រាជធានីភ្នំពេញ ៖ ប្រធានាធិបតីអាមេរិក
លោកបារ៉ាក់ អូបាម៉ា បានមកដល់ព្រលានយន្តហោះអន្តរជាតិភ្នំពេញហើយ
តាមជើងយន្តហោះពិសេសរបស់ប្រធានាធិបតី (Air Force One) កាលពីវេលាម៉ោង៥
និង៤៥នាទីល្ងាចថ្ងៃទី១៩ វិច្ឆិកា ២០១២នេះ
បន្ទាប់ពីលោកប្រធានាធិបតីរូបនេះបញ្ចប់បេសកកម្មដ៏សំខាន់ជាមួយ
មេដឹកនាំមួយចំនួននៅប្រទេសមីយ៉ាន់ម៉ា
និងទទួលស្វាគមន៍ពីលោករដ្ឋមន្ត្រីអ៊ឹម សិទ្ធី ។
ប្រព័ន្ធសន្តិសុខត្រូវបានពង្រឹងភ្លាមៗ
ដោយកម្លាំងយោធាអាេមរិក
សហការជាមួយកម្លាំងប្រដាប់អាវុធរបស់កម្ពុជាមានប៉ូលិស ប៉េអឹម
និងកងយោធពលខេមរភូមិន្ទចាប់តាំងពីក្នុងព្រលាន ជុំវិញព្រលាន
និងនៅតាមដងមហាវិថីសហព័ន្ធរុស្ស៊ីរហូតមកដល់វិមានសន្តិភាពទីស្តីការ
នាយករដ្ឋមន្ត្រីកន្លែងដែលបើកកិច្ចប្រជុំកំពូលអាស៊ានលើកទី២១
ហើយនៅទីនេះ គឺសម្តេចតេជោ ហ៊ុន សែន នាយករដ្ឋមន្ត្រីបានរង់ចាំជាស្រេច
ដើម្បីស្វាគមន៍ក្នុងនាមជាប្រធានអាស៊ាន ។
មុនពេលមកដល់ព្រលានយន្តហោះអន្តរជាតិ
ភ្នំពេញប្រហែល២០នាទី គេឃើញឧទ្ធម្ភាគចក្រ
ដែលជាកងការពាររបស់លោកប្រធានាធិបតីបារ៉ាក់
អូបាម៉ាជាច្រើនគ្រឿងហោះឆ្វែលជុំវិញព្រលាន
ដើម្បីត្រួតពិនិត្យសុវត្ថិភាព ហើយប្រព័ន្ធការពារនេះ
ត្រូវបានរៀបចំឡើងដោយរដ្ឋាភិបាលអាេមរិក និងរដ្ឋាភិបាលកម្ពុជា ។
គួរបញ្ជាក់ថា ចាប់ពីវេលាថ្ងៃត្រង់ថ្ងៃទី១៩
វិច្ឆិកា ២០១២ នេះ កំណាត់មហាវិថី, ដងវិថីសំខាន់ៗជាច្រើនកន្លែង
ត្រូវបានបិទចរាចរចេញចូលមួយរយៈសិន ជាពិសេសដងមហាវិថី
សហព័ន្ធរុស្ស៊ីតែម្តង មានសភាពស្ងាត់ជ្រងំ ។
ឯស្ថានីយប្រេងឥន្ធនៈជាច្រើនកន្លែង នៅតាមមហាវិថី ដងវិថីសំខាន់ៗ
ក៏ត្រូវបានផ្អាកដំណើរការដែរ រហូតបញ្ចប់កិច្ចប្រជុំកំពូលអាស៊ាន។
ដំណើរទស្សនកិច្ចផ្លូវរដ្ឋនេះ លោកបារ៉ាក់ អូបាម៉ា
នឹងចូលរួមកិច្ចប្រជុំកំពូលអាស៊ាននៅថ្ងៃទី១៩ និងថ្ងៃទី២០ វិច្ឆិកា ២០១២
ហើយលោកប្រធានាធិបតីអាមេរិករូបនេះនឹងជួបពិភាក្សាការងារទ្វេភាគី
ជាមួយសម្តេចតេជោនាយករដ្ឋមន្រ្តីហ៊ុន សែន ផងដែរ ។
ប៉ុន្តែចំពោះរបៀបវារៈអ្វីខ្លះ
ដែលប្រមុខរដ្ឋាភិបាលទាំងពីរ
លើកឡើងនោះមិនត្រូវបានអ្នកនំាពាក្យរាជរដ្ឋាភិបាលកម្ពុជាបង្ហើបឲ្យដឹងនោះឡើយ
។ មកទល់នឹងពេលនេះ នៅមិនទាន់មានព័ត៌មានថា
លោកអូបាម៉ានឹងអញ្ជើញទៅគោរពព្រះវិញ្ញាណក្ខន្ធព្រះមហាវីរក្សត្រនៅឡើយទេ
ពីព្រោះពេលវេលារបស់លោកអូបាម៉ា មកប្រទេសកម្ពុជា មានរយៈពេលខ្លី ។
