ត្រកាលនៃសម្រស់ឆ្នេរសមុទ្រកម្ពុជា ជាមួយនឹងគម្រោងការពារ និង គាំទ្រកុមាររបស់អង្គការ។
យោងតាមលោក ហង្ស ពិផល នាយកនៃអង្គការ Village Focus International បានឲ្យដឹងថា ព្រឹត្តិការណ៍បើកទូលាយសម្រាប់បេក្ខជនចុះឈ្មោះចូលរួមមានលក្ខណៈ ទូលាយ ដូចជារាជធានីភ្នំពេញ ខេត្តសៀមរាប និងខេត្តព្រះសីហនុ ដោយមានដៃគូជួយឧបត្ថម្ភពីសំណាក់ក្រុមហ៊ុនស្រាបៀរ Kingdom សណ្ឋាគារ និងរមណីយដ្ឋាន សុខា ហាងលក់កង់ Flying Bikes 2 និង Off Road Cyclery។
លោកបាននិយាយថា៖ «យើងមានអារម្មណ៍រំភើបខ្លាំងណាស់ក្នុងការបង្កើតឲ្យមាននូវ ព្រឹត្តិការណ៍មួយនេះឡើងនៅព្រះសីហនុ និងផ្តល់ឱកាសឲ្យកីឡាករប្រណាំងកង់ចូលរួមប្រកួតនៅតាមឆ្នេរ សមុទ្រដ៏ស្រស់ស្អាតនេះ»។
លោក ហង្ស ពិផល បានបន្តទៀតថា៖ «ជោគជ័យកាលពីរៀបចំនៅឯទីលានប្រកួតនាទឹកដីប្រាសាទអង្គរវត្ត នៃខេត្តសៀមរាបកន្លងមកនោះ បានជំរុញឲ្យយើងមានចំណាប់អារម្មណ៍នេះបន្តនៅលើទឹកដីឆ្នេរសមុទ្រ ផងដែរ។ យើងសង្ឃឹមថា ឆ្នាំនេះនឹងមានក្រុមកីឡាករប្រណាំងកង់នៅខេត្តព្រះសីហនុចូលរួម ច្រើនជាមិនខានឡើយ»។
ដោយឡែកលោកស្រី ហាលី ញូវហាម (Haley Newnham) អ្នកសម្របសម្រួលព្រឹត្តិការណ៍ប្រណាំងកង់របស់អង្គការ ក៏បានឲ្យដឹងផងដែរថា អង្គការក៏បានរៀបចំព្រឹត្តិការណ៍ប្រកួតប្រណាំងកង់បែបនេះ កាលពីខែធ្នូឆ្នាំទៅ នៅតំបន់ទេសចរណ៍ទឹកដីអង្គរផងដែរ ។
លោកស្រីបន្តថា៖ «ជាធម្មតាយើងរៀបចំការប្រកួតបែបនេះ ចំនួនពីរលើកក្នុងមួយឆ្នាំគឺនៅខែធ្នូ និងខែមេសា»។
ក្រៅពីព្រឹត្តិការណ៍ប្រណាំងកង់ដើម្បីរៃអង្គាសប្រាក់ជួយដល់ កុមារ អង្គការ ដែលបានធ្វើការតាំងពីឆ្នាំ២០០៣មួយនេះក៏បានផ្តោតលើការអភិវឌ្ឍ ជំនាញអ្នកដឹកនាំក្នុងស្រុកផងដែរ ដើម្បីធ្វើការផ្លាស់ប្តូរជាវិជ្ជមានរបស់សង្គម។
លោកស្រីលើកឡើងថា៖ «យើងបានធ្វើការជាមួយមជ្ឈមណ្ឌលការពារសិទ្ធិកុមារកម្ពុជា (CCPR) ដើម្បីជួយសង្គ្រោះកុមារឲ្យរួចផុតពីការជួញដូរផ្លូវភេទ និងបង្កើតគម្រោងជួយផ្នែកអប់រំកុមារក្រីក្រឲ្យបានចូលសាលារៀន ផងដែរ»។
