លោក ឈឹម សាវុធ មន្ត្រីសម្របសម្រួលកម្មវិធីវេទិកាសាធារណៈរបស់មជ្ឈមណ្ឌលសិទ្ធិ មនុស្ស កម្ពុជា ថ្លែងឲ្យដឹងពីថ្ងៃអាទិត្យថា នៅថ្ងៃ១៩ មីនានេះ មានតែក្រុមប្រជាសហគមន៍តាមខេត្តរៀងខ្លួនប៉ុណ្ណោះ ដែលចូលទៅក្នុងព្រៃឡង់មុនគេ ហើយបន្ទាប់មកនៅថ្ងៃ២០ មីនា ទាំងសហគមន៍ប្រជាពលរដ្ឋនិងមន្ត្រីអង្គការនានា នឹងចូលទៅក្នុងព្រៃដ៏ធំជាងគេនៅក្នុងប្រទេសដើម្បីពិនិត្យមើល បទល្មើសព្រៃឈើ។
លោកថា៖ «យើងចូលទៅដោយសារប្រជាពលរដ្ឋមើលឃើញមានសកម្មភាពដឹកឈើខុសច្បាប់ យ៉ាងគំហុកចេញមករាល់ថ្ងៃ។ ប្រជាពលរដ្ឋឃើញឈើខុសច្បាប់ដឹកចេញពីព្រៃជ្រៅ មិនមែនដីព្រៃដែលរដ្ឋាភិបាលសម្បទានទេ»។
លោក បានថ្លែងថា ថ្ងៃទី២៥ មីនា នឹងមានការជួបជុំគ្នាធំមួយនៅចំណុចភូមិបឹង ត្រង់ផ្លូវបំបែកក្នុងឃុំមានរិទ្ធិ ស្រុកសណ្តាន់ ខេត្តកំពង់ធំ ដើម្បីពិភាក្សាពីគម្រោងសកម្មភាពទប់ស្កាត់បទល្មើសព្រៃឈើនៅ ព្រៃឡង់នោះ និងស្វែងរកភស្តុតាងផ្សេងៗ សម្រាប់ដាក់បង្ហាញជូនក្នុងវេទិកាសាធារណៈនាថ្ងៃ២៨ ខែមីនា ដែលនឹងមានតំណាងរាស្ត្រពីគ្រប់គណបក្ស មន្ត្រីអាជ្ញាធរស្រុក អភិបាលខេត្តកំពង់ធំ និងក្រសួងកសិកម្មចូលរួមផង។
លោក ដួង វណ្ណារ៉ា សមាជិកបណ្តាញសហគមន៍ព្រៃឡង់ខេត្តស្ទឹងត្រែង ថ្លែងថា សហគមន៍ក៏មានគម្រោងបិទផ្លូវចូលទៅភូមិបឹង ស្រុកសណ្តាន់នេះដែរ ដើម្បីស្ទាក់កុំឲ្យមានឡានដឹកឈើចេញ។
លោកបន្តថា៖ «ចំពោះខេត្តខ្ញុំ ខ្ញុំបានប្រាប់អាជ្ញាធរហើយនៅថ្ងៃ១៨មីនានេះ បើមានបទល្មើសយើងនឹងបោសសម្អាតបង្ក្រាបហើយ។ បទល្មើសព្រៃឈើមិនចេះថយ បើទប់ស្កាត់តែសហគមន៍ តែរដ្ឋបាលព្រៃឈើនិងអាជ្ញាធរមិនទប់ស្កាត់ តែបែរជាយកលុយទៅវិញ ធ្វើម៉េចនឹងថយ»។ លោក ថា ក្រុមហ៊ុនខ្លះដែលបានទទួលសិទ្ធិសម្បទានពីរដ្ឋាភិបាលនៅក្នុងតំបន់ ព្រៃឡង់ បានកាប់ឈើនៅតំបន់ព្រៃដែលពុំមែនជាដីសម្បទាន ដើម្បីយកឈើប្រណីតចេញមកលក់ខុសច្បាប់។
នេះជាលើកទី២ ក្នុងឆ្នាំ២០១២ ដែលសហគមន៍ព្រៃឡង់ចុះល្បាតតំបន់ព្រៃឡង់ បន្ទាប់ពីសកម្មភាពទប់ស្កាត់កាលពីខែមុន នឹងចាប់បានម៉ាស៊ីនអារឈើ២គ្រឿង និងដុតកម្ទេចចោលនូវឈើប្រណីតប្រមាណ៤០ម៉ែត្រគូប នៅក្នុងព្រៃឡង់នេះ។
អភិបាលស្រុកសណ្តាន់ លោក ស៊ឹម វណ្ណា ថ្លែងថា មានករណីកាប់ឈើនៅតំបន់ហាមឃាត់ តែភាគច្រើនប្រព្រឹត្តដោយប្រជាពលរដ្ឋ។ លោកថា៖ «ពលរដ្ឋខ្លះកាប់ឈើល្អៗយកទៅធ្វើផ្ទះ តែរដ្ឋបាលព្រៃឈើ ចេះតែអនុញ្ញាត ព្រោះមិនច្រើន។ ឯក្រុមហ៊ុន សុទ្ធតែកាប់ឈើមានច្បាប់ទាំងអស់ គេមិនធ្វើលើសពីច្បាប់ទេ»។ លោកបដិសេធមិនអធិប្បាយអំពីករណីពលរដ្ឋបង្ក្រាបបទល្មើសព្រៃឈើ ខ្លួនឯងនេះទេ៕
