Hot News: ព័ត៌មានសេដ្ឋកិច្ច

Showing posts with label ព័ត៌មានសេដ្ឋកិច្ច. Show all posts

Saturday, August 24, 2013

PTT នឹងពង្រីកស្ថានីយទ្វេដងនៅកម្ពុជា

ភ្នំពេញៈ ក្រុមហ៊ុនប្រេង និង ឧស្ម័ន PTT របស់ថៃនឹងបង្កើនចំនួនស្ថានីយប្រេងទ្វេដងនៅកម្ពុជាត្រឹមចុង ឆ្នាំ ២០១៧។
លោក ប៊ិន ម៉ៃមាលា អ្នកគ្រប់គ្រង PTT នៅកម្ពុជានិយាយថា ពេលនេះមានក្រុមហ៊ុនលក់រាយប្រេង PTT ចំនួន ១៥ កន្លែងនៅកម្ពុជារួមទាំងស្ថានីយថ្មីនឹងបើកដំណើរការ នៅខែសីហានេះ ហើយស្ថានីយប្លាទីនីមដែលបម្រើសេវាច្រើនប្រភេទគ្រោងនឹងបើក ដំណើរការនៅខែតុលា។
លោកបន្ថែមថា៖ «នេះគឺស្ថិតក្នុងរង្វង់ផែនការរយៈពេល ៥ ឆ្នាំក្នុងការពង្រីកបណ្ដាញលក់រាយកាន់តែច្រើន និងផ្ដល់ស្ថានីយប្រេងកម្រិតស្ដង់ដារខ្ពស់បំផុត ដែលមានលំដាប់ពីប្លាទីនីម ស្ដង់ដារ និងក្រោមស្ដង់ដារ»។
ស្ថានីយប្លាទីនីម អាចមានកាហ្វេ មានសេវាហិរញ្ញវត្ថុក្នុងស្រុក និងមានហាងលក់ម្ហូបអាហារ ភេសជ្ជៈបន្ថែម ជាមួយនឹងប្រេង និងសេវារបស់ក្រុមហ៊ុនលក់រាយប្រកបដោយគុណភាព។
លោក AuttapolRerkpiboon អនុប្រធានប្រតិបត្តិជាន់ខ្ពស់បានឲ្យដឹងថា ទិសដៅរបស់ PTT គឺធ្វើជាយីហោដ៏ល្បីនៅក្នុងតំបន់នៅអាស៊ីដោយមិនរាប់បញ្ចូល ការគ្របដណ្ដប់លើទីផ្សារនៅកម្ពុជានោះទេ។ លោកបានបន្តថា៖ «យើងចង់ធ្វើជាយីហោមួយក្នុងចំណោមយីហោល្បីៗជាច្រើន។ ប៉ុន្តែយើងមានបំណងតែមួយគត់គឺស្ថិតក្នុងចំណោមអ្នកដឹកនាំ កំពូលៗនៅក្នុងប្រទេសនីមួយៗ ដែលធ្វើឲ្យក្រុមហ៊ុនប្រេងក្នុងប្រទេសនីមួយៗដឹកនាំទីផ្សារនេះ»។
លោកបានលើកឡើងថា PTT គ្រោងនឹងចំណាយទឹកប្រាក់ជាង ៧៧ លានដុល្លារចន្លោះឆ្នាំ២០១៣ និងឆ្នាំ ២០១៧ ដើម្បីពង្រីកក្រុមហ៊ុនលក់រាយរបស់ខ្លួននៅតំបន់ អាស៊ាន។ ថវិកាថ្មីនេះមានចំនួន ២៤ លានដុល្លារច្រើនជាងថវិកាពីមុនចំនួន ៥៣លានដុល្លារដែលបានគ្រោងសម្រាប់ឆ្នាំ ២០១២ រហូតដល់ឆ្នាំ ២០១៦។
លោកបញ្ជាក់ថា៖ «យើងឃើញឱកាសនៅក្នុង សេដ្ឋកិច្ច និងទីផ្សារកម្ពុជាដែលខ្លួនអាចវិនិយោគនៅពេលបច្ចុប្បន្នបាន។ យើងចង់ធ្វើឲ្យរួចរាល់ផងដែរ ហើយត្រៀមខ្លួនឲ្យបានល្អសម្រាប់កំណើនអនាគតតាមរយៈសហគមន៍ សេដ្ឋកិច្ចអាស៊ាន (AEC)»។
លោកបានបន្ថែមថា ទឹកដីភ្ជាប់គ្នារវាងប្រទេសទាំងនេះនឹងដើរតួនាទីដ៏សំខាន់ខណៈ ពាណិជ្ជកម្មក្នុងតំបន់មានការកើនឡើងតាមការចាប់ផ្តើម AEC។
ក្រុមហ៊ុនរដ្ឋថៃមួយនេះមានបំណងបង្កើតស្ថានីយប្រេង ៣០០ កន្លែងនៅតាមបណ្ដាប្រទេសជិតខាងត្រឹមឆ្នាំ ២០១៧ ធៀបនឹង ១៥៥ កន្លែងនៃផែនការលើកមុនដែលបានកំណត់ត្រឹមឆ្នាំ ២០១៦ ។ បច្ចុប្បន្ន មានម៉ាស៊ីនបូមប្រេងចំនួន ៨៨ គ្រឿងទូទាំងតំបន់អាស៊ានដែលមិនរាប់បញ្ចូលប្រទេសថៃខ្លួនឯង។
ត្រឹមឆ្នាំ២០១៥ PTT ចង់បង្កើតស្ថានីយប្រេងចំនួន ៤០ នៅប្រទេសឡាវ ដោយកើនឡើងពីចំនួន ២០ កន្លែង ចំនួន១៨ កន្លែងនៅប្រទេសមីយ៉ាន់ម៉ា និង ១០៨ កន្លែងនៅហ្វីលីពីនកើនឡើង ៥៤។
ចំណូលប្រេងលក់រាយបានពីសាខាក្រៅប្រទេសកាលពីឆ្នាំ២០១២ បានកើនឡើង ១៧ ភាគរយធៀបនឹង ១,៥ លានដុល្លារកាលពីឆ្នាំ ២០១១។ ទំហំនៃការលក់ប្រេងសរុប ១,៩ពាន់លានលីត្រ កើនឡើង ៣១ ភាគរយធៀបនឹង ១,៤៤ ពាន់លានលីត្រកាលពីឆ្នាំមុន។
PTT រំពឹងថាប្រាក់ចំណូលពីការលក់រាយបានពីសាខាក្រៅប្រទេសកើនឡើង ២៨ ភាគរយ រហូតដល់ ២,៣ លានដុល្លារនៅឆ្នាំ ២០១៧ កើនពី ១,៨ លានដុល្លារកាលពីឆ្នាំមុន៕PB(POSTKHMER)

Thursday, August 8, 2013

ចម ប្រសិទ្ធ ៖ សេដ្ឋកិច្ចកម្ពុជា អាចកើន ៧,៦% បើគ្មាន ការរំជើបរំជួល ក្រោយការ បោះឆ្នោត

ភ្នំពេញ៖ រដ្ឋមន្ត្រីក្រសួងពាណិជ្ជកម្ម បានថ្លែងនៅថ្ងៃទី៨ ខែសីហា នេះថា កំណើនសេដ្ឋកិច្ចកម្ពុជា អាចនឹងកើនឡើងចំនួន ៧,៦ភាគរយនៅ ឆ្នាំ២០១៣ ប្រសិនបើគ្មានបញ្ហាកើនឡើង នៅក្រោយការ បោះឆ្នោតជ្រើសតាំង តំណាងរាស្ត្រអាណត្តិទី៥ នេះ។
លោកទេសរដ្ឋមន្រ្តី ចម ប្រសិទ្ធ រដ្ឋមន្ត្រីក្រសួងពាណិជ្ជកម្ម បានមានប្រសាសន៍ កាលពីព្រឹកថ្ងៃ ព្រហស្បតិ៍ ទី០៨ ខែសីហា ឆ្នាំ២០១៣ ក្នុងពិព័រណ៍ឧស្សាហកម្ម គ្រឿងយន្តកម្ពុជា-អន្តរជាតិ និង ពិព័រណ៍ ឧស្សាហ កម្មកាត់ដេរ និងវាយនភណ្ឌ កម្ពុជា-អន្តរជាតិ នាមជ្ឈមណ្ឌលកោះពេជ្រ ថា «សេដ្ឋកិច្ចកម្ពុជា កំពុង បន្តទទួលបាន នូវកំណើនដ៏ខ្ពស់ ក្នុងឆ្នាំ២០១២ គឺ ៧.៦ភាគរយ និងត្រូវ បានគេរំពឹងថា នឹងកើន ឡើងចំនួន ប្រហាក់ប្រហែលនៅឆ្នាំ២០១៣នេះ បើសិនគ្មានការរំជើបរំជួល ក្រោយការបោះឆ្នោត»។
លោកបានមានប្រសាសន៍បន្តថា ការកើន ឡើងនេះ មិនមែនគ្រាន់តែជាលទ្ធផល នៃការកើនឡើង នូវតម្រូវការ របស់បរទេសប៉ុណ្ណោះទេ តែវា ក៏ជាការបង្ហាញឲ្យឃើញ ពីសក្តានុពលដ៏ធំធេង និង ឱកាសធុរកិច្ច ដ៏សម្បូរបែប នៅកម្ពុជាផងដែរ។
លោក បានបន្ថែមទៀតថា ការវិនិយោគដោយផ្ទាល់ ពីបរទេស មកកម្ពុជា កើនឡើង៧០ភាគរយ នៅឆ្នាំ ២០១២ ដែលមានទឹកប្រាក់ប្រមាណជា ១,៥កោដិដុល្លារអាមេរិក ហើយបានបង្កើតការងារ យ៉ាង សន្ធឹកសន្ធាប់ឲ្យយុវជនខ្មែរ ហើយការធ្វើវិសោធន៍កម្ម លើសកម្មភាពសេដ្ឋកិច្ច និងជំរុញការ នាំចេញ ដើម្បីសម្រេចឲ្យបាន នូវកំណើនសេដ្ឋកិច្ចដ៏ខ្ពស់មួយ ប្រកបដោយចីរភាព និងផលិតផល ដែលមាន តម្លៃបន្ថែម។
លោក បានបន្ថែមទៀតថា «នៅក្នុងដំណើរការអភិវឌ្ឍន៍នេះ វិស័យពាណិជ្ជកម្ម ទេសចរណ៍ កសិកម្ម ជាពិសេសវិស័យឧស្សាហ៍កម្ម ត្រូវបានចាត់ទុកថា ជាក្បាលម៉ាស៊ីនសំខាន់ ហើយ សហគ្រាសមធ្យម និងធុនតូច បានដើរតួនាទីយ៉ាងសំខាន់ ក្នុងការបង្កើតការងារសមធម៌ និង ប្រសិទ្ធភាព ដើម្បីទាញយកផលប្រយោជន៍ ពីសក្តានុពលនានា ដែលកម្ពុជាកំពុងបានឆ្ពោះ ទៅរក ការធ្វើពាណិជ្ជកម្មសេរី និងការធ្វើសមាហរណកម្មសេដ្ឋកិច្ច ទៅក្នុងតំបន់ និងពិភពលោក»។
គួរបញ្ជាក់ថា ការតាំងពិព័រណ៍នេះ មានដូចជា សម្លៀកបំពាក់ និងវាយនភណ្ឌ, កសិកម្ម, ក្រណាត់ និងផលិតផលបន្ទាប់បន្សំ, ប្លាស្ទីក និងកៅស៊ូ, កញ្ចប់វេចខ្ចប់ និងការបោះពុម្ព, ការកែច្នៃម្ហូបអាហារ, គ្រឿងស្វ័យប្រវត្តិ និងការងារលោហៈ, ឧបករណ៍ និងគ្រឿងរឹង, គ្រឿងបន្លាស់ និងឧបសាធនគ្រឿង យន្ត៕(DAPNEWS)

Wednesday, January 16, 2013

ទីផ្សារបន្លែ ផ្លែឈើ ចំណីអាហារសរីរាង្គកំពុងតែមានសន្ទុះនៅកម្ពុជា

ការយល់ដឹងផ្នែកសុខភាពខ្ពស់បានធ្វើឲ្យតម្រូវការផ្នែកចំណីអាហារសរីរាង្គមានការកើនឡើងខ្លាំង។

ធីតា វីន

14 មករា 2013

ភ្នំពេញ

ទីផ្សារបន្លែ ផ្លែឈើ ចំណីអាហារសរីរាង្គកំពុងតែមានសន្ទុះ ទទួលបានការគាំទ្រជាខ្លាំងពីអតិថិជនក្នុងរយៈពេលប៉ុន្មានឆ្នាំចុង ក្រោយនេះ បើទោះបីជាចំណីអាហារទាំងនោះនៅមិនទាន់មានការបញ្ជាក់ ឬទទួលស្គាល់ជាផ្លូវការពីក្រុមអ្នកជំនាញក៏ដោយ។

បន្លែ ផ្លែឈើសរីរាង្គគឺជាបន្លែផ្លែឈើដាំដុះដោយប្រើជីរធម្មជាតិដែល ផ្សំពីលាមកសត្វ ឬក៏កម្ទេចកម្ទីឈើ ឬស្លឹកឈើជាដើម ដោយជៀសវាងការប្រើប្រាស់ថ្នាំពុលកសិកម្មដែលអាចធ្វើឲ្យប៉ះពាល់ ដល់សុខភាព។

លោកគាម មករាឌី នាយកកម្មវិធីបរិស្ថាន និងសុខភាពនៃមជ្ឈមណ្ឌលសិក្សា និងអភិវឌ្ឍកសិកម្មកម្ពុជា ហៅកាត់ថា សេដាក បានឲ្យដឹងថា រហូតមកដល់ពេលនេះអង្គការសេដាកមានផ្សារលក់ចំណីអាហារសរីរាង្គចំនួន ៨នៅទីក្រុងភ្នំពេញ ដោយមានបន្លែ ផ្លែឈើ និងផលិតផលសរីរាង្គសរុបទាំងអស់ប្រមាណជាង៤០មុខ។

លោកបានឲ្យដឹងបន្ថែមថា ការយល់ដឹងផ្នែកសុខភាពខ្ពស់បានធ្វើឲ្យតម្រូវការផ្នែកចំណីអាហារ សរីរាង្គមានការកើនឡើងខ្លាំងដែលជាមធ្យមយ៉ាងហោចណាស់ក្នុង១ខែ ត្រូវការបន្លែ ផ្លែឈើប្រមាណជា៥០តោនសម្រាប់ផ្គត់ផ្គង់ទីផ្សារក្នុងទីក្រុង ភ្នំពេញ។

«មានការយល់ដឹងច្រើនពីគ្រោះថ្នាក់នៃបន្លែប្រើប្រាស់នូវសារ ធាតុគីមី ថ្នាំពុល ធ្វើឲ្យអតិថិជននៅទីក្រុងភ្នំពេញគឺគាត់ជួបប្រទេះនូវគ្រោះពុលជា ញឹកញយ ហើយដល់អញ្ចឹង គាត់រកបន្លែដែលមិនប្រើប្រាស់នូវសារធាតុគីមី។ ឃើញថា និន្នាការស្វែងរកបន្លែសរីរាង្គ ផលិតផលសរីរាង្គគឺកំពុងតែមានការរីករាលដាលពី១ឆ្នាំទៅ១ឆ្នាំ»។

លោកគាម មករាឌីបានឲ្យដឹងបន្តថា ផ្សារអង្គការសេដាកបានបង្កើតឡើងតាំងពីឆ្នាំ២០០៤ ក៏ប៉ុន្តែទទួលបានការគាំទ្រខ្លាំងនៅឆ្នាំ២០១២ ហើយនៅអំឡុងពេលនេះ បន្លែប្រមាណជា២០មុខដែលមានទម្ងន់ប្រមាណជា១០តោនក្នុង១ខែ ត្រូវបានដាក់លក់នៅលើផ្សារសេដាក។

លោកនាក់ ថារ៉ែន នាយកគ្រប់គ្រងហាងសួនធម្មជាតិ ដែលជាងហាងមួយមានការដាំបន្លែ ផ្លែឈើសរីរាង្គ ដោយខ្លួនឯងខ្លះ និងប្រមូលទិញពីអង្គការផ្សេងៗ បានឲ្យដឹងថា ក្នុង១ថ្ងៃគាត់លក់បន្លែសរីរាង្គទាំងនៅក្នុងហាងផ្ទាល់និងតាម ភោជនីយដ្ឋាននានាក្នុងទីក្រុងភ្នំពេញអស់ប្រមាណជា១,៥តោនដែលសន្ទុះ នេះមានការកើនឡើងទ្វេរដង បើប្រៀបធៀបទៅនឹងឆ្នាំកន្លងទៅ។

លោកបានឲ្យដឹងបន្ថែមថា នៅក្នុងហាងសួនធម្មជាតិមានលក់បន្លែប្រមាណជាង៤០មុខ និងមានចំណីអាហារសរីរាង្គផ្សេងៗទៀតប្រមាណជា៣០០មុខ ដូចជាស្រា អង្ករ ទឹកត្រី ទឹកស៊ីអ៊ីវជាដើម។

«នៅពេលដែលយើងបើកមុនដំបូង នៅមិនទាន់មានគេដឹងទេ ហើយអ្នកដឹង១ចំនួនក៏មិនសូវមានការទុកចិត្តថា យើងបានធ្វើពិតប្រាកដថា គ្មានជាតិគីមីអញ្ចឹងដែរអត់។ មកដល់ពេលបច្ចុប្បន្ននេះ យើងឃើញថា សន្ទុះនៃការទទួលស្គាល់ ការទុកចិត្តគឺមានកំណើនកើនច្រើនពី១ឆ្នាំទៅ១

ឆ្នាំ។ អតិថិជនបច្ចុប្បន្នមានការយល់ដឹង ពីព្រោះជំងឺបច្ចុប្បន្នគឺវាកើតឡើងច្រើនពីប្រភពនៃការទទួលទាន ដល់អញ្ចឹងទៅ អតិថិជនងាកមករកផលិតផលណាមួយ ដែលគាត់ពិសារទៅ វាអាចធានាបានថា វាមិនប៉ះពាល់ដល់សុខភាពរបស់គាត់»។

