នៅពេលដែលអ្នកធ្វើដំណើរតាមបណ្តោយផ្លូវកម្ពុជាក្រោមម្តងៗ អ្នកប្រាកដជាបានឃើញនូវហាងលក់សម្ភារអេឡិចត្រូនិក និងហាងលក់សម្លៀកបំពាក់យុវវ័យទាន់សម័យជាច្រើន ដែលមានការរចនា និងរៀបចំតុបតែងតាមលក្ខណពិសេសប្លែកៗគ្នា។ ប៉ុន្តែនាពេលថ្មីៗនេះ អ្នកដំណើរនឹង
មានការចម្លែកក្នុងអារម្មណ៍ ដែលបានឃើញនូវហាងសម្លៀកបំពាក់ថ្មីស្រឡាងមួយស្ថិតនៅផ្ទះលេខ ១៥៧-១៥៩ ផ្លូវកម្ពុជាក្រោម ខាងលិចផ្សារស៊ីដនី រាជធានីភ្នំពេញ។
ហាងសម្លៀកបំពាក់ «អេលាន» ត្រូវបានរចនាម៉ូដគួរឲ្យទាក់ទាញដ៏ពិសេស ជាមួយនឹងផ្ទៃពណ៌ខ្មៅ អក្សរស្លាកយីហោពណ៌ទឹកប្រាក់ស្រមោលព្រាលៗ រួមផ្សំនឹងឈ្មោះយីហោដ៏ស្រស់ស្អាត ធ្វើឲ្យមិត្ដភក្ដិ និងរូបខ្ញុំ មិនអាចមើលរំលងបានឡើយ។ គ្រាន់តែឈានជើងដើរចូលដល់ក្នុងហាងភ្លាម យើងខ្ញុំមានអារម្មណ៍ត្រជាក់ប្រកបដោយផាសុកភាពជាខ្លាំង និងទទួលបានការស្វាគមន៍យ៉ាងរួសរាយពីសំណាក់បុគ្គលិកបម្រើការងារ នៅទីនោះ។ ម្យ៉ាងវិញទៀត ការរចនាម៉ូដក្រដាសផ្កាលើផ្ទៃជញ្ជាំង ព្រមទាំងគ្រឿងសង្ហារិមពណ៌ខ្មៅរលើបរលោង រំលេចទៅដោយពន្លឺភ្លើងដ៏ស្រទន់ កាន់តែធ្វើឲ្យ «អេលាន» មានភាពទាក់ទាញមួយកម្រិតទៀត។
នៅទីនោះ ក្រៅពីសម្លៀកបំពាក់បុរសធម្មតា «អេលាន» មានលក់សម្ភារតុបតែងខ្លួនសម្រាប់បុរសទាន់សម័យជាច្រើនទៀត ដូចជា អាវយឺត ក្រវាត់ក អាវធំ ខោខូវប៊យ ស្បែកជើង និងកាតាប ជាដើម។ បន្ទាប់ពីដើរមើលសម្លៀកបំពាក់មួយសន្ទុះ ខ្ញុំចាប់អារម្មណ៍ឃើញភ្លាមថា រាល់ផលិតផលប្រើ ប្រាស់ទាំងអស់ សុទ្ធតែជាម៉ាក «អេលាន»។
ដោយងឿងឆ្ងល់ខ្លាំងពេក ខ្ញុំក៏សម្រេចចិត្តសួរបុគ្គលិកម្នាក់នៅទីនោះ។ លោក ជិន ស៊ីថាត ជាអ្នកគ្រប់គ្រងឃ្លាំងនៅក្នុងហាងលក់សម្លៀកបំពាក់ «អេលាន» បានពន្យល់ប្រាប់ថា៖ «អេលានគឺជាម៉ាកសម្លៀកបំពាក់ និងសម្ភារប្រើប្រាស់សម្រាប់បុរសដ៏ល្បីល្បាញនៅទីក្រុងហុងកុង ហើយត្រូវបាននាំចូលផ្តាច់មុខដោយមជ្ឈមណ្ឌលលក់សម្លៀកបំពាក់លីម ហុង»។ លោក បានបន្ថែមថា សម្លៀកបំពាក់នៅក្នុងហាងអេលាន មានតម្លៃជាមធ្យមចន្លោះពី១៥ដុល្លារទៅ២៥ដុល្លារតែប៉ុណ្ណោះ។
ដូច្នេះ ប្រសិនបើមិត្ដយុវវ័យចង់ទិញសម្លៀកបំពាក់ និងសម្ភារប្រើប្រាស់ប្លែក ហើយទាន់សម័យ សូមសាកល្បងទៅកាន់ហាងលក់សម្លៀកបំពាក់អេលាន នេះម្ដងមើល៕
