ពិរុទ្ធជន ហេង ពៅ ពេលឡើងសវនាការនៅសាលាឧទ្ធរណ៍កាលពីកន្លងមក។ រូបថត ផា លីណា
ភ្នំពេញៈ លោក ហេង ពៅ អតីតស្នងការរាជធានី អាយុ៥៥ ឆ្នាំ បានលះបង់សាសនាព្រះពុទ្ធ មកកាន់សាសនាគ្រិស្តវិញ ព្រោះតែគិតថា លោករងភាពអយុត្តិធម៌នៅក្នុងជីវិត។
លោក តាន់ សេណារ៉ុង ព្រះរាជអាជ្ញារងនៃសាលាដំបូងភ្នំពេញ បានឲ្យដឹងថា លោក ហេង ពៅ ឥឡូវលែងជាពុទ្ធសាសនិកហើយ គាត់ជាអ្នកកាន់សាសនាគ្រិស្ត ហើយគាត់បានសុំតុលាការឲ្យរៀបចំកន្លែងស្បថតាមពិធីសាសនា គ្រិស្ត នៅពេលតុលាការកោះហៅឲ្យមកឆ្លើយក្នុងរឿងក្តីព្រហ្មទណ្ឌរបស់គាត់ នៅថ្ងៃអនាគត។
លោក កៅ ទី មេធាវីនៃក្រុមមេធាវីភ្នំពេញថ្លែងថា លោក ហេង ពៅ បានគោរពសាសនាគ្រិស្ត បន្ទាប់ពីជាប់ឃុំ ក្រោមការផ្តន្ទាទោសឲ្យជាប់ពន្ធនាគារជាង ១០០ឆ្នាំ កាលពីឆ្នាំ២០១០។
អនុរក្សនៅ មជ្ឈមណ្ឌលកែប្រែម.១ (ព្រៃស) ដែលសុំមិនឲ្យបញ្ចេញឈ្មោះប្រាប់ថា លោក ហេង ពៅ ជាអ្នកជឿជាក់ខ្លាំងលើព្រះពុទ្ធសាសនា។ ដោយជំនឿលើព្រះពុទ្ធនេះ ក្នុងឆ្នាំ២០០១ គាត់បានចំណាយប្រាក់រាប់សែនដុល្លារជួយសង់រូបពុទ្ធបដិមាធំមួយ នៅខេត្តសៀមរាប។
លោកថា លោក ហេង ពៅ បានក្លាយជាអ្នកកាន់សាសនាគ្រិស្ត តាមការណែនាំពីអ្នកទោសបរទេស នៅពន្ធនាគារព្រៃស។
លោកបន្ត ថា៖ «លោក ហេង ពៅមានមិត្តភក្តិជាច្រើនជាជនបរទេសនិងជាប្រូតេស្តង់។ គាត់បានដាក់ចិត្តកាន់សាសនាគ្រិស្ត មកពីគាត់ស្អប់ភាពអយុតិ្តធម៌និងមនុស្សអាក្រក់...ព្រោះគាត់បាន រងភាពអយុតិ្តធម៌ និងការចោទប្រកាន់ខុសសម្រាប់គាត់»។
លោក កៅ សូផា មេធាវីការពារលោក ហេង ពៅ ថ្លែងថា មកដល់ពេលនេះ កូនក្តីលោកត្រូវចោទប្រកាន់ពីបទព្រហ្មទណ្ឌ១៦ករណីនិងកំពុងទទួល ទោសជាង ១០០ ឆ្នាំ នៅក្នុងពន្ធនាគារ។
លោកបន្តទៀតថា ក្នុងចំណោមរឿងក្តីទាំង១៦ មាន៨ករណី បានជំនុំជម្រះនៅសាលាដំបូងរាជធានីរួចហើយ ហើយខ្លះទៀតកំពុងបន្តនីតិវិធីនៅតុលាការ។
លោកបន្តថា៖ «កូនក្តីខ្ញុំបានទទួលភាពអយុតិ្តធម៌ក្នុងជីវិត។ តាមពិតគាត់មិនបានប្រព្រឹត្តបទល្មើស ដូចការចោទប្រកាន់ទេ។ គាត់គ្រាន់តែជាជនរងគ្រោះនៃការចោទប្រកាន់តែប៉ុណ្ណោះ»។
លោក បន្ថែមថា៖ «ដើម្បីរកការពិតនិងយុតិ្តធម៌ឲ្យគាត់ ខ្ញុំសូមតុលាការស្រាវជ្រាវ និងស៊ើបអង្កេតឲ្យស៊ីជម្រៅលើរឿងក្តីនេះ ហើយបើកសវនាការលើរឿងក្តីដែលនៅសល់ឲ្យបានឆាប់»។
លោក ហេង ពៅ មិនអាចទាក់ទងសុំការអត្ថាធិប្បាយបានទេ ពីម្សិលមិញ។ ប៉ុន្តែ ពីខែមិថុនា លោកថ្លែងប្រាប់ភ្នំពេញ ប៉ុស្តិ៍ ថា ការចោទប្រកាន់គាត់ទាំងអស់មិនពិតទេ។ ការចោទនោះគ្រាន់តែជាការបំផ្លើស ដោយអ្នកដែលស្អប់គាត់ ហើយរៀបចំគម្រោងទម្លាក់កំហុសនិងចាប់ខ្លួនគាត់។
លោកថា៖ «ខ្ញុំមិនបានប្រព្រឹត្តអំពើទាំងនេះដូចការចោទប្រកាន់ទេ។ ដើម្បីរកយុតិ្តធម៌ និងការពិតសម្រាប់រឿងក្តីខ្ញុំនេះ ខ្ញុំសូមឲ្យតុលាការរកចៅក្រមយុតិ្តធម៌មកស្បថមុនជំនុំ ជម្រះ។ សូមកុំជឿថាខ្ញុំជាមនុស្សល្អ តែសុំជឿលើភស្តុតាង»។ យោងឯកសារតុលាការ លោក ហេង ពៅ ត្រូវបានចាប់ខ្លួនដោយនគរបាលក្រសួងមហាផ្ទៃ ក្នុងឆ្នាំ២០០៦។ គាត់ត្រូវសាលាដំបូងភ្នំពេញផ្តន្ទាទោសដាក់ពន្ធនាគារសរុប១០៣ឆ្នាំ៕ TK