លោកគង់ តារា ដែលជាបុគ្គលិកនៃធនាគារមួយក្នុងទីក្រុងភ្នំពេញដែលកំពុងដើរទិញ បន្លែនៅក្នុងហាងសួនធម្មជាតិ បានឲ្យដឹងថា គាត់ទិញបន្លែសរីរាង្គនេះអស់រយៈ៧ឆ្នាំកន្លងមកហើយ ក៏ប៉ុន្តែគាត់នៅតែមិនទាន់ទុកចិត្តទាំងស្រុងពីគុណភាពចំណីអាហារ សរីរាង្គនេះនៅឡើយទេ។

«នៅចំណុចនេះ ខ្ញុំអត់ទាន់បានជឿទុកចិត្តច្រើនទេ ពីព្រោះយើងថា បន្លែអត់មានសារជាតិគីមី ក៏ប៉ុន្តែយើងអត់មានអីបង្ហាញអតិថិជនទេ។ អញ្ចឹងយើងពិបាកជឿដែរ ក៏ប៉ុន្តែគ្រាន់តែថា យើងឧស្សាហ៍ប្រើនៅទីនេះ។ យើងញុំទៅ យើងប្រៀបធៀប វាខុសគ្នា។ អញ្ចឹងយើងព្យាយាមប្រើ តែបើឲ្យយើងជឿទុកចិត្ត១០០ភាគរយ យើងនៅអត់ទាន់ជឿទេ ពីព្រោះគាត់អត់មានបន្សល់អីឲ្យអតិថិជនមើលផង»។

ជាមួយគ្នានេះដែរ លោកសាំង លាភ ជាពាណិករម្នាក់ដែលកំពុងទិញបន្លែសរីរាង្គនៅអង្គការសេដាកក៏បាន ឲ្យដឹងដែរថា ទោះបីជាបន្លែនៅទីនេះមានតម្លៃខ្ពស់ជាងទីផ្សារបន្តិចមែន តែដើម្បីសុខភាពគឺពិតជាមិនមានបញ្ហានោះទេ។

លោកបានបញ្ជាក់ថា បើមិនចាំបាច់ លោកកម្រទិញណាស់បន្លែនៅលើទីផ្សារទូទៅ ពីព្រោះលោកគិតថា វាមានជាតិគីមីច្រើន ដែលធ្វើឲ្យប៉ះពាល់ជាខ្លាំងដល់សុខភាព។

«នេះជាផលិតផលមួយដែលអាចជឿទុកចិត្តបានពី៨០ទៅ៩០ភាគរយ។

បន្លែទាំងអស់នេះឃើញមានពណ៌មិនដូចបន្លែនៅលើទីផ្សារ ដែលខៀវខ្ចីនោះទេគឺខុសគ្នា។ ខ្ញុំភាគច្រើនគឺ៨០ភាគរយគឺខ្ញុំទិញបន្លែនៅខាងនេះលុះត្រាអត់មាន ទើបទិញបន្លែនៅផ្សារ»។

យ៉ាងហោចណាស់នៅក្នុងប្រទេសកម្ពុជាមានអង្គការនិងក្រុមអ្នកលក់ផលិត ផលសរីរាង្គឯកជនប្រមាណជា១០ក្រុមផ្សេងគ្នា។ ហើយផលិតផលទាំងនោះភាគច្រើនចែកចាយនៅក្នុងទីក្រុងភ្នំពេញ ដូចជានៅតាមភោជនីយដ្ឋានមួយចំនួន និងតាមហាង ឬផ្សារដែលបើកបម្រើលក់សម្រាប់តែចំណីអាហារសរីរាង្គនេះ។ ផលិតផលសរីរាង្គនេះមិនមានលក់នៅតាមផ្សារធម្មតា ដែលមានជាមួយ និងបន្លែដែលប្រើជាតិគីមីនោះទេ។

លោកបណ្ឌិតគៀន សុភា ជាអនុប្រធាននៃអគ្គនាយកដ្ឋានសាកវេប្បកម្ម និងដំណាំរួមផ្សំនៃអគ្គនាយកដ្ឋានកសិកម្ម បានមានប្រសាសន៍ថា ទោះបីជាចំណីសរីរាង្គដែលបានដាក់លក់នោះនៅមិនទាន់បានឆ្លើយតបទៅតាម ស្តង់ដារក៏ដោយ ក៏ចំណីអាហារទាំងនោះមានលក្ខណៈល្អប្រសើរជាងបន្លែផ្លែឈើនៅលើ ទីផ្សារធម្មតាដែរ។

លោកបានឲ្យដឹងបន្ថែមថា ខាងក្រសួងកំពុងរៀបចំច្បាប់ដើម្បីគ្រប់គ្រងចំណីអាហារសរីរាង្គនេះឲ្យស្របទៅតាមស្តង់ដារ។

«វិស័យឯកជនគេធ្វើទៅតាមតម្រូវការទីផ្សារ ក៏ប៉ុន្តែបើសិនជាយើងនិយាយប្រកាសថា ជាផលិតផលសរីរាង្គ យើងពុំទាន់ទទួលស្គាល់ជាផ្លូវការនៅឡើយទេ។ យើងជឿជាក់ថា ប្រសិនជាគេប្រកាសអំពីផលិតផលសរីរាង្គ ខ្ញុំជឿថា គេក៏មានការប្រិតប្រៀងដែរអំពីបញ្ហាប្រើប្រាស់នូវសារធាតុគីមី។ ហើយយើងនៅពុំទាន់មានអង្គភាពណាមួយដែលចុះទៅត្រួតពិនិត្យថា តើវិធីសាស្ត្រក្នុងការដាំដុះរបស់គាត់នោះប្រព្រឹត្តទៅតាមគោលការណ៍ សរីរាង្គដែលឬអត់។ បច្ចុប្បន្ននេះទីផ្សារសរីរាង្គហ្នឹងកំពុងពេញនិយមសម្រាប់ប្រជាជន យើង»។

យោងតាមលទ្ធផលស្រាវជ្រាវរបស់លោកស្រីបណ្ឌិតចេក សុថា ប្រធានផ្នែកគីមី និងចំណីអាហារវិទ្យាស្ថានវិទ្យាសាស្ត្រនិងបច្ចេកវិទ្យារាជបណ្ឌិត សភាកម្ពុជា ដែលសិក្សាស្តីពីវត្តមាននៃសារធាតុគីមី ដែលមានគ្រោះថ្នាក់ក្នុងម្ហូបអាហារ បានបង្ហាញឲ្យដឹងថា សារធាតុគីមីមួយចំនួនដែលមានការ ប៉ះពាល់ជាខ្លាំងដល់សុខភាព បានមានវត្តមាននៅលើម្ហូបចំណីអាហារបន្លែមួយចំនួនដែលកំពុងចររាចនៅ លើទីផ្សារ រួមមានដូចជា៖ សារធាតុគីមីប័រ៉ាក់ ឬហៅថាទឹកអន្សា សារធាតុគីមីហ្វ័រម៉ាលីន សារធាតុគីមីអាស៊ីតសាលីស៊ីលីក សារធាតុគីមីសូដ្យូមអ៊ីដ្រូស៊ុលហ្វីត ឬហៅថា ម្សៅស។

សារធាតុទាំងនោះបង្កគ្រោះថា្នក់ ដូចជាខូចតម្រងនោម ក្រលៀន ឈឺក្បាល រមាស់ស្បែក រលាកប្រដាប់រំលាយអាហារ ក្រពះ ពោះវៀន ក្អួត វិលមុខ ក្តៅខ្លួន រាគ កន្ទួលលើស្បែក សន្លប់ ស្លាប់ និងបង្កឲ្យមានជំងឺមហារីកមួយចំនួនជាដើម។

លោកស្រីបណ្ឌិតចេក សុថាបានឲ្យដឹងទៀតថា ដោយសារអំឡុងពេលនេះ ប្រជាពលរដ្ឋមួយចំនួនកំពុងប្រឈមមុខនឹងបញ្ហាជំងឺមួយចំនួន ជាពិសេសគឺជំងឺមហារីកជាដើមដែលបណ្តាលមកពីចំណីអាហារដែលមានជាតិពុល កសិកម្ម។

ហេតុដូច្នេះ លោកស្រីបានបញ្ជាក់ថា កត្តានេះជាដើមហេតុចម្បងក្នុងការជំរុញឲ្យប្រជាពលរដ្ឋភាគច្រើន ស្វែងរកចំណីអាហារសរីរាង្គ ក៏ប៉ុន្តែចំណីអាហារសរីរាង្គដែលកំពុងចររាចនៅលើទីផ្សារនោះនៅមិន ទាន់មានការសិក្សាស្រាវជ្រាវណាមួយបញ្ជាក់ពីគុណភាពរបស់វានៅឡើយ។

«វាមិនទាន់មានការសិក្សាណាដែលរកឃើញថា បន្លែដែលយកមកនោះអត់មានថ្នាំទេ ពីព្រោះអត់ទាន់មានការវិភាគទៅលើបន្លែដែលគេដាំហ្នឹង។ជាការល្អ ហើយដែលប្រជាពលរដ្ឋយល់ដឹង។ គាត់ចង់បានបន្លែសរីរាង្គមែន ក៏ប៉ុន្តែមិនដឹងថា អ្នកដាំគាត់ទទួលខុសត្រូវថា បន្លែអត់ថ្នាំពុលដែរ ឬអត់។ សំខាន់គឺគាត់អ្នកដាំ ក៏ប៉ុន្តែវាអត់មានអីបញ្ជាក់»។

ទោះបីជាយ៉ាងណាក៏ដោយ ក្រុមអ្នកផលិតចំណីអាហារសរីរាង្គសុទ្ធតែបានអះអាងដូចៗគ្នាថា ផលិតផលសរីរាង្គដែលបានដាក់លក់នៅលើទីផ្សារនេះសុទ្ធតែបានធ្វើការ ដាំដុះ ថែទាំ និងរក្សាទុកយ៉ាងត្រឹមត្រូវទៅតាមស្តង់ដារចំណីអាហារសរីរាង្គ បើទោះបីជាមិនទាន់មានការចុះត្រួតពិនិត្យពីក្រុមអ្នកជំនាញនៃ ក្រសួងកសិកម្មក៏ដោយ៕(VOA)

Thursday, January 10, 2013

Samsung បង្ហាញ Evolution Kit ក្នុងពិព័រណ៍ CES 2013 បន្ថែមលើ ការអភិវឌ្ឍថ្មី នៃSmart TV

ក្រុមហ៊ុន អេឡិចត្រូនិក Samsung បានចូលរួមតាំងបង្ហាញ ឧបករណ៍ Evolution Kit របស់ខ្លួន ក្នុងពិព័រណ៍ អេឡិចត្រូនិកអន្តរជាតិ (CES) 2013 ដែលប្រារព្ធឡើងពីថ្ងៃទី ៨-១១ ខែមករា ឆ្នាំ២០១៣ ដើម្បីបង្ហាញពីភាពច្នៃប្រឌិត របស់ខ្លួន ជូនដល់សាធារណជន ។
Evolution Kit ត្រូវបានតាំងបង្ហាញជាលើកដំបូង នៅពិព័រណ៍CES 2012ម្តងរួចមកហើយ ដែលជាជំហាន នៃការច្នៃប្រឌិតមួយ ជួយឲ្យទូរទស្សន៍ Samsung Smart TV 2012 អភិវឌ្ឍ ទៅជាទូរទស្សន៍ Samsung Smart TV 2013 ។
ការបន្ថែមឧបករណ៍ Evolution Kit នៅ ខាងក្រោយទូរទស្សន៍ Samsung Smart TV បានធ្វើឲ្យ អតិថិជនអាចរីករាយ នឹងលក្ខណៈថ្មីៗ ដែលទូរទស្សន៍ Smart TV 2013 មាន។
ជាមួយការកែប្រែថ្មី ទៅលើ Hardware ដូចជា CPU, Memory និង GPU ឡើងដល់កម្រិតនៃ ទូរទស្សន៍Smart TV ចុងក្រោយ អ្នកប្រើអាចរីករាយ នឹងល្បឿនដ៏លឿននៃការឆែកអ៊ីនធឺណិត និងមុខងារការងារច្រើន ដោយអាចប្រើកម្មវិធីបាន ក្នុងខណៈពេលកំពុងទស្សនាទូរទស្សន៍។
បន្ថែមលើនេះ លក្ខណៈពិសេសនៃ Smart Interaction របស់ Samsung ដូចជា Voice Control និងMotion Control ក៏នឹងត្រូវបានកែប្រែថ្មីផងដែរ។ នៅពេលឧបករណ៍ Evolution Kit ដោត ភ្ជាប់ទៅទូរទស្សន៍ Smart Hub2012 នឹងប្រែទៅជា 2013 ភ្លាម ។ រាល់ឆ្នាំ អតិថិជននឹងអាចរីករាយ ជាមួយសេវាថ្មីៗជានិច្ចពីSmart TVរបស់ Samsung។ រូបរាងពិតប្រាកដ នៃឧបករណ៍ Evolution Kit គឺត្រូវបានតាំងបង្ហាញមុនគេ នៅពិព័រណ៍ CES 2013។ Samsung នឹងបង្ហាញនូវការផ្លាស់ប្តូរដ៏អស្ចារ្យ ដែលអាចភ្ជាប់នឹងទូរទស្សន៍បាន ហើយSmart Hub 2013 ស៊េរីថ្មី អាចបង្ហាញផ្ទៃនៃកម្មវិធី បានចំនួនប្រាំផ្ទាំងផ្សេងគ្នា នៅលើអេក្រង់តែមួយ ដែលអាចឲ្យអតិថិជនរីករាយ នឹងកម្មវិធីជាច្រើន រួមទាំងកម្មវិធី Live TV, VODs, កម្មវិធីថ្មីៗ និងអ៊ីនធឺណិត។
លោក Sunny Lee ប្រធានប្រតិបត្តិផ្នែកទីផ្សារ និងផ្នែកលក់អេក្រង់រូបភាព នៃក្រុមហ៊ុន អេឡិចត្រូនិក Samsung បានឲ្យដឹងថា "Evolution Kit បានបើកទំព័រ សករាជថ្មី នៃទូរទស្សន៍ Smart TV និងបំពេញបន្ថែមនូវលក្ខណៈដ៏ពិតប្រាកដ នៃទូរទស្សន៍ Smart TV ជាមួយការច្នៃប្រឌិត របស់ខ្លួន ដែលស័ក្តិសមទៅនឹង និន្នាការនៃការផ្លាស់ប្តូរលើវិស័យ ព័ត៌មានវិទ្យា IT ។ អតិថិជនទាំងអស់អាចរីករាយ ជាមួយលក្ខណៈពិសេសៗ និងសេវាថ្មីៗ ជារៀងរាល់ឆ្នាំ ដោយមិនចាំបាច់ទិញទូរទស្សន៍ថ្មី។ អតិថិជន Samsung Smart TV នឹងរីករាយ ក្នុងការទស្សនា ទូរទស្សន៍គ្មានដែនកំណត់ជាមួយ Evolution Kit"៕

Monday, December 3, 2012

មុខរបរលក់អាវជជុះ ធ្វើឲ្យមានជីវភាពធូរធារ

មុខរបរលក់អាវជជុះ ធ្វើឲ្យមានជីវភាពធូរធារ

ភ្នំពេញ: អាវជជុះបានក្លាយទៅជាមុខរបរមួយ ដែលនាំឲ្យមានជីវភាពធូរធាសមរម្យ។ មិនតែប៉ុណ្ណោះបានជួយសម្រួលដល់អ្នកពាក់ ដែលគ្មានប្រាក់ទិញសម្លៀកបំពាក់ថ្មីៗនឹងគេ។ ណាមួយវិញ សម្រាប់អ្នកគាំទ្រប្រើអាវជជុះនៅតែបន្តពាក់ដដែលព្រោះគេយល់ថាវា មានតម្លៃធូរថ្លៃអាចទិញបាន និងមានគុណភាពល្អទៀតផង។ រីឯអ្នកលក់វិញកាន់តែបានពង្រីកសាខាកាន់តែច្រើនរហូតដល់១១សាខា ទាំងអស់ មានដូចជានៅ ផ្សារនាគមាស, ជិតសាលាស៊ីសុវត្ថី(ផ្លូវត្រសក់ផ្អែម), ផ្សារកណ្តាល, ក្បាលថ្នល់ (ជិតហ្គារ៉ាសសាំងសូគីមិច), ជិតពេទ្យចិន, ជិតផ្សារដេប៉ូ, ផ្លូវកម្ពុជាក្រោម, ផ្លូវទេពផន (ជិតស្តុប) , ជិតពេទ្យលោកសង្ឃ, ផ្លូវ៣១០ និងនៅផ្សារទួលទំពួង។

បុរសម្នាក់កំពុងឈរ សំឡឹងមើលទៅកាន់អាវមួយ ដែលមានកអត់ក្បាល និងមានដៃអត់មានម្រាម ហើយដៃគាត់មួយចំហៀងកាន់ស្នា ឯមួយចំហៀងទៀតបានកាន់ចុងដៃ ហើយបានសួរទៅកាន់ ម្ចាស់របស់នោះថា “បងអានេះតម្លៃប៉ុន្មាន?” រំពេចនោះក៏មានសំឡេងតបមកវិញថា “អាវហ្នឹងតម្លៃ៣,៥ដុល្លារ”។ នេះជាសំឡេងសន្ទនារបស់វាងអ្នកលក់អាវជជុះលេខ១ និងភ្ញៀវ ដែលបានមកទិញ។

លោក មាស គុម្ភៈ ជាម្ចាស់ហាងលក់អាវជជុះ ដែលមានស្លាកយីហោថា “អាវប្រុសជជុះលេខ១” មួយកន្លែងនៅតាមបណ្តោយផ្លូវ ទេពផន ក្នុងសង្កាត់ទឹកល្អក់ទី៣ ដែលរូបលោកចាប់អាជីពនេះមកមានរយៈពេល ជិត៥ឆ្នាំមកហើយនោះ បានឲ្យដឹងថា ការបើកលក់ចាប់ពីម៉ោង ៨ ព្រឹក ដល់៨និង៣០យប់។ រីឯមូលហេតុ ដែលនាំឲ្យមានមុខរបរនេះឡើងគឺជាការបន្តយករបរនេះពីម្តាយរបស់គាត់ និងបានរកចំណួលចូលគ្រួសារបានសមរម្យ។

