លោកចន ធាង ប្រធានសហជីពសេរីកម្មករប្រចាំរោងចក្រមេនហាតធេនបានប្រាប់ថា ការស្នើសុំរបស់ កម្មករទាំង១២ចំណុចក្នុងរយៈពេលប៉ុន្មានថ្ងៃកន្លងមកនេះ ខាងរោងចក្របានយល់ព្រមនៅត្រង់ចំណុច លេខ១ លេខ២ លេខ៣ និងលេខ៤ចំនួន៥០ភាគរយ។ រីឯចំណុចលេខ៧ លេខ៨ លេខ៩ លេខ១១ និងលេខ១២ ខាងរោងចក្រយល់ព្រមតាមសំណើ១០០ភាគរយ ប៉ុន្តែនៅចំណុចលេខ៥ លេខ៦ និង លេខ១០ ខាងរោងចក្រមិនទាន់យល់ព្រមតាមការស្នើសុំរបស់កម្មករសោះឡើយ។
ប្រភពដដែលបានថា នៅព្រឹកថ្ងៃទី២៧ ខែកុម្ភៈ ឆ្នាំ២០១២ ខាងរោងចក្របានតម្រូវកម្មករទាំងអស់ ២៥២៣នាក់ឲ្យចូលធ្វើការវិញ ប៉ុន្តែនៅពេលកម្មករមកជួបជុំគ្នា បែរជាខាងរោងចក្រអនុញ្ញាត ឲ្យកម្មករចូលធ្វើការតែ៥០០នាក់ប៉ុណ្ណោះ ដោយបានលើកហេតុផលថា ខាងរោងចក្រខ្វះចរន្តអគ្គិសនី និងអគារខ្លះនៅមិនទាន់ជួសជុលរួចរាល់។
លោកចន ធាង បានបន្តទៀតថា រហូតដល់ហូបបាយថ្ងៃត្រង់ កម្មករដែលចូលធ្វើការទាំងនោះបាន ចេញមកវិញ បន្ទាប់ពីបានឮការប្រកាសប្រាប់ពីប្រធានក្រុមកាត់ដេរថា ខាងរោងចក្រលែងយល់ព្រម តាមការស្នើសុំរបស់កម្មករទាំង១២ចំណុចនោះហើយ។
លោកចន ធាងបានបន្តថា នៅថ្ងៃស្អែកនេះ មិនដឹងយ៉ាងម៉េចទេ ពួកលោកចង់ចូលធ្វើការវិញ ប៉ុន្តែខាង រោងចក្រធ្វើយ៉ាងនេះ មានតែចាំលោកប្រធានសហជីពសេរីកម្មករជា មុន្នី ជួបចរចាជាមួយថៅកែរោង ចក្រនៅថ្ងៃពុធនៅភ្នំពេញដើម្បីរកដំណោះស្រាបបន្តទៀត ៕(nokorwat)
