ភ្នំពេញ:
មន្ត្រីជាន់ខ្ពស់ក្រសួងមហាផ្ទៃ ក្រសួងកិច្ចការនារី
ក្រសួងការងារ និងមន្ត្រីតុលាការ របស់ប្រទេសកម្ពុជា
និងប្រទេសម៉ាឡេស៊ី បានជួបគ្នា
ក្នុងកិច្ចប្រជុំពិភាក្សាលើសេចក្តីព្រាងអនុស្សរណៈនៃការយោគយល់គ្នា
MOU រវាងរាជរដ្ឋាភិបាល នៃព្រះរាជាណាចក្រកម្ពុជា និងរដ្ឋាភិបាល
នៃប្រទេសម៉ាឡេស៊ី ស្តីពី
កិច្ចសហប្រតិបត្តិការប្រឆាំងនឹងអំពើជួញដូរមនុស្ស។ កិច្ចព្រមព្រៀង
MOU នឹងត្រូវចុះហត្ថលេខា នាថ្ងៃទី២២ ខែវិច្ឆិកា ឆ្នាំ២០១២។
កិច្ចប្រជុំពិភាក្សា ដែលបានធ្វើឡើង នៅសណ្ឋាគារ ឡឺរ៉ូយ៉ាល់ ភ្នំពេញ
នៅថ្ងៃទី២១ ខែវិច្ឆិកា ឆ្នាំ២០១២ ក្រោមការសម្របសម្រួល
រៀបចំឡើងដោយអង្គការសហប្រជាជាតិ
គឺជាការផ្តល់ឱកាសដល់ក្រុមមន្ត្រីរដ្ឋាភិបាលកម្ពុជា និងម៉ាឡេស៊ី
ដែលធ្វើការប្រយុទ្ធប្រឆាំងនឹងការជួញដូរមនុស្ស ជាពិសេសស្ត្រី
និងកុមារ អាចជួបពិភាក្សាតទល់គ្នាអំពីទស្សនៈផ្សេងៗ
និងបំភ្លឺបន្ថែម ទៅលើបញ្ហា ឬក្តីបារម្ភនានា
ដើម្បីឈានទៅសម្រេចបានជាឯកច្ឆន្ទ លើចំណុចទាំងឡាយ
នៅក្នុងសេចក្តីព្រាង អនុស្សរណៈ ដែលប្រទេសទាំងពីរ
មិនមានការឯកភាពគ្នានៅឡើយ។
តាមកម្មវិធីអនុស្សរណៈនៃ
ការយោគយល់គ្នា រវាងរាជរដ្ឋាភិបាលកម្ពុជា និងរដ្ឋាភិបាលម៉ាឡេស៊ី
ស្តីពី កិច្ចសហប្រតិបត្តិការប្រឆាំងនឹងអំពើជួញដូរមនុស្ស
នឹងធ្វើពិធីចុះហត្ថលេខា នៅព្រឹកថ្ងៃទី២២ ខែវិច្ឆិកា ឆ្នាំ២០១២។
លោកស្រី ជូ ប៊ុនអេង រដ្ឋលេខាធិការក្រសួងមហាផ្ទៃ
និងជាប្រធាននៃលេខាធិការដ្ឋានរបស់គណៈកម្មាធិការជាតិដឹកនាំបង្ក្រាប
អំពើជួញដូរមនុស្ស ការរត់ពន្ធ ការធ្វើអាជីវកម្ម ពលកម្មលើមនុស្ស
និងការធ្វើអាជីវកម្មផ្លូវភេទលើស្ត្រី និងកុមារ ( ប.ជ.រ.ព.ភ.
