ប្រជាពលរដ្ឋនៅភូមិចុងឃ្នៀស តំបន់កន្ធាយគម ប្រមាណជិត២០០នាក់ នៅតែលើកគ្នាទៅសាលាសង្កាត់ចុងឃ្នៀស ដើម្បីបន្តការតវ៉ាប្រឆាំងក្រុមហ៊ុនកំពង់ផែ ស៊ូ ជីង តទៅទៀត កាលពីព្រឹកថ្ងៃសៅរ៍ ទី១៨ ខែកុម្ភៈ បំណងរារាំងមិនឱ្យក្រុមហ៊ុនប្រើគ្រឿងចក្រធ្វើសកម្មភាពជីកដីលើក ធ្វើជាផ្លូវថ្មី នៅតំបន់ដែលពួកគេកំពុងតាំងទីលំនៅបានឡើយ។
អ្នកភូមិរាប់រយនាក់ បានលើកគ្នាតវ៉ាទាំងយប់ម្ដងមកហើយ កាលពីរាត្រីថ្ងៃទី១៧ ខែកុម្ភៈ បន្ទាប់ពីក្រុមហ៊ុនបានប្រើគ្រឿងចក្រទៅកាយដីចាក់លើផ្លូវចាស់ ដែលក្រុមហ៊ុនអះអាងថាជាការចាប់ផ្ដើមធ្វើផ្លូវថ្មីមួយខ្សែ និងជួយបង្ហូរទឹកស្អុយចេញពីតំបន់ទេសចរណ៍ទីនោះ។
ក្រុមអ្នកភូមិបានអះអាងថា ពួកគេជំទាស់មិនឱ្យក្រុមហ៊ុនចាក់ដីធ្វើផ្លូវថ្មីបានទេ ពីព្រោះវាអាចធ្វើឱ្យបាត់បង់ដីសម្រាប់តាំងទីលំនៅរបស់ពួកគេ ៖ "ប្រជាជន មកយប់មិញ កុំឱ្យកាត់ថ្នល់ បើចង់លើកថ្នល់ គេមិនសំណូមពរថាមិនឱ្យលើកថ្នល់ទេ គេឱ្យលើក ប៉ុន្តែលើកខុសពីផ្លូវចាស់បូរាណរបស់គេ។ ចុះបើកាត់ថ្នល់ចាស់ហើយដេញប្រជាជនឱ្យគ្នាទៅនៅឯណា?"
បុរសម្នាក់ទៀតបានមានប្រសាសន៍ប្រហាក់ប្រហែលគ្នានេះ ៖ "ម្សិល មិញហ្នឹងក្រុមហ៊ុនដេញអ្នកតូបឱ្យចុះចេញ ដើម្បីគេចាក់ថ្នល់ពីកន្លែង ស៊ូ ជីង ហ្នឹងដល់ក្បាលកន្ធាយគូម ហើយគេឱ្យយើងចុះទៅនៅក្រោម ហើយសួរថាដេញយើងទៅនៅកណ្ដាលវាលស្រែគេ គេអត់ឱ្យយើងនៅ ហើយចុះឱ្យយើងទៅនៅឯណា។ ដូច្នេះហើយពួកប្រជាពលរដ្ឋឡើងមកតវ៉ាសុំដី ស៊ូ ជីង ត្រឹមណា ឱ្យអភិវឌ្ឍន៍ធ្វើត្រឹមហ្នឹងទៅ ហើយថ្នល់ពីបូរាណមកសុំឱ្យប្រជាពលរដ្ឋនៅវិញ"។
ទោះយ៉ាងណាការប្រមូលផ្ដុំតវ៉ារបស់ក្រុមអ្នកភូមិទាំងនោះ បានរំសាយទៅវិញយ៉ាងឆាប់រហ័សកាលពីព្រឹកថ្ងៃសៅរ៍ បន្ទាប់ពីអាជ្ញាធរក្រុងសៀមរាប បានឱ្យអ្នកភូមិ និងតំណាងក្រុមហ៊ុនកំពង់ផែ ស៊ូ ជីង បានជួបគ្នានៅឯសាលាសង្កាត់ចុងឃ្នៀស ដើម្បីធ្វើការដោះស្រាយមក។
លោក វ៉ា ឈូដា ដែលជានាយករបស់ក្រុមហ៊ុនកំពង់ផែ ស៊ូ ជីង។ លោកបានមានប្រសាសន៍ថា ការលើកគ្នាតវ៉ារបស់អ្នកភូមិនោះ គឺជាការយល់ច្រឡំ នៅពេលដែលក្រុមហ៊ុនប្រើគ្រឿងចក្រជីកដី ដើម្បីបង្ហូរទឹកស្អុយចេញពីតំបន់នោះ ហើយគួបផ្សំនិងការញុះញង់ពីមនុស្សមួយចំនួន ដែលថា ពួកគេអាចនឹងមិនបានរស់នៅបន្តទៅទៀតផង នៅពេលដែលក្រុមហ៊ុនធ្វើផ្លូវថ្មីមួយខ្សែនៅទីនោះ ៖ "វាមាន អ្នកនៅពីក្រោយប៉ុន្មាននាក់ហ្នឹង ខ្ញុំមើលទៅ។ដូចបងប្អូនភាគច្រើនគាត់យល់ តែដោយសារអ្នកទៅញុះញង់ថាយើងធ្វើដេញគាត់ចេញ។ មិនមែនទេ យើងធ្វើឱ្យគាត់ដើរ ហើយបើគាត់មិនព្រមធ្វើ អាហ្នឹងខ្ញុំចាំបាច់ធ្វើនាំខាតលុយអី ខ្ញុំអត់ត្រូវធ្វើអាហ្នឹងផង។ ធ្វើអាហ្នឹងអស់លុយច្រើនធ្វើឡើងលើផុត ៨ម៉ែត្រឯណោះ។ តាមមើលទៅយើងត្រូវតែធ្វើឱ្យហើយ យើងមិនអាចទុកទឹកស្អុយកន្លែងទេសចរណ៍បានទេ។ ផ្លូវហ្នឹងយើងត្រូវតែធ្វើ ដើម្បីដាក់បង្វិលទឹកស្អុយចេញ ហើយណាមួយកន្លែងហ្នឹងរញ៉េរញ៉ៃណាស់ យើងត្រូវសង់ផ្សារលក់ឱ្យគាត់មានរបៀបរៀបរយ"។
លោក ទេព ប៊ុនឆាយ ជាអភិបាលក្រុងសៀមរាប។ លោកបានមានប្រសាសន៍ថា ការជំទាស់នោះបណ្ដាលមកពីប្រជាពលរដ្ឋមិនយល់នៅពេលដែលក្រុមហ៊ុន ចាប់ផ្ដើមប្រើគ្រឿងចក្រកាយដីផ្លូវទីនោះ។ ប៉ុន្តែកាលពីព្រឹកថ្ងៃសៅរ៍ គឺលោកបានពន្យល់ប្រជាពលរដ្ឋ ហើយឱ្យក្រុមហ៊ុនអាចចាប់ផ្ដើមបន្តការងារបង្ហូរទឹកស្អុយចេញពី ទីនោះបានវិញហើយ។
ទោះយ៉ាងណា លោក វ៉ា ឈូដា បានឱ្យដឹងថា លោកមានគម្រោងនឹងដេញដោលលើការប្រើអំពើហិង្សាដោយអ្នកភូមិបាននាំ គ្នាគប់បំផ្លាញគ្រឿងចក្រ ធ្វើឱ្យបែកកញ្ចក់ខូចខាតនោះ៕