លោក មាស គុម្ភៈ បាននិយាយថា “ដំបូងឡើយជាគំនិតរបស់ប្អូនស្រីខ្ញុំម្នាក់ឈ្មោះកញ្ញា។ ហើយម៉ាក់របស់ខ្ញុំយក(អាវ)មកច្រើន ពិបាករកអ្នកប៉ាវក្បាលគីប។ ហើយក៏មានគំនិតចង់បើកលក់ដែរ ក៏ចាប់ផ្តើមធ្វើហាងដាក់អាវព្យួរលក់ទៅ។ ហើយវាបានរកប្រាក់ចំណូលបានគួរសមដែរ”។

លោក មាស គុម្ភៈ បានបន្តថា “របរមួយនេះ (លក់អាវជជុះ) ត្រូវបានម្តាយរបស់ខ្ញុំរកស៊ីមកជាង១៦ ទៅ១៧ឆ្នាំមកហើយ អ៊ីចឹងខ្ញុំក៏បន្តលក់ទៅ”។

គុម្ភ:មិនអាចប្រាប់ពីចំណូល មួយថ្ងៃបានប៉ុន្មានទេ ព្រោះវាជារឿងផ្ទាល់ខ្លួន ។ ចំពោះមួយថ្ងៃលក់បានពី៣០ ទៅ៧០អាវជាមធ្យម ក្នុងមួយថ្ងៃ”។

ម្ចាស់ហាងលក់អាវជជុះវ័យក្មេង ខាងលើនេះ បានប្រាប់ឲ្យបានដឹងបន្តថា “តម្លៃអាវមានចាប់ពី៣,៥ដុល្លារ ដល់១២ដុល្លារ។ អាវ៣,៥ដុល្លារគឺជាអាវឆ្នូតសម្រាប់មនុស្សចំណាស់ៗ ដែលអាចពាក់ទៅធ្វើការ ឬទៅញ៉ាំការបានព្រោះវាស្អាត នៅថ្មីដែរពេលខ្លះ។ បើអាវតម្លៃចាប់ពី៤ដុល្លារឡើងនោះគឺសម្រាប់ស្ទាវៗ មានរឹបរាង មានម៉ូដ-ម៉ាក តម្លៃទៅតាមហ្នឹង”។

ចំពោះ សាខាទាំងអស់ ក៏ដូចជាហាងរបស់លោក កន្លងគាត់មានលក់តែអាវសម្រាប់បុរសៗទេ ហើយម្ចាស់ហាងដដែលបាននិយាយថា “ពីដើមមកគឺម៉ាក់របស់ខ្ញុំទម្លាប់លក់តែអាវប្រុសសុទ្ធ ហើយកាក់កបជាមួយអាវប្រុសជាងអាវស្រី។ មនុស្សប្រុសមិនសូវជាសាំញ៉ាំ រឿងតថ្លៃផង ហើយអ្នកទិញភាគច្រើនបានដឹងតម្លៃរួចហើយ និងលក់អត់កាត់ថ្លៃផង តែមានអ្នកខ្លះតថ្លៃដែរ ព្រោះចង់ឲ្យចុះថ្លៃ”។

ម្ចាស់ហាងលក់អាវជជុះ និយាយបន្តទៀតថា “ឥវ៉ាន់ទាំងអស់នេះភាគច្រើនកុម្ម៉ង់ផ្ទាល់តែម្តង ដោយនាំចូលពីប្រទេសជប៉ុន កូរ៉េ ចិន ជាពិសេសគឺពីប្រទេសកូរ៉េ។ ឯការនាំចូលម្តងៗក្នុងមួយខែគឺច្រើនគីបណាស់។ ខ្ញុំអត់អាចប្រាប់បានទេ ទាល់តែម៉ាក់ខ្ញុំបានគាត់ដឹង។ តម្លៃក្នុងមួយគីបតាមខ្ញុំដឹងចាប់ពី៣០០ ដល់៤៨០ដុល្លារជាង។ ក្នុងមួយគីបៗអាចមានចំនួនជាង៤០០អាវ ឬ៤២០អាវពេលខ្លះ។ នៅពេលខ្លះខ្ញុំគាស់គីបហ្នឹងមកមានអាវថ្មីក្នុងហ្នឹងដែរគឺ ភាគច្រើនជាអាវឡូត៍ (អាចផុតកំណត់នៅស្រុកគេ ហើយមានទាំងស្លាកសម្គាល់ថាថ្មីតែម្តង)”។

ម្ចាស់ហាងអាវ ជជុះ បានបន្ថែមថា លោកគាស់គីបថ្មីៗសម្រាប់ដាក់លក់ជារៀងរាល់ថ្ងៃចំពោះថ្ងៃលក់ដាច់ ខ្លាំង ករណីលក់ពុំសូវដាច់ទេគឺពី២ ទៅ៣ថ្ងៃទើបមានគាស់គីបថ្មីម្តងៗ។ លោក ពន្យល់ថា ប្រសិនណាបើមិនកោះគីបថ្មីទេ អ្នកទិញមិនអាចទិញឥវ៉ាន់បានទេ។ ម្យ៉ាងទៀត នាំឲ្យបាត់បង់អតិថិជន ហើយពួកគាត់ត្រូវការម៉ូដថ្មីៗដែរពេលខ្លះ ដូច្នេះលោកត្រូវតែគាស់គីបថ្មីរាល់ថ្ងៃផងដែរពេលខ្លះ។

ម្ចាស់ហាងអាវជជុះ បានបញ្ជាក់ថា មានការបញ្ចុះតម្លៃជូនខ្លះៗដែរ តែមិនច្រើនទេ ដោយសារការលក់នោះមិនសូវជាចំណេញច្រើនប៉ុន្មានដែរ។ នៅពេលខ្លះមានភ្ញៀវទិញច្រើនៗ ហើយយកទៅលក់បន្តទៀត អ្នកខ្លះលក់នៅតាមស្រុក តាមខេត្ត តាមផ្ទះរបស់គេក៏មាន។

លោក មាស គុម្ភៈបានបញ្ចប់ថា “សម្រាប់ការលក់អាវជជុះនេះគឺមិនដែលមានសល់ទេ។ នៅពេលដាក់លក់ទៅចេះតែអស់ទៅៗ។ ណាមួយយើងមើលទៅតាមអាវដែរពេលខ្លះអាវនៅច្រើន ខ្ញុំបន្ថយការនាំចូលសិន ហើយមើលទៅរាងរលាស់បន្តិចហើយបានដាក់មកថ្មីទៀត”។

ចំណែក អតិថិជន ដែលនិយមគាំទ្រប្រើប្រាស់អាវជជុះនោះ បានទទួលស្គាល់ថា ពិតជាមានអាវខ្លះល្អស្អាត មានគុណភាពខ្ពស់ និងមានតម្លៃធូរថ្លៃចំណាយប្រាក់តិចអាចទិញបានរបស់ច្រើន។

លោក ឈន់ហ៊ីម ជាបុគ្គលិកអង្គការមិនមែនរដ្ឋាភិបាល និងជាម៉ូយប្រចាំហាងអាវជជុះលេខមួយនោះ បានឲ្យដឹងថា “មានអី! តម្លៃធូរថ្លៃសមរម្យ ចំណាយលុយតិចអាចទិញបានច្រើន ហើយពេលខ្លះអាចពាក់ទៅញ៉ាំការគេម្តងម្កាលដែរ។ ជជុះមិនជជុះពាក់ទៅដូចតែគ្នា គ្មានអ្នកណាមកសួរទេ”។

រីឯ យុវជន វុត្ថា ជានិស្សិតមួយរូប បានមកទិញអាវជជុះជាមួយមិត្តភក្តិ នាំមកនោះ បាននិយាយថា “ខ្ញុំអត់ដែលពាក់អាវជជុះទេ តែឡូវសាកមើលម្តង។ ព្រោះឃើញគេពាក់មើលទៅស្អាត និងមានគុណភាពគួរសម”៕(CEN)

Monday, November 12, 2012

ចំណូលពន្ធកើនតែអ្នករិះគន់ថានៅទាប

បុគ្គលិកក្រុម ហ៊ុនមួយកំពុងរាប់លុយ។ ការប្រមូលពន្ធរបស់កម្ពុជាក្នុងរយៈពេល១០ខែកើនឡើង៣១ភាគរយ។ ប្រភពចំណូលពន្ធមានច្រើនដូចជាពន្ធប្រាក់ខែជាដើម ។ រូបថត ហេង ជីវ័ន

ភ្នំពេញៈ កម្ពុជាប្រមូលពន្ធបាន៦៦៣លានដុល្លារក្នុងរយៈពេល១០ខែឆ្នាំនេះ កើនឡើង៣១ភាគរយ បើធៀបនឹងរយៈពេលដូចគ្នាកាលពីឆ្នាំមុន។ នេះបើតាមសេចក្តីប្រកាសព័ត៌មានរបស់អគ្គនាយកដ្ឋានពន្ធដារ។
ចំនួននេះត្រូវបានគណបក្សប្រឆាំងអះអាងថានៅតែទាបជាងអត្រាជាក់ស្តែងដដែល ដោយសារតែអំពើពុករលួយ។
ចំណូល ទាំងនោះបានមកពីការប្រមូលពន្ធលើផលចំណេញ ពន្ធកាត់ទុក ពន្ធប្រាក់ខែ ពន្ធលើតម្លៃបន្ថែម (VAT) ពន្ធពិសេសលើទំនិញ និងសេវាកម្មមួយចំនួន ពន្ធលើអាជីវកម្ម ពន្ធរថយន្ត ពន្ធប៉ាតង់ និងពន្ធអចលនទ្រព្យ។
ថ្លែងនៅក្នុងកិច្ចប្រជុំប្រចាំខែ លោក គង់ វិបុល អគ្គនាយកនៃអគ្គនាយកដ្ឋានពន្ធដារ បានជំរុញឲ្យមន្ត្រីពន្ធពង្រឹងការអនុវត្តច្បាប់និងបញ្ជាឲ្យ ប្រមូលពន្ធប្រាក់ចំណូលបន្ថែមសម្រាប់ថវិការដ្ឋ។
លោកបានឲ្យ ដឹងថា ប្រទេសកម្ពុជា នៅតែមានឱកាសបង្កើនប្រាក់ចំណូលពន្ធ ដូច្នេះកត្តាសំខាន់គឺត្រូវលើកកម្ពស់ច្បាប់ពន្ធ និងផលវិបាកនៃគេចវេះពីការបង់ពន្ធដោយបុគ្គល សាជីវកម្ម ការជឿទុកចិត្ត និងអង្គភាពផ្សេងៗទៀត ដើម្បីលើកទឹកចិត្ត ដើម្បីបង់ពន្ធ។
លោក យឹម សុវណ្ណ អ្នកនាំពាក្យគណបក្សសម រង្ស៊ីបានប្រាប់ភ្នំពេញប៉ុស្តិ៍កាលពីសប្តាហ៍មុនថា ការប្រមូលពន្ធនៅតែទាបជាងប្រទេសជិតខាង និងក្នុងតំបន់។
លោក បន្តថា បើក្រឡេកមើលទៅលើពន្ធដែលកំណត់ដោយរដ្ឋាភិបាល យើងសង្កេតឃើញថា ពន្ធទាំងនោះមានចំនួនច្រើន។ ម្យ៉ាងវិញទៀត ពន្ធដែលប្រមូលបានពីប្រជាជន មានច្រើនប្រភេទ ប៉ុន្តែចំនួនដែលប្រមូលសម្រាប់ចំណូលជាតិ នៅតែមានអត្រាទាបដដែលគឺត្រឹម១២ ទៅ ១៣ភាគរយប៉ុណ្ណោះ បើធៀបនឹងប្រទេសជិតខាង ដែលប្រមូលបានពី១៨ ទៅ ២៥ភាគរយនៃប្រាក់ចំណូលជាតិ។
លោកថ្លែងថា រដ្ឋាភិបាលគួរពិចារណាអំពីការប្រើប្រាស់វិធីដ៏មានប្រសិទ្ធភាព សម្រាប់ការទប់ស្កាត់អំពើពុករលួយ ដើម្បីរកប្រាក់ចំណូលបានកាន់តែច្រើន។ លោកបន្តថា៖ «ទាំងប្រាក់ចំណូលនិងការចំណាយ គឺមិនសមស្របឡើយ ប្រសិនបើយើងអាចទប់ស្កាត់អំពើពុករលួយ។ យើងអាចរកចំណូលបានពី ៥០០លាន ទៅ ១ពាន់លានដុល្លារក្នុងឆ្នាំ»។
លោកបញ្ជាក់ថា រដ្ឋាភិបាលត្រូវចាត់វិធានការឲ្យមានប្រសិទ្ធភាពក្នុងការប្រយុទ្ធ ប្រឆាំងនឹងអំពើពុករលួយ ដោយសារប្រជាជនបានបង់ពន្ធច្រើនជាងប្រទេសជិតខាង ហើយពន្ធដែលពួកគាត់បង់ មិនមែនមានតែមួយប្រភេទនោះទេ ប៉ុន្តែមានអត្រាពន្ធក៏ខ្ពស់ផងដែរ ខណៈប្រាក់ចំណូលសម្រាប់ថវិកាជាតិ នៅតែទាបដដែល តើនេះបណ្តាលមកពីមូលហេតុអ្វី។
លោកថ្លែងថា៖ «ប្រាក់ជាច្រើន ត្រូវបានហូរចូលទៅបុគ្គល ឬមនុស្សមួយក្រុម មិនមែនចូលទៅជាតិឡើយ។ រដ្ឋាភិបាល ត្រូវតែពិចារណាអំពីការប្រឆាំងនឹងអំពើពុករលួយ»។
លោក Olaf Unteroberdoerster អគ្គនាយករងមូលនិធិរូបិយវត្ថុអន្តរជាតិប្រចាំតំបន់អាស៊ីអាគ្នេយ៍ បានឲ្យដឹងកាលពីខែតុលាថា ប្រាក់ចំណូលរបស់កម្ពុជា មានភាពប្រសើរនៅឆ្នាំ២០១២ ដោយការប្រមូលពន្ធផ្ទាល់ និងប្រយោល ត្រូវបានគេរំពឹងថានឹងកើនឡើង០,៧៥ភាគរយនៃGDP។ឱនភាពសារពើពន្ធ ក៏ត្រូវគេរំពឹងថានឹងរួមតូចមកនៅប្រហែលជា៣,២៥ភាគរយប៉ុណ្ណោះនៃ GDP ដោយសារសម្ពាធចំណាយអាចគ្រប់គ្រងបាន។
លោកបន្តថា៖ «ដោយសម្លឹងទៅមុខ ការបង្កើនប្រាក់បញ្ញើរបស់រដ្ឋាភិបាល ដែលចាប់ផ្តើមដោយថវិកាឆ្នាំ២០១៣ នៅតែមានអាទិភាពខ្ពស់ដោយធ្វើឲ្យកម្ពុជាអាចទប់ទល់នឹងផលវិបាក បាន។ បើតាមការប្រមើលមើលក្នុងរយៈពេលយូរ ការកៀរគរចំណូល មានភាពចាំបាច់បើកម្ពុជាអាចបំពេញតម្រូវការអភិវឌ្ឍ និងរក្សានិរន្តរភាពសារពើពន្ធបាន»។
កាលពីចុងខែតុលា រដ្ឋាភិបាល បានអនុម័តបង្កើនការចំណាយថវិកាជាតិរហូតដល់ជិត១៣ភាគរយសម្រាប់ ឆ្នាំ២០១៣ គឺបង្កើនដល់៣ពាន់លានដុល្លារខណៈឆ្នាំ២០១២ នេះមានត្រឹមតែ២,៧ពាន់លានដុល្លារប៉ុណ្ណោះ៕CS

Thursday, November 1, 2012

អេស៊ីលីដា ពង្រីកសេវាធនាគារទូរស័ព្ទ

សេវាដកប្រាក់ តាមម៉ាស៊ីន ATM របស់ធនាគារអេស៊ីលីដា។ បច្ចុប្បន្នធនាគារកំពុងពង្រីកបណ្តាញធនាគារតាមទូរស័ព្ទចល័ត ។ រូបថត ភ្នំពេញ ប៉ុស្តិ៍