) បានថ្លែងថា រាជរដ្ឋាភិបាលនៃព្រះរាជាណាចក្រកម្ពុជា
និងរដ្ឋាភិបាលប្រទេសម៉ាឡេស៊ី បានចែករំលែកនូវការព្រួយបារម្ភរួមគ្នា
ទៅលើបញ្ហាជួញដូរមនុស្ស ដែលចែងក្នុងអនុសញ្ញាអង្គការសហប្រជាតិ
ស្តីពី ការប្រឆាំងបទឧក្រិដ្ឋកម្មឆ្លងដែន ដែលមានអង្គការចាត់តាំង
និងពិធីសារ ស្តីពី ការទប់ស្កាត់ បង្រាប និងដាក់ទណ្ឌកម្ម
ការជួញដូរមនុស្ស ជាពិសេសស្ត្រី និងកុមារ សេចក្តីថ្លែងការណ៍ អាស៊ាន
ស្តីពី ការប្រឆាំងនឹងការជួញដូរមនុស្ស ជាពិសេសស្ត្រី និងកុមារ
ដែលបានអនុវត្ត នៅវៀងចន្ទ សាធារណរដ្ឋប្រជាធិបតេយ្យប្រជាមានិតឡាវ
នៅខែវិច្ឆកា ឆ្នាំ២០០៤ និងសន្ធិសញ្ញាអាស៊ាន ស្តីពី
ការជួយគ្នាទៅវិញទៅមកផ្នែកច្បាប់ ក្នុងវិស័យព្រហ្មទណ្ឌ
ដែលបានចុះហត្ថលេខា នៅកូឡាឡាំពួរ ប្រទេសម៉ាឡេស៊ី នៅខែវិច្ឆិកា
ឆ្នាំ២០០៤។
លោកស្រី ជូ ប៊ុនអេង បានបន្ថែថា
"ឧក្រិដ្ឋកម្មឆ្លងដែននេះ
បានជះឥទ្ធិពលអវិជ្ជមានទាំងនៅលើប្រទេសកម្ពុជា និងប្រទេសម៉ាឡេស៊ី
ក៏ដូចជាសហគមន៍ក្នុងតំបន់ និងពិភពលោកទាំងមូល"។
លោកស្រី ជូ
ប៊ុនអេង បានបន្តទៀតថា ក្នុងខែកុម្ភៈ ឆ្នាំ២០០៨ រាជរដ្ឋាភិបាលកម្ពុជា
បានបង្កើតច្បាប់ ស្តីពី ការបង្ក្រាបអំពើជួយដូរមនុស្ស
និងអំពើធ្វើអាជីវកម្មលើផ្លូវភេទ ដែលបានគ្របដណ្តប់
ទៅលើការជួញដូរទាំងស្ត្រី និងបុរស និងបានចែងលម្អិតអំពីប្រភេទ
នៃបទល្មើសព្រហ្មទណ្ឌនានា
ស្របតាមខ្លឹមសារនៃក្រមព្រហ្មទណ្ឌប្រទេសកម្ពុជា
និងនិយមនិយមនៃបទល្មើសជួញដូរមនុស្ស
ដែលមានក្នុងពិធីសាររបស់អង្គការសហប្រជាជាតិ។ នៅឆ្នាំដដែលនេះ
រាជរដ្ឋាភិបាល បានសម្រេចកំណត់ថ្ងៃទី១២ ធ្នូ ជា
“ទិវាជាតិប្រឆាំងការជួញដូរមនុស្ស” សម្រាប់ប្រទេសកម្ពុជា។
លោកស្រីរដ្ឋលេខាធិការ បានបន្ថែមថា ចាប់តាំងពីពេលនោះមក រាជរដ្ឋាភិបាល
រួមជាមួយនឹងការគាំទ្ររបស់ដៃគូអភិវឌ្ឍន៍នានា
បានប្រារព្ធទិវាជាតិប្រឆាំអការជួញដូរមនុស្ស
ចំនួនបីលើកបន្តបន្ទាប់គ្នា សំដៅលើកកម្ពស់ការយល់ដឹងរបស់សាធារណជន
ក៏ដូចជាការកៀរគរការគាំទ្រឲ្យខ្លាំងក្លាពីសំណាក់អ្នកពាក់ព័ន្ធ
ផ្សេងៗ ក្នុងកិច្ចខិតខំប្រឹងប្រែងរួមគ្នា
ប្រយុទ្ធប្រឆាំងការជួញដូរមនុស្ស។
លោកស្រី ជូ ប៊ុនអេង
បានបន្ថែមថា ក្នុងខែសីហា ឆ្នាំ២០០៩ ក្រសួងសង្គមកិច្ច អតីតយុទ្ធជន
និងយុវនីតិសម្បទា បានដាក់ឲ្យអនុវត្តគោលនយោបាយ ស្តីពី
