ភ្នំពេញៈ ក្រោយភ្ជាប់ពាក្យយ៉ាងស្ងប់ស្ងាត់កាលពីព្រឹកថ្ងៃទី៣១
តុលា ទីបំផុតស្នេហារបស់ សុខ សោម៉ាវត្តី
ដែលកន្លងមកល្បីថាធ្លាប់មានការរារាំងពីសំណាក់ឪពុកម្តាយខាង
ប្រុសនោះ នៅពេលនេះរូបនាងបានក្លាយជាកូនក្រមុំពេញសិទ្ធិរបស់លោក
ទូច ដាណារ៉ា ហៅ ពេជ្រ ហើយកាលពីថ្ងៃទី២៤ ខែវិច្ឆិកា នោះ។ចំណង ស្នេហ៍ ដែលមិនអាចកាត់ផ្តាច់បានរវាងពិធីការិនី និងជាតារាសម្តែងក្រមិចក្រមើមនាង សុខ សោម៉ាវត្តី និងលោក ទូច ដាណារ៉ា ដែលជាកូនអតីតស្នងការរាជធានីភ្នំពេញ លោក ទូច ណារ៉ុថ បានសាងស្នេហ៍មិនតិចឆ្នាំទេ ទម្រាំតែពន្លឺស្នេហ៍ពួកគេបានរសាត់អណ្តែតមកទើរលើចំណងអាពាហ៍ ពិពាហ៍ដែលជាការទទួលស្គាល់ និងផ្តួចផ្តើមឲ្យមានការរៀបមង្គលការនេះឡើងរបស់ឪពុកម្តាយទាំង សងខាងនោះ។
មង្គលការតារាល្បី និងកូនមន្ត្រីពាក់ផ្កាយ២បែបនេះ បានប្រព្រឹត្តទៅដោយមានភ្ញៀវកិត្តិយសមានកេរ្តិ៍ឈ្មោះជាមន្ត្រី និងតារាចម្រៀង សម្តែង កំប្លែង ប្រមាណជា២០០តុ ដោយរៀបចំពិសាភោជនាហារចំនួន៣អគារជាប់គ្នានៅកោះពេជ្រ ហើយក្នុងនោះគេឃើញមានវត្តមានលោកស្រី ម៉ែន សំអន លោក គន់ គីម និងលោកស្រី ហ៊ុន ម៉ាណា បានចូលរួមផ្តល់កិត្តិយសផងដែរ។
ជាមួយ ស្នាមញញឹម សុខ សោម៉ាវត្តី បាននិយាយថា៖ «ខ្ញុំសប្បាយរីករាយមែនទែនថ្ងៃនេះ តែខ្ញុំក៏ដូចជាភ័យៗផងដែរក្នុងពិធីខ្លួនឯងបែបនេះ»។
ជាមួយ គ្នានោះម្តាយ សុខ សោម៉ាវត្តី ក៏បានឲ្យដឹងនៅមុនពេលពិធីមង្គលការកូនអ្នកស្រី ជាមួយនឹងកូនអតីតស្នងការរាជធានីភ្នំពេញលោក ទូច ណារ៉ុថ ថា ភាគីដន្លងជាអ្នករៀបចំចាត់ចែងកម្មវិធីដោយផ្ទាល់។ អ្នកស្រីបញ្ជាក់ថា មង្គលការ សុខ សោម៉ាវត្តី មានភ្ញៀវកិត្តិយសចូលរួមយ៉ាងច្រើនកុះករនៅកោះពេជ្រ តែអ្នកស្រីក៏មិនហ៊ាននិយាយថា កម្មវិធីនោះធំប៉ុនណាដែរ គឺស្រេចតែលើការវាយតម្លៃរបស់ភ្ញៀវកិត្តិយស។
អ្នកស្រីនិយាយថា៖ «អូ! ភ្ញៀវចូលរួមហ្នឹងច្រើនណាស់ ហើយរឿងថា ធំ ឬតូចនោះ ខ្ញុំមិនហ៊ាននិយាយទេ»។
កន្លង មក ចំណងស្នេហ៍រវាង សុខ សោម៉ាវត្តី និងលោក ពេជ្រ មានការល្បីថា ក្រុមគ្រួសារលោក ពេជ្រ មិនពេញចិត្តចំពោះពិធីការិនី សុខ សោម៉ាវត្តី តែនាងតែងតែចេញមុខបដិសេធ។
ដើម្បីបញ្ជាក់បញ្ហានេះជាថ្មី
ម្តាយ សុខ សោម៉ាវត្តី បានឲ្យដឹងថា មិនដែលមានរឿងបែបនោះឡើយ
ហើយនៅក្នុងការរៀបអាពាហ៍ពិពាហ៍នេះ
អ្នកស្រីក៏បានទាក់ទងយ៉ាងជិតស្និទ្ធជាមួយនឹងដន្លងឪពុកម្តាយ
កូនប្រុសដែរ៕