ភ្នំពេញៈធនាគារ អេស៊ីលីដា បានពង្រីកប្រព័ន្ធធនាគារ និងសេវាទូទាត់តាមទូរស័ព្ទចល័តរបស់ខ្លួនទៅដល់អតិថិជន។ នេះបើតាមសេចក្តីប្រកាសព័ត៌មានចេញផ្សាយដោយក្រុមហ៊ុនផ្តល់សេវា បច្ចេកវិទ្យាពិភពលោកFiserv។
សេវា Unity តាមទូរស័ព្ទរបស់អេស៊ីលីដាត្រូវបានបង្កើតឡើងនៅឆ្នាំ២០១០ ហើយរហូតមកដល់ពេលនេះមានអតិថិជនជាច្រើនកំពុងប្រើប្រាស់ដោយ អតិថិជនមិនចាំបាច់មានគណនីធនាគារ ដោយពួកគេអាចទទួលបានសេវាជាច្រើនរួមមានការពិនិត្យសមតុល្យ របាយការណ៍ហិរញ្ញវត្ថុខ្នាតតូច ការផ្ទេរប្រាក់ពីគណនីផ្ទាល់ខ្លួន ការផ្ទេរទុន ការបង់ថ្លៃអគ្គិសនី ទឹក កាតទូរស័ព្ទការទូទាត់សេវាអ៊ីនធឺណិតនិងការឆែកមើលអត្រាប្តូរ ប្រាក់។
លោកអ៊ិន ចាន់នី ប្រធាន និងជាអគ្គនាយកធនាគារអេស៊ីលីដា បានលើកឡើងនៅក្នុងសេចក្តីប្រកាសព័ត៌មាននោះថា៖ «យើងបានចាប់ផ្តើមការផ្តល់សេវាតាមទូរស័ព្ទចល័តនៅ២០១០ ដោយផ្តល់ដល់អតិថិជននូវគម្រោងធនាគារតាមទូរស័ព្ទការជូនដំណឹង និងការទូទាត់ប្រាក់ជាដើម»។ លោកបានបន្ថែមថា៖ «ក្នុងពេលឆាប់ៗខាងមុខនេះ យើងកត់សម្គាល់ឃើញថា មានកំណើនសេវាហិរញ្ញវត្ថុតាមទូរស័ព្ទជាច្រើនក្នុងចំណោមអតិថិជន កម្ពុជាជាច្រើនដែលមិនមានគណនីធនាគារ»។
លោកបានលើកឡើងទៀតថា ការពង្រីកសេវាដល់អតិថិជនទាំងនោះ តាមUnity របស់អេស៊ីលីដា និង Mobiliti Reach អាចឲ្យយើងក្លាយទៅជាអ្នកផ្តល់សេវាហិរញ្ញវត្ថុនាំមុខគេក្នុង ចំណោមកម្មកររោងចក្រ កសិករនៅតំបន់ជនបទ។
លោក អ៊ិន ចាន់នី បានលើកឡើងថា ការពង្រីកសេវាUnity ដែលបានចាប់ផ្តើមនៅខែកក្កដា ក្នុងឆ្នាំនេះ ប៉ុន្តែមិនទាន់បានធ្វើបច្ចុប្បន្នភាពនៅឡើយនោះ មានគោលដៅផ្តោតជាសំខាន់លើប្រជាជននៅទូទាំងប្រទេស។
លោកបន្ត ទៀតថា៖ «បច្ចុប្បន្ន មានកម្មករ ៣៥០ ០០០នាក់នៅក្នុងឧស្សាហកម្មកាត់ដេរ។ ប្រជាជនទាំងនោះចង់ផ្ញើប្រាក់មកផ្ទះ ឲ្យគ្រួសាររបស់ខ្លួន នៅជនបទ។ ដូច្នេះ ពួកគេ អាចប្រើប្រាស់សេវា Unity ដើម្បីផ្ញើប្រាក់តាមទូរស័ព្ទចល័តបាន»។
ដោយមិនចាំបាច់ទៅដល់ តាមសាខាទេ អ្នកប្រើប្រាស់សេវា Unity អាចផ្ទេរប្រាក់ដោយការបញ្ជូនសារជាអក្សរដោយមានលេខកូដ អ្នកទទួលអាចទទួលបានប្រាក់ពីATM នៅទូទាំងប្រទេសឬទៅបញ្ជរណាមួយ ដើម្បីទទួលប្រាក់។
លោកThomas Hundt អគ្គនាយករបស់ទូរស័ព្ទចល័ត Smart Mobile បានឲ្យដឹងថា ចំនួនអ្នកប្រើប្រាស់ទូទៅ និងអាជីវកម្មសេវាធនាគារ កំពុងកើនឡើងនៅកម្ពុជា។
លោកបានឲ្យ ដឹងថា សេវាធនាគារមិនទាន់ជះឥទ្ធិពលនៅកម្ពុជា ដូចនៅអា្រហ្វិកឡើយ ប៉ុន្តែជាទូទៅ យើងសង្កេតឃើញមាននិន្នាការប្រើប្រាស់ទូរស័ព្ទចល័តកើនឡើង ហើយSmart កំពុងគាំទ្រការប្រើប្រាស់នោះ យ៉ាងពេញទំហឹង៕CS

Friday, September 28, 2012

កម្ពុជាអំណោយផលខាងឧស្សាហកម្ម

សេវាថែទំារថយន្តរបស់ក្រុមហ៊ុន ហុងដា នៅរាជធានីភ្នំពេញ។ កម្ពុជាកំពុងអំពាវនាវឲ្យមានការវិនិយោគក្នុងវិស័យឧស្សាហកម្មបន្ថែមទៀតនៅកម្ពុជា។ រូបថត វីរៈ ម៉ៃ

ភ្នំពេញៈ សេដ្ឋវិទូ និងដៃគូពាណិជ្ជកម្មបានអំពាវឲ្យក្រុមហ៊ុនដែលមានមូលដ្ឋានផលិតកម្មនៅប្រទេស ជិតខាងកម្ពុជាមកធ្វើការវិនិយោគបន្ថែមទៀតនៅក្នុងប្រទេសកម្ពុជា ខណៈប្រទេសនេះមិនរងផលប៉ះពាល់ពីគ្រោះទឹកជំនន់ដែលបង្កឲ្យរាំង ស្ទះដល់ផលិតកម្ម ដូចនៅប្រទេសថៃ និងវៀតណាមនោះទេ។

មន្ត្រីជាន់ ខ្ពស់កម្ពុជា ក៏បានអះអាងដែរថា វិស័យឧស្សាហកម្មកម្ពុជាអាចធន់នឹងគ្រោះទឹកជំនន់បានបើធៀបនឹង ប្រទេសជិតខាង។

លោក ចម ប្រសិទ្ធ រដ្ឋមន្ត្រីក្រសួងពាណិជ្ជកម្ម បានថ្លែងនៅក្នុងខួប២០ឆ្នាំរបស់ក្រុមហ៊ុន ហុងដា និង N.C.X Group នៅភ្នំពេញកាលពីថ្ងៃពុធថា ប្រទេសកម្ពុជា ប្រឈមនឹងទឹកជំនន់ជារៀងរាល់ឆ្នាំ ប៉ុន្តែវាមិនប៉ះពាល់ធ្ងន់ធ្ងរដល់រោងចក្រ ឬឧស្សាហកម្មផ្សេងៗទៀតឡើយ។ លោកបន្តថា បច្ចុប្បន្ន ថៃ កំពុងប្រឈមនឹងគ្រោះទឹកជំនន់។ លោកបន្តថា៖«ទោះបីជាកម្ពុជាជួប គ្រោះទឹកជំនន់ជារៀងរាល់ឆ្នាំក្តី វាមិនបានប៉ះពាល់ដល់តំបន់ឧស្សាហកម្មឡើយ។ វាប៉ះពាល់តែវាលស្រែតាមដងទន្លេមេគង្គប៉ុណ្ណោះ ប៉ុន្តែវាមិនបានប៉ះពាល់ដល់រោងចក្រឡើយ។ ម្យ៉ាងវិញទៀត យើងបានព្យាករថា នៅឆ្នាំនេះ ទឹកជំនន់ធំជាងកាលពីឆ្នាំមុន ដូច្នេះយើងកំពុងព្យាយាមទប់ស្កាត់ផលប៉ះពាល់អវិជ្ជមានមកលើ សេដ្ឋកិច្ច។ វានឹងមិនអាចប៉ះពាល់ដល់វិស័យឧស្សាហកម្មកម្ពុជាដែលស្ថិតនៅ ទីតាំងល្អឆ្ងាយពីតំបន់ទទួលរងគ្រោះដោយទឹកជំនន់ទេ»។

កម្ពុជាស្ថិត ក្នុងតំបន់អំណោយផលដល់ការធ្វើអាជីវកម្ម មានបរិយាកាសវិនិយោគល្អ ហើយមានការលើកទឹកចិត្តដល់វិនិយោគិនបរទេស។ នេះជាឱកាសដ៏អស្ចារ្យសម្រាប់ក្រុមហ៊ុនជប៉ុនផ្សេងៗទៀតដែល មានរោងចក្រនៅថៃគួរពិចារណាអំពីកម្ពុជា។ នេះបើតាមលោក ចម ប្រសិទ្ធ។

លោក Hiroshi SUZUKI ប្រធាននាយកប្រតិបត្តិ និងជាសេដ្ឋវិទូប្រចាំវិទ្យាស្ថានស្រាវជ្រាវអាជីវកម្មកម្ពុជា បានកត់សម្គាល់ឃើញថា ទឹកជំនន់ មិនសូវជាប៉ះពាល់ធ្ងន់ធ្ងរដល់កម្ពុជាឡើយ បើធៀបនឹងប្រទេសជិតខាង។

ហេដ្ឋារចនាសម្ព័ន្ធ ដូចជា ផ្លូវថ្នល់ រងផលប៉ះពាល់តិចតួច ហើយការតភ្ជាប់រវាងភ្នំពេញ ថៃ និងវៀតណាម មិនសូវទទួលរងផលប៉ះពាល់ធ្ងន់ធ្ងរឡើយ។

មានតែវិស័យទេសចរណ៍នៅខេត្តសៀមរាបប៉ុណ្ណោះ ដែលរងផលប៉ះពាល់ដោយទឹកជំនន់។

លោកបន្ត ថា វិស័យឧស្សាហកម្មនៅកម្ពុជា អាចធន់បាននឹងគ្រោះទឹកជំនន់។ ទឹកជំនន់កាលពីឆ្នាំមុន មានទំហំធំជាងគេបំផុតក្នុងរយៈពេល១០ឆ្នាំកន្លងទៅនេះ ប៉ុន្តែរោងចក្រស្ទើរតែទាំងអស់ អាចចៀសផុតពីការខូចខាតដោយទឹកជំនន់បាន។

រោងចក្រ ក៏ដូចជាហេដ្ឋារចនាសម្ព័ន្ធដឹកជញ្ជូនអាចធន់នឹងទឹកជំនន់បាន ហើយឧស្សាហកម្មសំខាន់ៗមួយចំនួន ដូចជា រោងចក្រកាត់ដេរ និងវាយនភ័ណ្ឌ មិនទទួលរងគ្រោះដោយទឹកជំនន់បានឡើយ។

លោកថ្លែង ថា ក្រុមហ៊ុន មីនីបៀ (Minebea) បានសម្រេចចិត្ត និងចាប់ផ្តើមសាងសង់រោងចក្រទីពីររបស់ខ្លួន នៅក្បែររោងចក្រទី១ ក្នុងតំបន់សេដ្ឋកិច្ចភ្នំពេញ ដែលនេះជាគំរូមួយនៃការគ្រប់គ្រងហានិភ័យដោយគ្រោះទឹកជំនន់នៅ ប្រទេសថៃ។

ទោះបីយ៉ាងនេះក្តីលោកបានអះអាងថា ការខូចខាតដោយទឹកជំនន់ មិនអាចបង្ខំឲ្យក្រុមហ៊ុនជប៉ុនដកខ្លួនចេញពីប្រទេសថៃភ្លាមៗ បានឡើយ៖ «ក្នុងរយៈពេលមធ្យម ក្រុមហ៊ុនខ្លះ ពិសេសក្រុមហ៊ុនប្រើកម្លាំងពលកម្មច្រើននឹងពិចារណាអំពីការផ្ទេរ ផ្នែកមួយចំនួននៃរោងចក្ររបស់ខ្លួន មកតំបន់មានសុវត្ថិភាព ដូចជា កម្ពុជា ហើយនេះជាវិធានការនៃការគ្រប់គ្រងហានិភ័យ»។

លោក ឆាយ រតនៈ ប្រធានសមាគមធានារ៉ាប់រងកម្ពុជា បានឲ្យដឹងថា គ្រោះទឹកជំនន់ កាលពីឆ្នាំមុន បានបង្កផលប៉ះពាល់ដល់គម្រោងសាងសង់មួយចំនួន នៅសៀមរាប និងគម្រោងផ្លូវដែកនៅខេត្តបន្ទាយមានជ័យ ដែលគិតជាទឹកប្រាក់ប្រហែល១លានដុល្លារអាមេរិក។ លោកសង្ឃឹមថា នៅឆ្នាំនេះ រដ្ឋាភិបាល នឹងត្រៀមខ្លួនឲ្យបានប្រសើរទប់នឹងផលប៉ះពាល់នៃទឹកជំនន់មកលើ សេដ្ឋកិច្ចរបស់កម្ពុជា។

កាលពីមុនទឹកជំនន់ បានប៉ះពាល់ខេត្តមួយចំនួន នៅតាមបណ្តោយទន្លេមេគង្គ ដែលបំផ្លាញផលដំណាំសរុបប្រហែល១០ភាគរយ ចំណែកនៅប្រទេសថៃវិញ ខេត្តចំនួន៣២ ក្នុងចំណោម៧៧ រងគ្រោះដោយទឹកជំនន់។

កាលពី ឆ្នាំទៅរដ្ឋាភិបាលកម្ពុជា បានចំណាយទឹកប្រាក់ប្រហែល ២០០លានដុល្លារសម្រាប់ស្តារហេដ្ឋារចនាសម្ព័ន្ធដែលទទួលរងការខូចខាតដោយទឹកជំនន់។

នៅឆ្នាំ២០១២ នេះ រដ្ឋាភិបាលក៏បានត្រៀមថវិកាជាតិប្រហែល៩០លានដុល្លារ ដើម្បីទប់ទល់នឹងទឹកជំនន់ដែរ៕ CS

Saturday, September 15, 2012

អូបាម៉ាសន្យា ចាប់ខ្លួនក្រុមឃាតកសម្លាប់ឯកអគ្គរដ្ឋទូតមកកាត់ទោស

លោកបារ៉ាក់ អូបាម៉ា ធ្វើសេចក្តីថ្លែងការណ៍ ជាមួយរដ្ឋមន្ត្រីការបរទេស លោកស្រី ហ៊ីឡារី គ្លីនតុន បន្ទាប់ពីមរណភាពរបស់មន្ត្រីទូត នៅលីប៊ី។ REUTERS

ក្រុង វ៉ាស៊ីន/បេនហ្គាហ្ស៊ីៈ ប្រធានាធិបតីអាមេរិក លោក បារ៉ាក់ អូបាម៉ា កាលពីថ្ងៃព្រហស្បតិ៍ បាន សន្យានាំខ្លួនក្រុមខ្មាន់កាំភ្លើងអ៊ិស្លាមនិយមដែលទទួលខុសត្រូវចំពោះការវាយប្រហារដ៏ឃោរឃៅ ដែលបានសម្លាប់ឯកអគ្គរដ្ឋទូតអាមេរិកប្រចាំលីប៊ី និងពលរដ្ឋអាមេរិកបីនាក់ផ្សេងទៀតមកកាត់ទោសនៅក្នុងការវាយប្រហារ ដែលអាចមានការរៀបចំទុកជាមុនមួយ។

លោកឯកអគ្គរដ្ឋទូត គ្រីស្តូហ្វើរ ស្ទេវិន និងពលរដ្ឋអាមេរិកបីនាក់ ទៀត បានស្លាប់បន្ទាប់ពីក្រុមប្រដាប់អាវុធអ៊ិស្លាមនិយម បានវាយប្រហារស្ថានកុងស៊ុលអាមេរិកមិនសូវរឹងមាំ និងជម្រកផ្ទះសុវត្ថិភាពមួយនៅក្រុងបេនហ្គាហ្ស៊ីកាលពីរាត្រី ថ្ងៃអង្គារ។ ក្រុមអ្នកវាយប្រហារគឺជាផ្នែកមួយនៃហ្វូងជនអន្ធពាល ដែលកំពុងចោទអាមេរិកជុំវិញភាពយន្តមួយ ដែលពួកគេថា បានប្រមាថព្យាការី មូហាម៉ាត់។

លោកអូបាម៉ា បាននិយាយថា លោកបានបញ្ជាឲ្យបង្កើនសន្តិសុខនៅតាមមូលដ្ឋានទូតអាមេរិកនៅទូទាំងពិភពលោកបន្ទាប់ពី ការវាយប្រហារនោះ។

ខណៈកំពុងទទូចថា វានឹងមិនគំរាមកំហែងទំនាក់ទំនងជាមួយរដ្ឋាភិបាលថ្មីលីប៊ី លោកអូបាម៉ាថ្លែងថា៖ «អាមេរិក ថ្កោលទោសក្នុងពាក្យសម្តីធ្ងន់បំផុតចំពោះការវាយប្រហារដ៏យង់ ឃ្នងនិងគួរឲ្យតក់ស្លុតនេះ។ ដោយមិនធ្វើឲ្យមាន កំហុស យើងនឹងធ្វើការជាមួយរដ្ឋាភិបាលលីប៊ី ដើម្បីនាំខ្លួនឃាតក ដែលបានវាយប្រហារពលរដ្ឋយើង មកកាត់ទោសតាមច្បាប់»។

ស្ថានកុង ស៊ុលអាមេរិកនោះត្រូវ បានចូលលុកលុយ និងបានដុតបំផ្លាញក្នុងការវាយប្រហារបែបយោធាមួយ លោកឯកអគ្គរដ្ឋទូតបាន ស្លាប់តែម្នាក់ឯង នៅក្នុងផ្សែង ខណៈក្រុមអ្នកជួយសង្គ្រោះបានរត់ចូលទៅក្នុងការពួនស្ទាក់វាយ ប្រហារសម្លាប់មនុស្សមួយ ខណៈពួកគេព្យាយាមជួយ អ្នកនៅមានជីវិត។ ក្រុមអ្នកវាយប្រហារ បានប្រើកាំភ្លើងដៃ កាំភ្លើងត្បាល់ និងគ្រាប់បែកដៃ។ ក្រុមមន្ត្រីអាមេរិក និងលីប៊ីបាននិយាយថា ការវាយប្រហារនេះអាចមាន ផែនការទុកជាមុន។

អំពើហិង្សានៅក្រុង ភាគខាងកើត នេះ បានកើតឡើងនៅចំថ្ងៃខួបទី១១ នៃការវាយប្រហាររបស់ក្រុមអាល់កៃដាលើអាមេរិក កាលពីថ្ងៃទី១១ កញ្ញា ២០០១។ ការវាយប្រហារមួយ ត្រូវបានកើតឡើងនៅ ឯស្ថានទូតអាមេរិកនៅក្នុងទីក្រុងគែរ កាលពីថ្ងៃអង្គារ ដែលក្នុងនោះក្រុមអ្នកតវ៉ា ដែលរួមមានក្រុមអ៊ិស្លាមនិយម និងក្រុមគាំទ្របាល់ទាត់យុវវ័យផងបានហែកចោល និងដុតទង់ជាតិអាមេរិក។

កាលពីរាត្រីថ្ងៃពុធ នៅក្រុងគែរ កម្លាំងសន្តិសុខ បានបាញ់ឧស្ម័នបង្ហូរទឹកភ្នែកដើម្បីបំបែកក្រុមបាតុករគប់ដុំថ្មកាន់តែច្រើន នៅក្បែរស្ថានទូតអាមេរិក។ ការផ្សាយផ្ទាល់ តាមទូរទស្សន៍ បានបង្ហាញពីបាតុកររាប់រយនាក់នៅឯស្ថានទូត។

ក្រុមមន្រ្តីអាមេរិក បាននិយាយថា កម្លាំងសន្តិសុខ ត្រូវគេបំបែកចេញពីលោកស្ទេវិន វ័យ៥២ឆ្នាំ ក្នុងពេលវាយប្រហារ ដោយពណ៌នាទិដ្ឋភាពវឹកវរដែលមានផ្សែង ការបាញ់កាំភ្លើង និងច្របូកច្របល់។

