ការប្រកាសពីការបាញ់នេះ បង្កការល្អក់កករភ្លាមៗដល់ក្តីសង្ឃឹមថ្មីៗថា មេដឹកនាំវ័យក្មេងនៃវង្សត្រកូលគ្រួសារកំពុងគ្រប់គ្រងកូរ៉េខាង ជើង ត្រៀមខ្លួនបើកចំហថែមទៀតចំពោះសហគមន៍អន្តរជាតិ។
ក្រុមអ្នកជំនាញបាននិយាយថា ការបាញ់ដែលគេគ្រោងនេះ គឺពិតជាការធ្វើតេស្តមីស៊ីលឆ្លងទ្វីប
ដែលសេចក្តីសម្រេចចិត្តអ.ស.ប.បានហាមប្រាម ហើយស្របទៅនឹងកិច្ចការទូតដែលអនុវត្តជាយូរមកហើយរបស់កូរ៉េខាង ជើង ស្តីពីការប្រើប្រាស់ការគំរាមកំហែងសន្តិសុខក្នុងតំបន់ ដើម្បីបង្កើនសម្បទានអន្តរជាតិ និងជាពិសេសអាមេរិក។
វាក៏ត្រូវគេប្រើប្រាស់ដើម្បីលើកស្ទួយឧត្តមភាពរបស់មេដឹកនាំ វ័យ ក្មេងថ្មីរបស់កូរ៉េខាងជើងលោក គីម ជុងអ៊ុន ដែលបានស្នងវង្សត្រកូលគ្រួសារនេះ បន្ទាប់ពីការស្លាប់របស់ឪពុករបស់លោកកាលពីចុងឆ្នាំមុន។
ទីភ្នាក់ងារព័ត៌មានស៊ីនហួ បានរាយការណ៍ថា អនុរដ្ឋមន្រ្តីក្រសួងការបរទេសលោក ចាង ជីឈុន បានសម្តែងនូវ«ក្តីបារម្ភ»របស់ចិន នៅពេលលោក បានជួបជាមួយឯកអគ្គរដ្ឋទូតកូរ៉េខាងជើងលោក ជី ចេរីយ៉ុង កាលពីថ្ងៃសុក្រសប្តាហ៍មុន។
ស៊ីនហួ កាលពីថ្ងៃសៅរ៍បានដកស្រង់សម្តីរបស់លោកចាងថា៖ «យើងពិតជាសង្ឃឹមថា គ្រប់ភាគីដែលជាប់ពាក់ព័ន្ធ នឹងនៅស្ងប់ស្ងៀម និងប្រកាន់យកភាពអត់ធ្មត់ និងចៀសវាងមិនបង្កើនភាពតានតឹង ដែលអាចនាំទៅរកស្ថានភាពមួយកាន់តែស្មុគស្មាញឡើយ»។
ទោះជាលោកមិនជេរប្រទិចការបាញ់ដែលគ្រោងទុកនេះក៏ដោយ ក៏ក្រុងប៉េកាំង កម្រដាក់សម្ពាធជាសាធារណៈលើកូរ៉េខាងជើងដែលពឹងស្ទើរតែទាំង ស្រុងលើប្រទេសធំជិតខាងខ្លួនដើម្បីការរើបឡើងវិញខាងសេដ្ឋកិច្ច ក្តី។
ប្រមុខគោលនយោបាយបរទេសសហភាពអឺរ៉ុបលោកស្រី ខេធើរីន អាស្តុន កាលពីថ្ងៃសៅរ៍ក៏បានជំរុញកូរ៉េខាងជើងបោះបង់ចោលផែនការដើម្បី បាញ់រ៉ុក្កែតនេះដែរ។
សេចក្តីថ្លែងការណ៍មួយពីការិយាល័យរបស់លោកស្រីអាស្តុន បាននិយាយថា៖ «តំណាងជាន់ខ្ពស់ អំពាវនាវឲ្យកូរ៉េខាងជើងបញ្ជាក់ជាបន្ទាន់ថា ខ្លួននឹងមិនបាញ់ទេ ងើយបន្តកិច្ចការស្តីពីការសងទំនុកចិត្តទៅវិញទៅមក»។
រដ្ឋមន្រ្តីការបរទេសអាមេរិក លោកស្រី ហ៊ីឡារី គ្លីនតុន កាលពីថ្ងៃសុក្រ បានហៅការប្រកាសអំពីបាញ់មីស៊ីលនេះថា ជាការបង្កហេតុកម្រិតខ្ពស់មួយ ដោយប្រាប់កូរ៉េខាងជើងថា វា អាចរំលោភកិច្ចព្រមព្រាងប្តូរយកជំនួយពីខែមុន ឲ្យបញ្ឈប់ការធ្វើតេស្តនុយក្លេអ៊ែរ និងការចម្រាញ់ជាតិអ៊ុយរ៉ានីញ៉ូម៕
