បន្ទាប់ពីចាកចេញពីស្រុកកំណើតនៅខេត្តតាកែវរយៈពេលមួយឆ្នាំមក យុវជនវ័យ២៥ឆ្នាំ ម៉ៅ បូរ៉ា បានខិតខំយ៉ាងខ្លាំងដើម្បីស្វែងរកការងារធ្វើនៅភ្នំពេញ តែគេមិនអាចមានឱកាសទទួលបានការងារឡើយ ព្រោះកម្រិតការអប់រំរបស់ខ្លួនបានត្រឹមតែថ្នាក់ទី៣នៃបឋមសិក្សា ។
ដោយសារតែភាពក្លាហាន បូរ៉ា ដែលជាមនុស្សមិនប្រកាន់ខ្លួន ក៏លេចចេញនូវគំនិតចេះច្នៃប្រឌិតផ្នែកអាជីវកម្ម នោះគឺ ការដើរលក់ម៉ាំល្ហុងចល័ត។ របររកស៊ីរបស់គេមួយនេះមានប្រជាប្រិយភាពគួរសមជាមួយអតិថិជន ទាំងកម្ពុជា និងជនបរទេស ដែលបានទិញម៉ាំល្ហុងគេយកទៅទទួលទាន ខណៈការលក់ដូររបស់ បូរ៉ា ច្រើនតែនៅតាមមាត់ទន្លេ និងនៅតាមបណ្ដាផ្សារនានា។ ទន្ទឹមនឹងអាជីពលក់ម៉ាំល្ហុងនេះ ក្ដីស្រមៃមួយទៀតដែលតែងតែដក់ក្នុងបេះដូងរបស់ បូរ៉ា ជាប់ជានិច្ចនោះគឺការក្លាយខ្លួនជាតារាមួយដួង ដែលអាចបង្ហើរសំនៀងលក់។
ចាប់តាំងពីយុវជនរូបនេះធ្លាប់ត្រូវបានសារព័ត៌មានភ្នំពេញ ប៉ុស្តិ៍បានចុះផ្សាយពីប្រវត្តិរូបគេកាលពីខែមិថុនាម្តងមក ឃើញថា មានទាំងសារព័ត៌មាន និងផលិតកម្មខារ៉ាអូខេក្នុងស្រុកជាច្រើនចាប់អារម្មណ៍លើយុវជន រូបនេះ ដោយបានឲ្យគេទៅសាកល្បងថតសំឡេងនៅស្ទូឌីយោផ្ទាល់ទៀតផង។
បូរ៉ា បាននិយាយថា៖ «ខ្ញុំតែងតែមានអារម្មណ៍ត្រេកអរ និងក្តីរំភើបណាស់ពេលបានជួបជាមួយបណ្តាផលិតកម្មនានា តែក្រោយមកក្តីប្រាថ្នា និងក្តីសង្ឃឹម វាហាក់ដូចជាបាត់អស់ទៅវិញ។ ខ្ញុំបានដឹងថា នឹងមានមនុស្សជាច្រើនមើលឃើញពីការផ្សងព្រេងរបស់ខ្ញុំនៅថ្ងៃណា មួយជាមិនខាន។ រហូតដល់ថ្ងៃមួយ ខ្ញុំបានជួបជាមួយអ្នកគ្រប់គ្រងផលិតកម្មក្នុងស្រុក«Green Stone»គាត់បានចាប់អារម្មណ៍នឹងទេពកោសល្យរបស់ខ្ញុំ»។
យុវជន បូរ៉ា បានប្រាប់ទស្សនាវដ្តី 7Days របស់ភ្នំពេញ ប៉ុស្ដិ៍ អំពីពន្លឺនៃការឈានចូលវិស័យសិល្បៈ និងការចេញនូវបទចម្រៀងទី ១ នៃអាល់ប៊ុមដំបូងរបស់គេ ដែលនឹងចេញនៅដើមខែមេសារបស់ផលិតកម្មថ្មីក្នុងស្រុកមួយឈ្មោះថា «Green Stone» តែម្តង។
