាមការសន្និដ្ឋានសាកសពនោះមាន២នាក់ប្ដីប្រពន្ធ អាយុប្រហែល៦០ឆ្នាំ និងកូនប្រុសមានអាយុប្រហែល៣០ឆ្នាំ ហើយអ្នកទាំង៣ស្លាប់ដោយសារអត់ឃ្លាន ។ ប៉ូលិសបានទៅដល់ផ្ទះជនរងគ្រោះក្រោយពេលអ្នកគ្រប់គ្រងផ្ទះនោះមិន អាចទំនាក់ទំនងជាមួយគ្រួសារនេះបានរយៈពេល២ខែកន្លងមក ។
តាមសារព័ត៌មាន Asahi ឱ្យដឹងថា គ្រួសារនេះបានស្នើសុំជំនួយពីអ្នកភូមិ ប៉ុន្ដែត្រូវបានបដិសេធ ហើយស្នើឱ្យអ្នកទាំង៣នោះទំនាក់ទំនងជាមួយក្រុមអ្នកផ្ដល់ជំនួយ ។
សារព័ត៌មាន Asahi បានផ្សព្វផ្សាយថា មនុស្សជាច្រើននៅក្នុងប្រទេសជប៉ុនមិនហ៊ានទៅកាន់កន្លែងផ្ដល់ ជំនួយរបស់រដ្ឋាភិបាលនោះឡើយដោយសារតែភាពអៀនខ្មាស ៕
