ភ្នំពេញ: តារាកំប្លែង ស្វិតជើងម្ខាង ឈ្មោះ រុន សារ៉េន ដែលគេស្គាល់ថា នាយ ជីវ៉ាន់ស៊ុយ បានទទួលមរណភាព ក្នុងជន្មាយុ ៥២ ឆ្នាំ កាលពីវេលាម៉ោង ៨ និង ២៦ នាទី ថ្ងៃទី៣ ខែវិចិ្ឆកា ឆ្នាំ២០១២ ដោយសារជំងឺ មហារីកថ្លើម។
សពត្រូវបានតម្កល់ទុកនៅផ្ទះរបស់លោក
ដែលមានទីតាំងស្ថិតក្នុងភូមិបឹងត្រស់ ឃុំភ្នំតូច ស្រុកមង្គលបុរី
ខេត្តបន្ទាយមានជ័យ ដើម្បីធ្វើបុណ្យតាមប្រពៃណី។
នាយ ជី វ៉ាន់ស៊ុយ បានល្បីឈ្មោះបោះសំឡេង ក្នុងវិស័យសិល្បៈអស់រយៈពេលជាច្រើនឆ្នាំមកហើយ ដោយសារហោវាស័ព្ទថ្វីមាត់របស់គាត់ រួមជាមួយក្រម៉ិចក្រម៉ើម និងកំប្លុកកំប្លែង។ នាយជីវ៉ាន់ស៊ុយ មានភាពល្បីល្បាញខ្លាំង ដោយសារជើងស្វិតខាងឆ្វេងរបស់គាត់។
ក្រោយតស៊ូនឹង ជំងឺមហារីកអស់ពេលជាច្រើនឆ្នាំ នាយទាហានស័ក្តិ៥ តារាកំប្លែង ជី វ៉ាន់ស៊ុយ បានទទួលមរណភាព កាលពីព្រឹកមិញនេះ ក្នុងជន្មាយុ ៥២ឆ្នាំ បន្ទាប់ពីធ្លាក់ខ្លួនឈឺរយៈពេលជាង៧ ខែកន្លងទៅ។
អ្នកកំប្លែង ស្វិតជើងម្ខាង ជី វ៉ាន់ស៊ុយ ត្រូវជាឪពុកនាងឃ្មឹប (រ៉េន សុធារី) អតីតប្រពន្ធនាក់កំប្លែង នាយ ហុងដា បានស្លាប់កាលពីព្រឹកថ្ងៃទី៣ វិច្ឆិកា ២០១២ នៅផ្ទះនាភូមិបឹងត្រស់ ឃុំភ្នំតូច ស្រុកមង្គលបូរី ខេត្តបន្ទាយមានជ័យ។
ស្ថិតក្នុងសភាពអត្តខាត់ក្រោម ទង់ក្រពើ និងរោង២ខ្នង ពិធីបុណ្យសពបានប្រព្រឹត្តទៅបណ្ដើរៗទាំងពុំទាន់មានវត្តមានកូនៗមក ជុំគ្នា។
អ្នកស្រី ហ៊ុន សាវន អាយុ៥១ឆ្នាំ ជាប្រពន្ធប្រាប់គេហទំព័រ CEN ថា ប្ដីខ្លួន ជីវ៉ាន់ស៊ុយ (ឈ្មោះដើម រុន សារ៉េន) ស្លាប់ក្នុងអាយុ៥២ឆ្នាំ ដោយជំងឺមហារីកថ្លើម។ មុនស្លាប់តារាកំប្លែងរូបនេះ ត្រូវបាននាយឧត្តមសេនីយ៍ ហ៊ឹង ប៊ុនហៀង អគ្គមេបញ្ជាការរងកងយោធពលខេមរភូមិន្ទ និងជាមេបញ្ជាការបញ្ជាការដ្ឋានក្នុងអង្គរក្សសម្ដេចតេជោ ហ៊ុន សែន