ភ្នំពេញៈ ប្រធានាធិបតីសហរដ្ឋអាមេរិក លោក
បារ៉ាក់ អូបាម៉ា ចាប់ផ្តើមបំពេញទស្សនកិច្ចជាផ្លូវការ នៅកម្ពុជា រយៈពេល២ថ្ងៃ
ចាប់ពីថ្ងៃទី១៩-២០ ខែវិច្ឆិកា ឆ្នាំ២០១២
ដើម្បីចូលរួមកិច្ចប្រជុំអាស៊ាន-អាមេរិកលើកទី៤ និង អាស៊ីបូព៌ា
និងជួបពិភាក្សាការងារទ្វេភាគីជាមួយនាយករដ្ឋមន្រ្តីកម្ពុជា សម្តេចតេជោ ហ៊ុន
សែន ផងដែរ។
ដំណើរមកកាន់ប្រទេសកម្ពុជាជាលើកដំបូងចាប់តាំងពីប្រទេសទាំង២
បានបង្កើតទំនាក់ទំនងការទូតតាំងពីថ្ងៃទី ១១ ខែកក្កដា ឆ្នាំ១៩៥០ របស់លោក
បារ៉ាក់ អូបាម៉ា និង គណៈប្រតិភូជាន់ខ្ពស់ រួមមានប្រមុខការទូតលោកស្រី
ហ៊ីលឡារី គ្លីនតុន បានមកដល់ព្រលានយន្តហោះអន្តរជាតិនាវេលាម៉ោង ៥
និង៤០នាទីល្ងាចថ្ងៃចន្ទ ទី១៩ ខែវិច្ឆិកា ឆ្នាំ ២០១២
តាមជើងហោះហើរពិសេសអ៊ែរហ្វក១ ដោយមានការស្វាគមន៍យ៉ាងកក់ក្តៅពី
លោករដ្ឋមន្រ្តីក្រសួងអប់រំ យុវជន និងកីឡា អ៊ឹម សិទ្ធី និងលោក អ៊ុច បូរិទ្ធ
រដ្ឋលេខាធិការក្រសួងការបរទេស មន្រ្តីជាន់ខ្ពស់រាជរដ្ឋាភិបាលកម្ពុជា
និងមន្រ្តីស្ថានទូតអាមេរិក។ ក្នុងឱកាសនោះ គេក៏សង្កេតឃើញ លោកឧត្តមសេនីយ៍ទោ
ហ៊ុន ម៉ាណែត មេបញ្ជាការរងកងទ័ពជើងគោក និងជាមេបញ្ជាការ នៃបញ្ជាការដ្ឋានជាតិ
កម្លាំងពិសេស ប្រឆាំងភេរវកម្ម អញ្ជើញទៅកន្លែងនោះផងដែរ។
ការមកដល់របស់ប្រធានាធិបតីសហរដ្ឋអាមេរិក ជនស្បែកខ្មៅរូបនេះ
នៅប្រទេសកម្ពុជា បន្ទាប់ពីរូបបានបញ្ចប់ ដំណើរទស្សនកិច្ចនៅប្រទេសថៃ
និងប្រទេសមីយ៉ាន់ម៉ា កាលពីថ្ងៃទី១៨ និងព្រឹកថ្ងៃទី១៩ ខែវិច្ឆិកា។
សម្រាប់ការមក ដល់របស់ប្រធានាធិបតីអាមេរិក
ជាលើកដំបូងនៅកម្ពុជានាពេលនេះ ស្ថិតនៅព្រលានយន្តហោះ អន្តរជាតិភ្នំពេញ
គេសង្កេតឃើញថា ត្រូវបានពង្រាយកម្លាំងសមត្ថកិច្ចចម្រុះជាច្រើននាក់
របស់ប្រទេសកម្ពុជា អមដោយកម្លាំង
អង្គរក្សពិសេសរបស់ប្រធានាធិបតីអាមេរិកផងដែរ។
តាមការគ្រោងទុក ដែលត្រូវបានឲ្យដឹងពីស្ថានទូតអាមេរិក
និងមន្រ្តីជាន់ខ្ពស់កម្ពុជា លោកអូបាម៉ា ដែលទើបនឹង
ជាប់ឆ្នោតជាប្រធានាធិបតីអាមេរិក ក្នុងអាណត្តិទី២ កាលពីថ្ងៃទី៦ ខែវិច្ឆិកា
