 |
| តុលាការឃុំខ្លួនយុវជនម្នាក់ ពីបទ រំលោភសេពសន្ថវៈ លើកូនស្រីថៅកែ |
ហេតុការណ៍នេះកើតឡើងកាលវេលាម៉ោង១២រសៀល ថ្ងៃទី១០ វិច្ឆិកា ២០១២ នៅចំណុចក្នុងបរិវេណការិយាល័យកសិកម្មក្រុង ស្ថិតក្នុងភូមិកងវ៉ា សង្កាត់កំពង់ស្វាយ ក្រុងសិរីសោភ័ណ ខេត្តបន្ទាយមានជ័យ។
លោក រ៉ែម វីរៈ អធិការនគរបាលក្រុងសិរីសោភ័ណ បានឲ្យដឹងថា ជនសង្ស័យឈ្មោះ ឆុង ប៉ូឡូ អាយុ២៩ឆ្នាំ មានទីលំនៅ ភូមិកងវ៉ា សង្កាត់កំពុងស្វាយ ក្រុងសិរីសោភ័ណ ខេត្តបន្ទាយមានជ័យ ជាកម្មករ ពីបទ ធ្វើសកម្មភាពចាប់បង្ខំរំលោភសេពសន្ថវៈ លើនារីម្នាក់អាយុ១៧ឆ្នាំ នៅនឹងទីលំនៅកន្លែងកើតហេតុ ត្រូវជាកូនម្ចាស់ផ្ទះ(ថៅកែ)។
តាមសំដីនារីរងគ្រោះ ប្រាប់គេហទំព័រ CEN ថា ជនសង្ស័យបានប្រើល្បិចលួងលោមឲ្យមកជិត ក៏ចាប់ប្រទាញប្រទង់អូសបបួលឲ្យចូលកន្លែងនៅក្នុងបរិវេណរោងកិនម្សៅ និងក្នុងបន្ទប់ទឹក នៃបរិវេណការិយាល័យកសិកម្មស្រុក។ ជនរងគ្រោះបានតបត និងរើបំរះប្រតប់ប្រតាយគ្នា និងស្រែកឲ្យអ្នកជិតខាងជួយសង្គ្រោះ តែគ្មាននរណាឮ ដោយសារថ្លង់នឹងមេក្រូបុណ្យកឋិន។ នៅពេលជនល្មើសធ្វើសកម្មភាព ជនរងគ្រោះមានស្នាមជាំលើដៃទាំងពីរ របួសបែកក្បាលជង្គង់ឆ្វេង១កន្លែង របួសកជើងឆ្វេង១កន្លែង និងរបួសលើត្រគាក១កន្លែង ដោយឡែកជនសង្ស័យក៏ត្រូវជនរងគ្រោះខាំឲ្យមានរបួសចេញឈាម១កន្លែងលើ ស្មាខាងស្ដាំផង។
តាមជនសង្ស័យបាននិយាយបំភ្លឺនៅ ព្រះរាជអាជ្ញាថា ខ្លួនបានស្រឡាញ់កូនថៅកែ ហើយនាងក៏ព្រមព្រៀងស្រឡាញ់សងខាង បបួលគ្នាដើរលែងក្នុងទីធ្លាសាលាស្រុកសិរីសោភ័ណ ឱកាសល្អខ្លួនបានចាប់ដៃនាងពិតប្រាកដមែន។
ជនសង្ស័យ ត្រូវបានសមត្ថកិច្ចសួរចម្លើយ កសាងសំណុំរឿងបញ្ជូនទៅតុលាការខេត្ត ដើម្បីចាត់ការតាមនីតិវិធីច្បាប់ ហើយត្រូវបានចៅក្រមស៊ើបសួរ ចោទប្រកាន់ពីបទ រំលោភសេពសន្ថវៈ សម្រេចឃុំខ្លួនបណ្ដោះអាសន្ន៕
