 |
| អ្នកលក់សាំងតាមដងផ្លូវនៅរាជធានីភ្នំពេញកំពុងចាក់សាំង រថយន្តឲ្យអតិថិជន។ តម្លៃសាំងបានហក់ឡើងខ្ពស់ ហើយរដ្ឋមន្ត្រីស្នើឲ្យសន្សំសំចៃ។ B.g |
ទោះបីជាយ៉ាងនេះក្តី លោកបញ្ជាក់ថា អាជីវកម្មនៅកម្ពុជា គួរតែរក្សាតម្រូវការប្រេងសាំងនាពេលបច្ចុប្បន្នរបស់ខ្លួនឲ្យ នៅបរិមាណដដែល ដើម្បីលើកកម្ពស់ផលិតកម្មសេដ្ឋកិច្ចឲ្យបានកម្រិតអតិបរមា។
ថ្លែងក្នុងពិធីបើកកិច្ចប្រជុំប្រចាំឆ្នាំនៅក្រសួងពាណិជ្ជកម្ម កាលពីថ្ងៃចន្ទលោក គាត ឈន់ បានសារ
ភាពថា តម្លៃប្រេងសាំងពិតជាឡើងថ្លៃខ្ពស់ជាងអ្វីដែលអ្នកប្រើប្រាស់ មានប្រាក់ចំណូលទាបនៅកម្ពុជាអាចរ៉ាប់រងបានទៅទៀត ប៉ុន្តែបញ្ហានេះ មិនមែនកើតឡើងតែនៅកម្ពុជាប៉ុណ្ណោះទេ។
លោកបានថ្លែងថា៖ «វាជាហេតុការណ៍មួយដែលកើតមាននៅគ្រប់ដំណាក់កាលក្នុងប្រទេសទាំងអស់ នៅលើពិភពលោក»។
តម្លៃប្រេងសាំងស៊ុបពែរបានឡើងថ្លៃដល់ ៥ ៨៥០រៀល មួយលីត្រនៅពេលនេះ។ តម្លៃនេះបានកើនឡើងខ្លាំង ពោលកើន៨,៣ភាគរយពីថ្ងៃទី៣១ធ្នូ ២០១១។ នេះបើផ្អែកតាមស្ថិតិរបស់ក្រសួងពាណិជ្ជកម្ម។
ស្ថិតិរបស់វិទ្យាស្ថានជាតិស្ថិតិ បានចេញផ្សាយកាលពីខែមុនថា អតិផរណា បានកើនឡើង ៥,៨ភាគរយ កាលពីខែមករា បើធៀបនឹងរយៈពេលដូចគ្នាពីឆ្នាំមុន។
លោក គាត ឈន់ បានឲ្យដឹងថា ទោះបីជាប្រេងសាំងឡើងថ្លៃក៏ដោយ ប៉ុន្តែតម្លៃនេះនៅតែទាបជាងតម្លៃជាក់ស្តែងដដែល ដោយសាររដ្ឋាភិបាលបានឧបត្ថម្ភធន ដែលមានចំនួនសរុបពី ២០០លាន ទៅ ៣០០លានដុល្លារក្នុងមួយឆ្នាំ។ លោកបញ្ជាក់ថា រដ្ឋាភិបាលមិនអាចពិចារណាលើការកាត់បន្ថយពន្ធនាំចូលប្រេងបាន ឡើយ។ ទន្ទឹមនឹងនេះដែរ លោក គាត ឈន់ បានជំរុញឲ្យក្រុមហ៊ុនអាជីវកម្មកម្ពុជាបង្កើនការប្រើប្រាស់ ប្រេងសាំង ដើម្បីប្រយោជន៍ដល់សេដ្ឋកិច្ចកម្ពុជា ទោះបីជាប្រេងឡើងថ្លៃក៏ដោយ។
លោកបានមានប្រសាសន៍ថា៖ «យើងគួរតែព្យាយាមសន្សំ ហើយបង្កើនការប្រើប្រាស់ប្រេងសាំងឲ្យបានកម្រិតអតិបរមា ដើម្បីបង្កើនផលិតកម្ម និងលើកកម្ពស់សមត្ថភាពរបស់យើង ក្នុងការប្រកួតប្រជែងនៅលើទីផ្សារអន្តរជាតិ»។
