ចាន់ រ៉ាវី បានជាប់ជម្រើសជាតារាសម្តែងរូបសង្ហាម្នាក់របស់ស្ថានីយទូរទស្សន៍ អាស៊ីអាគ្នេយ៍ ហើយគេតែងលេចមុខនៅពេលសម្តែងនៅក្នុងកម្មវិធីប្រគំតន្ត្រី និងចម្រៀងកាយវិការ
របស់ស្ថានីយទូរទស្សន៍មួយនេះ។ ប៉ុន្តែទើបតែទទួលបានកិត្តិយសកេរ្តិ៍ឈ្មោះនៅក្នុងពិភពសម្តែងមិន ទាន់នឹងបានហក់ឡើងដល់ចំណុចកំពូលផង តារាដែលខំវេចសម្ពាយពីស្រុកកំណើតមកជួលផ្ទះពីរនាក់បងប្អូននៅ ភ្នំពេញដើម្បីស្វែងរកភាពល្បីល្បាញនៅក្នុងវិស័យសិល្បៈម្នាក់នេះ បានទទួលមរណភាពភ្លាមៗទាំងរាងកាយមានសាច់ដុំរឹងមាំ មិននឹកស្មានដល់។
ពិធីករម្នាក់សុំមិនបញ្ចេញឈ្មោះបានឲ្យដឹងថា ចាន់ រ៉ាវី មានអាយុ២៨ឆ្នាំ ជាតារាសម្តែង និងបានថតស្ប៉តពាណិជ្ជកម្មជាច្រើន កាលមុនពេលគេស្លាប់ តែជាអកុសលតារារូបនេះបានស្លាប់ទាំងវ័យក្មេង។ ពិធីកររូបនេះបានបញ្ជាក់ថា អ្នករាល់គ្នាបានបញ្ជាក់ថា គាត់គឺជាតារាស្ប៉តពាណិជ្ជកម្មរបស់ក្រុមហ៊ុនបណ្តាញទូរស័ព្ទ ស្មាត Smart Mobile ដោយគេបានតម្រូវឲ្យតារាសម្តែងស្ប៉ត ចាន់ រ៉ាវី រវល់តែនិយាយសាសងស្នេហ៍តាមប្រព័ន្ធទូរស័ព្ទដែលមានតម្លៃសេវាថោក ហើយក៏ត្រូវជាង កាត់សក់អស់រលីងនៅសល់តែពីក្រោយបន្តិចដាក់ថា ៣០សេនក្នុងមួយនាទី។
រីឯពិធីករជាប់ចំណាត់ថ្នាក់លេខមួយកម្មវិធីពេជ្រកំពុងច្នៃ លោក សម្បត្តិ កិត្យា ដែលបានទៅចូលរួមពិធីបុណ្យសព ចាន់ រ៉ាវី ដោយផ្ទាល់នៅក្នុងស្រុកខ្សាច់កណ្តាល ខេត្តកណ្តាល បានឲ្យដឹងថា រ៉ាវី បានស្លាប់កាលពីថ្ងៃសៅរ៍ ទី១០ ខែមីនា ក្នុងផ្ទះជួលនៅភ្នំពេញដោយសារគាំងបេះដូង។ តែពិធីកររូបនេះបានបញ្ជាក់ថា តារារូបនោះមិនមែនជាតារាថតស្ប៉តរបស់ក្រុមហ៊ុន Smart Mobile នោះឡើយ។
លោកបាននិយាយថា៖ «ចាន់ រ៉ាវី គាត់ជាតារាសម្តែងម្នាក់ប្រចាំទូរទស្សន៍អាស៊ីអាគ្នេយ៍ គាត់បានស្លាប់កាលពីថ្ងៃសៅរ៍ ដោយសារគាំងបេះដូង។ បើតាមខ្ញុំដឹងថា គាត់ស្លាប់នៅផ្ទះជួលនៅភ្នំពេញ ដែលគាត់បានជួលរស់នៅពីរនាក់បងប្អូន។ ពេលធ្វើបុណ្យគឺធ្វើនៅស្រុកខ្សាច់កណ្តាល អ្នកស្គាល់ រ៉ាវី ក៏បានចូលរួមយ៉ាងច្រើនកុះករផងដែរ»។
ដោយសារតែស្លាប់មិនសមទំនងដោយសារជំងឺគាំងបេះដូង ខណៈដែលវ័យរបស់តារារូបនេះទើបតែ២៨ឆ្នាំនោះ ពិធីករម្នាក់សុំមិនបញ្ចេញឈ្មោះខាងលើបាននិយាយថា លោកបានទទួលព័ត៌មានថា គេស្លាប់ដោយសារគាំងបេះដូងមែន តែលោកបានឮពីក្រុមគ្រួសារមកថា ពេលដែលពេទ្យពិនិត្យទៅបែរជារកឃើញថា គ្រឿងក្នុងរបស់គេបានខ្ទេចខ្ទាំអស់ទៅហើយ។
ពាក់ព័ន្ធនឹងការស្លាប់ដោយមូលហេតុស្រពេចស្រពិលរបស់តារារូប នេះ ភ្នំពេញ ប៉ុស្តិ៍ មិនទាន់អាចទាក់ទងក្រុមគ្រួសារតារារូបនេះបានទេកាលពីម្សិលមិញ ។
ការលាចាកលោករបស់តារារូបនេះ តែក្នុងរយៈពេលមួយប៉ព្រិចភ្នែកបែបនេះ អ្នកគាំទ្រតារារូបនេះបានសម្តែងការសោកស្តាយគ្រប់ៗគ្នា ហើយអ្នកដែលបានចូលរួមក្នុងពិធីនោះបានទួញយំសោកគ្រប់ៗគ្នា៕