វេជ្ជបណ្ឌិតលីប៊ីម្នាក់បាន ប្រកាស ថា ស្ទេវិនស្លាប់ដោយសារឈ្លក់ផ្សែង។ អ្នកឯកទេសបច្ចកវិទ្យាព័ត៌មាន លោកសៀន ស្មីត និងពលរដ្ឋអាមេរិកបីនាក់ទៀត ដែលមិន ទាន់ស្គាល់អត្តសញ្ញា ក៏ត្រូវបាន សម្លាប់ដែរ។

ក្នុងចំណោមជនដៃដល់ ពលរដ្ឋលីប៊ីបានប្រាប់ថា ជាកងឯកភាព ក្រុមប្រដាប់អាវុធអ៊ិស្លាម អានសារ អាល់-សារៀ ដែលមានសមានចិត្ត នឹងក្រុមអាល់កៃដានិង មើលងាយកិច្ចប្រឹងប្រែងគាំទ្រដោយអាមេរិករបស់លីប៊ីដើម្បីប្រជាធិបតេយ្យ។

មន្ត្រីអាមេរិកម្នាក់និយាយថា យោធាអាមេរិកកំពុងបញ្ជូននាវា ពិឃាតពីរគ្រឿងទៅកាន់ឆ្នេរសមុទ្រលីប៊ី ធ្វើឲ្យរដ្ឋការអូបាម៉ា បង្ហាញពីភាពបត់បែន សម្រាប់វិធានការនាពេលអនាគតណាមួយប្រឆាំងនឹងលីប៊ី៕ NR

Monday, September 3, 2012

ខេមកូស៊ីធី បន្តអភិឌ្ឍន៍ហាងលក់ទំនិញ-សួនច្បារ

សំណង់អគារជាច្រើន ដែលកសាងឡើងនៅក្នុងគម្រោងរបស់ទីក្រុងរណបខេមកូស៊ីធី ។ រូបថត ហុង មីនា

ភ្នំពេញ: គម្រោងវិនិយោគទីក្រុងរណបខេមកូស៊ីធី បានចាប់ផ្តើមសកម្មភាពសាងសង់បន្តគម្រោងហាងលក់ទំនិញនិង សួនច្បារឡើងវិញហើយ បន្ទាប់ពីអាក់ខានសកម្មភាពចាប់តាំងពីខែមិថុនា ឆ្នាំ២០១១មក។

កត្តាឥទិ្ធពលទីផ្សារតម្រូវការក្នុងស្រុក និងវិបត្តិហិរញ្ញវត្ថុពិភពលោកបានធ្វើឲ្យគម្រោងវិនិយោគដ៏ធំមួយ នេះ ត្រូវផ្អាកសកម្មភាពសាងសង់មួយរយៈ។

លោក ខេង សែ ជំនួយការអគ្គនាយកក្រុមហ៊ុនវិនិយោគទីក្រុងរណបខេមកូស៊ីធី មានប្រសាសន៍ថា សព្វថ្ងៃក្រុមហ៊ុនកំពុងបន្តការវិនិយោគជំហានទី១ ដែលនៅព័ទ្ធជុំវិញទីក្រុងនេះជាបន្តទៀត។ ប៉ុន្តែនៅពេលនេះគម្រោងលក្ខណៈទ្រង់ទ្រាយធំផ្សេងៗទៀត ក្រុមហ៊ុនមិនទាន់ចាប់ផ្តើមធ្វើនៅឡើយទេ ហើយក៏មិនបានកំណត់ថា នឹងធ្វើវានៅពេលណាដែរ ដោយនៅពេលនេះក្រុមហ៊ុនធ្វើសម្រាប់ជំហានទី១ ដែលនៅសេសសល់ដើម្បីបញ្ចប់តែប៉ុណ្ណោះ។

ជំនួយការរូបនេះបន្តថា ជំហានទី១យើងសម្រេចការសាងសង់បាន៧០ភាគរយហើយ ដោយនៅពេលនេះយើងធ្វើដើម្បីបញ្ចប់គម្រោងដែលនៅសល់៣០ភាគរយ ក្នុងនោះមានគម្រោងអភិវឌ្ឍន៍ហាងទំនិញ និងសួនច្បារជាដើម។ លោកបញ្ជាក់ថា៖«ជំហានទី១ដែលមានបីដំណាក់កាលនោះ ក្រុមហ៊ុនបានសាងសង់ស្ទើរតែចប់រួចរាល់អស់ទៅហើយ ដោយនៅសល់តែដំណាក់កាលទី៣ នេះតែប៉ុណ្ណោះ ប៉ុន្តែយើងមិនទាន់ដឹងថា បញ្ចប់នៅពេលណានោះទេ គឺវាអាស្រ័យលើដៃគូភាគីវិនិយោគរបស់យើង»។

លោកបានបន្ថែមថា ដំបូងដៃគូវិនិយោគរបស់យើងគេបានទិញអគារនេះអស់តែម្តងគឺ១០០ ភាគរយ ខណៈពេលដែលក្រុមហ៊ុនបានប្រកាសលក់ដំបូង ដោយរហូតមកដល់ពេលនេះការអភិវឌ្ឍនៅជំហានទី១ ដំណាក់កាលទី១ និងដំណាក់កាលទី២បានបញ្ចប់ហើយ នៅតែដំណាក់កាលទី៣ កំពុងរង់ចាំធ្វើការពិភាក្សាជាមួយគូភាគីវិនិយោគ។

លោកបានអះអាងថា ៖«បើទោះបីជាយើងចាប់ផ្តើមបន្តសកម្មភាពឡើងវិញពេលនេះក៏ដោយ ក៏ខាងក្រុមហ៊ុនយើងនៅមិនទាន់មានផែនការរៀបចំថវិកាសម្រាប់ការ វិនិយោគគម្រោងធំៗជាបន្តទៀតនៅឡើយទេ»។ លោកបន្ថែមថា សព្វថ្ងៃយើងកំពុងវិនិយោគទៅលើហាងទំនិញ និងរៀបចំសួនច្បារសាធារណៈ ប៉ុន្តែតម្រូវការលក់ និងជួលមានចំនួនប៉ុន្មានលោកសុំមិនប្រាប់ទេ ដោយលោកគ្រាន់តែប្រាប់ថា មានតម្រូវការច្រើន។

លោកបានប្រាប់ឲ្យដឹងទៀតថា ចំពោះជំហានទី១នៃការវិនិយោគផ្ទះល្វែង និងវីឡាយើងបានលក់អស់ហើយ ដោយនៅសល់ផ្ទះប្រភេទខុនដូចំនួនតិចតួចប៉ុណ្ណោះ ដែលស្ថិតនៅក្នុងការប្រកាសលក់ជាបន្តទៀត។

លោកបានបន្ថែមថា គម្រោងវិនិយោគទីក្រុងរណបខេមកូស៊ីធីជាគម្រោងធំដែលសព្វថ្ងៃ ធ្វើបានតែ១ភាគ១០នៃគម្រោងទាំងមូលតែប៉ុណ្ណោះ។ លោកជឿថា គម្រោងធំថ្មីៗនឹងមានបន្តបន្ទាប់ទៀតក្រោយពីបញ្ចប់ជំហានទី១នេះ ដោយវាគ្រាន់តែត្រូវការពេលវេលាដើម្បីវិភាគលើតម្រូវការទីផ្សារ បន្ថែម និងស្វែងរកដៃគូរវិនិយោគបន្ថែមទៀតតែប៉ុណ្ណោះ ព្រោះនេះជាគម្រោងធំ។

លោក អាន ចន្នី ប្រធានផ្នែកលក់នៃគម្រោងវិនិយោគទីក្រុងរណបខេមកូស៊ីធី ក៏បានប្រាប់ឲ្យដឹងដែរថា នៅពេលនេះក្រុមហ៊ុនកំពុងរៀបចំផែនការលក់ និងជួលហាងទំនិញចំនួនជាង៣០ហាង។ លោកបញ្ជាក់ថា ៖«ហាងចំនួន១០ត្រូវបានអតិថិជនកក់អស់ទៅហើយ តាំងពីចាប់ដំណើរការសាងសង់មកម្ល៉េះ»។ លោកបន្តថា គម្រោងវិនិយោគហាងទំនិញនេះបានចាប់ផ្តើមសាងសង់នៅពាក់កណ្តាលខែ កក្កដាកន្លងមក ហើយខ្ញុំគិតថា ៣ទៅ៤ខែទៀតទើបចប់ ដោយគេនឹងដាក់ជួលក្នុងតម្លៃចន្លោះពី៥ទៅ៨ដុល្លារក្នុងមួយ ម៉ែត្រការ៉េ។

លោក ចន្នី បានបន្ថែមថា គម្រោងដែលកំពុងធ្វើនៅពេលនេះ គឺដើម្បីបញ្ចប់ការងារចាស់ៗដែលនៅសល់តែប៉ុណ្ណោះ ហើយលំនៅដ្ឋាន ផ្ទះល្វែង និងវីឡាបានលក់អស់ទៅហើយ សល់តែខុនដូប្រហែល២០ភាគរយតែប៉ុណ្ណោះ ដោយបន្ទប់ដែលមានបន្ទប់គេង២លក់ក្នុងតម្លៃចន្លោះពី១៤ទៅ១៦ ម៉ឺនដុល្លារចំណែកបន្ទប់ដែលមានបន្ទប់គេង៣ លក់ក្នុងតម្លៃចន្លោះពី១៨ទៅ២០ម៉ឺនដុល្លារ និង៤បន្ទប់គេង លក់ក្នុងតម្លៃ៣០ម៉ឺនដុល្លារអាមេរិក។

ទីក្រុងរណបខេមកូស៊ីធី ស្ថិតនៅក្នុងតំបន់គួរឲ្យចាប់អារម្មណ៍ មានសុវត្ថិភាព មានបរិស្ថានល្អ ជាមួយការវិនិយោគច្រើនធ្វើឲ្យទីផ្សារជួលងាយស្រួលក្នុងការរក អតិថិជន។ លោក ចន្នី បានបញ្ជាក់ថា៖«នៅរយៈពេលបីខែចុងក្រោយនេះ មានអតិថិជនបរទេសមកជួលកើនឡើងច្រើនជាងកាលពីដើមឆ្នាំនេះ»។

លោក ច្រឹក សុខនីម អនុប្រធានក្រុមហ៊ុនអចលនទ្រព្យវីត្រាស់ មានប្រសាសន៍ថា ការវិលត្រឡប់នៃសកម្មភាពវិនិយោគទីក្រុងរណបខេមកូស៊ីធី គឺជារឿងល្អមួយសម្រាប់វិស័យអចលនទ្រព្យនៅកម្ពុជា ដែលអាចជួយជំរុញឲ្យមានការវិនិយោគកើនឡើង។ លោកបន្តថា ការវិនិយោគធំៗគឺទាមទារឲ្យមានភាពច្បាស់លាស់ ទើបការវិនិយោគអាចដំណើរការដល់គោលដៅបាន ហើយការវិលត្រឡប់នៃក្រុមហ៊ុននេះអាចនឹងមានដំណើរការល្អឡើងវិញ ដែរ។

លោកបានបញ្ជាក់ថា៖«ខ្ញុំគិតថា ការវិនិយោគហាងទំនិញ នៅទីនោះនាពេលនេះពិតជាល្អ គឺអាចធ្វើឲ្យការវិនិយោគជំហានទី១របស់ក្រុមហ៊ុនមានតម្លៃឡើង វិញ ហើយក៏អាចធ្វើឲ្យការវិនិយោគជំហានបន្ទាប់របស់ក្រុមហ៊ុន ទទួលបានជោគជ័យផងដែរ»។

លោកបានបន្ថែមថា ទីផ្សារអចលនទ្រព្យសព្វថ្ងៃកំពុងធ្វើដំណើរម្តងមួយជំហានៗ ដូច្នេះការវិនិយោគចាំបាច់គឺត្រូវការពេលវេលាដែលជារឿងល្អដែរ សម្រាប់ការវិនិយោគយូរអង្វែង៕

Saturday, September 1, 2012

ទំនិញពាណិជ្ជកម្មរវាងអាស៊ាននិងសហរដ្ឋអាមេរិកនៅឆ្នាំ២០១១មានការកើនឡើង

ខេត្តសៀមរាប ៖ យោងតាមសេចក្តីប្រកាសព័ត៌មាន ស្តីពីកិច្ចពិគ្រោះយោបល់រវាងរដ្ឋមន្ត្រីសេដ្ឋកិច្ចអាស៊ាន ជាមួយតំណាងរដ្ឋមន្ត្រីសេដ្ឋកិច្ចសហរដ្ឋអាមេរិក នៅសណ្ឋាគារអប្សារាអង្គររីស្សត នៅក្រុងសៀមរាប ក្រោមអធិបតី លោកទេស រដ្ឋមន្ត្រី ចម ប្រសិទ្ធ រដ្ឋមន្ត្រីក្រសួងពាណិជ្ជ កម្មកម្ពុជា និងលោក Ron Kirk តំណាងរដ្ឋមន្ត្រី ពាណិជ្ជកម្មសហរដ្ឋអាមេរិក កាលពីព្រឹក ថ្ងៃទី៣០ សីហា ឆ្នាំ២០១២ បានឲ្យដឹងថា តាមទិន្នន័យរបស់សហរដ្ឋអាមេរិក បានបង្ហាញ ថា ទំនិញពាណិជ្ជកម្មសរុបរវាងអាស៊ាន និងសហរដ្ឋអាមេរិកក្នុងឆ្នាំ២០១១ កើនឡើង ៩.២% គឺកើនពី១៧៨ពាន់លានដុល្លារអាមេរិក ទៅ១៩៤លានដុល្លារអាមេរិក លើសពីឆ្នាំ មុន ។ ទំនិញពាណិជ្ជកម្មអាស៊ាននាំចូលទៅសហរដ្ឋអាមេរិក បានកើនឡើងជិត៨.៦% គឺ ៧៦,៤ពាន់លានដុល្លារអាមេរិក ក្នុងខណៈដែលទំនិញពាណិជ្ជកម្មអាស៊ាន នាំចេញទៅ សហរដ្ឋអាមេរិកបានកើនឡើង ៩.៨% គឺ កើន១១៨.២ពាន់លានដុល្លារអាមេរិកក្នុង ឆ្នាំ២០១១ ។
នៅក្នុងកិច្ចពិគ្រោះយោបល់នោះ រដ្ឋមន្ត្រីសេដ្ឋកិច្ចអាស៊ានទាំងអស់ បានធ្វើការកត់ សំគាល់អំពីទំនាក់ទំនងលើការផ្លាស់ប្តូរផ្នែកវិស័យពាណិជ្ជកម្មរវាង អាស៊ាន និងសហរដ្ឋអា មេរិក មានភាពរឹងមាំ និងរីកចំរើន ។
ដោយឡែកនៅក្នុងកិច្ចប្រជុំកំពូល អាជីវកម្មធុរកិច្ចអាស៊ាន-សហរដ្ឋអាមេរិកលើកទី១ ដែលរៀបចំឡើងនៅសណ្ឋាគារមេឌីយ៉ាណអង្គរ នាព្រឹកថ្ងៃនោះដែរ លោកអគ្គលេខាធិការ អាស៊ាន ស៊ូរិន្ទ ពិតស៊ូវណ្ណ ( Surin Pitsuwan ) មានប្រសាសន៍ថា អាស៊ានទាំងអស់ពិត ជាបានដឹងយ៉ាងច្បាស់ហើយថា ប្រសិនបើអាស៊ានមិនបានត្រៀមខ្លួន ដោយប្រុងប្រ យ័ត្ន និងបើមិនមានភាពវៃឆ្លាត ព្រមទាំងមិនបានគិតគូរជ្រើសរើសភាពជាដៃគូ សម្រាប់រៀបចំ អនាគតរបស់ខ្លូននោះ ប្រទេសក្នុងតំបន់អាស៊ាន ទំនងនឹងស្ថិតនៅក្នុងភាពភយន្តរាយ ដូច្នេះសហរដ្ឋអាមេរិក គឺជាដៃគូមួយដ៏ល្អសម្រាប់ បណ្ដាប្រទេសក្នុងតំបន់អាស៊ាន ។
លោក ដេវិត ខារិន តំណាងលោក Ron Kirk ទីប្រឹក្សាជាន់ខ្ពស់ផ្នែកពាណិជ្ជកម្ម របស់ប្រធានាធិបតីសហរដ្ឋអាមេរិក បានអះអាងបញ្ជាក់ជារួមថា កិច្ចប្រជុំអាជីវកម្មធុរកិច្ច អាស៊ានលើកទី១ ខ្ញុំជឿជាក់ថាអាមេរិកបានអាមេរិក បានស្គាល់ក្រុងសៀមរាប-អង្គរ របស់ កម្ពុជា ជាបន្តបន្ទាប់ទាំងពីទស្សវត្យឆ្នាំ១៩៦០ ហើយក្នុងនោះពួកគេ ក៏បានស្គាល់ប្រទេស នៅអាស៊ី-អាគ្នេយ៍ផងដែរ ។ ហើយការទំនាក់ទំនង និងការនាំទំនិញចេញ ចូល ក៏ចាប់ ផ្ដើមមាន និងមានការកើនឡើងរាប់កោដិដុល្លារ ដែលជាផ្លែផ្កាគួរជាទីពេញចិត្ត យើងរួមគ្នាក្នុងការជំរុញនូវកំណើនសេដ្ឋកិច្ចវិនិយោគ និងពង្រីកទីផ្សារឲ្យបានទូលំទូលាយឡើងរវាង អាស៊ាន និងអាមេរិក ៕

Sunday, August 26, 2012

អង្គការមិត្តសម្លាញ់ច្នៃបដាអ៊ីហ្ស៊ីខមជារ៉ូប និងវត្ថុផ្សេងៗ

ឈុតរ៉ូប និងវត្ថុប្រើប្រាស់នានា ដែលកែច្នៃពីបដាក្រុមហ៊ុនអីុហ្ស៊ីខម។ រូបថត ឈឹម ស្រីនាង