លោក ងួន ម៉េងតិច អគ្គនាយកសភាពាណិជ្ជកម្មកម្ពុជា បានឲ្យដឹងកាលពីម្សិលមិញថា អ្នកប្រើប្រាស់ គួរព្យាយាមកាត់បន្ថយការប្រើប្រាស់ប្រេងសាំង ដើម្បីសន្សំប្រាក់ នៅពេលទំនិញឡើងថ្លៃខ្ពស់។ លោកបន្តថា៖ «វាអាចជាការល្អ ប្រសិនបើប្រជាជនរបស់យើង អាចធ្វើដូច្នេះបាន ដោយសារពួកគេ នឹងចំណាយប្រាក់តិចលើប្រេងឥន្ធនៈ ហើយមានប្រាក់ច្រើនសម្រាប់ទិញទំនិញផ្សេង»។
ទោះយ៉ាងនេះក្តីអ្នកប្រើប្រាស់ និយាយថា រដ្ឋាភិបាល មិនចាត់វិធានការគ្រប់គ្រង ដើម្បីទម្លាក់ប្រេងសាំង។
លោក រ៉ុង ឈុន ប្រធានសមាគមគ្រូបង្រៀនកម្ពុជាឯករាជ្យ បានកត់សម្គាល់ឃើញថា វាបានប៉ះពាល់ដល់កម្មករ ដែលមានប្រាក់ចំណូលទាប។ លោកបានលើកឡើងថា៖ «វាឡើងថ្លៃខ្ពស់ខ្លាំង បើធៀបនឹងប្រទេសជិតខាង។
ការណ៍នេះបញ្ជាក់ថា រដ្ឋាភិបាលមិនបានយកចិត្តទុកដាក់ចំពោះបញ្ហានេះទេ»។
លោក រ៉ុង ឈន់ បានបន្ថែមថា លោកឆ្ងល់អំពីវិសាលភាពនៃការឧបត្ថម្ភធនរបស់រដ្ឋាភិបាលជាខ្លាំង។ លោកបានសង្កត់ធ្ងន់ថា៖ «អ្នកទាំងនោះ គួរតែពិនិត្យតាមដានឈ្មួញប្រេង ដើម្បីធានាថា ពួកគេមិនក្រឡុកទីផ្សារ ហើយពួកគេគួរតែបន្ទាបពន្ធនាំចូលប្រេងផងដែរ»។
តម្លៃប្រេងនៅក្នុងប្រទេសវៀតណាម កាលពីថ្ងៃទី៨ ខែមីនា គឺ ១,១០ដុល្លារអាមេរិកក្នុងមួយលីត្រ។ នេះបើតាមរបាយការណ៍របស់សារព័ត៌មានវៀតណាម ដែលបានដកស្រង់ចេញពីក្រសួងហិរញ្ញវត្ថុរបស់ប្រទេសនេះ។ កាលពីម្សិលមិញនៅប្រទេសថៃ ក្រុមហ៊ុន PTT បានលក់ប្រេងរបស់ខ្លួនក្នុងមួយលីត្រថ្លៃ ១,៣៣ដុល្លារ។ បើតាមគេហទំព័ររបស់ក្រុមហ៊ុន។
ទន្ទឹមនឹងនេះដែរ អាជីវកម្មតូចតាចនៅកម្ពុជា បានឲ្យដឹងថា ពួកគេបានទទួលផលចំណេញតិចតួច ដោយសារប្រេងឥន្ធនៈឡើងថ្លៃខ្ពស់។ ខណៈដែលអាជីវកម្មទាំងនោះ នៅថេរ ពួកគេរកប្រាក់ចំណេញបានតិចតួចប៉ុណ្ណោះពីប្រាក់ចំណូលដែលខ្លួនរក បាន។
លោក សយ ប៊ុនណាង អាយុ ២៩ឆ្នាំ អ្នករត់រ៉ឺម៉កកង់បី នៅភ្នំពេញបានឲ្យដឹងថា ថ្លៃសាំងឡើងថ្លៃប៉ះពាល់ដល់អាជីវកម្មរបស់ពួកគេ។
លោកបានបន្ថែមថា៖ «ខ្ញុំចង់ឲ្យរដ្ឋាភិបាលជួយដល់ពួកយើង។ បើមិនដូច្នេះទេ យើងមិនអាចរស់បានឡើយ»៕
