លោក ស ខេង រដ្ឋមន្រ្តីក្រសួងមហាផ្ទៃ បានថ្លែងក្នុងពិធីមួយ នៅក្រសួងមហាផ្ទៃ កាលពីម្សិលមិញថា បុរសដែលបាញ់កាំភ្លើងនោះ ត្រូវបានសមត្ថកិច្ចកំណត់អត្តសញ្ញាណរួចហើយ ហើយក្រសួងមិនបញ្ចេញព័ត៌មាន របស់ជនសង្ស័យនោះទេ ដោយសារការស៊ើបអង្កេតកំពុងបន្ត ទាក់ទងនឹងទីកន្លែងរបស់ជនសង្ស័យនោះ។ លោកបញ្ជាក់ថា៖«យើងដឹងអ្នកបាញ់ជាអ្នកណាហើយ ហើយយើងក៏មានភស្តុតាង [ដើម្បីផ្តន្ទាទោសគាត់] ផងដែរ។ គ្រប់ប្រទេសមានការតវ៉ា ប៉ុន្តែយើង [កម្ពុជា] យកកាំភ្លើងទៅដោះស្រាយ ឲ្យអ្នកដែលគ្មានកាំភ្លើង។ បញ្ជានគរបាលឲ្យបាញ់អ្នកភូមិ។ ការអនុវត្តនេះហួសសម័យហើយ។ វាមិនមែនជារបបខ្មែរក្រហមទេ យើងត្រូវតែការពារប្រជាជន»។
កាលពីថ្ងៃចន្ទ កម្មករជាង ៦០០០ នាក់ មកពីរោងចក្រ ៤ ក្នុងតំបន់សេដ្ឋកិច្ច Manhattan ក្នុងក្រុងបាវិត
បានធ្វើការតវ៉ា និងទាមទារប្រាក់អត្ថប្រយោជន៍ និងលក្ខខណ្ឌការងារល្អប្រសើរជាងមុន។ ក្រុមកម្មករ បានអះអាងថា មន្ត្រីនគរបាលម្នាក់បានបាញ់កម្មករ ៣ នាក់ ឲ្យរងរបួសធ្ងន់។ កាលពីម្សិលមិញ កម្លាំងនគរបាល ត្រូវបានគេដាក់ពង្រាយនៅតាមបណ្តោយផ្លូវជាតិលេខ ១ ពីក្រុងស្វាយរៀង ទៅក្រុងបាវិត និងនៅខាងមុខរោងចក្រដើម្បីធានាថា កម្មករ ដែលធ្វើការនៅរោងចក្រក្នុងតំបន់សេដ្ឋកិច្ចពិសេសនឹងមិនអាចជិះ ឡានទៅរោងចក្រដើម្បីធ្វើការតវ៉ាបានទៀតទេ។
អ្នកស្រី អាន សំអឿន ប្រពន្ធរបស់អ្នកបើកបររថយន្តម្នាក់ ដែលដឹកជញ្ជូនកម្មកររោងចក្រទៅធ្វើការបានថ្លែងថា កាលពីយប់ថ្ងៃចន្ទ មេភូមិព្រែកទប់ បានមកផ្ទះអ្នកស្រី ហើយប្រាប់ប្តីរបស់អ្នកស្រី កុំឲ្យទៅយកកម្មករ រហូតដល់ថ្ងៃសុក្រ។ អ្នកស្រីបានបន្តទៀតថា៖ «គាត់ [មេភូមិ] បានប្រាប់ខ្ញុំថា អាជ្ញាធរចង់ការពាររោងចក្រ និងរកដំណោះស្រាយជូនកម្មករ»។
លោក ទិត ពុធ មេភូមិព្រែកទប់ បានថ្លែងថា លោក ព្រមទាំងមេភូមិ និងមេភូមិដទៃទៀត ត្រូវបានណែនាំឲ្យប្រាប់អ្នកបើកបររថយន្ត ក្នុងមូលដ្ឋានរបស់ខ្លួនថា អ្នកបើកបររថយន្តមិនត្រូវបានអនុញ្ញាតឲ្យដឹកជញ្ជូនកម្មករទៅ រោងចក្រទេ រហូតទាល់តែដល់ថ្ងៃសុក្រ។ លោកបានបន្ថែមថា៖ «ទោះបីយើងធ្វើអ្វីក៏ដោយ យើងគ្រាន់តែចង់ចៀសវាងអំពើហិង្សា»។
