រាជធានីភ្នំពេញ ៖
រថយន្តដឹកសំពីងសំពោងមួយគ្រឿង
និងរថយន្តដឹកដីខ្សាច់មួយគ្រឿងដែលហូរទឹកប្រឡាក់ផ្លូវត្រូវ
អាជ្ញាធរខណ្ឌទួលគោក ដឹកនាំដោយលោកសាំង សុភៈវិចិត្រ
អភិបាលរងខណ្ឌចាប់បញ្ជូនទៅសាលាខណ្ឌ កាលពីព្រឹកថ្ងៃទី១៨
កុម្ភៈ ដោយសារតែរថយន្តទាំងនោះធ្វើចរាចរណ៍ដឹកទំនិញ
និងដឹកខ្សាច់មិនគោរពទៅតាមការណែនាំរបស់សាលារាជធានីភ្នំពេញ ។
រថយន្តដែលអាជ្ញាធរឃាត់ទុកនោះមួយគ្រឿង
ម៉ាក FUSO ពណ៌ស្ករ
ជារថយន្តដឹកខ្សាច់ដែលមានទឹកហូរធ្លាក់ប្រឡាក់ផ្លូវ
និងមួយគ្រឿងទៀតម៉ាក KIA ពណ៌ស ដឹកសំបកធុងទឹកបរិសុទ្ធ ។
លោកសាំង សុភៈវិចិត្រ បានឱ្យដឹងថា ការឃាត់រថយន្តដឹកសំពីងសំពោង
និងដឹកដីខ្សាច់នេះធ្វើឡើងតាមការណែនាំរបស់លោកសេង រតនៈ
អភិបាលខណ្ឌទួលគោក
ព្រោះរថយន្តទាំងនោះមិនបានស្តាប់តាមការណែនាំរបស់សាលារាជ
ធានីភ្នំពេញ ដោយធ្វើឱ្យបាត់បង់សណ្តាប់ធ្នាប់តាមដងផ្លូវសាធារណៈ
និងសោភ័ណភាពរាជធានីភ្នំពេញ ។
លោកសាំង សុភៈវិចិត្រ បានបន្តទៀតថា
គ្រប់រថយន្តដឹកធ្ងន់សំពីងសំពោងត្រូវសាលារាជធានីភ្នំពេញ ហាមឃាត់
។ ចំណែករថយន្តដឹកដីខ្សាច់
ទោះបីជាមានច្បាប់អនុញ្ញាតឱ្យចូលរាជធានីភ្នំពេញ
ក៏ដោយក៏ត្រូវគោរពតាមការណែនាំដែលហាមធ្វើចរាចរណ៍នៅចន្លោះម៉ោង៦
និង៣០នាទីព្រឹកដល់ម៉ោង៨និង៣០នាទីព្រឹក និងពីម៉ោង១១ដល់១២
ឯពេលល្ងាចហាមពីម៉ោង៥ទៅ ៦ល្ងាច
និងហាមធ្វើចរាចរលើកំណាត់ផ្លូវព្រះនរោត្តម
ផ្លូវសហព័ន្ធរុស្សុី ផ្លូវព្រះមុនីវង្ស ផ្លូវម៉ៅសេទុង
ផ្លូវព្រះសីុសុវត្ថិ ផ្លូវព្រះសុធារស់ ផ្លូវព្រះសីហនុ
ផ្លូវកម្ពុជាក្រោម ផ្លូវផ្សារដឺហ្គោល ផ្លូវនេហ៍រុ
និងហាមឆ្លងកាត់ស្ពានធំៗក្នុងរាជធានីភ្នំពេញ ៕
