ក្រោយលេចធ្លោ ក្នុងនាមជាពិធីការិនីរបស់ស៊ីធីអិនក្នុងកម្មវិធី “សុខគា លក្ខិណា ប៊ីអាយជី” ថន លក្ខិណា ហាក់ស្ងប់ស្ងាត់មួយរយៈ
ពាក់ព័ន្ធនឹងចំណងស្នេហ៍ ក្រោយល្បីផ្តាច់ស្នេហ៍
ជាមួយកម្លោះសង្ហា រតនៈ វិសិដ្ឋ។ ប៉ុន្តែបង្ហាញវត្តមាន
ក្នុងពិធីខួបកំណើត របស់អតីតគូស្នេហ៍រូបនេះ លក្ខិណា
ស្រាប់តែស្រក់ទឹកភ្នែកប៉ុន្មានតំណក់ ធ្វើឲ្យគេងឿងឆ្ងល់ទៅវិញ។
ពិធីការិនីរាងខ្ពស់ស្រឡះ ថន លក្ខិណា
កំពុងតែមានដំណើរការណ៍ការងារក្នុងនាមជាពិធីការិនី យ៉ាងរលូន
បើទោះជានាងមិនទាន់អាចក្តោបក្តាប់កម្មវិធីច្រើនក្នុងពេលតែមួយ
ក៍ដោយ ប៉ុន្តែយ៉ាងហោចណាស់ ក៏កម្មវិធីរបស់នាងតែមួយនេះ
បាននិងកំពុងទទួលបានការគាំទ្រពីទស្សនិកជនដែរ
ដោយទើបនឹងទទួលបានពានរង្វាន់ពីកម្មវិធី “អាណាចក្រតារា”
កាលពីពាក់កណ្តាលខែកុម្ភៈនេះ។
ដូច្នេះបើនិយាយពីការងារ គឺ ថន
លក្ខិណា កំពុងរីកមុខរីកមាត់
តែបើនិយាយពីរឿងរ៉ាវផ្ទាល់ខ្លួនវិញ ពិធីការិនីរូបស្រស់រូបនេះ
មិនទាន់មានភាពគាប់ប្រសើរទេ ខណៈកន្លងមក
នាងបានជួបរឿងអាស្រូវគួរសមដែរ ពាក់ព័ន្ធនឹងរឿងស្នេហា។
ជាក់ស្តែង កាលពីដើមឆ្នាំ២០១១
ខណៈគេឃើញនាងដើរចែកសំបុត្រអញ្ជើញភ្ញៀវឡើងផ្ទះ
មួយល្វែងនៅម្តុំដេអិនដែលមានតម្លៃក្បែរ២០ម៉ឺនដុល្លារនោះ
មានព័ត៌មានថា នោះជាកាដូពីគូស្នេហ៍ជាឧកញ៉ារបស់នាងទិញឲ្យ
ព្រោះគេមិនជឿថា ថន លក្ខិណា ដែលទើបល្បីប្រមាណ២ឆ្នាំ
តាមរយៈការងារជាពិធីការិនី និងសម្ដែង
មានលទ្ធភាពរំលេចសមិទ្ធផលតម្លៃដប់ម្ភៃម៉ឺនដុល្លារនោះឡើយ។
យ៉ាងណាក៏ដោយ នាងបានបកស្រាយថា ផ្ទះមួយល្វែង
គឺជាបង្អែករបស់ម្តាយ ក្រោយគាត់លក់ដីមួយកន្លែងប៉ុណ្ណោះ។
ក្រោយមកទៀត ក៏ល្បីថា
ពិធីការិនីរូបនេះបានបង្កាត់ភ្លើងស្នេហ៍ជាមួយលោក រតនៈ វិសិដ្ឋ
មុនពេលកាត់ផ្តាច់វិញ ដោយយោងលើមូលហេតុពិបាកដើរផ្លូវរួមគ្នា។
តែតាមអ្នកដឹងរឿង គេមើលឃើញថា ទង្វើផ្តាច់ស្នេហ៍ រតនៈ វិសិដ្ឋ
នេះ ក៏ព្រោះតែនាងមិនចង់ឲ្យកម្លោះសង្ហារូបនេះ ដែលកាលណោះ
អត់ទាន់ល្បី តោងកាលីបប៉ុណ្ណោះ។ ដូច្នេះហើយ ទើបក្រោយមក គេឃើញ
