 |
| ឃុំខ្លួនតៃកុងឡាន ដឹកខ្សាច់ម្នាក់ ដែលបុករោងការ នៅវាលស្បូវ |
ចំណែកអ្នកបើកបរថយន្តឡិចស៊ីស៤៧០ ដែលបើកវ៉ាទៅកៀររថយន្តដឹកខ្សាច់បណ្តាលឱ្យមនុស្សរងរបួសនោះ ក៏ត្រូវតំណាងអយ្យការចោទប្រកាន់ពីបទ បើកបរបង្ករបួសដល់អ្នកដទៃដោយអចេតនា រួចបញ្ជូនសំណុំរឿងនេះទៅឱ្យចៅក្រមស៊ើបសួរចាត់ការបន្តតាមរូបភាព ជនត្រូវចោទនៅក្រៅឃុំ។
ដោយឡែកម្ចាស់រថយន្តដឹកខ្សាច់បាន ត្រូវតំណាងអយ្យការ បំបែកសំណុំរឿងចោទប្រកាន់ពីបទ ប្រើស្លាកលេខក្លែងក្លាយ រួចបញ្ជូនសំណុំរឿងនេះទៅឱ្យចៅក្រមស៊ើបសួរចាត់ការបន្តតាមរូបភាពជន ត្រូវចោទនៅក្រៅឃុំដែរ។
អ្នកបើកបររថយន្តដឹកខ្សាច់ប្រភេទ នីសាន់រូបនេះឈ្មោះ ចាន់ សម្បតិ្ត ភេទប្រុស អាយុ២២ឆ្នាំ មានទីលំនៅភូមិកោះផុស ឃុំដីឥដ្ឋ ស្រុកកៀនស្វាយ ខេត្តកណ្តាល។ ចំណែកអ្នកបើកបររថយន្តឡិចស៊ីស៤៧០ពណ៌ខ្មៅ ពាក់ស្លាកលេខ 2Q 8388 ដែលជាដើមចមនៃគ្រោះថ្នាក់ចរាចរណ៍នេះមានឈ្មោះអ៊ុន សុខ ភេទប្រុស អាយុ៥៦ឆ្នាំ មានទីលំនៅផ្ទះលេខ២៤៩ ផ្លូវលេខ៩៣ សង្កាត់អូរឬស្សីទី៤ ខណ្ឌ៧មករា។
តាមប្រភពពីសមត្ថកិច្ច បានឱ្យដឹងថា កាលពីព្រលប់ថ្ងៃទី២០ ខែវិច្ឆិកា ឆ្នាំ២០១២ មានរថយន្តឡិចស៊ីស៤៧០មួយគ្រឿង បានបើកតាមបណ្តោយផ្លូវជាតិលេខ១ ពីទិសដៅពីកើតទៅលិចពោលគឺពីកៀនស្វាយចូលរាជធានីភ្នំពេញ។ លុះបើកមកដល់ចំណុចសង្កាត់វាលស្បូវ ខណ្ឌមានជ័យ រថយន្តឡិចស៊ីសបានបើកវ៉ារថយន្តនីសាន់ដឹកខ្សាច់ដែលកំពុងបើកបរ ស្របទិសគ្នា។
ប៉ុន្តែនៅពេលបើកវ៉ានេះអ្នកបើកបររថយន្តឡិចស៊ី សយកចង្កូតមិនទាន់ក៏បើករកៀររថយន្តដឹកខ្សាច់មួយទំហឹង ធ្វើឱ្យរថយន្តដឹកខ្សាច់រេចង្កូតចូលទៅរោងការមួយកន្លែងដែលមានភ្ញៀវ មួយចំនួនចូលតុរួចហើយ បណ្តាលឱ្យមនុស្សរងរបួសជាង២០នាក់។
ក្រោយហេតុការណ៍នេះកើតឡើង សមត្ថកិច្ចបានឃាត់ខ្លួនអ្នកបើកបររថយន្តឡិចស៊ីស និងអ្នកបើកបររថយន្តដឹកខ្សាច់ដែលក្នុងនោះគេសង្កេតឃើញថា អ្នកបើកបររថយន្តឡិចស៊ីសមានអាការៈស្រវឹងស្រាយ៉ាងខ្លាំង។
បន្ទាប់ពីឃាត់ខ្លួនរួចហើយ សមត្ថកិច្ចប៉ូលិសការិយាល័យចរាចរណ៍ផ្លូវគោករាជធានីភ្នំពេញ បានសាកសួរ អ្នកបើក រថយន្តទាំង២ រួចកសាងសំណុំរឿង បញ្ជូនមកតុលាការ ដោយភ្ជាប់សេចក្តីសន្និដ្ឋានថា ភាគីអ្នកបើករថយន្តឡិចស៊ីសមានជាតិស្រវឹងពេលបើកបរ។
ចំណែក ភាគីរថយន្តដឹកខ្សាច់បានជ្រុលទៅបុកបណ្តាលឱ្យមនុស្សមានរបួសជាង២០ នាក់ ដែលរហូតមកទល់ពេលនេះមានជនរងគ្រោះ២៣នាក់ មកដាក់ពាក្យបណ្តឹងរួចហើយ ពិសេសរថយន្តដឹកខ្សាច់នេះពាក់ស្លាកលេខក្លែងក្លាយ បន្ថែមទៅលើករណីគ្រោះថ្នាក់ចរាចរណ៍មួយទៀត។ ប៉ុន្តែនៅពេលសមត្ថកិច្ចបញ្ជូនមកតុលាការឃើញតែ អ្នកបើកបររថយន្តដឹកខ្សាច់ម្នាក់ប៉ុណ្ណោះ ចំណែកអ្នកបើកបររថយន្តឡិចស៊ីសពុំឃើញបញ្ជូនមកទេ ពោលគឺត្រូវបានដោះលែងឱ្យមានសេរីភាពវិញ តាមបញ្ជារបស់ថ្នាក់លើ។
នៅដំណាក់កាលអយ្យការឈ្មោះចាន់ សម្បត្តិ បានបញ្ជាក់ថា រថយន្តដែលខ្លួនជិះគឺជួលពីគេមកទេ ហើយម្យ៉ាងទៀតក្នុងពេលបើកបរខ្លួនក៏បើកបរក្នុងល្បឿនយឺតដែរ ពោលបើសិនជាខ្លួនបើកក្នុងល្បឿនលឿនប្រហែលជាអ្នករបួសមិនមែនប៉ុណ្ណឹង នោះទេ៕