ភ្នំពេញ : ក្រុម ហ៊ុនអ៊ីនធឺណិតអ៊ីហ្ស៊ីខម (Ezecom) បានសហការជាមួយនឹងអង្គការមិត្តសម្លាញ់ ដើម្បីកែច្នៃបដាផ្សព្វផ្សាយពាណិជ្ជកម្មចាស់ៗរបស់ក្រុមហ៊ុនរបស់ ខ្លួនឲ្យទៅជាកាបូបយួរ កាបូបដៃរបស់ស្រ្តី និងវត្តុអនុស្សាវរីយ៍ជាច្រើនទៀត។
កាលពីព្រឹកថ្ងៃទី២៣ សីហា ម្សិលមិញនេះ អ៊ីហ្ស៊ីខមក៏បានបើកពិព័រណ៍សម្លៀកបំពាក់ និងវត្ថុប្រើប្រាស់ជាច្រើនដែលធ្វើអំពីសម្ភារកែច្នៃឡើងវិញ នៅបរិវេណE-cafe នៃក្រុមហ៊ុន ដែលស្ថិតនៅតាមបណ្តោយមហាវិថីព្រះសីហនុ។
កញ្ញា អ៊ីនហ្គ៍ អូលដ៍ រីកឃើត (Inge Olde Rikkert) ប្រធានគ្រប់គ្រងទីផ្សាររបស់ក្រុមហ៊ុនអ៊ីហ្ស៊ីខមបានឲ្យដឹងថា៖ «ពិព័រណ៍នេះមានគោលបំណងពីរយ៉ាង គឺយើងចង់បង្ហាញពីសមិទ្ធផលការងារដ៏អស្ចារ្យរបស់អង្គការមិត្តសម្លាញ់ និងការបណ្តុះបណ្តាលវិជ្ជាជីវៈរបស់ពួកគេ។ ម្យ៉ាងគឺបង្ហាញសាធារណជនថាបច្ចុប្បន្នមានក្រុមហ៊ុនបច្ចេកវិទ្យា ជាច្រើនរួមទំាងក្រុមហ៊ុនរបស់យើងផងដែរមានការយកចិត្តទុកដាក់អំពី បរិស្ថាន និងការអនុវត្តដែលមិនប៉ះពាល់ដល់បរិស្ថាន»។
កញ្ញាបាន បន្តទៀតថា ក្រុមហ៊ុនបានប្រមូលបដាផ្សព្វផ្សាយចាស់របស់អ៊ឹហ្ស៊ីខមដែលប្រើរួច ហើយប្រគល់ឲ្យទៅអង្គការមិត្តសម្លាញ់ ដើម្បីយកទៅកែច្នៃជាវត្តុប្រើប្រាស់ផ្សេងៗ បន្ទាប់ពីច្នៃរួចក្រុមហ៊ុននឹងទិញរបស់ទំាងនោះទុកធ្វើជាកាដូ អនុស្សាវរីយ៍ជូនទៅអតិថិជនរបស់ក្រុមហ៊ុនអ៊ីហ្ស៊ីខម។
ក្នុងនោះ ផងដែរ លោក ជេមស៍ ស៊ូធឺលេន (James Sutherland)ប្រធានផ្នែកទំនាក់ទំនងអង្គការមិត្តសម្លាញ់ក៏បានឲ្យដឹង ថា៖ «នៅក្នុងអង្គការយើងខ្ញុំផលិតផលភាគច្រើនគឺផលិតចេញពីសម្ភារដែលលែង ប្រើការហើយ យើងគិតថា ការបង្កើតឲ្យមានផលិតផល និងសម្លៀកបំពាក់ច្នៃនេះឡើង គឺជាវិធីសាស្រ្តដ៏ល្អក្នុងការបង្ហាញអំពីអត្ថប្រយោជន៍នៃការមិន ធ្វើឲ្យប៉ះពាល់ដល់បរិស្ថានព្រមទំាងស្នាដៃប្រកបដោយទេពកោសល្យរបស់ សិស្ស និងគ្រូនៅក្នុងអង្គការមិត្តសម្លាញ់»។
ពិព័រណ៍ដែលបាន ដាក់តាំងដូចជាសម្លៀកបំពាក់ និងសម្ភារទាំងនោះគឺច្នៃម៉ូដដោយសិស្សសាលាដែលបានបញ្ចប់ការសិក្សា នៅក្នុងអង្គការមិត្តសម្លាញ់ រីឯគ្រឿងប្រើប្រាស់ដទៃទៀតគឺផលិតដោយឪពុកម្តាយរបស់សិស្សដែល ស្ថិតនៅក្នុងគម្រោងបង្កើតប្រាក់ចំណូលគ្រួសាររបស់អង្គការនេះផង ដែរ។
ពិធីការីនីទូរទស្សន៏ស៊ីធីអិន និងជាអតីតតារាបង្ហាញម៉ូដឈ្មោះលីតា ដែលបានដើរម៉ូដសម្លៀកបំពាក់នេះបានបង្ហាញចំណាប់អារម្មណ៍ថា៖ «នេះជាលើកទីមួយហើយដែលខ្ញុំបានស្លៀកសម្លៀកបំពាក់ប្លែកបែបនេះដែល ធ្វើពីក្រណាត់PVC។ វាប្លែកបន្តិច ប៉ុន្តែខ្ញុំគិតថាវាជាគំនិតដ៏អស្ចារ្យក្នុងការច្នៃសម្ភារដែល ប្រើរួច មិនថាជាសម្ភារអ្វីទេ»។
ការបង្ហាញម៉ូដឈុតរ៉ូប កែច្នៃនេះគឺជាលើកទីពីរហើយដែលក្រុមហ៊ុនអ៊ីហ្ស៊ីខមបានរួមសហការជា មួយអង្គការមិត្តសម្លាញ់។ ក្រុមហ៊ុននេះក៏កំពុងតែផ្តល់សេវាអ៊ីនធឺណិតឥតគិតថ្លៃដល់សិស្សនៅក្នុង អង្គការផងដែរ។
ការទស្សនាម៉ូដសម្លៀកបំពាក់ និងផលិតផលដទៃទៀតដែលបង្កើតដោយសិស្សរបស់អង្គការមិត្តសម្លាញ់អាច ធ្វើទៅបាននៅ E-cafe របស់ក្រុមហ៊ុនអ៊ីហ្ស៊ីខម នៅតាមបណ្តោយផ្លូវព្រះសីហនុ ដែលពិព័រណ៍នេះនឹងតាំងបង្ហាញរយៈពេល១ខែពេញ៕

Saturday, August 18, 2012

តម្លៃដីធ្លី ក្នុងរាជធានីភ្នំពេញកើនឡើងតិចតួច

ចំនួនប្រជាជនកាន់តែច្រើន ធ្វើឲ្យដីធ្លីនៅភ្នំពេញមានតម្លៃកើនឡើងជាប្រចាំ ។ ស្រេង ម៉េងស្រ៊ុន

ភ្នំពេញ : ទីផ្សារអចលនទ្រព្យនៅរាជធានីភ្នំពេញតំបន់ដែលមានតម្លៃកើនឡើងខ្ពស់ ជាងគេគឺខណ្ឌដូនពេញ និងខណ្ឌ៧មករា ក្នុងរយៈពេល៦ខែដើមឆ្នាំ២០១២ នេះបើយោងតាមរបាយការណ៍ក្រុមហ៊ុនវាយតម្លៃអចលនទ្រព្យអេស៊ារៀល អ៊ីស្ទេត។
ទិន្នន័យបង្ហាញថា តម្លៃដីធ្លីខណ្ឌដូនពេញ និងខណ្ឌ៧មករា ក្នុងរាជធានីភ្នំពេញ នាឆមាសទី១ ឆ្នាំ២០១២នេះបានកើនឡើង១៩,៧ភាគរយ បើប្រៀបធៀបនឹងរយៈពេលដូចគ្នាកាលពីឆ្នាំ២០១១ ចំណែកតម្លៃដីធ្លីក្នុងខណ្ឌចំការមនដែលល្បីថា ជាតំបន់ល្អមានតម្រូវការច្រើននោះបានកើនត្រឹមតែ៥,៣ភាគរយ និងខណ្ឌទួលគោកបានកើនឡើង១២,៧ភាគរយ។
លោក កឺក ណារិន អនុប្រធានក្រុមហ៊ុនអេស៊ារៀលអ៊ីស្ទេត បានប្រាប់ថា កំណើននេះមានតាំងពីឆ្នាំ២០១១មកម្ល៉េះ ខណៈពេលវិបត្តិហិរញ្ញវត្ថុពិភពលោកកាន់តែមានភាពធូរស្បើយ។ លោកបញ្ជាក់ថា៖«វិស័យសេដ្ឋកិច្ចចាប់ផ្តើមដំណើរការល្អ ខណៈវិស័យធនាគារ បានបន្ធូរបន្ថយលើការប្រាក់កម្ចី ដែលបានធ្វើឲ្យវិស័យអចលនទ្រព្យកាន់តែមានភាពប្រសើរឡើងៗ ជាមួយនឹងអ្នកទិញអចលនទ្រព្យសព្វថ្ងៃមានទិសដៅច្បាស់លាស់»។
របាយការណ៍ នោះបានបង្ហាញទៀតថា ដីធ្លីក្នុងខណ្ឌដូនពេញ តំបន់ធ្វើពាណិជ្ជកម្មនៅឆមាសទី១ឆ្នាំនេះ មានតម្លៃជាមធ្យម ៣៣៦៥ដុល្លារក្នុងមួយម៉ែត្រការ៉េ និងតំបន់លំនៅដ្ឋានមានតម្លៃ ២០៤២ដុល្លារ បើធៀបនឹងរយៈពេលដូចគ្នាឆ្នាំមុនតំបន់ធ្វើពាណិជ្ជកម្មមួយ ម៉ែត្រការ៉េថ្លៃ២៨៣២ដុល្លារ និងតំបន់លំនៅដ្ឋានមានតម្លៃ១៦៩២ដុល្លារ។
ខណ្ឌ៧មករា តំបន់ធ្វើពាណិជ្ជកម្មនៅឆមាសទី១ឆ្នាំនេះតម្លៃ ៣ ០០០ដុល្លារក្នុងមួយម៉ែត្រការ៉េ និងតំបន់លំនៅដ្ឋានមានតម្លៃ១៦៨១ដុល្លារ បើប្រៀបធៀបនឹងរយៈពេលដូចគ្នាឆ្នាំមុនតំបន់ធ្វើពាណិជ្ជកម្មមួយ ម៉ែត្រការ៉េថ្លៃ២៥៩៧ដុល្លារ និងតំបន់លំនៅដ្ឋានមានតម្លៃ១ ៣៥៧ដុល្លារ។
ដីធ្លីក្នុងខណ្ឌចំការមន តំបន់ធ្វើពាណិជ្ជកម្មនៅឆមាសទី១ឆ្នាំនេះតម្លៃគិតជាមធ្យម ២ ៦៨៥ដុល្លារក្នុងមួយម៉ែត្រការ៉េ និងតំបន់លំនៅដ្ឋានមានត្រឹមតែ ១ ៣៦២ដុល្លារ បើប្រៀបធៀបនឹងរយៈពេលដូចគ្នាឆ្នាំមុនតំបន់ធ្វើពាណិជ្ជកម្មមួយ ម៉ែត្រការ៉េថ្លៃ២ ៥០៣ដុល្លារ និងតំបន់លំនៅដ្ឋានជាមធ្យមត្រឹមតែ១ ៣១៧ដុល្លារ។ រីឯដីធ្លីក្នុងខណ្ឌទួលគោក តំបន់ធ្វើពាណិជ្ជកម្មមានតម្លៃគិតជាមធ្យម ២ ១៤០ដុល្លារក្នុងមួយម៉ែត្រការ៉េ និងតំបន់លំនៅដ្ឋានមានតម្លៃ៩៤៨ដុល្លារ បើប្រៀបធៀបទៅនឹងឆ្នាំមុនតំបន់ធ្វើពាណិជ្ជកម្មមួយម៉ែត្រការ៉េ ថ្លៃ១ ៨២៧ដុល្លារ និងតំបន់លំនៅដ្ឋានមានតម្លៃ៨៧៤ដុល្លារ។
លោក ណារិន មានថ្លែងទៀតថា តម្លៃទីផ្សារអចលនទ្រព្យនៅដំណាច់ឆ្នាំនេះមិនរំពឹងថា កើនឡើងលើសឆ្នាំទៅមិញច្រើនទេ គឺវាអាចត្រឹមតែ៦ភាគរយប៉ុណ្ណោះ។ លោកបានលើកឡើងថា អ្នកវិនិយោគផ្នែកវិស័យអចលនទ្រព្យមានការយល់ដឹងច្រើនក្នុងការ ប្រែក្លាយលំនៅដ្ឋានដើម្បីធ្វើអាជីវកម្ម ដែលពីមុនពួកគាត់វិនិយោគតែវីឡា ប៉ុន្តែឥឡូវនេះបានចាប់ផ្តើមវិនិយោគជាអាផាតមិន លក់ឬជួលវិញម្តង។
លោក បញ្ជាក់ថា៖«វីឡាមួយជួលបានតែ៣ទៅ៤ពាន់ដុល្លារក្នុងមួយខែ តែបើសាងសង់ធ្វើជាអាផាតមិន ស្ថិតនៅតំបន់ដូចគ្នា ទំហំដីប៉ុនគ្នាវិញគាត់អាចរកចំណូលបានពី៤ទៅ៥ម៉ឺនដុល្លារក្នុង មួយខែ»។ លោកបន្តថា តម្រូវការជួលអាផាតមិន បានកើនលើសការផ្គត់ផ្គង់ពី៥ទៅ១០ភាគរយ។
លោក ស៊ឹង ប៊ុណ្ណា ប្រធានក្រុមហ៊ុនប៊ុណ្ណារៀលធីគ្រុប និងជាប្រធានសមាគមអ្នកវាយតម្លៃអចលនទ្រព្យកម្ពុជាបានថ្លែងថា ទីផ្សារអចលនទ្រព្យនៅភ្នំពេញតម្លៃទិញដូរពិតប្រាកដនៅឆមាសទី១ ឆ្នាំនេះបានកើនឡើង១០ភាគរយ បើប្រៀបធៀបទៅនឹងរយៈពេលដូចគ្នាកាលពីឆ្នាំមុន។
លោកបាន ប្រាប់ឲ្យដឹងទៀតថា ដីធ្លីខណ្ឌដូនពេញគ្របដណ្តប់ទៅដោយការវិនិយោគសំណង់ច្រើនមែន ប៉ុន្តែខណ្ឌនេះមានទីតាំងល្អតែមួយចំនួនប៉ុណ្ណោះ។ លោកបញ្ជាក់ថា ៖«ខណ្ឌដូនពេញ និងខណ្ឌចំការមន ល្អដូចគ្នា មានសក្តានុពលនៃការវិនិយោគប្រហាក់ប្រហែលគ្នា ជាក់ស្តែងលំនៅដ្ឋានតំបន់បឹងកេងកង១ ជាតំបន់មានតម្រូវការចាំបាច់ខ្លាំងជាងតំបន់ផ្សេងៗទៀតនៅភ្នំពេញ» ។ លោកបន្ថែមថា ដីធ្លីខណ្ឌចំការមន មានសក្តានុពល៥០ភាគរយ ដូនពេញមាន៧០ភាគរយ និងតំបន់ខណ្ឌ៧មករាជាតំបន់ដែលមានលក្ខណៈទីផ្សារចម្រុះតែទីផ្សារ ដោះដូរនៅមានកម្រិតនៅឡើយ៕

Monday, July 30, 2012

AirAsia អាចបន្តការហោះហើរទៅអឺរ៉ុបជាមួយ Airbus A330 ថ្មី

យន្តហោះ Airbus A340 របស់ក្រុមហ៊ុន AirAsia X។ Reuters

ក្រុងស៊ីដនីៈ ក្រុមហ៊ុនអាកាសចរណ៍ AirAsia X Sdn ដែលជាក្រុមហ៊ុនផ្តល់សេវាហោះហើរផ្លូវឆ្ងាយរបស់ក្រុមហ៊ុនអាកាស ចរណ៍ផ្តល់សេវាហោះហើរតម្លៃទាបរបស់អាស៊ី បានឲ្យដឹងថា ផែនការបញ្ជាទិញយន្តហោះ A330 ស៊េរីថ្មី ពីក្រុមហ៊ុនផលិតយន្តហោះ Airbus អាចធ្វើឲ្យក្រុមហ៊ុនអាកាសចរណ៍របស់ខ្លួន ស្តារអាជីវកម្មផ្តល់សេវាហោះហើរនៅតំបន់អឺរ៉ុបឡើងវិញ ដែលអាជីវកម្មនេះ មិនសូវបានទទួលជោគជ័យ ដោយសារការប្រើប្រាស់យន្តហោះចាស់ៗ។
លោក Azran Osman Rani អគ្គនាយកក្រុមហ៊ុនអាកាសចរណ៍ AirAsia បានឲ្យដឹងក្នុងបទសម្ភាសមួយនៅទីក្រុងស៊ីដនីកាលពីម្សិលមិញថា៖ «យើងនឹងផ្តល់សេវាហោះហើរទៅកាន់តំបន់អឺរ៉ុបបានកាន់តែច្រើន ដោយប្រើប្រាស់យន្តហោះថ្មីៗទាំងនេះ»។ លោក បានបដិសេធមិនប្រាប់ពីចំនួនយន្តហោះ A330 ដែលក្រុមហ៊ុនអាកាសចរណ៍របស់ប្រទេសម៉ាឡេស៊ីនេះ នឹងបញ្ជាទិញ ឬពេលវេលាដែលក្រុមហ៊ុននេះ នឹងចាប់ផ្តើមផ្តល់សេវាហោះហើរទៅអឺរ៉ុបជាថ្មីនោះទេ។
លោក Azran មានប្រសាសន៍ថា៖ «យន្តហោះ A330 ថ្មី នឹងអាចផ្តល់ប្រាក់ចំណេញច្រើនសម្រាប់ការផ្តល់សេវាហោះហើរទៅ កាន់តំបន់អឺរ៉ុប ដោយសារយន្តហោះទាំងនោះ ស៊ីសាំងតិច និងមានសមត្ថភាពខ្ពស់។ ក្រុមហ៊ុន AirAsia X បានបញ្ចប់ការផ្តល់សេវាហោះហើរទៅកាន់តំបន់អឺរ៉ុបកាលពីដើម ឆ្នាំនេះ ដោយសារតម្លៃប្រេងខ្ពស់ តម្រូវការធ្លាក់ចុះ និងដោយសារការហូតពន្ធលើការបញ្ចេញកាបូន។
ក្រុមហ៊ុនផលិត យន្តហោះ Airbus បានប្រកាសពីផែនការផលិតយន្តហោះ A330 ដែលមានបំពាក់ម៉ាស៊ីនភ្លោះកាលពីដើមខែនេះ ដើម្បីប្រកួតប្រជែងជាមួយនឹងយន្តហោះម៉ូដែល 787 និងយន្តហោះម៉ូដែល 777 របស់ក្រុមហ៊ុនផលិតយន្តហោះ Boeing។ យន្តហោះម៉ូដែលថ្មីនេះ ដែលនឹងចាប់ផ្តើមផ្តល់សេវាហោះហើរនៅឆ្នាំ២០១៥ នឹងប្រើប្រាស់បច្ចេកវិទ្យាពីយន្តហោះម៉ូដែល A350 ដើម្បីបង្កើនចំណាត់ថ្នាក់ និងសមត្ថភាពរបស់យន្តហោះប្រភេទនេះ។
លោក Azran មានប្រសាសន៍បន្តថា ក្រុមហ៊ុនអាកាសចរណ៍ AirAsia X ដែលកំពុងផ្តល់សេវាហោះហើរនៅតំបន់អាស៊ី និងប្រទេសអូស្រ្តាលី ក៏មានផែនការលក់ភាគហ៊ុនប្រមាណពី ២៥ ភាគរយ ទៅ ៣០ ភាគរយផងដែរនៅក្នុងការបោះផ្សាយមូលបត្រជាសាធារណៈលើកដំបូង(IPO) របស់ខ្លួន៕ BP