កិច្ចការពារសិទ្ធិជនរងគ្រោះ ដោយអំពើជួញដូរមនុស្ស។ ក្នុងខែធ្នូ
ឆ្នាំ២០០៩ រដ្ឋាភិបាលប្រទេសកម្ពុជា និងប្រទេសវៀតណាម
បានចុះហត្ថលេខលើនីតិវិធីប្រតិបត្តិបទដ្ឋាន (SOP) ស្តីពី
ការកំណត់អត្តសញ្ញាណ និងការធ្វើមាតុភូមិនិវត្តន៍ជនរងគ្រោះ
ដោយសារអំពើជួញដូរ។ នីតិវិធីទាំងនោះ
ត្រូវបានដាក់ឲ្យដំណើរការរហូតមកដល់ពេលនេះ។ លើសពីនេះទៅទៀត
នៅក្នុងខែនិងឆ្នាំដដែល រាជរដ្ឋាភិបាលកម្ពុជាបានសម្រេចបង្កើត
“គណៈកម្មាធិការជាតិ ដឹកនាំការបង្ក្រាបអំពើជួញដូរមនុស្ស ការរត់ពន្ធ
ការធ្វើអាជីវកម្មពលកម្មលើមនុស្ស
និងការធ្វើអាជីវកម្មផ្លូវភេទលើស្ត្រី និងកុមារ (ប.ជ.រព.ភ)”។
លោកស្រី បានបន្ថែមថា គណៈកម្មាធិការជាតិនេះ
បានបង្កើតជាក្រុមការងារថា្នក់ជាតិផ្សេងៗ
ទាក់ទងទៅនឹងការបង្ការការទប់ស្កាត់ ការពារ យុត្តិធម៌ អនុវត្តច្បាប់
កិច្ចការកុមារ និងកិច្ចសហប្រតិបត្តិការអន្តរជាតិ
ដើម្បីគាំទ្រឲ្យមានវិធីសាស្ត្រគ្រប់ជ្រុងជ្រោយ
ក្នុងការងារប្រយុទ្ធប្រឆាំងការជួញដូរមនុស្សនៅក្នុងប្រទេសកម្ពុជា។
សមាជិកក្រុមការងារទាំងនោះ មានសមាសភាពមកពីស្ថាប័ន រដ្ឋាភិបាល
និងអង្គការមិនមែនរដ្ឋាភិបាលនានា។ មូលហេតុ
គឺយើងចង់ធានាឲ្យបានថាស្ថាប័នរដ្ឋាភិបាល
និងសង្គមស៊ីវិលនៅគ្រប់លំដាប់ថា្នក់ទាំងអស់
នឹងចូលរួមក្នុងកិច្ចខិតខំប្រឹងប្រែងកាត់បន្ថយការជួញដូរមនុស្ស។
នៅឆ្នាំ២០១០
ក្រសួងយុត្តិធម៌បានរៀបចំការបង្កើតជាបណ្តាញមូលដ្ឋានទិន្នន័យ
ផ្ទៃក្នុង ស្តីពី ការចោទប្រកាន់-ផ្តន្ទាទោស ដែលតាមរយៈទិន្នន័យ
ត្រូវបានបញ្ចូលទៅក្នុងប្រព័ន្ធកុំព្យូទ័រ ហើយរបាយការណ៍ស្តីពីជនល្មើស
និងជនរងគ្រោះ ដោយអំពើជួញដូរមនុស្ស ត្រូវបានរៀបចំចងក្រងឡើង។
ក្នុងឆ្នាំដដែលនេះ
ប្រទេសកម្ពុជាបានឲ្យសច្ចាប័នលើសន្ធិសញ្ញាអាស៊ានស្តីពីការជួយគ្នា
ទៅវិញទៅមកផ្នែកច្បាប់ក្នុងវិស័យព្រហ្មទណ្ឌ។ កាលពីឆ្នាំមុន
រាជរដ្ឋាភិបាលបានសម្រេចចេញអនុក្រឹតថ្មី (អនុក្រឹតលេខ១៩០) ស្តីពី
“ការពគ្រប់គ្រងលើការបញ្ជូនពលករខ្មែរ ទៅធ្វើការនៅបរទេស
តាមរយៈទីភ្នាក់ងារជ្រើសរើសឯកជន”។
លោកស្រី ជូ ប៊ុនអេង
បានបន្ថែមថា អនុក្រឹតថ្មីនេះ បាននិរាករណ៍អនុក្រឹតចាស់
ដែលត្រូវបានអនុវត្ត កាលពីឆ្នាំ១៩៩៥។ ក្នុងឆ្នាំដដែលនេះ
រាជរដ្ឋាភិបាលបានបញ្ចូលមេរៀន ទាក់ទងទៅនឹងការប្រឆាំងការជួញដូរមនុស្ស
ទៅក្នុងសៀវភៅបណ្តុះបណ្តាលគរុសិស្សទុតិយភូមិ
