 |
| រដ្ឋមន្ត្រីការបរទេស ជួបប្រជុំ នាថ្ងៃទី១៧វិច្ឆិកា ឆ្នាំ២០១២ ( រូបថត៖ ស៊ីវ ចាន់ណា ) |
បន្ទាប់ពីកិច្ចប្រជុំរដ្ឋមន្ត្រីការបរទេសអាស៊ាន នៅពេលរសៀលថ្ងៃទី១៧ ខែវិច្ឆិកា ឆ្នាំ២០១២ លោក កៅ គឹមហួន រដ្ឋលេខាធិការនៃក្រសួងកិច្ចការបរទេស និងសហប្រតិបត្តិការអន្តរជាតិ បានឲ្យដឹងថា នៅថ្ងៃទី១៧វិច្ឆិកា រដ្ឋមន្ត្រីការបរទេសអាស៊ាន បានបញ្ចប់កិច្ចប្រជុំបី ដែលរួមមាន កិច្ចប្រជុំការបរទេសអាស៊ាន ក្រុមប្រឹក្សាសហគមន៍នយោបាយសន្តិសុខថ្នាក់រដ្ឋមន្ត្រី ជាកិច្ចប្រជុំលើកទី៨ និងកិច្ចប្រជុំក្រុមប្រឹក្សាសម្របសម្រួលអាស៊ានកម្រិតថ្នាក់ រដ្ឋមន្ត្រី លើកទី១១។
លោក កៅ គឹមហួន បានបង្ហាញពីលទ្ធផលផ្លែផ្កានៃកិច្ចប្រជុំទាំងបីនោះ រួមមាន៖ សម្រាប់កិច្ចប្រជុំថ្នាក់រដ្ឋមន្ត្រីការបរទេសអាស៊ាន បានផ្លាស់ប្តូរមតិ យោបល់អំពីបញ្ហាតំបន់អន្តរជាតិ ដូចជា ព្រឹត្តិការណ៍នៅប្រទេសស៊ីរី ជាដើម ទាក់ទងនឹងឧបទ្វីបកូរ៉េ។ ក្រៅពីសភាពការណ៍នៅឧបទ្វីបកូរ៉េ និងសមុទ្រចិនខាងត្បូង និងមានបញ្ហាផ្សេងៗទៀត។ ដោយឡែកទៀត រដ្ឋមន្ត្រីការបរទេសអាស៊ាន ក៏បានលើកអំពីការងារ ដែលត្រូវតាមដានតាំងពីកាលប្រជុំថ្នាក់រដ្ឋមន្ត្រីការបរទេសអាស៊ាន លើកទី៤៧ កាលពីខែកក្កដា និងកិច្ចប្រជុំរដ្ឋមន្ត្រីអាស៊ានក្រៅផ្លូវការ នៅទីក្រុងលីយ៉ុងនៅខែកញ្ញាកន្លងទៅនេះ ហើយការសំខាន់ខ្លាំងនោះ គឺការជំរុញ និងការអនុវត្តនៃធម្មនុញ្ញអាស៊ាន ក៏ដូចជាពិនិត្យមើលឡើងវិញ នៃការអនុវត្តផែនទីចង្អុលផ្លូវរបស់អាស៊ាន ក្នុងការកសាងសគមន៍អាស៊ាន។
លោក កៅ គឹមហួន បានបន្ថែមថា ជាសមិទ្ធផលដូចយើងឃើញស្រាប់ហើយនៅក្នុងកិច្ចប្រជុំ រដ្ឋមន្ត្រីការបរទេសអាស៊ាន ដែលលេចធ្លោខ្លាំង ដូចជាការកសាងសហគមន៍អាស៊ាននេះ គឺការផ្លាស់ប្តូរមតិទៅលើសភាពតំបន់អន្តរជាតិ។ រីឯកិច្ចប្រជុំក្រុមប្រឹក្សាសហគមន៍នយោបាយសន្តិសុខអាស៊ាន បានពិនិត្យមើលការងារមួយចំនួន ដែលបានសម្រេចកន្លងទៅនេះ ជាពិសេសនៅក្នុងក្របខណ្ឌក្រុមប្រឹក្សាសហគមន៍នយោបាយសន្តិសុខនេះ។ ក្នុងនោះដែរ គឺការជំរុញឲ្យមានសេចក្តីថ្លែងការណ៍សិទ្ធិមនុស្សអាស៊ាន ការជំរុញឲ្យមានការផ្តល់នូវសច្ចាប័ននៃការចូលរួម TSC។
លោក កៅ គឹមហួន បានលើកឡើងថា នេះមុនកិច្ចប្រជុំសន្និសីទកាសែត យើងបានឃើញហើយថា ប្រទេសប្រេស៊ីល បានចូលជាភាគីមួយទៀត នៃសន្ធិសញ្ញាមិត្តភាពសហប្រតិបត្តិការអាស៊ីអាគ្នេយ៍ ជាប្រទេសទី៣១ ។