Tuesday, July 3, 2012

ក្រសួងឧស្សាហកម្មគ្រោងដំឡើងថ្លៃចរន្តអគ្គិសនីទូទាំងប្រទេស

ក្រសួងឧស្សាហកម្ម រ៉ែ និងថាមពល មានផែនការដំឡើងថ្លៃចរន្តអគ្គិសនី នៅពេលឆាប់ៗនេះ ដើម្បីទប់ទល់នឹងការខាតបង់ថវិការដ្ឋ ដែលបានចំណាយនៅឆ្នាំ២០១២ នេះ ដោយសារតែតម្លៃប្រេងឥន្ធនៈឡើងថ្លៃខ្ពស់កន្លងមក។

រដ្ឋលេខាធិការក្រសួងឧស្សាហកម្ម រ៉ែ និងថាមពល លោក ទុន លាង នៅថ្ងៃទី២ ខែកក្កដា ឆ្នាំ២០១២ បានប្រកាសថា ក្រសួងនេះអនុញ្ញាតឲ្យអគ្គិសនីកម្ពុជា ដំឡើងថ្លៃចរន្តអគ្គិសនីនៅទូទាំងប្រទេសកម្ពុជា នៅពេលខាងមុខនេះ បើមិនដូច្នោះទេ អគ្គិសនីកម្ពុជា មិនអាចបន្តរងការខាតបង់ប្រាក់ចំណូលទៀតឡើយ។
ការខាតបង់ប្រាក់ចំណូលនោះ គឺច្រើនលានដុល្លារអាមេរិក នៅឆ្នាំ២០១២ នេះ នៅគ្រាដែលតំលៃប្រេងសាំងបានឡើងថ្លៃខ្ពស់រហូតដល់ ៥.៩០០រៀលក្នុងមួយលីត្រ ប្រៀបធៀបនៅពេលនេះ តំលៃប្រេងសាំងបានធ្លាក់តម្លៃមក ៥.០០០រៀលក្នុងមួយលីត្រ។ កាលពីឆ្នាំ២០១១ កន្លងទៅនេះ អគ្គិសនីកម្ពុជា (EDC) បានទទួលប្រាក់ចំណេញចំនួនជាង ៣០លានដុល្លារអាមេរិកពីការលក់ចរន្តអគ្គិសនី នៅគ្រាដែលតំលៃប្រេងសាំងនៅថោក។
មន្ត្រីជាន់ខ្ពស់ក្រសួងឧស្សាហកម្ម រ៉ែ និងថាមពល មិនបានប្រាប់ឲ្យដឹងជាក់លាក់ទេថា តើការដំឡើងថ្លៃចរន្តអគ្គិសនីនោះ នឹងចាប់ផ្ដើមនៅថ្ងៃណា និងមានតំលៃប៉ុន្មានក្នុងមួយគីឡូវ៉ាត់ម៉ោង នៅតាមតំបន់នីមួយៗ។
តំលៃចរន្តអគ្គិសនីនៅទីក្រុងភ្នំពេញ បច្ចុប្បន្នមានតំលៃខុសគ្នាតិចច្រើនទៅតាមចំនួនប្រើប្រាស់ អគ្គិសនី។ ក្នុងនោះមានតម្លៃ ៣៥០ តំលៃ ៥៥០រៀល និងតំលៃ ៧៥០រៀលក្នុងមួយគីឡូវ៉ាត់ម៉ោង ប្រៀបធៀបនឹងខេត្ត និងតំបន់ដទៃទៀត គឺតំលៃ ១.២០០រៀលក្នុងមួយគីឡូវ៉ាត់ម៉ោង និងតំលៃលើសនេះទៀតក៏មាន។
រដ្ឋលេខាធិការក្រសួងឧស្សាហកម្ម រ៉ែ និងថាមពល លោក ទុន លាង បានមានប្រសាសន៍ប្រាប់អ្នកកាសែតថា ក្រសួងឧស្សាហកម្ម រ៉ែ និងថាមពល កំពុងតែរៀបចំឲ្យដំឡើងថ្លៃចរន្តអគ្គិសនីឆាប់ៗនេះហើយ៖ «ឆ្នាំ នេះទេ ប្រេងឡើងធ្វើឲ្យចំណូលអគ្គិសនីហ្នឹងមិនបានតាមបំណង ដោយសារអត់ទាន់ឡើងថ្លៃភ្លើង (អគ្គិសនី) អ៊ីចឹងថ្លៃភ្លើងនឹងអាចសុំឡើងនៅពេលដ៏ខ្លីខាងមុខនេះ បើសិនមិនឡើង អគ្គិសនីកម្ពុជា ខាតហើយ»។
លោកបានបន្តថា មូលហេតុដែលតម្លៃអគ្គិសនីកម្ពុជា ថ្លៃជាងប្រទេសជិតខាង គឺដោយសារតែកម្ពុជា មានរោងចក្រផលិតអគ្គិសនីភាគច្រើនប្រើប្រាស់ប្រេងឥន្ធនៈ។
ទាក់ទងនឹងបញ្ហាគម្រោងឡើងថ្លៃអគ្គិសនីនេះ មន្ត្រីជាន់ខ្ពស់មួយរូបខាងផ្នែកពាណិជ្ជកម្ម នៃអគ្គិសនីកម្ពុជា សុំមិនធ្វើអត្ថាធិប្បាយអ្វីទេ។
អាជីវករម្នាក់នៅទីក្រុងភ្នំពេញ សុំមិនឲ្យបញ្ចេញឈ្មោះ បាននិយាយថា គ្រួសាររបស់នាងប្រើប្រាស់ចរន្តអគ្គិសនីអស់ចំនួនជាង ៣០០គីឡូវ៉ាត់ម៉ោងក្នុងមួយខែ និងត្រូវចំណាយថវិកាចំនួនជាង ២៦ម៉ឺនរៀលក្នុងមួយខែ។
នាងមិនសប្បាយចិត្តចំពោះគម្រោងដំឡើងថ្លៃចរន្តអគ្គិសនីខាងមុខនេះទេ៖ «... កាលណាឯកជនឡើងថ្លៃតាមចិត្ត ប្រជារាស្ត្ររស់នៅងាប់ហើយ ពិបាកងាប់ហើយ ភ្លើង។ អ្នករត់ម៉ូតូឌុបអីក៏គេត្រូវការភ្លើងប្រើដែរ ដល់ពេលគាត់ធ្វើអ៊ីចឹង ខ្ញុំអត់គាំទ្រទេ។ រដ្ឋមិនគួរធ្វើអ៊ីចឹងទេ រដ្ឋត្រូវតែអនុញ្ញាតឲ្យក្រុមហ៊ុនដទៃទៀតចូលរួមដេញថ្លៃ»។
រដ្ឋលេខាធិការក្រសួងឧស្សាហកម្ម រ៉ែ និងថាមពល លោក ទុន លាង បានមានប្រសាសន៍ថា ប្រទេសកម្ពុជា ត្រូវការទិញចរន្តអគ្គិសនីចំនួន ៤៥% នៅទូទាំងប្រទេសពីប្រទេសថៃ វៀតណាម និងឡាវ៕

Chevron៖ ការផលិតប្រេងពន្យាររហូតដល់ឆ្នាំ២០១៦

ភ្នំពេញៈ ការផលិតប្រេងនៅកម្ពុជាអាចនឹងចាប់ផ្តើមនៅឆ្នាំ២០១៦ ឬយ៉ាងហោចណាស់៣ឆ្នាំទៀត បន្ទាប់ពីកាលបរិច្ឆេទកំណត់ជាលើកដំបូង។ នេះបើតាមសេចក្តីរាយការណ៍របស់មន្ត្រី Chevron នៅក្នុងកិច្ចប្រជុំមួយនៅក្រសួងបរិស្ថាន កាលពីថ្ងៃសុក្រស្តីពីការវាយតម្លៃលើ EIA របស់ Chevron។
មន្ត្រីរដ្ឋាភិបាល កាលពីម្សិលមិញក៏បានអះអាងអំពីលទ្ធភាពកំណត់ពេលវេលារុករកប្រេងនេះផងដែរ។
អ្នក ចូលរួមក្នុងកិច្ចប្រជុំនោះបានឲ្យដឹងថា ប្រសិនបើក្រុមហ៊ុន Chevron Overseas Petroleum Cambodia ទទួលបានការយល់ព្រមសម្រាប់ការផលិតប្រេងនៅចុងឆ្នាំនេះ វាអាចចាប់ផ្តើមដំណើរការរយៈពេល៣៤ខែ ដែលនឹងនាំដល់ការបូមប្រេងនៅក្នុងប្លុក A។
លោក ម៉ម សម្បត្តិ ប្រធាននាយកដ្ឋានភាពជាដៃគូអភិវឌ្ឍន៍សកម្មភាព (DPA) បានដកស្រង់ព័ត៌មាននៅក្នុងកិច្ចប្រជុំនោះថា ដំណើរការនេះនឹងរួមមានការសម្រេចចិត្ត និងការព្រមព្រៀងវិនិយោគ ផ្ទៃក្នុង ជាមួយរដ្ឋាភិបាល។
លោក ឌឹប សេរីវីសិទ្ធិ អ្នកនាំពាក្យរបស់អាជ្ញាធរប្រេងកាតជាតិកម្ពុជា (CNPA) បានឲ្យដឹងតាមអ៊ីមែល កាលពីថ្ងៃម្សិលមិញថា៖ «ប្រសិនបើអ្វីៗគ្រប់យ៉ាង អាចដំណើរការទៅដោយរលូន នោះរយៈពេល៣៤ខែនឹងជាពេលវេលាសមស្របសម្រាប់ផលិតកម្មនេះ។ ឆ្នាំ២០១៦ ជាពេលវេលាសមស្រប ដោយសារតែភាពយឺតយ៉ាវនៃស្ថានភាពបច្ចុប្បន្ន»។
ទោះ បីជាថ្ងៃទី១២ ខែ១២ ឆ្នាំ២០១២ ជាកាលបរិច្ឆេទសម្រាប់ផលិតតំណក់ប្រេងលើកដំបូងក្តី ក៏ក្រុមហ៊ុន Chevron បានឲ្យដឹងក្នុងសេចក្តីប្រកាសព័ត៌មានតាមអ៊ីនធឺណិត កាលពីខែមេសាថា ខ្លួនសង្ឃឹមថានឹងទទួលបានការអនុម័តលើការផលិតកម្មនៅចុងឆ្នាំ នេះ។
កាលពីខែមករា ឆ្នាំ២០១២ នេះអ្នកនាំពាក្យរបស់រដ្ឋាភិបាល បានឲ្យដឹងថា លទ្ធភាពនៃការទាញយកប្រេងនៅឆ្នាំនេះនឹងមិនអាចធ្វើទៅរួចឡើយ។
លោក Steve Glick ប្រធានប្រតិបត្តិការរបស់ Chevron នៅកម្ពុជា កាលពីថ្ងៃម្សិលមិញ បានបដិសេធមិនអត្ថាធិប្បាយទាក់ទងនឹងកាលបរិច្ឆេទផលិតកម្មប្រេង ទេ។ ប៉ុន្តែលោកបានផ្តល់ពន្លឺទាក់ទងស្ថានភាពនៃការវាយតម្លៃផលប៉ះពាល់ លើបរិស្ថាន (EIA) ។
កាលពីសប្តាហ៍មុន ភ្នំពេញ ប៉ុស្តិ៍ បានទទួល EIA ទាក់ទងនឹងផលិតកម្មប្រេងរបស់ Chevron នៅក្នុងតំបន់រុករកប្រេងក្នុងឈូងសមុទ្រកម្ពុជា។ ទោះបីជាឯកសារនេះត្រូវបានលាតត្រដាងជាសាធារណៈជាលើកដំបូងក៏ ដោយ ប៉ុន្តែលោក Glick បានឲ្យដឹងថា ក្រុមហ៊ុនរបស់លោក បានបញ្ចប់ EIA ៣ រាប់បញ្ចូលទាំងរបាយការណ៍ស្តីពីការទាញយកប្រេងផងដែរ។ លោកបានលើកឡើងថា៖ «យើងនៅកម្ពុជាក្នុងរយៈពេល១០ឆ្នាំ ហើយ Chevron បានបង្ហាញ EIA ចំនួន២រួចទៅហើយ ក្នុងពេលនោះ»។ លោកបានបន្ថែមថា ក្រុមហ៊ុននេះបានបញ្ចប់កម្មវិធីគ្រប់គ្រងបរិស្ថាន ទាក់ទងនឹងប្រតិបត្តិការរបស់ខ្លួន។
EIA ស្តីពីការរុករកប្រេង គឺតម្រូវដោយច្បាប់កម្ពុជា។
ការ បារម្ភនៅតែមានចំពោះ EIA ភាគច្រើនរបស់ Chevron។ របាយការណ៍ បានកំណត់ផលប៉ះពាល់ «តិច» ឬ «មិនសូវច្រើន» លើបរិស្ថាន និងសហគមន៍ក្បែរតំបន់នោះ ដោយកន្លែងខ្លះស្ថិតនៅ១៥៧គីឡូម៉ែត្រ ឆ្ងាយពីឆ្នេរសមុទ្រកម្ពុជា។
ទោះបីជាយ៉ាងនេះក្តី លោក ម៉ម សម្បត្តិ បានឲ្យដឹងថា ផលប៉ះពាល់ដ៏ខ្លាំងក្លាលើវិស័យទេសចរណ៍ និងសហគមន៍នេសាទ ត្រូវការកិច្ចពិភាក្សាបន្ថែម។ លោកបានលើកឡើងថា៖ «យើងព្រួយបារម្ភថា អ្នកនេសាទនឹងត្រូវបានមិនអនុញ្ញាតឲ្យទៅក្បែរនោះទេ។ ពួកគេអាចទទួលរងផលប៉ះពាល់លើសេដ្ឋកិច្ចគ្រួសារ ប៉ុន្តែបញ្ហានេះ មិនទាន់ត្រូវបានពិភាក្សានៅឡើយទេ។ ភ្ញៀវទេសចរ បានទៅទស្សនាកោះក្បែរៗតំបន់ផលិតប្រេង។ យើងមិនដឹងថា ប្រតិបត្តិការនេះនឹងមានផលប៉ះពាល់យ៉ាងណាទេ»។
ក្រុមហ៊ុន Chevron បានខួងអណ្តូងរុករកប្រេង១៨ មុននឹងប្រកាសការរកឃើញប្រេងសម្រាប់ធ្វើពាណិជ្ជកម្មពីឆ្នាំ ២០១០។ ក្រុមហ៊ុននេះ មានភាគហ៊ុន ៣០ភាគរយ នៅប្លុក A ឬហៅថាតំបន់អប្សារា៕

