ខេត្តកំពង់ឆ្នាំង ៖ យុវជនសញ្ជាតិវៀតណាម
ម្នាក់បានរងរបួសធ្ងន់ធ្ងរ
ដោយត្រូវគេចាក់មួយកាំបិតបណ្តាលឱ្យធ្លាយពោះ
កាលពីវេលាម៉ោង៦និង៤០នាទីយប់ថ្ងៃទី២០ កុម្ភៈ
នៅផ្លូវលំស្ថិតនៅក្នុងភូមិកណ្តាល សង្កាត់ផ្សារឆ្នាំង
ក្រុងកំពង់ឆ្នាំង ។
ជនរងគ្រោះឈ្មោះង្វៀង យ៉ាំងហុង អាយុ២៥ឆ្នាំ
មានទីលំនៅភូមិ-ឃុំកើតហេតុ ។
បើតាមការប្រាប់របស់ក្រុមគ្រួសារជនរងគ្រោះបានឱ្យដឹងថា
មុនពេលកើតហេតុជនរងគ្រោះមានគ្នា៤ទៅ៥នាក់បានអង្គុយផឹកស៊ី
នៅក្បែរតារាងបាល់ទះចំណុចខាងលើ ។
លុះផឹកសីុយប់បន្តិចក៏មានទាស់ពាក្យសម្តីគ្នា
ប៉ុន្តែមិនបានវាយតប់គ្នាទេ ហើយក៏បែកគ្នាទៅផ្ទះរៀងៗខ្លួន
ប៉ុន្តែពេលជនរងគ្រោះ ដើរចេញពីកន្លែងផឹកស៊ីបានបន្តិច
ស្រាប់តែមានជនមិនស្គាល់មុខស្ទុះទៅចាក់មួយកាំបិតចុងស្រួច
បណ្តាលឱ្យធ្លាយពោះចេញពោះវៀនមកក្រៅ ។
មិត្តភក្តិដែលឃើញហេតុការណ៍ក៏យកអាវរុំមុខរបួស ហើយដឹកជនរងគ្រោះទៅសង្គ្រោះនៅមន្ទីរពេទ្យ ៕
