លោក អ៊ុក ស៊ុយ បានបញ្ជាក់ថា៖ «នៅពេលបេក្ខជនរបស់យើងដាក់ឯកសារដើម្បីបានភាពស្របច្បាប់របស់ពួកគេ មេឃុំ-ចៅសង្កាត់បច្ចុប្បន្ន តែងបដិសេធបេក្ខភាពពួកគេ ដូច្នេះបេក្ខជនរបស់យើង មិនអាចប្រកួតប្រជែងក្នុងការបោះឆ្នោតបានទេ។ ករណីភាគច្រើននៃការច្រានចោលទាំងនេះ ត្រូវបានរកឃើញក្នុងឃុំ-សង្កាត់ជាច្រើន ដូចជា នៅខេត្តតាកែវ ខេត្តកណ្តាល ខេត្តរតនគិរី និងខេត្តកោះកុងជាដើម»។
លោក គួយ ប៊ុនរឿន តំណាងមកពីគណបក្សសម រង្ស៊ី (SRP) ដែលជាបក្សប្រឆាំងមួយថ្លែងថា ការបំភិតបំភ័យ ការគំរាមកំហែង និងដំណើរការស្មុគស្មាញសម្រាប់ភាពស្របច្បាប់របស់បេក្ខជននៅតែមាន កើតមាននៅឃុំ-សង្កាត់ជាច្រើន ហើយ គ.ជ.ប នៅតែមិនទាន់ចាត់វិធានការប្រឆាំងនឹងមន្ត្រីគណបក្ស CPP ណាដែលរំលោភច្បាប់បោះឆ្នោត និងគណបក្សនយោបាយនៅឡើយ។
លោកអំពាវនាវទៅ គ.ជ.ប កុំឲ្យក្រុមមន្រ្តីជាន់ខ្ពស់របស់CPP យកទ្រព្យសម្បត្តិរដ្ឋទៅឃោសនាសម្រាប់គណបក្សខ្លួន។
លោក ប៊ុនរឿន បានបញ្ជាក់ថា ៖«គ.ជ.ប ត្រូវតែចាត់វិធានការតាមផ្លូវច្បាប់ប្រឆាំងនឹងក្រុមមន្រ្តី ជាន់ខ្ពស់ CPP ទាំងឡាយ ដែលមានតួនាទីក្នុងរដ្ឋាភិបាល ហើយប្រើប្រាស់ទ្រព្យសម្បត្តិរដ្ឋឃោសនា និងទិញបេក្ខជនយើងឲ្យបោះបង់ការឈរឈ្មោះប្រកួត»។
លោក អ៊ុក គឹមហាន អ្នកតំណាងCPPបានច្រានចោលរាល់ការចោទប្រកាន់ពីគណបក្សសមរង្ស៊ី និងគណបក្សសិទ្ធិមនុស្ស។
លោក អ៊ុក គឹមហាន បានបន្តទៀតថា៖ «អស់លោក [គណបក្សសមរង្ស៊ី និងគណបក្សសិទ្ធិមនុស្ស] ជានិច្ចកាលតែងបំផ្លើសសភាពការណ៍ជុំវិញបរិយាកាសនយោបាយនៅកម្ពុជាថា វាខ្មៅងងឹតពេក។ ខ្ញុំគិតថា ឥឡូវនេះឆ្នាំ២០១២ហើយ បើអស់លោក គំរាមកំហែង ឬរំលោភសិទ្ធិអ្នកដទៃ ជនរងគ្រោះប្រាកដជានឹងមានការតវ៉ាជាមិនខាន»។
លោក ទេព នីថា អគ្គលេខាធិការគ.ជ.ប ទទួលស្គាល់ថា ឥទ្ធិពលរបស់មេឃុំ-ចៅសង្កាត់ កំពុងកាន់អំណាចនៅតាមឃុំ-សង្កាត់ខ្លះ បានធ្វើឲ្យប៉ះពាល់ដល់បរិយាកាសនយោបាយសេរីនិងយុត្តិធម៌ ក្នុងអំឡុងការចុះឈ្មោះបេក្ខជន ប៉ុន្តែមកដល់នឹងពេលនេះ មិនមានពាក្យបណ្តឹងពាក់ព័ន្ធនឹងការចុះឈ្មោះបេក្ខជននៅឡើយ។
លោកបានបន្តថា៖ «យើងបើកសិទ្ធិឲ្យអ្នកតំណាងគណបក្សទាំងអស់ត្អូញត្អែរលើករណីពាក់ព័ន្ធ នឹងដំណើរការចុះឈ្មោះបេក្ខជន ប៉ុន្តែ មកដល់នឹងពេលនេះ មិនមានបណ្តឹងផ្លូវការណាមួយទេ»។
លោក គល់ បញ្ញា នាយកប្រតិបត្តិអង្គការ ខុម ង្រ្វែល ដែលឃ្លាំមើលការបោះឆ្នោតជាមូលដ្ឋានបានថ្លែងថា សមាជិកមេឃុំ-ចៅសង្កាត់ខ្លះ កំពុងកាន់អំណាចសព្វថ្ងៃ បារម្ភអំពីបញ្ហាប្រឈមនិងបេក្ខជនផ្សេងទៀត នៅក្នុងឃុំ-សង្កាត់ជាមួយ ដូច្នេះពួកគេប្រើឥទ្ធិពលរបស់ខ្លួនធ្វើឲ្យបេក្ខជនឯទៀតមិនបាន ចុះឈ្មោះ។
លោក គល់ បញ្ញា បានបញ្ជាក់ថា៖«បើមេឃុំ-ចៅសង្កាត់បច្ចុប្បន្នដឹងថា បេក្ខជនខ្លាំងៗមកពីគណបក្សផ្សេងមកប្រកួតប្រជែងក្នុងឃុំ-សង្កាត់គេ ពួកគេតែងព្យាយាមអស់ពីសមត្ថភាពបង្កឧបសគ្គដល់ បេក្ខជនមកពីគណបក្សផ្សេងឲ្យខាងតែបាន»៕ NR
