រាជធានីភ្នំពេញ ៖
តារាបង្ហាញម៉ូដជាតិប្រមាណជាង៥០នាក់
ត្រូវបានគេត្រៀមរួចជាស្រេចសម្រាប់ការដើរបង្ហាញម៉ូដដ៏ធំមួយនៅ
មជ្ឈមណ្ឌលកោះពេជ្រនារាត្រីថ្ងៃទី៣០ មីនា ខាងមុខនេះ
ដើម្បីបង្ហាញម៉ាកផលិតផលល្បីៗចំនួន៤
ហើយសន្និសីទសារព័ត៌មានប្រកាសអំពីគម្រោងការនេះ
ត្រូវបានធ្វើឡើងកាលពីថ្ងៃទី២៣ មីនា នៅសណ្ឋាគារឡឺរ៉ូយ៉ាល់ ។
ក្នុងសន្និសីទសារព័ត៌មានបានឱ្យដឹងថា
គោលបំណងនៃការរៀបចំកម្មវិធីនេះឡើង
គឺដើម្បីប្រកាសជាផ្លូវការនូវគម្រោងរៀបចំព្រឹត្តិការណ៍បង្ហាញមូ៉ដដ៏
អស្ចារ្យនៃម៉ាកផលិតផល Fashion
ដ៏មានប្រជាប្រិយភាពបំផុតទាំង៤
នៅក្នុងទីផ្សារកម្ពុជាសព្វថ្ងៃនេះ រួមមាន ម៉ាក AXARA
មកពីប្រទេសបារាំង, MANGO មកពីប្រទេសអេស្ប៉ាញ, E.PSE និងVNC
មកពីប្រទេសម៉ាឡេស៊ី ។ កម្មវិធីដ៏ធំនេះ
នឹងត្រូវរៀបចំឡើងនៅរាត្រីថ្ងៃទី៣០ មីនា២០១២ នៅមជ្ឈមណ្ឌលសន្និបាត
និងពិព័រណ៍កោះពេជ្រ ក្រោមឈ្មោះ Fashion Illumination
ដែលជាការប្រារព្ធនូវការចាប់ផ្តើមរដូវកាលថ្មី
គឺរដូវស្លឹកឈើលាស់ និងរដូវក្តៅឆ្នាំ២០១២
របស់ម៉ាកផលិតផលសម្លៀកបំពាក់ ស្បែកជើងទាំង៤ខាងលើ
ដែលកម្មវិធីនេះ
ត្រូវបានម៉ាកផលិតផលហ្វេស្សិននានាពាសពេញពិភពលោកប្រារព្ធឡើងជារៀង
រាល់ឆ្នាំ ។
សម្រាប់កម្ពុជា នេះគឺជាមហាព្រឹត្តិការណ៍
ហ្វេស្សិនមួយដែលមិនធ្លាប់មានពីមុនមកពីសំណាក់ម៉ាកហ្វេស្សិន
អន្តរជាតិ ហើយនេះក៏ជាសក្ខីភាពបញ្ជាក់ថា
ប្រជាជនកម្ពុជាពិតជាមានបរិបទនៃការរស់នៅមានភាពជឿនលឿនដូចបណ្តា
ប្រទេសនានាដែរ ។ មិនតែប៉ុណ្ណោះគឺរឹតតែបង្ហាញសហគមន៍ជាតិ
និងអន្តរជាតិឱ្យឃើញពីភាពសម្បូរបែបនៃការអភិវឌ្ឍគ្រប់វិស័យ
ចំពេលដែលព្រះរាជាណាចក្រកម្ពុជា
ធ្វើជាម្ចាស់ផ្ទះនៃកិច្ចប្រជុំអាស៊ានឆ្នាំ២០១២
ក៏ដូចជាសមាហរណកម្មទៅកាន់សហគមន៍សេដ្ឋកិច្ចនាឆ្នាំ២០១៥ ខាងមុខ ។
កម្មវិធីបង្ហាញម៉ូដខ្នាតធំមួយនេះ
នឹងត្រូវដើរបង្ហាញដោយតារាបង្ហាញម៉ូដជាតិចំនួនប្រមាណជាង ៥០នាក់
ដែលម្នាក់ៗសុទ្ធសឹងតែបានឆ្លងកាត់ការជ្រើសរើសរួមជាមួយការហាត់
សមយ៉ាងល្អិតល្អន់បំផុត ដើម្បីគុណភាពទាំងមូលរបស់ព្រឹត្តិការណ៍នេះ
។ ឆាកដ៏វែង និងប្រហែលជាវែងជាងគេមិនធ្លាប់មានពីមុនមក
សម្រាប់ការបង្ហាញម៉ូដនៅកម្ពុជា
នឹងត្រូវបានគេផលិតឡើងដែលមានប្រវែង៣០ម៉ែត្រ
អមទៅដោយទីកន្លែងអង្គុយសម្រាប់ភ្ញៀវកិតិ្តយស ៥០០នាក់
ដែលភាគច្រើន គឺជាសមាជិករាជវង្សសមាជិករាជរដ្ឋាភិបាល
ពាណិជ្ជករជាន់ខ្ពស់ពីគ្រប់ស្ថាប័ននានានៅក្នុងប្រទេស
ព្រមទាំងភ្ញៀវជាតិ និងអន្តរជាតិយ៉ាងច្រើនកុះករ ។
កម្មវិធី Fashion Illumination ដ៏ពិសេស មួយនេះ
នឹងរៀបចំឡើងដោយក្រុមហ៊ុន Sovereign Retail Group
ដែលជាក្រុមហ៊ុនហ្វេស្សិនដ៏ធំនៅកម្ពុជា
និងចូលរួមសហការឧបត្ថម្ភពីសំណាក់ក្រុមហ៊ុននានា ៕