ព្រឹត្តិការណ៍ប្រណាំងកង់នៅខេត្តព្រះសីហនុនេះក៏ស្របពេលជាមួយ នឹង ព្រឹត្តិការណ៍ប្រកួតពាក់កណ្តាលម៉ារ៉ាតុងអន្តរជាតិដែរ។ លោកស្រី ហាលី បានបន្ថែមឲ្យដឹងថា ព្រឹត្តិការណ៍ប្រកួតនឹងតម្រូវឲ្យក្រុមកីឡាករទាំងអស់ឆ្លងកាត់ តំបន់មួយចំនួននៅក្នុងខេត្តព្រះសីហនុ ដូចជាភូមិដ្ឋាននានារបស់ប្រជាពលរដ្ឋ តំបន់កូនភ្នំ និងបន្តមកដល់តំបន់ឆ្នេរសមុទ្រ។
ចំពោះជនបរទេសអាយុលើសពី ១៦ ឆ្នាំត្រូវចំណាយប្រាក់៣៥ដុល្លារអាមេរិកសម្រាប់ការប្រកួតទាំងពីរ ប្រភេទ ខណៈអ្នកមានអាយុក្រោម ១៦ ឆ្នាំត្រូវចំណាយតែ ១៨ ដុល្លារអាមេរិកប៉ុណ្ណោះ។
ចំណែកកីឡាករកម្ពុជាអាយុលើស ១៦ឆ្នាំត្រូវចំណាយ៧ដុល្លារខណៈអ្នកមានអាយុក្រោម១៦ឆ្នាំត្រូវ ចំណាយ៣ដុល្លារ។ រាល់តម្លៃនៃការចុះឈ្មោះចូលរួមគឺរាប់បញ្ចូលទាំងអាហារប៊ីប៊ី ឃ្យូ នៅក្នុងកម្មវិធីផ្តល់រង្វាន់ដល់ម្ចាស់ជ័យលាភី តែមិនបានបូកបញ្ចូលដល់មធ្យោបាយធ្វើដំណើរ និងការស្នាក់នៅរបស់អ្នកចូលរួមក្នុងព្រឹត្តិការណ៍ឡើយ។
ចំពោះប្រិយមិត្តដែលចាប់អារម្មណ៍ចង់ចូលរួមសកម្មភាពកីឡាប្រណាំង កង់ ដើម្បីសប្បុរសធម៌នេះ លោកអ្នកអាចចុះឈ្មោះចូលរួមនៅតាមការិយាល័យៈ
- ហាងលក់កង់ Off Road Cyclery ផ្ទះលេខ ១៨ ផ្លូវ ៣៦០ ភ្នំពេញ ទូរស័ព្ទ ០១២ ៥៥៥ ១២៣ (ការិយាល័យសម្រាប់ជួលកង់ប្រណាំង)។
- ហាងសម្លៀកបំពាក់ adidas ផ្ទះលេខ ១៦៤ មហាវិថីនរោត្តម ភ្នំពេញ ទូរស័ព្ទ លេខ ០២៣ ៧២៦ ៩០៦ និងសាខាខេត្តសៀមរាបផ្ទះលេខ ៥៩៨-៦០០ ផ្លូវទេពវង្ស ភូមិមង្គលមួយ ទូរស័ព្ទ ០៦៣ ៩៦៥ ៩០៦។
- ការិយាល័យទេសចរណ៍ ANA Travel នៅផ្លូវឆ្នេរអូរឈើទាល ខេត្តព្រះសីហនុ ទូរស័ព្ទ ០៣៤ ៩៣៣ ៧២៩។
សម្រាប់ព័ត៌មានលម្អិត ស្ដីអំពីការចូលរួមកម្មវិធីប្រណាំងកង់ និងការជួយឧបត្ថម្ភនានា សូមទំនាក់ទំនងជាមួយលោកស្រី ហាលី ញូវហាម (ជាភាសាអង់គ្លេស) តាមរយៈអ៊ីមែល hayley@villagefocus.org ឬ ទូរស័ព្ទលេខ ០៩៧ ៩៥៩៤ ២៤៦ និង ទូច សោភ័ណ (ជាភាសាខ្មែរ) តាមរយៈអ៊ីមែល sophorn@villagefocus.org ឬទូរស័ព្ទលេខ ០១៦ ៩៩៩ ១៩៧៕
