ភ្នំពេញ៖ រថយន្ត៣គ្រឿងបានបុកគ្នាបន្តបន្ទាប់ តែសំណាងល្អគ្មាននរណាម្នាក់រងរបួសនោះទេ។យោងតាមសេចក្តីរាយការណ៍បានឲ្យដឹងថា នៅវេលាម៉ោង ៧ និង៣០នាទីយប់ថ្ងៃទី១៧ ខែមីនា ឆ្នាំ២០១២ នៅតាមបណ្តោយផ្លូវ ព្រះនរោត្តម ក្នុងខណ្ឌដូនពេញ មានករណីគ្រោះថ្នាក់ចរាចរមួយ ដែលបង្កដោយរថយន្តកូរ៉ូឡាមួយគ្រឿង បានបើកបុករថយន្តកូរ៉េ ពាក់ស្លាកលេខ ភ្នំពេញ 2S-1056 ដែលបើកប្រកាន់ខាងស្តាំដៃរបស់ខ្លួន។
សេចក្តីរាយការណ៍បានឲ្យដឹងថា មុនពេលកើតហេតុរថយន្តកូរ៉ូឡា ពាក់ស្លាកលេខ ភ្នំពេញ
2Q-6283 បើកវ៉ាគេវ៉ាឯង ពីស្តុបចំការមន លុះដល់កន្លែងកើតហេតុ បានជ្រុលទៅបុករថយន្តកូរ៉េ ដែលបើកបញ្ច្រសទិសគ្នា ។ ភ្លាមៗនោះ មានរថយន្តមួយគ្រឿងទៀត ពាក់ស្លាកលេខ ភ្នំពេញ 2M-7017 បានបើកបុកគូទរថយន្តកូរ៉េនេះ បណ្តាលឲ្យរងការខូចខាតយ៉ាងដំណំ។ ក្រោយកើតហេតុអ្នកបើករថយន្តកូរ៉ូឡា បានរត់គេចខ្លួនបាត់ បន្សល់តែរថយន្តឲ្យសមត្ថកិច្ចស្ទួចយកទៅរក្សាទុកឲ្យ៕(dapnews)