រតនៈ វិសិដ្ឋ ងាកមកស្និទ្ធស្នាលជាមួយ ឆ័យលី ដាឡែន និងថ្មីៗនេះ
ជាមួយ សាន សុម៉ាលី ទៀតទើបគេកាត់ស្មានថា ជាទង្វើបញ្ឈឺ ថន
លក្ខិណា ដែលសុខចិត្តបោះបង់រូបគេ។
ទោះជាយ៉ាងនេះក្តី
ក្នុងកម្មវិធីខួបកំណើតរបស់លោកប៉ុន្មានថ្ងៃមុននេះ ថន លក្ខិណា
ក៏មានវត្តមានដែរតាមការអញ្ជើញរបស់ម្ចាស់កម្មវិធី
ជាមួយនឹងឈុតរ៉ូបសដ៏ទាក់ទាញមួយឈុតអមដំណើរដោយនារីវ័យស្របាល
គ្នាម្នាក់ទៀត។ ប៉ុន្តែអ្វីដែលគួរឲ្យចាប់អារម្មណ៍នោះ
គឺគ្រាន់តែចុះពីលើឡានដើរបានប៉ុន្មានជំហាន នាង
ស្រាប់តែទុចង៉ក់ស្រក់ទឹកភ្នែកដោយមិនដឹងមូលហេតុទៅវិញ។
ចំណុចនេះ ធ្វើឲ្យគេសង្ស័យថា នាងប្រហែលជា
ពិបាកទប់ចិត្តខណៈឃើញ សាន សុម៉ាលី និង រតនៈ វិសិដ្ឋ កៀកកិតគ្នា
នៅចំពោះមុខបែបនេះ ព្រោះខណៈនោះ ទាំង សាន សុម៉ាលី និង រតនៈ
វិសិដ្ឋ កំពុងតែតោងដៃតោងជើងគ្នា និងរំលេចដោយពាក្យ ”អូន…បង”
យ៉ាងត្រជាក់ចិត្តផង។
សន្ទនារយៈពេលខ្លីតាមទូរស័ព្ទជាមួយ
Sabay ថន លក្ខិណា ឲ្យដឹងថា
នាងគ្មានហេតុផលអ្វីត្រូវសម្រក់ទឹកភ្នែកដោយសារប្រុសម្នាក់
ដែលនាងមិនស្រឡាញ់ឡើយ។ លក្ខិណា និយាយថា ”អត់មានអីផង…ខ្ញុំយំ
ព្រោះតែខ្ញុំមានរឿងស្មុគស្មាញផ្ទាល់ខ្លួនផ្សេងតើ!”។ ពិធីការិនី
ដែលអាចនិយាយភាសាថៃបានរូបនេះបន្តថា” ខ្ញុំមានរឿងរ៉ាវផ្ទាល់
ដែលមិនអាចប្រាប់បាន តែឥឡូវដោះស្រាយរួចហើយ ហើយបើថា
ខ្ញុំយំដោយសារគេ(រតនៈ វិសិដ្ឋ)នោះ ក៏មិនត្រូវដែរ
ព្រោះយើងគ្រាន់តែជាមិត្តនឹងគ្នាប៉ុណ្ណោះ…!”។
ថន លក្ខិណា
ទើបនឹងបានប្រឡងជាប់មធ្យមសិក្សាទុតិយភូមិ
កាលពីពាក់កណ្តាលឆ្នាំ២០១១ហើយនាងគ្រោងបន្តសិក្សាថ្នាក់
បរិញ្ញាបត្រនៅសាកលវិទ្យាល័យជាតិគ្រប់គ្រងផ្នែកធនាគារ
និងហិរញ្ញវត្ថុទៀតនៅដើមឆ្នាំ២០១២នេះ។
តែមុននឹងបង្ហាញខ្លួនក្នុងនាមជានិស្សិត នៅថ្ងៃច័ន្ទទី២៧
កុម្ភៈនេះ លក្ខិណា នឹងត្រូវបំពាក់ឯកសណ្ឋានជាផ្លូវការ
ក្នុងនាមជាសមាជិកថ្មីរបស់កាកបាទក្រហមផងដែរ
ក្រោយបានដាក់ពាក្យកាលពីខែ មិថុនា ឆ្នាំមុន៕(sabay)
