 |
| បភាពបន្លែស្រស់ៗនៅក្នុងផ្សារសេដាក សាខាទី១៣។ |
តើវាជាការលំបាកណាស់មែនទេក្នុងការបែងចែកថា
ម្ហូបចំណីអាហារនៅលើទីផ្សារនាពេលសព្វថ្ងៃ
ថាមួយណាប្រើសារធាតុគីមីឬក៏អត់ នោះ? ការមន្ទិលសង្ស័យទាំងនេះ
នឹងមិនអាចកើតមានទៀតទេ នៅពេលដែលអ្នកបានចូលទៅដល់ផ្សារសេដាក
(មជ្ឈមណ្ឌលសិក្សា និងអភិវឌ្ឍន៍កសិកម្មកម្ពុជា)
ពីព្រោះវាជាផ្សារមួយដែលលក់ផលិតផលធម្មជាតិរបស់ខ្មែរសុទ្ធសាធ
និងធានាដល់សុខភាពរបស់អ្នកប្រើប្រាស់។
ស្ថិតក្នុងទីតាំងផ្ទះលេខ B10 ផ្លូវ205 សង្កាត់ទំនប់ទឹក
ខណ្ឌចំការមន ជាប់នឹងរបងខាងកើតនៃសណ្ឋាគារ Intercontinental
គឺជាទីតាំងនៃផ្សារសេដាក សាខាទី១៣
ដែលទើបនឹងបើកទ្វារកាលពី២ខែមុន។
ទាំងស្លាកសញ្ញានៅខាងមុខហាង និងការរចនានៅផ្ទៃខាងក្នុង
គឺសុទ្ធតែមានសោភណភាពទំនើបគួរឲ្យទាក់ទាញ ។
លោក ម៉ោល ចាន់ណា អាយុ២៣ឆ្នាំ
ជាបុគ្គលិកផ្នែកលក់នៅក្នុងផ្សារសេដាកសាខាទី១៣នេះបាន ឲ្យដឹងថា
សាខាទី១៣ក៏ដូចជាសាខាដទៃទៀតដែរ
គឺតែងតែផ្គត់ផ្គង់នូវតម្រូវការអាហារធម្មជាតិដល់ប្រជាពលរដ្ឋ
ខ្មែរ មិនត្រឹមតែមានលើបន្លែ និងផ្លែឈើប៉ុណ្ណោះទេ
ប៉ុន្ដែថែមទាំងមានសាច់មាន់ សាច់គោ សាច់ជ្រូក និងស៊ុតទៀតផង។
លោក ចាន់ណា បានឲ្យដឹងទៀតថា ទំនិញធម្មជាតិទាំងអស់
គឺជាផលិតផលរបស់សហគមន៍ប្រជាពលរដ្ឋនៅតាមបណ្តាខេត្តនានាដែលបាន
ចូលជាសមាជិកសេដាក
ហើយបានឆ្លងកាត់ការបង្រៀននិងអប់រំពីវិធីធ្វើកសិកម្មបែបធម្មជាតិ
ដើម្បីចៀសវាងការប្រើប្រាស់ជាតិគីមីផ្សេងៗ។ ជាពិសេស
ប្រជាពលរដ្ឋទាំងនោះ
អាចលក់ផលិតផលរបស់ខ្លួនក្នុងតម្លៃខ្ពស់ជាងផលិតផលដែលមានជាតិគីមី
។
ជាក់ស្ដែង ផលិតផលលក់ដាច់ជាងគេបំផុតនៅក្នុងផ្សារសេដាក គឺអង្ករ
និងទឹកឃ្មុំដែលជាចំណីអាហារដ៏ពេញនិយមសម្រាប់ប្រជាពលរដ្ឋខ្មែរ
។ បុគ្គលិកផ្នែកលក់រូបនោះ បានបញ្ជាក់ថា៖ «ផ្សាររបស់យើង
ក៏ផ្ដល់សេវាកម្មដឹកជញ្ជូនអង្ករចាប់ពី៥០គីឡូក្រាមឡើង
ឬផលិតផលផ្សេងៗដែលមានតម្លៃ១០ម៉ឺនរៀល ជូនដល់គេហដ្ឋានរបស់អតិថិជន
តាមរយៈការទំនាក់ទំនងទូរស័ព្ទរបស់សាខានានាដែលនៅជិត
ផ្ទះពួកគេ»។ ម្យ៉ាងវិញទៀត លោកអ្នកអាចរកទិញភេសជ្ជៈ
អាហារសម្រន់ និងគ្រឿងទេសជាច្រើនប្រភេទ
ដែលពិបាករកទិញក្នុងផ្សារនានា
ពីខាងក្នុងទូរទឹកកកស្ថិតជិតជ្រុងឆ្វេងដៃផ្សារសេដាកទី១៣។
ទំនិញទាំងនោះ សុទ្ធតែបានច្នៃប្រឌិតដោយកូនខ្មែរ
និងទទួលបានការបញ្ជាក់ពីគុណភាពជាផលិតផលគ្មានជាតិគីមីដោយសេដាក
ទៀតផង។
បុគ្គលិក ដដែល បានបន្ដទៀតថា៖ «ក្រុមហ៊ុនខ្មែរផ្សេងទៀត
អាចដាក់លក់ផលិតផលរបស់ខ្លូននៅក្នុងផ្សារសេដាកក្រោយពីមានការ
ចុះត្រួតពិនិត្យគុណភាពរបស់ក្រុមការងារអង្គការសេដាក»។
ចំណែកឯលោក យ៉ង សាំងកុមារ នាយកអង្គការសេដាក បានមានប្រសាសន៍ថា
ការផ្តើមគំនិតបង្កើតនូវផ្សារសេដាកនេះឡើង
ដោយសារតែលោកចង់ផ្តល់អត្ថប្រយោជន៍ដល់ប្រជាជនកម្ពុជាលើពីរចំណុច
គឺ កត្ដាសង្គម និងហិរញ្ញវត្ថុ។ ដោយហេតុថា កត្ដាទាំង២នេះ
បាននិងកំពុងដើរតួយ៉ាងសំខាន់ចំពោះសុខភាពប្រជាពលរដ្ឋកម្ពុជា
និងបង្កើននូវចំណេះដឹងនៃអាហារសរីរាង្គ
ជាពិសេសបញ្ហាសេដ្ឋកិច្ចគ្រួសាររបស់ប្រជាពលរដ្ឋ។
លោកសាំងកុមារ បានបន្តទៀតថា៖ «មកទល់នឹងពេលនេះ
ផ្សារសេដាកពុំទាន់ទទួលបានចំណូលខ្ពស់នៅឡើយទេ
ប៉ុន្តែពួកយើងនៅតែខិតខំប្រឹងប្រែងដើម្បីប្រយោជន៍ប្រជាពលរដ្ឋ
ខ្មែរគ្រប់រូប»។
យោងទៅតាមគម្រោងរបស់អង្គការសេដាក បានឲ្យដឹងថា ទៅថ្ងៃអនាគត
ផ្សារសេដាកនឹងត្រូវបើកពង្រីករហូតដល់ទៅ២០០សាខា នៅទូទាំងប្រទេស
ដើម្បីបម្រើទៅដល់តម្រូវការរបស់ប្រជាពលរដ្ឋ
និងដើម្បីឲ្យពួកគេមានសុខភាពល្អ ព្រមទាំងបង្កើនការងារ
និងផ្ដល់ចំណេះដឹងពីអត្ថប្រយោជន៍នៃអាហារសរីរាង្គ៕(PostKhmer)
