កីឡាករកាន់ សុវណ្ណ
ត្រូវជួបប្រកួតជាមួយកីឡាករសុខ ចិន្តា មកពីក្លឹបឃ្លាំងមឿងកីឡា
នៅថ្ងៃសុក្រទី២៤ កុម្ភៈ
សប្តាហ៍មុនក្នុងវគ្គជម្រុះវិលជុំចុងក្រោយពូល A
ដើម្បីឈានទៅដណ្តើមខ្សែក្រវាត់ភេសជ្ជៈខារ៉ាបាវ
ប្រភេទទម្ងន់៦០គីឡូក្រាមប៉ុន្តែស្រាប់តែបាត់មុខកីឡាកររូបនេះ
ដោយគ្មានដំណឹងអ្វីឡើយ ។ នៅរាល់ព្រឹត្តិការណ៍នៃការប្រកួត
ខាងសហព័ន្ធកីឡាប្រដាល់កម្ពុជាសុទ្ធតែបានចែងច្បាប់ប្រកួតទុក
ជាមុនរួចជាស្រេចនិង
ធ្វើការចែកជូនគ្រប់បណ្តាក្លឹបទាំងអស់
ដែលបានបញ្ជូនកីឡាកររបស់ខ្លួនមកចូលរួមប្រកួតដើម្បីជ្រាបជា
ដំណឹងទាំងអស់គ្នាអំពីលក្ខខណ្ឌផ្សេងៗ
ហើយគ្រប់ភាគីសុទ្ធតែបានឯកភាព ព្រមព្រៀងគ្នាផងដែរ
ប៉ុន្តែលើកនេះការដាក់ពិន័យរាងធ្ងន់ជាងមុន ។
ដូច្នេះដើម្បីចង់ដឹងថា
ខាងសហព័ន្ធគេមានចំណាត់ការបែបណាក្នុងរឿងនេះ
និងចង់ដឹងថាអាចធ្វើបាន ឬអត់នោះ
ទើបកាលពីរសៀលថ្ងៃអង្គារទី២៨ កុម្ភៈ កន្លងមក លោកម៉ា សេរី
អ្នករៀបចំកម្មវិធីប្រកួតប្រដាល់នៅ CTN
បានសំណូមពរឱ្យមានការប្រជុំរកដំណោះស្រាយមួយជាបន្ទាន់ព្រោះថា
លោកក៏ត្រូវខាងម្ចាស់ឧបត្ថម្ភកម្មវិធីស្តីបន្ទោសដែរ ។
លោកឧត្តមសេនីយ៍ តែម ម៉ឺន ប្រធានសហព័ន្ធកីឡាប្រដាល់កម្ពុជា
ដែលបានមកចូលរួមប្រជុំលើកនេះ
ក៏បានឯកភាពអំពីបញ្ហាខាងលើនេះដែរ
ព្រោះថាកន្លងមកលោកតែងតែធ្វើការដាស់តឿនជារឿយៗដល់កីឡាករ
គ្រប់បណ្តាក្លឹបទាំងអស់ឱ្យខិតខំគោរពវិន័យរក្សាឱ្យបាននូវ
សីលធម៌ ប៉ុន្តែពួកគេបានត្រឹមតែស្តាប់ចូលពីត្រចៀកម្ខាង
និងចេញទៅតាមត្រចៀកម្ខាងទៀតប៉ុណ្ណោះ ។
ទោះបីយ៉ាងណាលោកក៏បានឯកភាពចំពោះសំណើរបស់
លោករាជ សុផែន ដែលសុំចុះមកនៅពាក់កណ្តាល
ព្រោះលោកយល់ឃើញអំពីគុណសម្បតិ្តរបស់លោករាជ សុផែន
ដែលធ្លាប់ធ្វើការងារល្អរយៈពេលកន្លងមក ។ ចំណែកលោកម៉ា សេរី
បើទោះជាលោកឯកភាពក្នុងរឿងនេះមែន
តែមើលទៅមុខលោកដូចជាមិនសប្បាយចិត្តសោះ
ដោយសារតែរូបលោកត្រូវទទួលរងនូវការដាក់សម្ពាធពីថ្នាក់លើ
របស់លោកដែរ ជាពិសេសខាងម្ចាស់ឧបត្ថម្ភកម្មវិធីតែម្តង ។
មានគ្រូប្រដាល់មួយចំនួនលួចរិះគន់ថា
ចំណាត់ការរបស់សហព័ន្ធនាពេលនេះមិនសូវជាក្តៅទាល់តែសោះ
ម្យ៉ាងគេខ្លាចតែក្លឹបផ្សេងទៀតធ្វើតាម ៕
