 |
| ជនសង្ស័យ ពេលបញ្ជូនដល់ស្នងការដ្ឋានខេត្តកំពត ក្នុងបទចាប់រំលោភកុមារីវ័យ៥ឆ្នាំ |
ហេតុការណ៍នោះ បានកើតឡើង កាលពីវេលាម៉ោងប្រហែល ១១ ព្រឹក ថ្ងៃទី២៥ ខែវិច្ឆិកា ឆ្នាំ២០១២ ក្នុងភូមិព្រៃពាយ ឃុំត្រពាំងភ្លាំង ស្រុកឈូក ខេត្តកំពត។
ជនសង្ស័យក្នុងករណីនេះ ឈ្មោះ ខុន ចាន់ថៃ អាយុ ២៧ឆ្នាំ។ កុមារីរងគ្រោះ និងជនសង្ស័យ ជាអ្នករស់នៅក្នុងភូមិឃុំកើតហេតុជាមួយគ្នា។
ប៉ូលិសនៃស្នងការដ្ឋានខេត្តកំពត បានរៀបរាប់ថា កាលពីវេលាម៉ោងប្រហែល ១១ព្រឹក ថ្ងៃទី២៥ ខែវិច្ឆិកា ឆ្នាំ២០១២ ក្រោយពីផឹកស្រា នៅតូបមួយ ក្នុងភូមិអស់រយៈពេលជាច្រើនម៉ោងមក ជនសង្ស័យក៏ដើរចុះទៅបត់ជើងតូច ប្រមាណប្រហែល ៤០ម៉ែត្រ ពីតូបបានជួបក្មេងស្រីតូចៗពីរនាក់ កំពុងដើរបេះកប្បាស។ ក្នុងចំណោមនោះ ក្មេងម្នាក់ ដែលត្រូវជាកូនរបស់ម្ចាស់តូបលក់ស្រា បានត្រឡប់ទៅផ្ទះមុន។ ព្រោះតែបាត់ក្មេង ស្រីម្នាក់ទៀតយូរពេក ឳពុករបស់ម្ចាស់តូប បានតាមទៅមើល ស្រាប់តែឃើញក្មេងស្រីរងគ្រោះអង្គុយទល់មុខនឹង ខុន ចាន់ថៃ ដោយយំសស្រាក់។
ម្ចាស់តូបលក់ស្រា ក៏ទៅប្រាប់រឿងនេះ ដល់ឳពុកម្តាយកុមារី ឱ្យបានដឹង។ ដោយឡែក ជនសង្ស័យក៏វិលត្រឡប់ទៅផ្ទះវិញ មិនបន្តផឹកទៀតទេ។
ក្រោយពី ទទួលដំណឹងនោះ ឪពុកកុមារីរងគ្រោះ បានរត់ទៅប្តឹងប៉ូលិសមូលដ្ឋាន ប្តឹងជនសង្ស័យ ពីបទចាប់រំលោភកូនរបស់ខ្លួន ទើបប្រហែលមួយម៉ោងក្រោយ សមត្ថកិច្ចចុះទៅនាំខ្លួនជនសង្ស័យ ពីលំនៅស្ថាន រួចបញ្ជូនឱ្យអធិការដ្ឋានស្រុកឈូក សាកសួរតាមបណ្តឹងរបស់គ្រួសារកុមារីនេះ។
ចម្លើយសារភាពរបស់ ជនសង្ស័យ អះអាងថា នៅពេលកំពុងស្រវឹង ខ្លួនបានដើរចុះ ទៅរកកន្លែងបត់ជើងតូច ហើយជួបនឹងកុមារីពីរនាក់ ក៏ចាប់ឱបថើប និងស្ទាបប្រដាប់ភេទក្មេងស្រីម្នាក់ តែគេរើបម្រះរួច។ ភ្លាមនោះ ពួកគេទាំងពីរនាក់ ក៏រត់ទៅបេះកប្បាស។ ឯខ្លួនដើរទៅមុខទៀត។ ក្រោយបត់ជើង រួចពេលត្រឡប់មកវិញ ឃើញតែក្មេងស្រីម្នាក់ នៅបេះកប្បាស ដោយអង្គុយលត់ជង្គង់ ខ្លួនក៏អង្គុយជួយបេះកប្បាស ហុចឱ្យ ហើយក្មេងនោះ បានរត់ទៅផ្ទះបាត់ ទើបខ្លួន ដើរសំដៅរកកន្លែងផឹកស្រាបន្តទៀត។ ចំណែកឯការចាប់ឱបថើបនោះ មិនដឹងជាខ្លួន បានធ្វើអ្វីលើសដល់កម្រិតណាទេ ព្រោះស្រវឹងខ្លាំងពេក។
ប៉ូលិសស្នងការដ្ឋាន បន្តថា តាមសេចក្តីសន្និដ្ឋានរបស់ប៉ូលិសអធិការដ្ឋានស្រុកឈូក បញ្ជាក់ថា ជនសង្ស័យឈ្មោះ ខុន ចាន់ថៃ ពិតជាប្រព្រឹត្តអំពើរំលោភលើកុមារីរងគ្រោះវ័យ ៥ឆ្នាំម្នាក់នោះ កាលពីថ្ងៃទី២៥ ខែវិច្ឆិកា ឆ្នាំ២០១២ នៅភូមិព្រៃពាយ ឃុំត្រពាំងភ្លាំង ប្រាកដមែន។ ដូច្នេះសមត្ថកិច្ច នៃស្នងការដ្ឋាន នឹងដំណើរការសាកសួរលម្អិតបន្ត ដើម្បីបំពេញសំណុំបែបបទបញ្ជូនទៅសាលាដំបូងខេត្ត៕
