 |
| ឃុំខ្លួនយុវជន៣នាក់ ករណីប្លន់ប្រដាប់អាវុធ |
យុវជនទាំង ៣នាក់នេះមានឈ្មោះ ឡេង សុខសាញ់ អាយុ២៦ឆ្នាំ រស់នៅវត្តស្ទឹងមានជ័យ កុដិលេខ៦ ស្រុកកំណើតភូមិអូរក្រោម ឃុំថ្ម ស្រុកសំរោងទង ខេត្តកំពង់ស្ពឺ ឈ្មោះ អ្នកវឌ្ឍនៈ អាយុ១៩ឆ្នាំ មុខរបរនិស្សិតថ្នាក់ទី៣ ស្នាក់នៅសង្កាត់បឹងសាឡាង ខណ្ឌទួលគោក និងឈ្មោះ អ៊ូន រ៉ាមី អាយុ២៥ឆ្នាំ ស្នាក់នៅក្នុងវត្តស្ទឹងមានជ័យកុដិលេខ១១បានត្រូវសមត្ថកិច្ចប៉ូលិស ការិយាល័យព្រហ្មទណ្ឌកម្រិតធ្ងន់រាជធានីភ្នំពេញ ឃាត់ខ្លួនជាបន្តបន្ទាប់កាលពីយប់ថ្ងៃទី២២ ខែវិច្ឆិកា ឆ្នាំ២០១២។
គួររំលឹកថា កាលពីព្រលប់ថ្ងៃទី២១ ខែវិច្ឆិកា ឆ្នាំ២០១២ មានស្ត្រីម្នាក់បានជិះម៉ូតូមួយគ្រឿងម៉ាកឃ្លីក ពណ៌សលាយប្រផេះ ពាក់ស្លាកលេខ ភ្នំពេញ1BH-9586តាមផ្លូវបេតុងស្ថិតក្នុងភូមិទ្រា៤ សង្កាត់ស្ទឹងមានជ័យ ខណ្ឌមានជ័យ ស្រាប់តែមានក្រុមចោរបានមកភ្ជង់គំរាមយក ម៉ូតូ តែនាងមិនឲ្យក៏ប្រតាយប្រតប់គ្នាជាមួយក្រុមចោរនោះ ហើយក្រុមចោរបានដកកាំភ្លើងបាញ់មួយគ្រាប់ជនរងគ្រោះត្រូវចំឆ្អឹងខ្នង ពីក្រោយ។
បន្ទាប់ពីហេតុការណ៍កើតឡើង ក្រុមចោរបាននាំគ្នាជិះម៉ូតូគេចខ្លួន តែសមត្ថកិច្ចប៉ូលិសបានស្រែកតាមវិទ្យុទាក់ទងអំពីស្លាកលេខម៉ូតូ ក្រុមចោរ ពេលនោះកម្លាំងសមត្ថកិច្ចប៉ូលិសព្រហ្មទណ្ឌកម្រិតធ្ងន់រាជធានីភ្នំពេញ ក៏ចេញល្បាតស្រាវជ្រាវចាប់បានឈ្មោះ អ៊ូន រ៉ាមី នៅចំណុច រង្វង់មូល នាងគង្ហីង ក្នុងសង្កាត់វាលវង់ ខណ្ឌ៧មករា។
យោងតាម ចម្លើយសារភាពរបស់ឈ្មោះអ៊ូន រ៉ាមីសមត្ថកិច្ចបានឈានទៅឃាត់ខ្លួនឈ្មោះឡេង សុខសាញ់ នៅវត្តស្ទឹងមានជ័យ កុដិលេខ១១ និងឈ្មោះអ្នក វឌ្ឍនៈនៅផ្សារសូរិយា រួចបញ្ជូនមកការិយាល័យដើម្បីសាកសួរ៕
