លោកទី មុនិន្ទ ព្រះរាជអាជ្ញារងនៃតុលាការខេត្ដកំពង់ស្ពឺបានមានប្រសាសន៍ថា សាលក្រមនេះនឹងប្រកាសនៅថ្ងៃទី១៦ ខែមីនា ឆ្នាំ២០១២ ។
លោកបាននិយាយប្រាប់អ្នកសារព័ត៌មានបន្ទាប់ពីបញ្ចប់សវនាការថា ចៅក្រមកំពុងពិចារណាលើបទចោទប្រកាន់ដោយបង្វែពីបទសម្លាប់ដោយចេតនា មកជាបទសម្លាប់ដោយអចេតនាវិញដោយសារជនសង្ស័យក៏ទិញឡេនោះពីផ្សារ មកលក់បន្ដដែរ ។
លោក សោម ពុទ្ធដារ៉ា មេបញ្ជាការកងរាជអាវុធហត្ថស្រុកឱរ៉ាល់ ខេត្ដកំពង់ស្ពឺ បានថ្លែងពីពេលកន្លងមកថា បងប្អូនបង្កើត២នាក់នេះបានទិញក្រែម ធ្វើឱ្យស្បែកសហើយបានយកឡេពីអ្នកលក់ក្រែមឈ្មោះឡោ លីហួរ ជាអ្នកសំអាងយកឡេទៅលាបនៅលើស្បែករបស់ពួកគេដើម្បីធ្វើឱ្យស្បែក របស់ពួកគេសស្អាតមុនថ្ងៃរៀបការ។ ពួកគេបានលាបពីម៉ោង១រសៀលដល់ម៉ោង៧ល្ងាច ហើយបន្ទាប់ពីនោះជនរងគ្រោះមានអារម្មណ៍ពិបាកដកដង្ហើមនិងមិនអាច ស្ដាប់ឮអ្វីបន្ទាប់ពីពួកគេប្រើក្រែមនោះ។ ជនរង គ្រោះជាបងស្រីបានស្លាប់នៅម៉ោង៨និង៣០ព្រឹក រីឯប្អូនស្រីត្រូវបានបញ្ជូនទៅមន្ទីរពេទ្យបង្អែកខេត្ដដើម្បីជួយ សង្គ្រោះទាន់ពេល គឺម៉ាម សៀក អាយុ២១ឆ្នាំ បានស្លាប់ហើយប្អូនស្រីឈ្មោះម៉ាម ស្រីអូន អាយុ១៩ឆ្នាំ បានសន្លប់និងជួយសង្គ្រោះទាន់ពេល ។
លោកសោម ពុទ្ធដារ៉ា បានថ្លែងថា ជនរងគ្រោះដែលស្លាប់ត្រូវរៀបការបន្ទាប់ពីថ្ងៃបុណ្យភ្ជុំបិណ្ឌ រួច ដូច្នេះពួកគេចង់ឱ្យស្បែកមើលទៅសស្អាតពួកគេបានទិញក្រែមមកលាប ដើម្បីធ្វើឱ្យស្បែកសដោយមិនដឹងអំពីប្រតិកម្មនៃក្រែមនោះ។
ក្រសួងសុខាភិបាលមានហាមប្រាមការនាំចូលនិងលក់ក្រែមបន្សស្បែកជា ផលិតផលវៀតណាមដែលបានបណ្ដាលឱ្យស្ដ្រីខាងលើស្លាប់។ មួយខែបន្ទាប់ពីនោះ សម្ដេចនាយករដ្ឋមន្ដ្រីបានបញ្ជាឱ្យក្រសួងសុខាភិបាលធ្វើការ ត្រួតពិនិត្យឱ្យបានហ្មត់ចត់ទៅលើការប្រើប្រភេទគីមីការពារស្បែក និងសម្រស់ដែលលោកបានថ្លែងថា វាអាចបណ្ដាលឱ្យមានជំងឺមហារីកនិងបញ្ហាសុខភាពដទៃផ្សេងៗទៀត ៕