បូរ៉ា បានបន្ថែមថា៖ «ទោះបីជាចម្រៀងដំបូងរបស់ខ្ញុំនៅពុំទាន់ប្រសូតចេញក៏ដោយ តែខាងផលិតកម្មបានចំណាយពេលជួយបង្ហាត់បង្រៀនខ្ញុំច្រើនណាស់ ទាំងការច្រៀង និងការសម្តែង។ ខ្ញុំក៏ធ្លាប់បានចូលសម្តែងចម្រៀងចំនួនបួន ឬ ប្រាំបទហើយដែរ»។
ឥឡូវនេះ បូរ៉ា មានការអភិវឌ្ឍខ្លួនពីជិះកង់លក់ម៉ាំល្ហុងម្នាក់ឯង ដោយគេបានផ្តល់ឱកាសការងារដល់យុវជន ប្រាំនាក់ផ្សេងទៀត ដែលរស់នៅស្រុកកំណើតជាមួយគ្នា ឲ្យមកជួយលក់ម៉ាំល្ហុង ដោយស្លៀកពាក់ស្រដៀងគ្នា។
បូរ៉ា បានបន្តថា៖ «យើងមានគ្នា ទាំងអស់ ៦ នាក់ ដោយមានម៉ូតូបីគ្រឿងសម្រាប់បម្រើសេវាកម្មលក់ម៉ាំល្ហុង។ ការអភិវឌ្ឍបែបនេះយើងក៏មានប្រាក់ចំណូលកើនឡើង តែខ្ញុំក៏ត្រូវចំណាយប្រាក់ប្រចាំថ្ងៃសម្រាប់ពួកគេដែរ»។
វាជាជំនួញមួយដែលមានលក្ខណៈប្លែកពីគេ ដោយអ្នកលក់ម៉ាំល្ហុងរូបនេះ តែងតែលក់ម៉ាំល្ហុងរបស់គេរហូតដល់ទៅ១០០គីឡូក្រាមឯណោះ ដោយពួកគេចាប់ផ្តើមលក់ពីម៉ោង៥ល្ងាច ដល់ម៉ោង៨:៣០យប់តែប៉ុណ្ណោះ។
យុវជនសក់បះពណ៌ក្រហមទង់ដែងរូបនេះ បាននិយាយទៀតថា៖ «ក្រៅពីពេលទំនេរទៅផ្សារទិញល្ហុង និងគ្រឿងផ្សំមកធ្វើនោះ ខ្ញុំក៏បានឆ្លៀតពេលទៅសមជាមួយផលិតកម្មចម្រៀងដែរ។ ទោះបីវាជាផលិតកម្មថ្មីបំផុតនៅក្នុងស្រុកក៏ដោយ ក៏ខ្ញុំនៅតែសង្ឃឹមថា មនុស្សម្នាពិតជាចង់ឃើញ និងចាំស្តាប់សំឡេងច្រៀងរបស់ខ្ញុំជាមិនខានឡើយ»។
គួរបញ្ជាក់ថា ដើមហេតុនៃការប្រកបរបរលក់ម៉ាំនេះ ដោយសារតែ បូរ៉ា គិតថាវាជាមុខម្ហូបងាយស្រួលធ្វើ ហើយអាចញាំជាអាហារកំដរមាត់ជាមួយបាយ ឬ ជាគ្រឿងក្លែមក៏បាន ខណៈសារព័ត៌មានភ្នំពេញ ប៉ុស្តិ៍ធ្លាប់បានសាកសួរគេកាលពីខែមិថុនា។ បូរ៉ា បានប្រាប់សារព័ត៌មានភ្នំពេញ ប៉ុស្តិ៍ថា៖ «ជារឿយៗខ្ញុំធ្វើវាញុំាពេលខ្ញុំខ្ជិលចម្អិនម្ហូបតែម្តង»។
អ្វីដែលពិសេសនោះ មុននឹងមករស់នៅភ្នំពេញ បូរ៉ា ក៏ធ្លាប់ជាមេចុងភៅសម្រាប់ធ្វើម្ហូបការនៅតាមភូមិដ្ឋាន ក្នុងស្រុកកំណើតជាច្រើនឆ្នាំផងដែរ។ ទោះបីជាមុខរបរនោះវាមានភាពសមសួនទៅហើយក្តី ក៏ បូរ៉ា តែងប្រាថ្នាថា ចង់ទទួលបាននូវកិត្តិស័ព្ទល្បីល្បាញផ្នែកសិល្បៈនៅថ្ងៃណាមួយ ដែលអាចជួយលើកស្ទួយសង្គមគ្រួសារខ្លួនបាន។
