ភ្នំពេញ: នៅពេលលោកអូបាម៉ាបានមកទស្សនកិច្ចរយ:ពេល២ថ្ងៃនៅកម្ពុជា កាលពីថ្ងៃទី១៩ និង២០ ខែវិច្ឆិកា លោកបានផ្តល់ផលប្រយោជន៍មួយដល់ប្រទេសកម្ពុជា។ នោះគឺកម្ពុជាជាតួអង្គដ៏សំខាន់មួយនៅក្នុងនយោបាយតំបន់ និងអន្តរជាតិ។ ដូច្នេះកេរ្ត៍ឈ្មោះរបស់កម្ពុជាក៏ត្រូវលើកតម្កើងទៅតាមនោះ។
លោកសុរិន ភីតសុវណ្ណ អគ្គលេខាធិការអាស៊ាន បានទទួលស្គាល់ថា ទស្សនកិច្ចនោះបាននាំផលប្រយោជន៍ដល់កម្ពុជា និងអាស៊ាន ក្នុងសង្វៀនអន្តរជាតិ។ ប៉ុន្តែនៅក្នុងកម្រិតទ្វេភាគី ទស្សនកិច្ចនោះ បានបង្ហាញរូបភាពមួយដែលតម្រូវអោយប្រទេសទាំងពីរ គឺកម្ពុជា និងអាមេរិក មានការយោគយល់គ្នាច្រើនជាងនេះ ដើម្បីលើកកម្ពស់ទំនាក់ទំនងទ្វេភាគី។ វាជារូបភាពពីរផ្ទុយគ្នាទស្សនកិច្ចរបស់លោកវេន ជាប៉ាវ នាយករដ្ឋមន្ត្រីចិន និងលោកអូបាម៉ា។
ទស្សនកិច្ចរបស់លោកវេន ជាប៉ាវ គឺជាទស្សនកិច្ចផ្លូវការ និងមានគោលដៅច្បាស់លាស់ ដើម្បីពង្រឹងទំនាក់ទំនងជាយុទ្ធសាស្ត្ររវាងប្រទេសចិន និងកម្ពុជា លើគ្រប់វិស័យ។ ជាមួយគ្នានោះ ចិនក៏បានផ្តល់ជំនួយជាង៥៣លានដុល្លាដល់កម្ពុជា ដើម្បីអភវិឌ្ឍន៍ប្រទេស។
ផ្ទុយពីនេះ ទស្សនកិច្ចរបស់លោកអូបាម៉ា មកកម្ពុជាជាលើកដំបូងមិនមែនជាទស្សនកិច្ចផ្លូវការឡើយ។ លោកមកកម្ពុជា គឺដើម្បីចូលរួមកិច្ចប្រជុំកំពូលអាស៊ីបូព៌ាដែលលោកយល់ថា អាមេរិកមិនអាចខកខានបានពីក្នុងកវេទិកា ដែលមាន១៨ប្រទេសចូលរួម ដោយសារតែនយោបាយអាមេរិក កំពុងផ្តោតលើតំបន់នេះ។ ប៉ុន្តែនៅក្នុងឱកាសទស្សនកិច្ចរយ:ពេលពីរថ្ងៃ លោកបានជួបទ្វេភាគីជាមួយសម្តេចតេជោហ៊ុន សែន នៅវិមានសន្តិភាព។
ទំនាក់ទំនងដ៏ច្បាស់លាស់មួយរវាងកម្ពុជា និងអាមេរិក អាចរំលេចចេញពីជំនួបទ្វេភាគីនោះ។
លោកអូបាម៉ា មិនបានប្រើប្រាស់ពេលវេលាជាងកន្លះម៉ោង ដើម្បីនិយាយអោយបានច្រើនពីការពង្រឹងទំនាក់ទំនងរវាងកម្ពុជា និងអាមេរិកទេ។ ប៉ុន្តែផ្ទុយទៅវិញ លោកបានរិះគន់អំពីបញ្ហាសិទ្ធិមនុស្ស ការចាប់ខ្លួនលោកម៉ម សូណង់ដូ និងលទ្ធិប្រជាធិបតេយ្យនៅកម្ពុជា ខណ:ដែលលោកព្រងើយនឹងការស្នើសុំរបស់កម្ពុជា ដើម្បីលុបចោលបំណុល៣០០លានដុល្លា នាសម័យសង្គ្រាម។ ការពិភាក្សារវាងលោកអូបាម៉ា និងសម្តេចហ៊ុន សែន ត្រូវបានគេពណ៌នាថា មានភាពតឹងតែង នៅពេលដែប្រទេសមហាអំណាច បានមកស្តីអោយប្រទេសម្ចាស់ផ្ទះដល់ផ្ទះ។ ជាមួយនឹងការពិតបែបនេះ គេពិបាកនឹងសន្និដ្ឋានថាមានរាត្រីទឹកឃ្មុំមួយនៅក្នុងទំនាក់ទំនង រវាងប្រទសទាំងពីរ។
រហូតមកទល់ពេលនេះ វាហាក់ដូចជា ថាអាមេរិកបានឈានដល់ការសន្និដ្ឋានមួយថា ខ្លួនបានបាត់បងស់សមរភូមិកាទូត នៅកម្ពុជា ហើយចិនបានដណ្តើមយកបេះដូងកម្ពុជាបាត់ទៅហើយ បើទោះបីជាដំបូងឡើយអាមេរិកបានឈរជើងយ៉ាងរឹងមាំនៅក្នុងទំនាក់ទំនង ជាមួយកម្ពុជា៕
