លោកតាំង អតីតមន្រ្តីលេខពីររបស់ក្រុងហុងកុងដែលកាលពីសប្តាហ៍មុនបាន បង្ហាញថាជាបេក្ខជននាំមុខដែលចិនគាំទ្រនៅក្នុងការបោះឆ្នោត នៅខែក្រោយ បានជួបនូវការធ្លាក់ប្រជាប្រិយភាពរបស់លោក ជុំវិញការចោទប្រកាន់រឿងសហាយស្មន់ក្រៅអាពាហ៍ពិពាហ៍ ការខុសឆ្គងខាងពាក្យសម្តី ហើយពេលនេះមានជម្លោះ ដោយសារជម្រកក្រោមដីនៃវីឡាគ្រួសាររបស់លោកមួយថែមទៀត។
អ្វីដែលធ្វើឲ្យសាធារណជនក្តៅក្រហាយលើសពីសំណង់ក្រោមដី ដែលកាសែតជាច្រើន បានរាយការណ៍ថាមានបន្ទប់ដាក់ស្រាមួយ កន្លែងបញ្ចាំងកុនមួយ កន្លែងហាត់ប្រាណមួយ និងអាងកំដៅមួយគឺថា លោកតាំង បានទម្លាក់កំហុសការសាងសង់នេះ ទៅលើភរិយារបស់លោកវិញ។
ថ្វីបើមានការអំពាវនាវឲ្យលោកលាលែងក៏ដោយ ក៏លោក តាំង បានដាក់សុំការតែងតាំងជាផ្លូវការរបស់លោកដើម្បីជំនួសនាយក ប្រតិបត្តិដែលនឹងផុតអាណត្តិលោក ដូណាល់ សាង ពីថ្ងៃចន្ទ បន្ទាប់ពីទទួលបានការគាំទ្រការតែងតាំង៣៧៩នាក់ ពីគណៈកម្មាធិការបោះឆ្នោត ដែលមានសមាជិក១២០០នាក់។
អ្នកវិទ្យាសាស្ត្រនយោបាយនៃ សាកលវិទ្យាល័យ បាប់ទីសហុងកុង លោក ម៉ៃឃើល ដេកូលយើរបាននិយាយថាសំឡេង៣៧៩ ជាចំនួនតិចតួចគួរឲ្យអាម៉ាស់ បើនិយាយពីលោកតាំង ជា«អ្នកនាំមុខស្ទើរតែមិនមានការសង្ស័យ»រហូតដល់ថ្ងៃព្រហស្បតិ៍ សប្តាហ៍មុន។
លោក បានបន្តថា៖ «ខណៈទិន្នន័យ បង្ហាញអំពីរបៀបដែលលោក ហិនរី តាំង ធ្លាក់ចុះពីតារាងគាំទ្រហើយបើក្រុងប៉េកាំង នៅព្យាយាមដាក់លោកហិនរី តាំង នៅពេលសាធារណជនជាច្រើនគាំទ្រអ្នកផ្សេងដូចជាលោក ស៊ីវ៉ាយ លឿង វានឹងធ្វើឲ្យហុងកុងមិនអាចគ្រប់គ្រងបានទេ»៕
