បត់រថយន្ដ ចូលដេប៉ូលឈើ បុកអូសម៉ូតូ អ្នកធ្វើដំណើរ រងរបួសធ្ងន់ស្រាល

ភ្នំពេញ ៖ រថយន្ដកូរ៉េមួយគ្រឿង ដែលកំពុងដឹកឈើ បានបុកអូសម៉ូតូអ្នកដំណើរ ៣នាក់ ប្ដីប្រពន្ធនិងកូន ឱ្យរងរបួសធ្ងន់ស្រាល កាលពីវេលាម៉ោង ២និង៣០នាទី  រសៀលថ្ងៃទី១៥ ខែមីនានេះ ស្ថិតនៅតាមបណ្ដោយ ផ្លូវលេខ ៥៩៨ ភូមិទំនប់ សង្កាត់ភ្នំពេញថ្មី ខណ្ឌសែនសុខ ។
សេចក្ដីរាយការណ៍ពីកន្លែងកើតហេតុ បានឱ្យដឹងថា រថយន្ដកូរ៉េដែលដឹកឈើ ពាក់ស្លាកលេខ ក-៦៤៦០ ភព៣ បានបើកពីត្បូងទៅជើង តាមបណ្ដោយផ្លូវលេខ ៥៩៨ លុះដល់ដេប៉ូលឈើ
យីហោ យូ ហេង ក៏បត់ចូល ស្រាប់តែ ប៉ះចំម៉ូតូ សេ ១២៥ មួយគ្រឿង ពាក់ស្លាកលេខ ភ្នំពេញ 1AF-7413 ដែលបើកស្របទិសគ្នា បុកនិងអូស ចូល រហូតទៅដល់ក្នុងឃ្លាំង បណ្ដាលឱ្យបុរសជាប្ដី អ្នកបើកម៉ូតូនិងប្រពន្ធរងរបួសធ្ងន់ រីឯកូនតូចរងរបួសស្រាល ។
សមត្ថកិច្ចមិនទាន់ កំណត់អត្ដសញ្ញាណជនរងគ្រោះ ទាំងបីនាក់នៅឡើយទេ ខណៈបច្ចុប្បន្នកំពុងសម្របសម្រួល គ្រោះថ្នាក់ចរាចរណ៍នេះ ក្រោយកើតហេតុ ជនរងគ្រោះត្រូវបានបញ្ជូន ទៅកាន់មន្ទីរពេទ្យ៕(dapnews)