នាង ភឿន ភីម អាយុ ១៧ ឆ្នាំ ជាកម្មករនៅរោងចក្រ Kaoway Sports ដែលផលិតស្បែកជើង PUMA បានថ្លែងថា អាជ្ញាធរគិតថា កម្មករនឹងធ្វើការតវ៉ាម្តងទៀត ហើយបំផ្លិចបំផ្លាញរោងចក្រ ដូច្នេះគេមិនឲ្យយើងធ្វើការចំនួន ៣ ថ្ងៃ។ នាងបានបន្ថែមថា៖ «មេឃុំបានប្រាប់អ្នកបើកបរ កុំឲ្យមកយកយើងទៅធ្វើការ ព្រោះគេខ្លាចយើងដុតរោងចក្រ»។
ក្រុមហ៊ុន PUMA បានចេញផ្សាយសេចក្តីថ្លែងការណ៍ទាក់ទងនឹងការតវ៉ានៅរោងចក្រ ដែលបានលើកឡើងដោយមិនត្រឹមត្រូវសម្អាងលើសមាគមរោងចក្រកាត់ដេរនៅ កម្ពុជាថា មានតែស្រ្តីម្នាក់ បានរងរបួស ដោយសារការបាញ់នោះ ហើយកម្មកររោងចក្រ Kaoway Sports មិនបានចូលរួមក្នុងបាតុកម្មទេ។
នាង កែវ នា ត្រូវបានបាញ់ចំដៃស្តាំ ក្នុងពេលតវ៉ា ហើយបានទទួលការព្យាបាលរបួសគ្រាប់កាំភ្លើង នៅគ្លីនិកឯកជន ក្នុងក្រុងបាវិត។ បងប្អូនជីដូនមួយរបស់នាងឈ្មោះ ប៊ុត ចិន្តា ដែលត្រូវបានបញ្ជូនទៅមន្ទីរពេទ្យកាល់ម៉ែត្រ ជាមួយនឹងរបួស ដែលអាចសម្លាប់នាងបានហើយនាង នុត សាខន ក៏ត្រូវបានគេបាញ់ចំផងដែរ ក្នុងពេលតវ៉ា។
នាង កែវ នា ដែលថ្លែងពីគ្រែក្នុងគ្លីនិក កាលពីម្សិលមិញ បានឲ្យដឹងថា៖ «គេ [PUMA] ថា យើងមិនមែនជាកម្មករ Kaoway ទេ។ ប្រសិនបើយើងមិនមែនជាកម្មកររោងចក្រ តើយើងជាអ្នកណា? យើងតវ៉ា ហើយគេបាញ់យើង»។
លោក ជៀង អំ អភិបាលខេត្តស្វាយរៀង បានឲ្យដឹងកាលពីម្សិលមិញថា ម្ចាស់រោងចក្រ មកពីតំបន់សេដ្ឋកិច្ចពិសេស បានជួបជាមួយនឹងរដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ កាលពីព្រឹកម្សិលមិញ ដើម្បីស្វែងរកដំណោះស្រាយចំពោះការទាមទាររបស់កម្មករ។ លោកបានបន្តថា គេយល់ព្រមផ្តល់ប្រាក់ ២០០០ រៀល សម្រាប់ថ្លៃអាហារថ្ងៃត្រង់ ក្នុងមួយថ្ងៃ ១០ ដុល្លារ ក្នុង ១ ខែ សម្រាប់ការធ្វើដំណើរ ព្រមទាំងនៅថ្ងៃអាទិត្យ ឬថ្ងៃឈប់សម្រាក បើរោងចក្រ មិនមានរថយន្តដឹកជញ្ជូនពួកគេ រោងចក្រនឹងផ្តល់ប្រាក់ ២ ដុល្លារបន្ថែម សម្រាប់ថ្លៃធ្វើដំណើរ។
អង្គការលីកាដូ បានចេញផ្សាយសេចក្តីថ្លែងមួយកាលពីម្សិលមិញដោយធ្វើការថ្កោល ទោស ចំពោះការប្រើអំពើហិង្សាប្រដាប់អាវុធទៅលើអ្នកតវ៉ា ដែលគ្មានអាវុធនៅក្នុងដៃ។
លោកស្រី Naly Pilorge ប្រធានអង្គការលីកាដូ បានថ្លែងថា៖ «ប្រសិនបើការចាប់ខ្លួន និងការកាត់ទោសបទល្មើសទាំងនេះមិនដល់កម្រិតច្បាប់និងមិន ក្លាយជាវិធានតឹងរ៉ឹង ហើយមានការលើកលែង នោះអំពើហិង្សានឹងច្បាស់ជាបន្តកើនឡើង»៕