ក្រៅពីនេះទៀត លោក កៅ គឹមហួន បានលើកឡើងថា រដ្ឋមន្ត្រីការបរទេសអាស៊ាន ក៏មានការជំរុញការគ្រប់គ្រងគ្រោះមហន្តរាយ ដែលត្រូវពង្រឹងការប្រឆាំងការជូញដូរមនុស្ស និងបញ្ហាផ្សេងៗទៀត។ ដោយឡែកទៀត ការពិភាក្សាទៅលើសន្ធិសញ្ញានៃតំបន់អាស៊ីអាគ្នេយ៍ ដែលគ្មានអាវុធនុយក្លេអែរ កន្លងមកនេះ មានការជំរុញការងារនេះ មិនទាន់បានសម្រេចនៅឡើយទេ ដែលយើងកំពុងធ្វើការចរចាបន្តទៀត ជាមួយប្រទេសមហាអំណាចទាំង៥ ដែលមានអាវុធនុយក្លេអែរនេះ។
លោក កៅ គឹមហួន ក៏បានបន្ថែមថា ចំពោះលទ្ធផលកិច្ចប្រជុំក្រុមប្រឹក្សាសម្របសម្រួលអាស៊ានកម្រិតថ្នាក់ រដ្ឋមន្ត្រី លើកទី១១ ហៅកាត់ថា ACC ជាការត្រៀមសម្រាប់ កិច្ច ប្រជុំអាស៊ានកំពូលលើកទី២១ កិច្ចប្រជុំអាស៊ានបូកបី ខួបស្សាវរីយ៍លើកទី១៥ និងកិច្ចប្រជុំ អាស៊ានកំពូលបូក១ ជាមួយចិន ជប៉ុន កូរ៉េ និងប្រទេសឥណ្ឌា និងលទ្ធផលកិច្ចប្រជុំថ្នាក់ដឹកនាំរវាងអាស៊ាន និងសហរដ្ឋអាមេរិក ក៏ដូចជាកចិ្ចប្រជុំអាស៊ានកំពូលលើកទី៧។ ការត្រៀមនេះ ជាពិសេស គឺពិនិត្យមើលឯកសារទាំងអស់ដើម្បីឆ្លងដាក់ជូនប្រមុខរដ្ឋាភិបាល ក្នុងការចុះហត្ថលេខា និងអនុម័ត ដែលឯកសារទាំងអស់ក្នុងនោះបានឆ្លងកាត់ ACC ទាំងស្រុង។ ដោយឡែកទៀតរដ្ឋមន្ត្រី ACC ក៏បានអនុម័តទៅលើអគ្គលេខាធិការថ្មី ដែលជាបេក្ខភាពមកពីប្រទេសវៀតណាម នឹងស្នើជូនទៅប្រមុខរដ្ឋាភិបាល ដើម្បីប្រមុខរដ្ឋាភិបាលអាស៊ាន សម្រេចអគ្គលេខាធិការថ្មី ដែលនឹងចូលមកកាន់អាណត្តិ នៅថ្ងៃទី១ ខែមករា ឆ្នាំ២០១៣ ទៅចន្លោះឆ្នាំ២០១៧ ហើយនឹងការឯកភាពទៅលើសម្រាប់អគ្គលេខាធិការអាស៊ាននាឆ្នាំ២០១៣។
សូមរម្លឹកថា តាមកម្មវិធី កិច្ចប្រជុំអាស៊ាន កាលពីថ្ងៃទី១៧វិច្ឆិកា ឆ្នាំ២០១២ រួមមាន៖ កិច្ចប្រជុំរដ្ឋមន្ត្រីការបរទេសអាស៊ាន កិច្ចប្រជុំសហគមសន្តិសុខនយោបាយអាស៊ាន កិច្ចប្រជុំរៀបចំសម្រាប់រដ្ឋមន្ត្រីសេដ្ឋកិច្ចអាស៊ាន និងកិច្ចប្រជុំលើកទី១១នៃក្រុមប្រឹក្សាសម្របសម្រួលអាស៊ាន។
ក្នុងនោះ កាលពីថ្ងៃទី១៧វិច្ឆិកា ឆ្នាំ២០១២ រដ្ឋមន្ត្រីការបរទេសអាស៊ាន និងរដ្ឋមន្ត្រីការបរទេសប្រេស៊ីល ព្រមទាំងអគ្គលេខាធិការអាស៊ាន ក៏បានចុះហត្ថលេខាលើលិខិតូបករណ៍ នៃការអនុញ្ញាតឲ្យចូលជាភាគីនៃសន្ធិសញ្ញា មិត្តភាព និងសហប្រតិបត្តិការនៅអាស៊ីអាគ្នេយ៍ សម្រាប់សាធារណរដ្ឋសហព័ន្ធប្រេស៊ីល និងលិខិតូបករណ៍នៃការសុំចូលជាភាគី នៃសន្ធិសញ្ញាមិត្តភាព និងកិច្ចសហប្រតិបត្តិការ នៅអាស៊ីអាគ្នេយ៍ របស់សាធារណរដ្ឋសហព័ន្ធប្រេស៊ីល៕