នៅតាមមជ្ឈមណ្ឌលគរុកោសល្យភូមិភាគទាំងប្រាំមួយ។
លោកស្រី
បន្ថែមថា រាជរដ្ឋាភិបាលក៏បានអនុម័តទៅលើ “ផែនការសកម្មភាពជាតិ
ស្តីពីការបង្ក្រាបអំពើជួញដូរ ការរត់ពន្ធ
ការធ្វើអាជីវកម្មពលកម្មលើមនុស្ស និងការធ្វើអាជីកម្មផ្លូវភេទ”
ដែលជាផែនទីបង្ហាញផ្លូវដ៏សំខាន់ សម្រាប់ទីភ្នាក់ងាររដ្ឋាភិបាល
និងស្ថាប័នសង្គមស៊ីវិល។
លោកស្រី ជូ ប៊ុនអេង ក៏បានបន្ថែមថា
ថ្មីៗនេះ កាលពីថ្ងៃទី២៨ ខែកញ្ញា ឆ្នាំ២០១២
រាជរដ្ឋាបាលនៃព្រះរាជាណាចក្រកម្ពុជា
និងរដ្ឋាភិបាលនៃសាធារណរដ្ឋសង្គមនិយមវៀតណាម
បានចុះហត្ថលេខាលើកិច្ចព្រមព្រៀង ស្តីពី
វិសោធនកម្មលើកិច្ចព្រមព្រៀងរវាងរដ្ឋាភិបាល នៃព្រះរាជាណាចក្រកម្ពុជា
និងរដ្ឋាភិបាលនៃសាធារណរដ្ឋសង្គមនិយមវៀតណាម ស្តីពី
កិច្ចសហប្រតិបត្តិការទ្វេភាគីដើម្បីលុបបំបាត់ការជួញដូរស្ត្រី
និងកុមារ និងជួយដល់ជនរងគ្រោះ ដោយសារការជួញដូរ
ដែលត្រូវបានបានចុះហត្ថលេខាជាលើកដំបូង កាលពីឆ្នាំ២០០៥។
លោកស្រី
ជូ ប៊ុនអេង ក៏បានលើកឡើងថា ជាចុងក្រោយ និងជាបន្តបន្ទាប់ទៀត
រាជរដ្ឋាភិបាលនៃព្រះរាជាណាចក្រកម្ពុជា បានសហការជាមួយអាជ្ញាធរ
និងសង្គមស៊ីវិលទាំងនៅក្នុងប្រទេសកម្ពុជា និងប្រទេសជាគោលដៅ
(ដោយរួមមានទាំងប្រទេសម៉ាឡេស៊ីផងដែរ) ក្នុងការជួយសង្គ្រោះ
និងធ្វើមាតុភូមិនិវត្តន៍ជនរងគ្រោះជាច្រើននាក់។
លោកស្រី
ក៏បានថ្លែងអំណរគុណយ៉ាងជ្រាលជ្រៅ ចំពោះរដ្ឋាភិបាលម៉ាឡេស៊ី
ដែលបានសហការជួយដោះស្រាយបញ្ហានេះ ដោយទឹកចិត្តសប្បុរស។
លោកស្រី ជូ ប៊ុនអេង ក៏បានលើកឡើងថា ទោះបីជាមានកិច្ចខិតខំប្រឹងប្រែង
និងវឌ្ឍនភាពនាពេលកន្លងមកក៏ដោយ ក៏យើងនៅតែឃើញមានបញ្ហាផ្សេងៗ
ព្រមទាំងកត្តាប្រឈមនានា។ ឧទាហរណ៍ យើងឃើញមានប្រជាជនកម្ពុជា
ក្នុងចំនួនច្រើនកើនឡើងជាបន្តបន្ទាប់
បានបង្ខំចិត្តចាកចេញពីសហគមន៍របស់ពួកគេ
ដើម្បីស្វែងរកមុខរបរចិញ្ចឹមជីវិតផ្សេងៗ ដោយសហេតុថា
ពួកគេបានជួបប្រទះនូវបញ្ហាប្រឈម ដែលមានដូចជា ភាពក្រីក្រ
កំណើននៃចំនួនប្រជាជន សមត្ថភាពមានកម្រិត
ក្នុងការស្រូបយកទីផ្សារពលកម្ម ក្នុងស្រុក និងប្រភេទផ្សេងៗទៀត
នៃបញ្ហាសង្គម-សេដ្ឋកិច្ច ដែលគួរឲ្យកត់សម្គាល់។
លោកស្រី ជូ
ប៊ុនអេង ក៏បានលើកឡើងថា "នៅក្នុងចំណោមប្រជាជនភាគច្រើន នៅតាមជនបទ
ទេសសន្តប្រវសន៍ /ការធ្វើចំណាកស្រុក គឺជាវិធីមួយ
