ជ្រើសរើសម៉ាកផលិតផលក៏ជាកត្តាចាំបាច់មិនអាចរំលងបាន ដែរ។ ដូច្នេះដោយមើលឃើញពីតម្រូវការ និងភាពចាំបាច់នេះ អ្នកឯកទេសផលិតផលម៉ាក Lolane ដែលជាផលិតផលល្បីរបស់ថៃ ហើយផលិតផលនេះបានដំណើរការអស់រយៈពេលជាច្រើនឆ្នាំនៅកម្ពុជា បានបើកវគ្គបង្រៀនពីវិធីច្នៃម៉ូដសក់ ការប្រើពណ៌ទៅលើប្រភេទសក់ គំនិតច្នៃប្រឌិតថ្មី ការបង្ហាញពីការកែសម្ផស្ស និងសាឡនផ្សេងៗទៀតដល់បណ្តាអតិថិជនរបស់ខ្លួន និងអ្នកបម្រើការងារនៅក្នុងហាងសាឡននានានៅរាជធានីភ្នំពេញប្រមាណ ជាង១០០នាក់។
វគ្គបណ្តុះបណ្តាលពីជំនាញសម្អាងនេះ ត្រូវបានរៀបចំឡើងដោយក្រុមហ៊ុនផលិត និងនាំចូលផលិតផលម៉ាកល្បី Lolane នៅប្រទេសថៃ រយៈពេល២ថ្ងៃគឺថ្ងៃទី១៣ និង១៤ កុម្ភៈ នៅសណ្ឋាគារជូលីណា។
លោក Prasertsak គ្រូផ្នែកច្នៃម៉ូដសក់ និងជាអ្នកជំនាញរបស់ផលិតផល Lolane បានសម្តែងការភ្ញាក់ផ្អើលដោយលោកសង្កេតឃើញថា កម្ពុជាបច្ចុប្បន្នមានការរីកចម្រើនខ្លាំងផ្នែកសម្អាង និងសាឡន ដោយពួកគេអាចធ្វើបានល្អជាងពី៥ឆ្នាំមុន ប៉ុន្តែទោះជាយ៉ាងណា លោកបានបញ្ជាក់ថា ពួកគេត្រូវការ ការបណ្តុះបណ្តាលបន្ថែមសម្រាប់វិស័យនេះ។
អ្នកឯកទេសរូបនេះបន្តថា ដូច្នេះដើម្បីជំរុញឲ្យវិស័យនេះ កាន់តែមានភាពរីកចម្រើនជាងមុន និងមានភាពទាន់សម័យកាន់តែខ្លាំង ក្រុមហ៊ុនផលិតផល Lolane បានរៀបចំនូវវគ្គបណ្តុះបណ្តាលរបស់ខ្លួនជាលើកដំបូងនៅកម្ពុជា ដោយក្រុមហ៊ុនបានអញ្ជើញបណ្តាអតិថិជន និងអ្នកឯកទេសប្រចាំនៅហាងសាឡននានាប្រមាណជាង១០០នាក់ឲ្យចូល រួមក្នុងបំណងបន្ថែមចំណេះដឹងថ្មីៗលើអ្វីដែលពួកគេមានស្រាប់ និងគំនិតច្នៃប្រឌិតទាន់សម័យដែលទើបរកឃើញជាមួយនឹងគ្រូបង្រៀនមក ពីប្រទេសថៃចំនួន៤រូប។
លោកនិយាយថា៖ «សព្វថ្ងៃនេះកម្ពុជារីកចម្រើនយ៉ាងខ្លាំងខាងវិស័យនេះ តែអ្វីៗវាមានភាពរីកចម្រើនជាបន្តបន្ទាប់ ដូច្នេះវាទាមទារឲ្យអ្នកទាំងនោះទទួលនូវការបណ្តុះបណ្តាលថ្មីៗ បន្ថែមពីលើអ្វីដែលពួកគេមានស្រាប់។ អ៊ីចឹងខាង Lolane បាននាំមកនូវវិធីសាឡនថ្មីសម្រាប់ការបណ្តុះបណ្តាលនេះ តែចំណេះដឹងនេះ ពួកគេអាចយកទៅប្រើប្រាស់គ្រប់ម៉ាក និងប្រភេទផលិតផលបានដូចគ្នា»។
អ្នកឯកទេសដែលធ្លាប់ទទួលចំណាត់ថ្នាក់លេខមួយផ្នែកសាឡន និងច្នៃម៉ូដសក់រូបនេះ បានលើកឡើងថា កម្មវិធីបណ្តុះបណ្តាលពាក់ព័ន្ធនឹងសម្រស់នេះ ត្រូវបានរៀបចំនៅប្រទេសចំនួន៣៥រួចមកហើយ ដោយឡែកសម្រាប់ប្រទេសកម្ពុជាទើបតែជាលើកទី១ប៉ុណ្ណោះ។
អ្នកស្រី Itsaya ប្រធានផ្នែកលក់ផលិតផល Lolane ប្រចាំប្រទេសថៃ បានឲ្យដឹងថា វគ្គបណ្តុះបណ្តាលនេះមានទិសដៅយ៉ាងសំខាន់ក្នុងការជំរុញឲ្យអ្នក បម្រើការងារនៅក្នុងហាងសម្អាង និងសាឡន ទាំងអស់នៅកម្ពុជាមានចំណេះដឹងកាន់តែរឹងមាំក្នុងវិស័យនេះ។ ដូច្នេះដើម្បីជំរុញឲ្យមានភាពរីកចម្រើនកាន់តែខ្លាំងនោះ ទាល់តែយើងមានកត្តា៣សំខាន់ៗ គឺត្រូវមានផលិតផលល្អ ការអនុវត្ត និងធនធានមានចំណេះដឹង៕(PK)
