បើកលឿនពេក វ៉ារថយន្ត មួយគ្រឿង ជ្រុលទៅបុក រថយន្តមួយទៀត​ ស្លាប់ភ្លាមៗ នៅនឹងកន្លែង កើតហេតុ

ភ្នំពេញៈ យុវជនម្នាក់ត្រូវស្លាប់ភ្លាមៗ នៅនឹងកន្លែងកើតហេតុ ដោយសារតែបើកម៉ូតូលឿន វ៉ារថយន្តមួយគ្រឿង ដែលបើកស្របទិសគ្នា រួចហើយ ក៏ជ្រុលចង្កូត ទៅបុករថយន្តមួយគ្រឿងផ្សេងទៀត បើកបរច្រាសទិសគ្នា បណ្តាលឲ្យស្លាប់តែម្តង ហេតុការណ៍នេះ កើតឡើងកាលពីវេលា ម៉ោង ១៤និង៤០នាទី ថ្ងៃទី១៧ ខែវិច្ឆិកា ឆ្នាំ២០១២ ស្ថិតនៅតាមបណ្តោយផ្លូវជាតិលេខ៤ ភូមិព្រៃព្រីងខាងជើង សង្កាត់ចោមចៅ ខណ្ឌពោធិ៍សែនជ័យ រាជនធានីភ្នំពេញ។
ជនរងគ្រោះ ត្រូវបានគេស្គាល់ឈ្មោះ ងយ ភត្រា ភេទប្រុស អាយុ ១៨ឆ្នាំ រស់នៅភូមិត្រពាំងវែង ខាងកើតឃុំដងទង់ ស្រុកដងទង់ ខេត្តកំពត ជិះម៉ូតូ មួយគ្រឿង ម៉ាកហុងដា ស៊េរីឆ្នាំ២០០៧ ពណ៌ខ្មៅ ពាក់ស្លាកលេខ ព្រះសីហនុ 1A-2634 ។ រីឯរថយន្តបង្ក ម៉ាក ហ៊ីយ៉ាន់ដាយ ពណ៌ទឹកសមុទ្រ ប្រភេទ១២ កៅអី  ពាក់ស្លាកលេខ ភ្នំពេញ 2H4072 បើកបរដោយឈ្មោះ ចន សុចេង ភេទប្រុស អាយុ ៣៩ឆ្នាំ រស់នៅក្រាំងតារ័ត្ន ឃុំព្នាយ ស្រុក សំរោងទង ខេត្តកំពង់ស្ពឺ ។
បើយោងតាមប្រភពព័ត៌មាន ពីនគរបាលចរាចរខណ្ឌពោធិ៍សែនជ័យ បានឲ្យដឹងថា មុនពេលកើតហេតុ ជនរងគ្រោះជិះម៉ូតូម្នាក់ឯង ដោយបើក វ៉ាគេជាបន្តបន្ទាប់ លុះមកដល់ចំណុចកើតហេតុ ក៏ជ្រុលចង្កូតចូលទ្រូងផ្លូវ ហើយស្របពេលនោះ មានរថយន្តមួយគ្រឿងផ្សេងទៀតមកដល់  ក៏ជ្រុល ទៅបុករថយន្ត បណ្តាលដួលបោកក្បាលទៅនឹងថ្នល់ ស្លាប់ភ្លាមៗនៅនឹងកន្លែងកើតហេតុតែម្តង ។
ប្រភពបានបន្តទៀតថា បន្ទាប់ពីកើតហេតុ នគរបាលចរាចរខណ្ឌពោធិ៍សែនជ័យ ចុះទៅដល់កន្លែងកើតហេតុ ធ្វើអន្តរាគមន៍ ក្នុងនោះដែរ អ្នកបើកបរ បន្ទាប់ពីបុករួច មិនបានគេចខ្លួននោះទេ គឺឈប់រថយន្តនៅនឹងកន្លែងកើតហេតុ ហើយក៏ត្រូវនគរបាលឃាត់ខ្លួន កមកាន់ប៉ុស្តិ៍ចោមចៅ ដើម្បីធ្វើការ សាកសួរ ចំណែកឯសពវិញ ត្រូវបានប្រគល់ទៅក្រុមគ្រួសារ យកទៅធ្វើបុណ្យតាមប្រពៃណី  រថយន្តនិងម៉ូតូ ត្រូវបានយកទៅរក្សាទុក នៅអធិការដ្ឋាន នគរបាលខណ្ឌពោធិ៍សែនជ័យ ដើម្បីរង់ចាំភាគីទាំងសងខាង ចូលខ្លួនដោះស្រាយទៅតាមច្បាប់៕