នកសារព័ត៌មានខ្មែរពីររូប
នឹងត្រូវបញ្ជូនទៅសហរដ្ឋអាមេរិក ដើម្បីដកស្រង់បទពិសោធន៍
ធ្វើសេចក្តីរាយការណ៍ព័ត៌មានពេលបោះឆ្នោតជ្រើសរើស
ប្រធានាធិបតីនៅអាមេរិក ដែលនឹងប្រព្រឹត្តិទៅ នៅថ្ងៃទី៦ ខែវិច្ឆិកា
ខាងមុននេះ។
នេះបើយោងតាមមន្រ្តីស្ថានទូតអាមេរិកប្រចាំនៅកម្ពុជា។
មន្រ្តី
ស្ថានទូតអាមេរិក បានឲ្យដឹងថា
អ្នកយកព័ត៌មានខ្មែរទាំងពីររូបនោះ គឺមានលោក យឹម ឆេងលាភ
តំណាងឲ្យអ្នកយកព័ត៌មានមកពី មណ្ឌលព័ត៌មានស្រី្តកម្ពុជា និងលោក
លាង ឌឺលុច អ្នកយកព័ត៌មានវិទ្យុបារាំងអន្តរជាតិ។ ស្ថានទូតអាមេរិក
នឹងបញ្ជូនអ្នកសារព័ត៌មានទាំងពីររូបនេះទៅសហរដ្ឋអាមេរិក
ដើម្បីទៅដកស្រង់បទពិសោធន៍ទាក់ទងនឹងការការរាយការណ៍ព័ត៌មាន
ក្នុងអំឡុងពេលនៃការបោះឆ្នោតនៅអាមេរិក។
លោក ឆេងលាប តំណាងអ្នកសារព័ត៌មានមួយរូបពីមណ្ឌលព័ត៌មានស្រី្តកម្ពុជា ដែលត្រូវចេញដំណើរទៅកាន់សហរដ្ឋអាមេរិចនៅ ល្ងាចនេះ បានថ្លែងថា លោកសង្ឃឹមថា នឹងទទួលបានព័ត៌មានថ្មីៗបន្ថែមទៀត ទាក់ទងនឹងការបោះឆ្នោតនៅសហរដ្ឋអាមេរិច ព្រោះសហរដ្ឋអាមេរិច គឺជាប្រទេសមួយ ដែលមានភាពចាស់ទុំខាងលទ្ធិប្រជាធិបតេយ្យ។
លោក បានបន្ថែមថា៖ “ក្រៅពីនោះ ខ្ញុំក៏ចង់ដឹងថា តើនៅអាមេរិក គេបើកចំហរព័ត៌មានកម្រិតណា នៅអំឡុងពេលបោះឆ្នោត និងថាតើគេមានថ្ងៃសដូចប្រទេសកម្ពុជាដែរ ឬទេ? ពិសេសជាងនេះទៅទៀត ខ្ញុំក៏ចង់ដឹងថា តើការផ្សាយព័ត៌មានតាមវិទ្យុ និងទូរទស្សន៍នៅថ្ងៃបោះឆ្នោតនៅទីនោះ មានលក្ខណៈបើកទូលាយកម្រិតណា បើប្រៀបធៀបនឹងប្រទេសកម្ពុជារបស់យើង?”។
លោក ឆេង លាភ បានបន្ថែមទៀតថា ក្រៅពីនេះ លោកសង្ឃឹមថា លោកនឹងមានឱកាសបានផ្លាស់ប្តូរបទពិសោធន៍ជាច្រើនជាមួយនឹងអ្នក សារព័ត៌មានបរទេស ទាក់ទងនឹងការប្រមូលព័ត៌មាននៅប្រទេសគេ ជុំវិញការបោះឆ្នោត៕
