.jpg?1353146408) |
| ជនរងគ្រោះពេលបញ្ជូនដល់មន្ទីរពេទ្យ និងដំបងប្រើប្រាស់ពេលប្រយុទ្ធគ្នា |
ហេតុការណ៍នេះកើតឡើងនៅវេលា ម៉ោង ១ រសៀលថ្ងៃទី១៧ ខែវិច្ឆិកា ឆ្នាំ២០១២ ក្នុងភូមិអណ្តូងខ្មែរ សង្កាត់អណ្តូងខ្មែរ ក្រុង-កំពត។ ជនសង្ស័យត្រូវសមត្ថកិច្ចឃាត់ខ្លួន ក្រោយពីព្យាយាមរត់គេច ប្រមាណជាងមួយម៉ោងរួចមក។
ជនរងគ្រោះ ឈ្មោះ លី ម៉ាត់ អាយុ ៧៣ឆ្នាំ។ ឯជនសង្ស័យឈ្មោះ ជា ឃីម អាយុ ៥១ឆ្នាំ។ ទាំងពីរនាក់រស់នៅភូមិតាដឹប សង្កាត់អណ្តូងខ្មែរ ក្រុង-ខេត្តកំពត។
ដោយស្រង់សម្តីពីកន្លែងកើតហេតុ ប៉ូលិសមូលដ្ឋានបានឱ្យដឹងថា មុនពេលកើតមានអំពើហិង្សា គេឃើញបុរសទាំងពីរនាក់អង្គុយផឹកស្រាតាំងពីព្រឹក ក្នុងខ្ចូសរបស់អ្នកស្រុក ស្ថិតនៅកន្លែងកើតហេតុ ដោយផ្ទះនោះធ្វើពិធីបុណ្យមួយ។ ការផឹកស៊ីនៅតែបន្ត ទោះពិធីបុណ្យបានបញ្ចប់ តាំងពីម៉ោង ១១ ព្រឹក ទៅហើយក្តី។
រហូតដល់ម៉ោងប្រហែល ១ រសៀល គេឮសំឡេងអ្នកទាំងពីរជជែកគ្នា អំពីរឿងភ្នាល់ តែមិនដឹងភ្នាល់អ្វីទេ។ ពេលនោះគេឃើញជនរងគ្រោះទះកំផ្លៀងជនសង្ស័យមួយដៃ រួចជនសង្ស័យក៏ចាប់បោកកែវ ហើយយកអំបែងកែវចាក់ឆូតលើផ្ទៃមុខជនរងគ្រោះ បណ្តាលឱ្យហូរឈាមស្រោចពេញមុខ។ ការប្រយុទ្ធនៅតែបន្ត ឈានដល់ប្រើប្រាស់ដំបង រហូតបុរសរងគ្រោះដួលសន្លប់ ទើបជនសង្ស័យរត់គេចខ្លួនពីកន្លែងកើតហេតុ។ ភ្លាមនោះ ម្ចាស់ផ្ទះក៏ជូនដំណឹងដល់សាច់ញាតិ ឲ្យប្រញាប់បញ្ជូនជនរងគ្រោះទៅមន្ទីរពេទ្យ និងបន្តប្តឹងចូលប៉ុស្តិ៍ប៉ូលិសរដ្ឋបាល។
ប្រហែលមួយម៉ោង ក្រោយ ពោលគឺពេលសមត្ថកិច្ចកំពុងសួរនាំ ស្រាប់តែជនសង្ស័យវិលត្រឡប់មកកន្លែងកើតហេតុវិញ ទើបត្រូវឃាត់ខ្លួន បញ្ជូនទៅកាន់អធិការដ្ឋានក្រុង ដើម្បីចាត់ការបន្ត៕ J