បានឲ្យនាំគាត់ទៅព្យាបាលនៅមន្ទីរពេទ្យព្រះកេតុមាលា (ពេទ្យយោធា ១-៧៩) ភ្នំពេញ បន្ទាប់ពីគាត់ឈឺធ្ងន់ ៦ ខែមកហើយ។ ចេញពីពេទ្យបានមកព្យាបាលដោយឱសថបូរាណខ្លះ និងសម័យខ្លះ ហើយវិលទៅពេទ្យដដែលបាន១ខែ ក៏ត្រូវពេទ្យប្រាប់ថាស្ថានភាពជំងឺពុំអាចថយក្រោយទេ។ គ្រួសារបានដឹកមកផ្ទះបាន ៣ថ្ងៃ ក៏ស្លាប់នៅព្រឹកថ្ងៃទី៣ វិច្ឆិកា ២០១២។
ភរិយានៃសពនិយាយបន្តថា ជី វ៉ានស៊ុយ បានប្រឹងរស់ក្នុងសភាពពិការភាព តាំងពីរៀបការនឹងគ្នានៅឆ្នាំ១៩៧៩ ហើយគាត់ (វ៉ាន់ស៊ុយ) ចេញលេងភ្លៀងការ និងកំប្លែងក្នុងវង់ល្ខោនដោយលេងដូរអង្ករ និងស្រូវ។ ឆ្នាំ១៩៩៤ វ៉ាន់ស៊ុយ បានត្រូវប៉ុស្តិ៍ទូរទស្សន៍ខ្មែរលេខ៩ ហៅទៅសំដែង ព្រោះគាត់ធ្លាប់ទៅរស់នៅជំរំជនភៀសខ្លួនខ្មែរ និងស្គាល់អ្នកធ្វើការនៅទូរទស្សន៍នោះ។ ក្រោយមកស្ថានការណ៍ប្រែប្រួល វ៉ាន់ស៊ុយ បាន ចូលក្នុងក្រុមសិល្បៈកងអង្គរក្សសម្ដេចតេជោ ហ៊ុន សែន ឆ្នាំ២០០៨ ហើយបានស័ក្តិ៤កន្លះយោធា។
អ្នកស្រី ហ៊ុន សាវន និយាយបន្តថា ខ្លួន និងប្ដីនេះ មានកូន៥នាក់ជាមួយគ្នា និងកូនធម៌ម្នាក់ទៀត ក្នុងនោះ៥នាក់រាប់ទាំង ឃ្មឹប ឬ រ៉េន សុធារី អាយុ ២៩ឆ្នាំ អតីតភរិយារបស់នាយហុងដា តារាកំប្លែងផង។ គឺជាអ្នកកំប្លែងដែលដំបូងរៀនពីឪពុកនេះ។ ស្ត្រីភរិយា និងសាច់ញាតិ ក្នុងទឹកមុខក្រៀមក្រំ និងទឹកភ្នែករហាម អំពាវនាវដល់ប្រិយមិត្តអ្នកគាំទ្រ តារាកំប្លែងជី វ៉ាន់ស៊ុយ មេត្តាអាណិតមេត្តាជួយផង គឺជួយតាមលទ្ធភាពមកខ្លួនប្រពន្ធ ព្រោះតែបានមើលជំងឺអស់ទ្រព្យអស់រលីង ដែលបានបន្តិចៗពីការសំដែង។
មុននឹងស្លាប់ ជី វ៉ាន់ស៊ុយ បានលាប្រពន្ធទាំងអាល័យដោយនិយាយថា "អស់ពីប្ដីទៅអូននៅកំព្រាគ្មានទីពឹង"។ តែប្រពន្ធតបថា "សូមព្រលឹងបងបានទៅកាន់ទីសុខសុគតិភពចុះ អូនមិនអីទេនឹងខំរស់បន្ត ជាមួយកូនៗ ដែល៤នាក់ជាអ្នកសិល្បៈ និង២នាក់ជាពលករស៊ីឈ្នួលនៅថៃ៕