កន្លងទៅនេះ នឹងចូលរួមកិច្ចប្រជុំ កំពូលអាស៊ាន-អាមេរិក លើកទី៤
និងកិច្ចប្រជុំអាស៊ីបូព៌ា ព្រមទាំងជួបពិភាក្សាការងារទ្វេភាគីជាមួយនាយករដ្ឋ
មន្រ្តីកម្ពុជា និងជាប្រធានអាស៊ានបច្ចុប្បន្ន សម្តេចតេជោ ហ៊ុន សែន
នៅវិមានសន្តិភាព។
ដំណើរទស្សនកិច្ចរបស់ប្រធានាធិបតីអាមេរិក មកកាន់តំបន់អាស៊ី
និង សមាគមអាស៊ាន នៅពេលនេះ ត្រូវបាន គេរំពឹងថា គោលបំណងសំខាន់នោះ
ដើម្បីរឹតចំណងមិត្តភាពឲ្យកាន់ តែខ្លាំងលើកគ្រប់វិស័យរវាងតំបន់អាស៊ីប៉ា
ស៊ីហ្វិក និង មហាអំណាចសេដ្ឋកិច្ចទី១លើពិភពលោក ខណៈដែលអ្នកវិភាគខ្លះ
បានលើកឡើងថា អាមេរិកបាន និងកំពុង ពង្រីកឥទ្ធិពលរបស់ខ្លួននៅតំបន់នេះ
និងម្យ៉ាងទៀត ដើម្បីរារាំងការពង្រីកឥទ្ធិពលរបស់ចិន។
លោក បារ៉ាក់ អូបាម៉ា ជាប្រធានាធិបតីអាមេរិក ស្បែកខ្មៅដំបូងគេបង្អស់ ក្នុងប្រវត្តិសាស្រ្តអាមេរិក។
អូបាម៉ា ធ្លាប់ធ្វើជាសមាជិកសភា រដ្ឋ អ៊ីលីណយ ចាប់ពីឆ្នាំ១៩៩៧ ដល់២០០៤
និងធ្វើជាសមាជិកព្រឹទ្ធិសភា សហរដ្ឋអាមេរិក ចាប់ពីឆ្នាំ២០០៥ រហូត
ដល់ថ្ងៃទី១៦ ខែវិច្ឆិកា ឆ្នាំ២០០៨ និងចូលកាន់តំណែងជាប្រធានា ធិបតី
នៅថ្ងៃទី២០ ខែមករា ឆ្នាំ២០០៩ នាអគារ កាពីតូល ក្រុងវ៉ាស៊ីនតោន។អូបាម៉ា រៀនចប់ពីសាកលវិទ្យាល័យកូឡុំប៊ី (Columbia University) និងពីសាលាច្បាប់ហាវើដ (Harvard Law School) ជាសាលាដែលគេធ្លាប់ធ្វើជានាយក នៃទស្សនាវដ្តីហាវើដ-ឡ-រីវីយូ(Harvard Law Review) នៅទី នោះ។ លោក អូបាម៉ា ធ្លាប់ធ្វើជាប្រធានសហជីព ជាសាស្រ្តាចារ្យបង្រៀនផ្នែកច្បាប់នៅមហាវិទ្យាល័យឈីកា ហ្គោ (Chicago) ចាប់ពីឆ្នាំ១៩៩២ ដល់២០០៤ និងធ្លាប់ធ្វើជាមេធាវីការពារសិទ្ធិប្រជាពលរដ្ឋផងដែរ មុននឹង ងាកមកធ្វើនយោបាយ។
លោក អូបាម៉ា កើតនៅថ្ងៃទី៤ ខែសីហា ឆ្នាំ១៩៦១ នាក្រុង ហូណូលូលូ រដ្ឋហាវ៉ៃ មានឈ្មោះពេញ បារ៉ាក់ ហូ សេនអូបាម៉ា ឪពុកជានិស្សិតជនជាតិ កេនយ៉ា ឈ្មោះ បារ៉ាក់ អូបាម៉ាស៊ីនៀ (Barack Obama,Sr.) ដែល ទទួលបានអាហារូបករណ៍មករៀននៅអាមេរិក បានជួបនាង អែន ដាន់ហែម (Ann Dunham) នៅសាកលវិទ្យា ល័យហាវ៉ៃ (University of Hawii) និងបានរៀបការនៅថ្ងៃទី២ ខែកុម្ភៈ ឆ្នាំ១៩៦១ តែក្រោយមកឪពុកម្តាយ របស់លោក បានចែកផ្លូវគ្នា នៅពេលលោក អូបាម៉ា មានអាយុ ២ឆ្នាំ។ ឪពុករបស់លោក បានធ្វើដំណើរមក លេងជាមួយលោកបានម្តង នៅពេលគាត់មានអាយុបាន ១០ឆ្នាំ។ ក្រោយពីនោះ នៅឆ្នាំ១៩៨២ គាត់ក៏ទទួល គ្រោះថ្នាក់រថយន្តស្លាប់ចោលទាំងភរិយាចាស់ និងថ្មី ព្រមទាំងកូនជាច្រើននាក់។ នៅចន្លោះអាយុ ៦-១០ឆ្នាំ អូបាម៉ា រៀននៅទីក្រុងហ្សាកាតា ប្រទេសឥណ្ឌូនេស៊ី ដោយសារមា្តយទៅរស់នៅជាមួយប្តីថ្មី ដែលជាជនជាតិ ឥណ្ឌូនេស៊ី ធ្លាប់មករៀននៅអាមេរិក។ លុះដល់ឆ្នាំ ១៩៧១ លោក អូបាម៉ា ក៏ត្រឡប់មករស់នៅជាមួយជីដូនជីតា ខាងម្តាយ ហើយចូលរៀនសាលា ភូណាហ៊ូ (Punahou) រហូតដល់ឆ្នាំ១៩៧៩។
បុព្វបុរសខាងម្តាយ អូបាម៉ា ក៏មានជាប់សែស្រឡាយ ជាមួយអតីតប្រធានាធិបតី ហ៊ែរី ទ្រូម៉ែន និងអតីតអនុប្រធា នាធិបតី ឌិច ឆេនី ផងដែរ។ ម្តាយ របស់គាត់ត្រឡប់មកស្រុកកំណើត (រដ្ឋហាវ៉ៃ) នៅឆ្នាំ១៩៧២ រហូតដល់ឆ្នាំ ១៩៧៧ ម្តាយគាត់ ក៏ត្រឡប់ទៅឥណ្ឌូនេស៊ី ដើម្បីធ្វើការជាអ្នកស្រាវជ្រាវផ្នែកមនុស្សវិទ្យា។ លុះដល់ឆ្នាំ ១៩៩៤ នាងត្រឡប់មកផ្ទះនៅរដ្ឋហាវ៉ៃវិញ ហើយទទួលមរណភាព នៅក្នុងឆ្នាំ១៩៩៥ ដោយសារជំងឺមហារីក។
១៩៧៩ ចូលរៀនសាលាអុកស៊ីដង់តាល់ (Occidental) នៅឡូសអេនជើឡេស
១៩៨១ ចូលរៀននៅសាកលវិទ្យាល័យ កូឡុំបៀ (Colombia) នៅញូយ៉កស៊ីធី
១៩៨៣ ទទួលបរិញ្ញបត្រវិទ្យាសាស្រ្តនយោបាយ និងទំនាក់ទំនងបរទេស
១៩៨៨ ចូលរៀនច្បាប់ នៅមហាវិទ្យាល័យច្បាប់ ហាវើដ
១៩៩០ ត្រូវបានជ្រើសតាំងជានាយកទស្សនាវដ្តី Harvard Law Review
១៩៩១ ទទួលបរិញ្ញបត្រច្បាប់ Juris Doctor ពីមហាវិទ្យាល័យ ហាវើដ
១៩៩២ រៀបការជាមួយនាង មីសែល រ៉ូប៊ិនសុន (Michelle Robinson)
១៩៩៥ ចេញផ្សាយសៀវភៅសុបិនពីលោកឳពុក Dreams from My Father
១៩៩៧-២០០៤ ជាសមាជិកសភារដ្ឋអ៊ីលីណយ(Illinois)
២០០៥-២០០៨ ជាសមាជិកព្រឹទ្ធសភាសហរដ្ឋអាមេរិក
២០០៨-២០១២ ជាប្រធានាធិបតីសហរដ្ឋអាមេរិក
២០១២ ជាប់ឆ្នោតសាជាថ្មី ជាប្រធានាធិបតីសហរដ្ឋអាមេរិក៕
វិដេអូនៃការមកដល់របស់ប្រធានាធិបតី បារ៉ាក់ អូបាម៉ា នៅកម្ពុជា
