រាជធានីភ្នំពេញ ៖
គូស្មេហ៍ដែលរងរបួសធ្ងន់ធ្ងរទាំង២នាក់
ដោយសារត្រូវក្រុមចោរវាយនឹងឈើជ្រុងប្លន់យកម៉ូតូវីវ៉ា
១គ្រឿង ខណៈពួកគេកំពុងអង្គុយសាសងគ្នានៅទីងងឹត
និងស្ងាត់មួយកន្លែង ក្នុងភូមិសំរោងទាវ សង្កាត់ក្រាំងធ្នង់
ខណ្ឌពោធិ៍សែនជ័យ កាលពីវេលាម៉ោង៧និង៣០នាទីយប់ថ្ងៃទី១៧ មីនា
ហើយកោះសន្តិភាពបានចុះផ្សាយរួចមកហើយនោះមិនទាន់បញ្ចប់ទេ
ព្រោះថាក្រោយពេលក្រុមចោរជិះម៉ូតូជនរងគ្រោះមកដល់ផ្លូវ
លំក្នុងភូមិបាយាប សង្កាត់ភ្នំពេញថ្មី ខណ្ឌសែនសុខ
ក៏បានធ្វើសកម្មភាពកាក់ម៉ូតូគូស្នេហ៍មួយទៀតដែលកំពុងជិះ
ដោយវាយបុរសជាគូស្នេហ៍ រួចប្លន់យកម៉ូតូហុងដា សេ១២៥ ស៊េរី២០១២
ដោយបានទុកម៉ូតូវីវ៉ា របស់គូស្នេហ៍ទី១នៅនឹងកន្លែងកើតហេតុ ។
ករណីប្លន់យកម៉ូតូហុងដា សេ១២៥
ពីគូស្នេហ៍ទី២
ខាងប៉ូលិសបានព្យាយាមលាក់អ្នកកាសែតតាំងពីប៉ូលិសប៉ុស្តិ៍
រហូតដល់នាយផ្នែកព្រហ្មទណ្ឌដោយសារខ្លាចអធិការស្តីបន្ទោស ។
ប៉ុន្តែលោកអធិការម៉ក់ ហុង បានឱ្យដឹងយ៉ាងខ្លីថា
ជនសង្ស័យក្រោយពីធ្វើសកម្មភាពវាយប្លន់យកម៉ូតូវីវ៉ា១គ្រឿង
ពីគូស្នេហ៍ នៅភូមិដូនទាវ សង្កាត់ក្រាំងធ្នង់
រួចជិះម៉ូតូជនរងគ្រោះមកដល់ផ្លូវលំ ភូមិបាយាប
សង្កាត់ភ្នំពេញថ្មី ក៏បានវាយប្លន់យកម៉ូតូហុងដា សេ១២៥
ពីគូស្នេហ៍១គូទៀតទៅបាត់
ដោយទុកម៉ូតូវីវ៉ារបស់ជនរងគ្រោះជាគូស្នេហ៍ទី១នៅកន្លែងកើត
ហេតុ ព្រោះម៉ូតូនេះចាស់ពេកមិនត្រូវប៉ាន់ ។
ប៉ូលិសខណ្ឌសែនសុខបានយកម៉ូតូរបស់ជនរងគ្រោះ
ប្រគល់ឱ្យប៉ូលិសខណ្ឌពោធិ៍សែនជ័យវិញ ។
ជុំវិញការវាយប្លន់គូស្នេហ៍ទី២នេះ លោកស្រីជិន សាវឿន
អាយុ៤០ឆ្នាំ មានទីលំនៅភូមិពោងពាយ សង្កាត់ភ្នំពេញថ្មី
ខណ្ឌសែនសុខ ដែលស្ថិតនៅក្នុងបន្ទប់នៃមន្ទីរពេទ្យព្រះកុសុមៈ
បានអង្គុយអស់សង្ឃឹមដោយកូនដែលរងរបួសដោយក្រុមចោរវាយប៉ោង
មុខ និងត្រូវក្បាលផ្នែកខាងក្រោយជាទម្ងន់
ហើយមកដល់វេលាម៉ោង១និង១០នាទីរសៀលថ្ងៃទី១៩ មីនា
នៅមិនទាន់ដឹងខ្លួននៅឡើយ ។
លោកស្រីបានរៀបរាប់ថា
កូនប្រុសគាត់ដែលរងគ្រោះនេះឈ្មោះឆាំ សីហា អាយុ២៣ឆ្នាំ
ជាកម្មកររោងចក្រ
បានរងរបួសយ៉ាងធ្ងន់ធ្ងររហូតសន្លប់បាត់ស្មារតី
បើទោះបីគ្រូពេទ្យព្យាយាមព្យាបាលយ៉ាងណាក៏ដោយ ។ គាត់បន្តថា
មុនពេលកើតហេតុ កូនប្រុសរបស់គាត់បានដឹកគូដណ្តឹងឈ្មោះស្រីរ័ត្ន
ជាកម្មការិនីរោងចក្រ មកពីដើរលេងនៅមាត់ទន្លេមុខវាំង
ហើយធ្វើដំណើរបំណងមកផ្ទះ លុះមកដល់ចំណុចខាងលើ
ក៏ជួបនឹងក្រុមចោរកាក់ម៉ូតូឱ្យឈប់
ហើយចាប់កូនប្រុសគាត់វាយផ្ទប់នឹងជញ្ជាំងថ្មនៅតាមផ្លូវរួមជាមួយ
គូដណ្តឹង បណ្តាលឱ្យរងរបួសរហូតភ័យតក់ស្លុតយ៉ាងខ្លាំង
ដែលពេលនេះក្រុមគ្រួសារបានបញ្ជូនទៅផ្ទះវិញហើយ ។
លោកជិន សាវឿន ជាឪពុកបានបន្ថែមថា កូនប្រុស
និងកូនប្រសាស្រីស្រឡាញ់គ្នា២ឆ្នាំហើយ
ដែលលោកគ្រោងចូលស្តីដណ្តឹង និងរៀបការនៅឆ្នាំក្រោយនេះ
ប៉ុន្តែពួកគេបានជួបគ្រោះអកុសលបែបនេះ
ធ្វើឱ្យគាត់រន្ធត់ចិត្តខ្លាំងណាស់ ។ ទោះបីជាបែបណា
ម្តាយនិងឪពុកជនរងគ្រោះបានបង្ហាញនូវការហួសចិត្តចំពោះសមត្ថ
កិច្ចខណ្ឌសែនសុខ
ដែលពុំបានមកអើតសួរនាំក្រុមគ្រួសារគាត់ជាជនរងគ្រោះនៅក្នុង
មន្ទីរពេទ្យទេ ចាប់តាំងពីកើតហេតុរហូតមកដល់ពេលនេះ
ដោយប៉ូលិសខណ្ឌបានត្រឹមតែសួរនាំតាមរយៈទូរស័ព្ទប៉ុណ្ណោះ ៕(KOH)
