រាជធានីភ្នំពេញ ៖
យុវជនម្នាក់បានដេកស្លាប់ក្នុងថ្លុកឈាម
និងប្តី-ប្រពន្ធ២នាក់ទៀតរងរបួសធ្ងន់ក្នុងហេតុការណ៍គ្រោះ
ថ្នាក់ចរាចរណ៍មួយដែលបង្កឡើងដោយម៉ូតូម៉ាកឌ្រីម សេ១២៥ ពណ៌ខ្មៅ
ស៊េរី២០១២ មួយគ្រឿង
បើកដោយយុវជនម្នាក់បានបើកយ៉ាងលឿនហើយព្យាយាមវ៉ាម៉ូតូមួយគ្រឿង
នៅពីមុខក៏ជ្រុលចង្កូតទៅបុកម៉ូតូឌ្រីម សេ១២៥ ពណ៌ខ្មៅ ស៊េរី២០០៤
មួយគ្រឿងទៀតជិះគ្នា២នាក់ប្តី-ប្រពន្ធដែលធ្វើដំណើរបញ្ច្រាស
ទិសគ្នាចំពីមុខពេញទំហឹងបណ្តាលឱ្យម៉ូតូទាំង២គ្រឿងអូសខ្ទាត
ប្រមាណ២០ម៉ែត្រ
និងធ្វើឱ្យមនុស្សទាំង៣នាក់ប៉ើងហោះខ្ទាតបោកក្បាលទៅនឹងថ្នល់
ហូរឈាមពេញផ្លូវស្លាប់ម្នាក់ភ្លាមៗនៅនឹងកន្លែង
និង២នាក់ប្តី-ប្រពន្ធ រងរបួសធ្ងន់
កាលពីវេលាម៉ោង៤និង៣៥នាទីរសៀលថ្ងៃទី២៦ វិច្ឆិកា ២០១២
តាមបណ្តោយផ្លូវទំនប់កប់ស្រូវ ក្នុងភូមិត្រពាំងរាំង
សង្កាត់ឃ្មួញ ខណ្ឌសែនសុខ ។
សពយុវជនដែលបើកម៉ូតូម៉ាកឌ្រីម សេ១២៥ ពណ៌ខ្មៅ
ស៊េរី២០១២ ឈ្មោះ ផាត់ សំអាត អាយុ២៥ឆ្នាំ
ស្នាក់នៅភូមិព្រែកតាព្រំ ឃុំកំពុងអុស ស្រុកពញាឮ ខេត្តកណ្តាល ។
ចំណែកប្តី-ប្រពន្ធ២នាក់ដែលជិះម៉ូតូឌ្រីម សេ១២៥ ពណ៌ខ្មៅ
ស៊េរី២០០៤ រងរបួសធ្ងន់នោះប៉ូលិសមិនទាន់ស្គាល់អត្តសញ្ញាណទេ ។
