កូរ៉េខាងជើងគំរាម បំផ្ទុះសង្រ្គាម ឆ្លើយតបការធ្វើ សមយុទ្ធយោធា របស់អាមេរិក និងកូរ៉េខាងត្បូង

សេអ៊ូល៖ ប្រទេសកូរ៉េខាងជើងបានធ្វើការគំរាមថា ខ្លួនអាចនឹងបំផ្ទុះសង្គ្រាម ប្រសិនបើសហរដ្ឋអាមេរិក និងកូរ៉េខាងត្បូង នៅតែមានះធ្វើសមយុទ្ធយោធា ប្រចាំឆ្នាំ នៅសប្តាហ៍ក្រោយនេះ ដោយបានលើកឡើង ថា ការធ្វើសមយុទ្ធយោធា ប្រៀបទៅនឹងការបញ្ឆេះឲ្យមានសង្គ្រាមផ្ទុះឡើង។

យោងតាមទីភ្នាក់ងារសារព័ត៌មាន Channel News Asia ចុះថ្ងៃទី២៦ ខែកុម្ភៈ ឆ្នាំ២០១២ បានឲ្យដឹងដោយលើកឡើងនូវសំដីរបស់រដ្ឋមន្ត្រីការពារជាតិកូរ៉េខាងជើង

ដែលបានហៅការធ្វើសមយុទ្ធនេះថា ជា ការបញ្ឆេះឲ្យមានសង្រ្គាមផ្ទុះឡើង ដោយនឹកស្មានមិនដល់។ ជាមួយគ្នានេះដែរ កូរ៉េខាងជើងបានបន្ត លើកឡើងថា កងកម្លាំងយោធា និងប្រជាជនរបស់ខ្លួននឹងរួមកម្លាំងគ្នាក្នុងការធ្វើយ៉ាងណា ឲ្យគម្រោង ការរបស់សហរដ្ឋអាមេរិក និងកូរ៉េខាងត្បូងត្រូវបរាជ័យ។

កាលពីសប្តាហ៍មុនភាគីខាងជើងបានប្តេជ្ញាថា ខ្លួននឹងធ្វើការសងសឹកវិញ ដោយគ្មានការត្រាប្រណី ប្រសិនបើមានការបំផ្ទុះអាវុធ ក្នុងតំបន់ដែនទឹកនៅតំបន់ជម្លោះក្បែរបន្ទាត់ព្រំដែនសមុទ្រលឿង។ ប៉ុន្តែភាគីខាងជើងនឹងមិនប្រើប្រាស់កម្លាំងយោធាឆ្លើយតបការធ្វើសមយុទ្ធយោធានេះនោះឡើយ។

រដ្ឋមន្ត្រីការពារជាតិ កូរ៉េខាងជើង បានប្រកាសថា នឹងធ្វើសង្គ្រាមប្រឆាំងសហរដ្ឋអាមេរិកជាដាច់ខាត។ ជាមួយគ្នានេះដែរ កងកម្លាំងយោធា និងប្រជាជនរបស់ខ្លួន បានប្តេជ្ញាថា នឹងត្រៀមខ្លួនក្នុងការធ្វើសង្គ្រាម ប្រឆាំងសត្រូវក្នុងគោលដៅការពារសន្តិសុខ និងសន្តិភាព សម្រាប់ប្រជាជាតិ និងប្រជាជនរបស់ខ្លូន។

គួរបញ្ជាក់ថា សហរដ្ឋអាមេរិក និងកូរ៉េខាងត្បូងនឹងចាប់ផ្តើមធ្វើសមយុទ្ធយោធាសំខាន់ៗ ប្រចាំឆ្នាំនៅ សប្តាហ៍ខាងមុខ។ គួររំលឹកផងដែរថារដ្ឋមន្ត្រីសហរដ្ឋអាមេរិក និងកូរ៉េខាងជើង ធា្លប់បានធ្វើកិច្ចចរចាគ្នា សាជាថ្មីម្តងទៀត ដើម្បីបើកកិច្ចចរចាប្រាំមួយភាគី ដោះស្រាយបញ្ហាអាវុធនុយក្លេអ៊ែររបស់កូរ៉េខាងជើង ក្នុងគោលដៅបង្កើនកិច្ចទំនាក់ទំនងផ្នែកការទូត និងសេដ្ឋកិច្ចជាមួយប្រទេសកុម្មុនីស មួយនេះសាជាថ្មី ម្តងទៀត៕(dapnews)