ដែលពួកគេបានប្រើប្រាស់ ដើម្បីបំពេញតម្រូវការមូលដ្ឋានរបស់ពួកគេ
តួយ៉ាងដូចជា ការសងបំណុលជាច្រើន (ដែលជារឿយៗ
ច្រើនទាក់ទងទៅនឹងត្រមូវការថែទាំសុខភាព)។ ពួកគេមួយចំនួន
បានទទួលផលវិជ្ជាមាន រីឯមួយចំនួនទៀតបានត្រឹមទទួលរងកេងប្រវ័ញ្ច
និង/ឬត្រូវគេជួញដូរប៉ុណ្ណោះ"។
ហេតុនេះ លោកស្រី ជូ ប៊ុនអេង
បានកត់សម្គាល់ថា នៅមានការងារច្រើនណាស់ ត្រូវធ្វើ
ដើម្បីជួយប្រជាជនទាំងនោះ ជាពិសេស គឺអ្នកងាយរងគ្រោះ ដូចជា
ពលករចំណាកស្រុក ជាដើម។ ឧទាហរណ៍ជាក់ស្តែងបំផុតមួយ ទៅលើការងារ
ដែលត្រូវបំពេញទាំងនោះ គឺសំដៅលើការបង្កើតកិច្ចសហប្រតិបត្តិការ
ជាមួយរដ្ឋាភិបាលម៉ាឡេស៊ី តាមរយៈការបង្កើតអនុស្សរណៈ យោគយល់គ្នា ស្តីពី
កិច្ចសហប្រតិបត្តិការប្រឆាំងការជួញដូរមនុស្ស។
ចំណែកលោក
ឌូហ្លាស ប្រូឌឺរីក ( DOUGLAS BRODERICK ) បានមានប្រសាសន៍ថា
មានកម្មករចំណាកស្រុកកម្ពុជាជាច្រើន ត្រូវបានបញ្ជូនទៅធ្វើការ
នៅប្រទេសម៉ាឡេស៊ី។ ពួកគេភាគច្រើន បានរកប្រាក់ចំណូល ហើយប្រាក់ចំណូល
ក្នុងគ្រួសាររបស់ពួកគេ ក៏បានជួយបង្កើនសេដ្ឋកិច្ចរបស់ប្រទេសជាតិ។
ទោះបីជាមានផ្នែកវិជ្ជមានក៏ដោយ
ក៏មានបទពិសោធន៍រវាងរំលោភបំពានខ្លះដែរ។ ដូច្នេះហើយ
យើងត្រូវឲ្យអាជ្ញាធរប្រទេសទាំងពីរ
ចាប់ផ្តើមជួយដល់កម្មករទាំងអស់នោះ។
តំណាងអង្គការសហប្រជាជាតិ
ក៏បានបន្ថែមថា "យើងដឹងហើយថា កម្ពុជា និងប្រទេសម៉ាឡេស៊ី
បានធ្វើការជួយការពារកម្មករចំណាកស្រុក
ប្រឆាំងនឹងការជួញដូរមនុស្សរួចមកហើយ។ ខ្ញុំជឿថា កិច្ចប្រជុំទាំងនេះ
គឺជាការបញ្ចប់នូវសចក្តីពង្រាងអនុស្សរណៈនៃកិច្ចយោគយល់គ្នា
រវាងកម្ពុជា និងប្រទេសម៉ាសឡេស៊ី"។
លោក ឌូហ្លាស ប្រូឌឺរីក
បានកត់សម្គាល់ថា ក្រុមអង្គការសហប្រជាជាតិ នៅកម្ពុជា
គឺមានការប្តេជ្ញាចិត្ត ក្នុងការបន្តការគាំទ្រ
សហការជាមួយគូទ្វេភាគីពាក់ព័ន្ធទាំងអស់
ដើម្បីជំរុញធានានូវឧត្តមភាពរបស់កម្មករចំណាកស្រុក
និងដើម្បីអ្នកដែលមិនបានទទួលនូវយុតិ្តធម៌។
ជា
ការកត់សម្គាល់ កាលពីថ្ងៃទី១៥ ខែតុលា ឆ្នាំ២០១១ រាជរដ្ឋាភិបាលកម្ពុជា
បានសម្រេចផ្អាកជាបណ្តោះអាសន្ន ក្នុងការបញ្ជូនពលករ
ដែលជាស្ត្រីកម្ពុជា ទៅបម្រើការតាមផ្ទះ នៅប្រទេសម៉ាឡេស៊ី។ ហេតុផល
ដោយសារតែស្ត្រីពលករកម្ពុជាភាគច្រើន ក្នុងចំណោមពលករកម្ពុជា ៥
ម៉ឺននាក់ ត្រូវរងនូវការកេងប្រវ័ញ្ច ការរំលោភបំពាន និងមួយចំនួន
ជាត្រូវបានគេជួញដូរផងដែរ៕
