ទាក់ទងនឹងកម្មវិធីប្រកួតនេះលោក ទី រ៉ាណាត នាយកផលិតកម្មវិធីទូរទស្សន៍ប៉ុស្តិ៍លេខ៣ បានប្រាប់ឲ្យដឹងថា យើងបានសម្រិតសម្រាំងកីឡាករជើងខ្លាំងរបស់កម្ពុជាចំនួន៨នាក់ ឲ្យឡើងប្រកួតគ្នា ហើយអ្នកឈ្នះ៤នាក់នៅក្នុងចំណោមពួកគេ នឹងត្រូវរៀបចំឲ្យធ្វើការប្រកួតជាមួយកីឡាករបរទេសចំនួន៤នាក់ ផ្សេងទៀតតាមរូបមន្តជម្រុះ ដើម្បីដណ្តើមយកជ័យលាភី នៅក្នុងកម្មវិធីប្រកួតដណ្តើមប្រាក់ក្នុងធនាគារ ដែលនឹងធ្វើឡើងនៅដើមខែមេសាខាងមុខនេះ។ ចំណែកឯសមាសភាពកីឡាករបរទេសទាំង៤រូប ដែលត្រូវធ្វើការប្រកួតនោះ យើងកំពុងសម្លឹងរកមើល។
យ៉ាងណាមិញសម្រាប់សមាសភាពកីឡាករកម្ពុជាទាំង៨រូប ដែលត្រូវធ្វើការប្រកួតជម្រុះនោះ បានជ្រើសរើសរួចរាល់អស់ហើយ។
កីឡាករ៤នាក់ ដែលត្រូវធ្វើការប្រកួតជម្រុះលើកទី១ នៅថ្ងៃសៅរ៍ ទី១០ ខែមីនា ខាងមុខនេះ មាន អ្នកលេងទម្ងន់ដៃមកពីសមាគមកីឡាក្រសួងការពារជាតិ ពេជ្រ សីហា ត្រូវជួបជាមួយ អ្នកលេងកម្ពស់ អ៊ុង វិរៈ របស់ក្លិបកងពលតូចឆត្រយោង៩១១ ខណៈ អ្នកប្រដាល់ ឡុង សុវណ្ណឌឿន របស់ក្លិបសាលវ័ន្តកីឡា ត្រូវប្រកួតជាមួយអ្នកប្រដាល់ ពៅ ស័ក្តិសិទ្ធិ មកពីសមាគមក្រសួងមហាផ្ទៃ។
ចំណែកសមាសភាពកីឡាករ៤នាក់ផ្សេងទៀត ដែលត្រូវធ្វើការប្រកួត នៅថ្ងៃសៅរ៍ ទី១៧ សប្តាហ៍បន្ទាប់នោះ គឺអ្នកជំនាញប្រើក្បាច់ចម្រុះ ឡៅ ស៊ីណាត របស់ក្លិបកងពលតូចឆត្រយោង៩១១ ត្រូវជួប កីឡាករអាងកម្លាំង ឡន លឿប មកពីក្លិបកងពលតូចលេខ៧០ រីឯអ្នកប្រដាល់មុខស្រស់ក្លិបខេមរខ្លាហោះ ចាន់ រតនា នឹងត្រូវប្រឈមមុខជាមួយកីឡាករកំពុងសាងភាពល្បី ប្រាក់ មករា របស់ក្លិបរស្មីកុមារកំព្រា។
លោក ទី រ៉ាណាត បានគូសបង្ហាញលក្ខខណ្ឌនៃការប្រកួតនេះថា៖«ចំពោះកីឡាករកម្ពុជា៤ នាក់ និងកីឡាករបរទេស៤នាក់ ដែលត្រូវធ្វើការប្រកួតគ្នាដណ្តើមប្រាក់ក្នុងធនាគារ ដែលឧបត្ថម្ភដោយស្រាស៊ូបភើហ្គោលលើកនេះ យើងនឹងអនុវត្តការប្រកួតតាមរូបមន្តជម្រុះដូចសព្វដង ដើម្បីរកអ្នកឈ្នះ២នាក់ ឡើងទៅប្រកួតនៅវគ្គផ្តាច់ព្រ័ត្រ ប៉ុន្តែសម្រាប់ការចាប់គូប្រកួតលើកនេះ វាមានលក្ខណៈខុសប្លែកពីការប្រកួតលើកមុន»។
លោកបានបញ្ជាក់ថា៖«កាលពីមុន យើងដាក់កីឡាករខ្មែរ ឲ្យជួបកីឡាករបរទេស ក្នុងការប្រកួតជម្រុះ ប៉ុន្តែលើកនេះ យើងធ្វើការចាប់ឆ្នោតដោយប្រើគ្រាប់ប៉េងប៉ុង។ មានន័យថា នៅថ្ងៃឡើងប្រកួតសប្តាហ៍ទី១ យើងយកកីឡាករបរទេស២នាក់ និង កីឡាករខ្មែរ២នាក់ ដោយឲ្យពួកគេចាប់គ្រាប់ប៉េងប៉ុង ហើយអ្នកចាប់បានលេខ១ ត្រូវធ្វើការប្រកួតជាមួយអ្នកចាប់បានលេខ១ដូចគ្នា ចំណែកអ្នកចាប់បានលេខ២ ត្រូវធ្វើការប្រកួតជាមួយអ្នកចាប់បានលេខ២ បើទោះបីជាការចាប់គ្រាប់ប៉េងប៉ុងនោះតម្រូវឲ្យកីឡាករខ្មែរ ប្រកួតជាមួយកីឡាករខ្មែរ ហើយ កីឡាករបរទេស ត្រូវប្រកួតជាមួយកីឡាករបរទេសដូចគ្នាក៏ដោយចុះ។ និយាយឲ្យចំទៅការចាប់គូប្រកួតរបស់អ្នកទាំង៤ គឺវាអាស្រ័យទៅលើការចាប់គ្រាប់ប៉េងប៉ុងតែម្តង»។
កីឡាករ ពេជ្រ សីហា ធ្លាប់ជួបជាមួយ អ៊ុង វិរៈ ចំនួន២លើករួចមកហើយ។ ការជួបគ្នាលើកទី១ ដណ្តើមយកចំណាត់ថ្នាក់លេខ១ និងលេខ២ ក្នុងកម្មវិធីប្រកួតប្រដាល់ជ្រើសរើសជើងឯកជាតិប្រចាំឆ្នាំ២០១១ សីហា បានចាញ់ពិន្ទុ វិរៈ ប៉ុន្តែសម្រាប់ការឡើងសងសឹកនៅលើសង្វៀនប៉ុស្តិ៍លេខ៣ សីហា បានធ្វើឲ្យ វិរៈ ស្មើពិន្ទុទាំងទ្រមខ្លួន។
ចំណែក ឡុង សុវណ្ណឌឿន ធ្លាប់បរាជ័យក្រោមទម្ងន់ជើង ពៅ ស័ក្តិសិទ្ធិ ម្តងផងដែរ ប៉ុន្តែជំនួបគ្នាពេលនោះ ឡុង សុវណ្ណឌឿន នៅមានបទពិសោធប្រកួតនៅស្ទើរជាងបច្ចុប្បន្ននេះឆ្ងាយណាស់ ហេតុ នេះការប្រកួតលើកនេះ ពៅ ស័ក្តិសិទ្ធិ អាចនឹងជួបការលំបាកច្រើនជាមិនខានឡើយ៕(PK)