បូរ៉ា បានរំឭកពីមូលហេតុដែលនាំឲ្យខ្លួនរសាត់អណ្ដែតមកទីក្រុងថា៖ «ជីវិតរស់នៅឯខេត្តវាហាក់ដូចជាមិនមានអ្វីប្លែក ឬ មានអ្វីថ្មីសម្រាប់រូបខ្ញុំឡើយ។ ដូច្នេះបានខ្ញុំចង់មកផ្សងព្រេងរស់នៅឯក្រុងភ្នំពេញ និងចង់ដឹងថាតើខ្ញុំអាចចិញ្ចឹមគ្រួសារបានទេ?»។
បូរ៉ា បានបញ្ជាក់ពីភាពប្រាកដប្រជា ៨០ ភាគរយដែរថា បទចម្រៀងដំបូងរបស់ខ្លួនបានច្រៀងសម្រាប់អាល់ប៊ុមទី១នោះ នឹងចេញនៅដើមខែមេសាខាងមុខ។ តារាចម្រៀង មានប្រភពជាអ្នកលក់ម៉ាំល្ហុងនេះហាក់ដូចជាមិនខ្វាយខ្វល់ច្រើន ឡើយចំពោះអ្នកគាំទ្រខ្លួនបានយូរប៉ុនណា តែយ៉ាងហោចណាស់គេក៏អាចធ្វើឲ្យប្រិយមិត្តដែលនិយមទទួលទាន ម៉ាំល្ហុងរបស់ខ្លួនបានទទួលអារម្មណ៍ចូលចិត្ត និងរីករាយដែរ។
តារាចម្រៀងមានប្រភពពីការលក់ម៉ាំល្ហុង បូរ៉ា លើកឡើង៖ «គ្មានបញ្ហាទេថា តើខ្ញុំនឹងមានភាពល្បីប៉ុនណាទេ ខ្ញុំនឹងមិនបោះបង់ចោលនូវក្តីប្រាថ្នានោះដែរ។ លើសពីនេះ ខ្ញុំនឹងពង្រីកមុខរបរលក់ម៉ាំល្ហុងនេះបន្ថែមឲ្យគ្រប់ទិសទី ពេញប្រទេសតែម្តងនាពេលអនាគត»។
លោក ឈុន លីហ៊ាង ដែលចាងហ្វាងផលិតកម្ម Green Stone ជាទ្រនំរបស់តារាចម្រៀង ម៉ៅ បូរ៉ា បានថ្លែងប្រាប់ទស្សនាវដ្តី 7Days ថា មិនមានអ្វីចោទជាបញ្ហាច្រើនសម្រាប់តារាចម្រៀងម៉ៅ បូរ៉ា នេះឡើយ។
ម្ចាស់ផលិតកម្មទើបតែបង្កើតថ្មីថ្មោងរូបនេះបានបន្តថា៖ «យើងមានក្តីសង្ឃឹមច្រើនចំពោះសំឡេង និងទេពកោសល្យកំប្លែងរបស់គេ។ តែពេលគេផ្តោតលើសំឡេងខ្លាំងពេក គេក៏ភ្លេចបញ្ចូលអារម្មណ៍ជាមួយនឹងអត្ថន័យនៃបទចម្រៀងដែរពេល ខ្លះ។ ជួនកាលគេហាក់ដូចជាមានឥរិយាបថដាក់ខ្លួនពេកជាមួយភ្ញៀវ ពេលទៅចូលរួមនឹងពិធីជប់លៀងម្តងៗ។ យើងក៏មានការបារម្ភដែរ ព្រោះថាគេហាក់ដូចភ្លេចខ្លួនថា គេបានក្លាយជាអ្នកចម្រៀងម្នាក់ទៅហើយដែរ»៕(PK)