ភ្នាក់ងារមូលបត្រមិនបារម្ភពីការប្តូរអគ្គនាយក

ភ្នំពេញៈ ក្រុមហ៊ុនមូលបត្របានឲ្យដឹងថាគេមិនបារម្ភអំពីការផ្លាស់ប្តូរ អគ្គនាយករដ្ឋាករទឹកស្វ័យភ្នំពេញ(PPWSA)ឡើយតែអះអាងថាអាចនឹងបង្ក ផលប៉ះពាល់តិចតួចរយៈពេលខ្លី។
លោក ឯក សុនចាន់ ដែលបម្រើការជាអគ្គនាយក PPWSA ប្រហែល២០ឆ្នាំមកហើយនោះត្រូវបានដាក់ឲ្យចូលនិវត្តន៍នៅថ្ងៃ ត្រឹមថ្ងៃទី១ ខែកក្កដា។
លោក ស្វាយ ហៃ នាយកក្រុមហ៊ុនឈ្មួញជើងសារបស់ធនាគារអេស៊ីលីដាបានឲ្យដឹងថា ការផ្លាស់ប្តូរអគ្គនាយកថ្មី នឹងធ្វើឲ្យលទ្ធផលរបស់ក្រុមហ៊ុននេះកាន់តែប្រសើរ។ លោកថ្លែងថា៖ «ការផ្លាស់ប្តូរនេះ មិនបង្កឲ្យមានបញ្ហា ឬវិបត្តិណាមួយឡើយ។ វាទាក់ទងនឹងអាយុចាស់របស់អគ្គនាយកដែលត្រូវចូលនិវត្តន៍។ បញ្ហានេះមិនមែនកើតមានតែនៅក្នុងស្ថាប័នរបស់រដ្ឋាភិបាលនោះទេ វាក៏កើតមាននៅក្នុងក្រុមហ៊ុនឯកជនផងដែរ គឺពួកគេត្រូវតែកំណត់អាយុចូលនិវត្តន៍»។
លោក ស្វាយ ហៃ បានបន្ថែមថា៖ «ខ្ញុំសង្ឃឹមថា ស្ថាប័នធំរបស់ PPWSA និងរដ្ឋាភិបាលបានព្យាករច្បាស់លាស់រួចហើយអំពីសារៈសំខាន់នៃការ ផ្លាស់ប្តូរ ដើម្បីឲ្យស្ថាប័ននេះមានភាពរីកចម្រើន ពីព្រោះពួកគេឃើញអគ្គនាយកចាស់ធ្វើការបានល្អ ដូច្នេះពួកគេចង់ដាក់អ្នកថ្មី ដើម្បីឲ្យតម្លៃភាគហ៊ុននៅថេរ ឬឡើងថ្លៃ»។
លោក តាន សុខជា មន្ត្រីបម្រើការនៅនាយកដ្ឋានទឹកស្អាតនៅក្រសួងឧស្សាហកម្ម រ៉ែ និងថាមពលអះអាងថា មិនមានជម្លោះផ្ទៃក្នុងកើតឡើងជុំវិញការផ្លាស់ប្តូរនេះឡើយ។ លោកបន្តថា៖ «វាជាការផ្លាស់ប្តូរធម្មតាដោយសារតែលោកចូលនិវត្តន៍ ដូចនេះអ្នកថ្មី គួរមកជំនួសតំណែងលោក»។
លោក តាន សុខជា ក៏បានទទួលស្គាល់ និងស្ងើចសរសើរលទ្ធផលការងាររបស់លោក ឯក សុនចាន់ ក្នុងអាណត្តិការងាររបស់លោកផងដែរ៖«លោកបានសម្រេចលទ្ធផលជាច្រើន សម្រាប់ស្ថាប័នរបស់លោក ហើយលោកបានយកចិត្តទុកដាក់ចំពោះបុគ្គលិករបស់លោក ស្មើៗគ្នា តាមច្បាប់។ តាមដែលខ្ញុំដឹង បុគ្គលិកទាំងអស់ ស្រឡាញ់លោកណាស់។ និយាយដោយស្មោះទៅ លោកជាមេដឹកនាំដ៏ល្អ និងប្រសើរណាស់»។
លោក សង្ឃឹមថា អ្នកថ្មីមានជំនាញ និងមានសមត្ថភាពគ្រប់គ្រាន់ ដើម្បីបន្តការងារពីលោក ឯក សុនចាន់។ លោកបន្ថែមថា ការចាកចេញនេះមិនពាក់ព័ន្ធនឹងអំពើពុករលួយឡើយ។ លោក សុខជា បានលើកឡើងទៀតថា៖ «យើងពិតជាអាណិតគាត់ណាស់ ប៉ុន្តែនេះជាវដ្តជីវិតដែលមិនមែនកើតឡើងតែចំពោះគាត់ប៉ុណ្ណោះទេ គឺកើតឡើងចំពោះយើងគ្រប់ៗគ្នា។ ដូច្នេះហើយទើបរដ្ឋាភិបាល ព្យាយាមបណ្តុះបណ្តាល និងអប់រំយុវជនឲ្យមកជំនួសតំណែងអ្នកចូលនិវត្តន៍»។
លោក Min Kyoung Hoon អគ្គនាយករងនៃផ្សារមូលបត្រកម្ពុជាបានលើកឡើងថា ការចូលនិវត្តន៍របស់អគ្គនាយករដ្ឋាករទឹកអាចនឹងប៉ះពាល់ ឬមិនប៉ះពាល់អាស្រ័យលើអ្នកដែលត្រូវមកគ្រប់គ្រងបន្ត។ លោកបន្ថែមថា៖ «ខ្ញុំជឿជាក់ថា រដ្ឋាភិបាលកម្ពុជា នឹងចាត់តាំងអគ្គនាយកដែលល្អ និងអស្ចារ្យសម្រាប់ PPWSA។ ដូច្នេះ ខ្ញុំគិតថា វាអាចនឹងមិនប៉ះពាល់ដល់តម្លៃភាគហ៊ុនឡើយ»។
លោក Min Kyoung Hoon បានលើកឡើងថា៖ «គ្រប់ប្រទេស និងទីផ្សារទាំងអស់ដែលមានការផ្លាស់ប្តូរដូចនៅទីនេះ អាចនឹងមានផលប៉ះពាល់តិចតួចដល់តម្លៃភាគហ៊ុនរបស់ក្រុមហ៊ុន ដូចដែលអ្នកដឹងហើយថា នៅពេល Steve Job ស្លាប់ មានការផ្លាស់ប្តូរមួយចំនួន ដល់តម្លៃភាគហ៊ុនរបស់ Apple។
លោក ស៊ីម ស៊ីថា អគ្គនាយករដ្ឋាករទឹកខេត្តព្រះសីហនុ បានអះអាងកាលពីម្សិលមិញថា លោកនឹងគ្រប់គ្រងក្រុមហ៊ុនរដ្ឋមួយនេះឲ្យមានប្រសិទ្ធភាព។
តម្លៃ ភាគហ៊ុនរបស់រដ្ឋាករទឹក បានបិទឈប់លក់ក្នុងតម្លៃ ៦ ៣៥០រៀល កាលពីម្សិលមិញ ពោលគឺនៅពីលើតម្លៃIPOតែ៥០រៀលប៉ុណ្ណោះ។
លោក ស្វាយ ហៃ ឲ្យដឹងថា ដោយសារការចាប់ផ្តើមធ្វើពាណិជ្ជកម្មនៅប្រទេសជាច្រើន ដូចជាឡាវ និងប្រទេសអភិវឌ្ឍន៍មួយចំនួន ភាគហ៊ុនអាចនឹងឡើងចុះខ្ពស់ ឬទាបជាងតម្លៃ IPO ដូចជាភាគហ៊ុនfacebook ជាដើម។
លោកបន្តថា៖ «ខ្ញុំសង្ឃឹមថា ក្រុមហ៊ុនចេញលក់ភាគហ៊ុននឹងចេញរបាយការណ៍ចំណូលរបស់គេឲ្យបាន ឆាប់រហ័ស នោះវានឹងធ្វើឲ្យតម្លៃភាគហ៊ុនរបស់វាប្រែប្រួល ប៉ុន្តែពេលនេះតម្រូវការនិងការផ្គង់ផ្គង់អាចប្រើប្រៀបបានដូច្នេះ វានឹងឡើងចុះតិចតួច»។
លោក Min Kyoung Hoon បានឲ្យដឹងថា មានហេតុផលជាច្រើននៅពីក្រោយនោះ។ លោកបន្តថា៖ «យើងកំពុងព្យាយាមរកឲ្យបានច្បាស់លាស់ហេតុអ្វីបានជាតម្លៃរបស់ វាធ្លាក់ចុះ »៕

Friday, June 15, 2012

ក្រុមហ៊ុនដាក់ចំណាត់ថ្នាក់តែរៀងៗខ្លួន

ភ្នំពេញៈ យុទ្ធសាស្រ្តក្នុងការទាញអតិថិជនក្នុងទីផ្សារសេវាទូរស័ព្ទដ៏ តូចចង្អៀតរបស់កម្ពុជាកំពុងត្រូវបានគេធ្វើសម្រាប់ជាការដាក់ ចំណាត់ថ្នាក់។
ក្រុមហ៊ុន Smart Mobile ក្នុងសប្តាហ៍នេះបានប្រកាសថា មានអតិថិជន៣លាននាក់ ពោលជាក្រុមហ៊ុនជាប់ចំណាត់ថ្នាក់ទីពីរនៅកម្ពុជាបើគិតតាម ចំនួនអតិថិជនបន្ទាប់ពីក្រុមហ៊ុនមិត្តហ្វូន របស់វៀតណាម។
តួលេខដែលទទួលបានដោយភ្នំពេញ ប៉ុស្តិ៍បានបង្ហាញថា ក្រុមហ៊ុនCellcard មានប្រើប្រាស់២,៩លាននាក់តាំងពីឆ្នាំ២០១១។
អ្នកវិភាគនិយាយថា ចំនួនដ៏ច្រើនលើសលប់នៃអ្នកប្រើប្រាស់សេវាទូរស័ព្ទទូទាំងប្រទេស ដែលច្រើនជាងចំនួនប្រជាជនកាលពីឆ្នាំមុន គឺដោយសារតែអ្នកខ្លះគ្រាន់តែជាអតិថិនប្រើរយៈពេលខ្លី និងងាយនឹងមានភាពប្រែប្រួល។
តួលេខថ្មីរបស់ Smart បានបង្ហាញអំពីចំនួនអតិថិជនរបស់ខ្លួនបានកើនឡើងជាង១លាន អ្នក ចាប់តាំងពីខែមករា។
ក្រុមហ៊ុន Hello កាលពីថ្មីៗនេះបានរាយការណ៍អំពីកំណើនអតិថិជន១៥ ភាគរយ ក្នុងត្រីមាសទី១នៃឆ្នាំនេះ បើធៀបរយៈពេលដូចគ្នាកាលពីឆ្នាំទៅ។
ក្រុមហ៊ុនមានអ្នកប្រើប្រាស់ ១,៦៧លាននាក់ ក្នុងខែវិច្ឆិកា។ នេះបើតាមតួលេខដែលភ្នំពេញប៉ុស្តិ៍ទទួលបាន។ ប្រាក់ចំណូលរបស់ Hello ទាបជាងមុន ២ ភាគរយ ដោយសារមានកំណើនខ្លាំងក្នុងត្រីមាសទីបួន។
លោក Shiv Putcha អ្នកវិភាគទីផ្សារកំពុងអភិវឌ្ឍន៍នៅក្រុមហ៊ុនស្រាវជ្រាវ Ovum មានមូលដ្ឋាននៅទីក្រុងឡុងដ៍បានឲ្យដឹងថា មានការចោទប្រកាន់ថាមានការបំប៉ោងចំនួនតួលេខ។ លោកបានថ្លែងថា៖ «នៅក្នុងទីផ្សារកំពុងអភិវឌ្ឍន៍ យើងឃើញថាអ្នកប្រើប្រាស់ធ្វើការផ្លាស់ប្តូរពីក្រុមហ៊ុនមួយ ទៅក្រុមហ៊ុនមួយទៀតជាញឹកញាប់»។
លោកកត់សម្គាល់ថា ស្តង់ដារសម្រាប់កំណត់អ្នកប្រើប្រាស់អចិន្រៃ្តយ៍ជារឿយៗមិនមានភាពច្បាស់លាស់។
នាយកប្រតិបត្តិរបស់ក្រុមហ៊ុន Smart លោក Thomas Hundt កាលពីម្សិលមិញបានថ្លែងថា ស្តង់ដាររបស់ក្រុមហ៊ុនសម្រាប់រាប់អ្នកប្រើប្រាស់គឺជា «វិធានការអន្តរជាតិដែលមានលក្ខណៈអភិរក្សបំផុត» ដោយរួមបញ្ចូលទំាងគណនីទូរស័ព្ទ ដែលបានប្រើអស់រយៈបីខែ ឬតិចជាងនេះ។
អត្រាកំណើនរបស់ទូរស័ព្ទដៃដែលទំនងជាមានលក្ខណៈខ្ពស់ក្នុង ប្រទេសកម្ពុជាអាចនឹងគិតបញ្ចូលផងដែរទៅនឹងកំណើនប្រជាប្រិយភាព ចំពោះទូរស័ព្ទដៃទំនើប ដែលអាចប្រើជាមួយស៊ីមកាតលើសពីពីរ។ នេះបើតាម លោក Shiv Putcha ដែលបានកត់សម្គាល់។
លោកបន្តថា ខណៈការភ្ជាប់នេះនៅតែបង្កើតចំណូលសម្រាប់ក្រុមហ៊ុនទូរស័ព្ទ មួយចំនួន ប៉ុន្តែពួកគេប្រហែលមិនមែនជាអតិថិជនតែមួយគត់របស់ក្រុមហ៊ុន ទាំងនោះឡើយ។
ព័ត៌មានស្តីពីអតិថិជនប្រើប្រាស់សេវារបស់ក្រុមហ៊ុន មិត្តហ្វូន និង Cellcard មិនអាចរកបានកាលពីម្សិលមិញ ហើយតំណាងនៅក្រុមហ៊ុនក៏មិនអាចទាក់ទងបានដែរ។
ក្រុមហ៊ុនមិត្តហ្វូន មានអតិថិជនចំនួន ៧,៣៥ លាននាក់ ក្នុងខែវិច្ឆិកា ឆ្នាំ២០១១។ នេះបើតាមតួលេខដែលទទួលបានដោយភ្នំពេញ ប៉ុស្តិ៍ ប៉ុន្តែអ្នកនៅក្នុងវិស័យនេះបានហៅតួលេខនេះថាមានលក្ខណៈបំប៉ោង៕

Saturday, June 9, 2012

ដំណាំពោតនៅប៉ៃលិនខូចជិតពាក់កណ្តាល

ប៉ៃលិនៈ ដំណាំពោតនៅខេត្តប៉ៃលិនកំពុងទទួលរងការខូចខាតជិតពាក់កណ្តាលដោយ សារតែភាពរាំង ស្ងូត នៅពាក់កណ្តាលរដូវ។ នេះបើយោងតាមមន្ត្រីកសិកម្មខេត្ត។
លោក ផាន់ ពេជ្រ ប្រធានមន្ទីរកសិកម្មខេត្តប៉ៃលិនបានឲ្យដឹងថា ផ្ទៃដីដាំដុះពោតនៅប៉ៃលិនមានជាង១ម៉ឺនហិកតានៅក្នុងរដូវ ទី១។ ការដាំពោតនៅខេត្តប៉ៃលិនកសិករដាំបានពីរដងក្នុងមួយឆ្នាំ ដែលវគ្តទី១ចាប់ផ្តើមពីខែមករា និងកុម្ភៈ។ លោក ផាន់ ពេជ្រ បន្តថា ក្នុងទំហំដីជាង១ម៉ឺនហិកតា ការខូចខាតអស់ប្រមាណ៤០ភាគរយ ហើយកន្លែងខ្លះដែលមិនខូចខាតក៏ទទួលបានផលតិចតួចដែរ។
លោកបន្តថា៖ «ភ្លៀងចាប់ផ្តើមធ្លាក់នៅក្នុងខែមករា ធ្វើឲ្យកសិករខំដំានៅដើមរដូវ តែក្រោយមកភ្លៀងខ្សត់ធ្វើឲ្យទិន្នផលពោតបានធ្លាក់ចុះដោយសារ គ្មានផ្លែ»។
ទោះបីយ៉ាងនេះក្តី លោកបានកត់សម្គាល់ថា តម្លៃពោតបានឡើងថ្លៃពីជាង៤០០រៀល ដល់៥០០រៀលក្នុង១គីឡូក្រាមសម្រាប់ពោតស្នួល។
កាលពីដើមខែឧសភាក្នុងពិធីច្រត់ព្រះនង័្គល គោឧសភរាជបានបរិភោគពោតនឹងសណ្តែកច្រើន ធ្វើឲ្យមានការព្យាករថាទិន្នផលពោតសម្រាប់រដូវថ្មីនេះនឹងទទួល បានផលល្អ។
លោក ជា គា ឈ្មួញទិញពោតដ៏ធំនៅខេត្តប៉ៃលិន បាននិយាយថា តាមការសង្កេតរបស់លោក ពោតនៅក្នុងខេត្តប៉ៃលិនទាំងមូលអាចខូចខាត ប្រហែលជា ៧០ ទៅ ៨០ ភាគរយ ព្រោះគ្មានភ្លៀងទាល់តែសោះពេលពោតកំពុងចេញផ្កា។ លោកបន្តថា៖ «តម្លៃអាចនឹងឡើងថ្លៃ តែយើងមិនទាន់ដឹងច្បាស់ទេ ព្រោះកសិករនៅដាំបន្តមួយរដូវទៀត»។
កសិកររូបនេះបានបន្តទៀតថា នៅវគ្គទីមួយនេះ ពួកគាត់ខូចខាតស្ទើរតែទាំងស្រុង ហើយអ្នកខ្លះបានភ្ជួរចោលទាំងអស់ដោយសារតែគ្មានផល។ លោកបន្តទៀតថា នៅពេលកសិផលនៅក្នុងស្រុកខ្វះខាត តម្លៃនឹងកើនឡើងព្រោះខ្វះខាតនៅតាមទីផ្សារ។ តម្លៃពោតពេលនេះថ្លៃ១ ២០០រៀលក្នុងមួយគីឡូក្រាម។ នេះបើតាមលោក ជា គា។
អ្នក ស្រី យ៉ង់ សុផល កសិករដំាពោតនៅខេត្តប៉ៃលិន បាននិយាយថា អ្នកស្រីបានភ្ជួរចោលនូវផ្ទៃដីដាំពោតប្រហែលប្រាំហិកតាតាំងពី ដាំបានប្រហែល១ខែ ដោយសារវាដុះមិនបានល្អ ព្រោះខ្សត់ភ្លៀងហើយអ្នកស្រីបានបង្វែរទៅដាំដំឡូងមីវិញ។
កសិកររូបនេះបានចំណាយទុនដាំពោតអស់ប្រមាណពី៣០០ទៅ៤០០ដុល្លារក្នុងមួយហិកតា។
លោក មាស លឿន កសិករនៅភូមិប៉ាងរលឹម ឃុំអូរតាវ៉ៅ ស្រុកប៉ៃលិន បានឲ្យដឹងថា ការដាំនៅវគ្គទីពីរនឹងទទួលបានផលល្អ។
លោកបន្តថា៖ «ខ្ញុំជឿថា នៅវគ្គទីពីរនេះវានឹងមិនខូចខាតទេ។ វាមិនដែលគ្មានភ្លៀងក្នុងរដូវវស្សានោះទេ»។ លោកនៅតែមានជំនឿថា ឆ្នាំនេះនឹងបានផលល្អ៕

Tuesday, May 8, 2012

ទឹកលិចផ្លូវជាច្រើនកន្លែងក្នុងរាជធានីភ្នំពេញ ដើមឈើជាច្រើនរលំ និងសង្កត់រថយន្តដោយសារភ្លៀងធំ

រាជធានីភ្នំពេញ ៖ រថយន្តម៉ាកឡែនរ៉ូវែរ និងរថយន្តម៉ាកមែរសឺដេសពណ៌ខ្មៅ ស៊េរីទំនើប ដែលចតនៅលើចិញ្ចើមផ្លូវជិតភ្លើងស្តុបបូកគោ ស្ថិតក្នុងខណ្ឌចំការមន រាជធានីភ្នំពេញ ត្រូវដើមឈើដួលរលំសង្កត់លើរងការខូចយ៉ាងដំណំ កាលពីវេលាម៉ោង៣ និង២៥នាទីរសៀលថ្ងៃទី៨ ឧសភា ២០១២ដោយសារសារតែភ្លៀងជញ្ជ្រុំ និងខ្យល់បក់បោករំលើងគល់ ។

សេចក្តីរាយការណ៍បានបញ្ជាក់ទៀតថា ខណៈពេលដែលភ្លៀងកំពុងបង្អុរនៅឡើយ