ថ្នាក់ដឹកនាំគណបក្សសម រង្ស៊ី និងគណបក្សសិទ្ធិមនុស្ស នៅក្នុងកិច្ចសំណេះសំណាលពីម្សិលមិញ។ រូបថត វីរៈ ម៉ៃ
សម្តីរបស់លោក សម រង្ស៊ី បានធ្វើឲ្យមានការទះដៃ អបអរសាទរ ពីសំណាក់ថ្នាក់ដឹកនាំ របស់គណបក្សសម រង្ស៊ី និងគណបក្សសិទ្ធិមនុស្ស ប្រមាណជាង ៤០០ នាក់ ដែលបានប្រមូលផ្តុំគ្នា នៅក្នុងពិធីសំណេះសំណាលមួយកាលពីម្សិលមិញ។ ថ្នាក់ដឹកនាំ និងសមាជិកគណបក្ស សិទិ្ធមនុស្ស និងគណបក្ស សម រង្ស៊ី បានមករាជធានីភ្នំពេញ ដើម្បីស្តាប់ការពន្យល់ពីការបង្កើតសម្ព័ន្ធភាពថ្មីរបស់គណបក្ស ទាំងពីរ គឺចលនាប្រជាធិបតេយ្យសង្គ្រោះជាតិ។
លោក សម រង្ស៊ី ប្រធានចលនាប្រជាធិបតេយ្យសង្គ្រោះជាតិ បានបន្តថា សហរដ្ឋអាមេរិក នឹងជួយត្រួសត្រាយផ្លូវ ឲ្យលោកបានវិលត្រឡប់ដើម្បីដឹកនាំគណបក្សថ្មី។ លោក ព្រមជាមួយនឹងលោកស្រី មូរ សុខហួរ និងលោក កឹម សុខា ប្រធានគណបក្សសិទិ្ធមនុស្ស នឹងធ្វើដំណើរទៅសហរដ្ឋអាមេរិក នៅថ្ងៃទី ៧ ខែសីហា ដើម្បីជួបមន្រ្តីសហរដ្ឋអាមេរិក និងពិភាក្សាពីការបោះឆ្នោតជាតិនាពេលខាងមុខនេះ។
លោក សម រង្ស៊ី បានថ្លែងថា៖ «ខ្ញុំជឿជាក់ថា នឹងមានដំណោះស្រាយ»។
លោក សម រង្ស៊ី ត្រូវបានហាមឃាត់មិនឲ្យចុះឈ្មោះបោះឆ្នោត ឬឈរឈ្មោះបោះឆ្នោតឡើយ ដោយសារតែលោកត្រូវបានតុលាការផ្តន្ទាទោសពាក់ព័ន្ធទៅនឹងការ រិះគន់លើកបញ្ហាព្រំដែនដ៏ចម្រូងចម្រាស រវាងកម្ពុជា និងវៀតណាម។ កាលពីឆ្នាំ ២០១០ តុលាការ បានផ្តន្ទាទោសលោក ដោយកំបាំងមុខ ឲ្យជាប់ពន្ធនាគារសរុប ១២ ឆ្នាំ ដោយសារតែលោក បានដកតម្រុយបង្គោលព្រំដែនកម្ពុជាវៀតណាម និងប្រើប្រាស់ផែនទី Google មកចោទប្រកាន់ពីការទន្ទ្រានទឹកដីកម្ពុជា ពីសំណាក់វៀតណាម។
លោក កឹម សុខា ប្រធានគណបក្សសិទិ្ធមនុស្ស និងជាអនុប្រធានចលនាប្រជាធិបតេយ្យសង្គ្រោះជាតិ បានថ្លែងថា កម្ពុជានឹងធ្លាក់ចូលទៅក្នុងរណ្តៅ នៃគ្រោះមហន្តរាយយ៉ាងធ្ងន់ធ្ងរ បើគ្មានថ្នាក់ដឹកនាំថ្មីធ្វើការសង្គ្រោះឲ្យបានទាន់ពេលវេលាទេ នោះ។
គ្រោះមហន្តរាយ ដែលលោកកឹម សុខា បានលើកឡើង គឺសំដៅទៅលើការហូរចូលនៃជនអន្តោប្រវេសន៍វៀតណាម ដោយពុំមានការទប់ស្កាត់ ការផ្តល់ដីសម្បទានសេដ្ឋកិច្ច ទៅឲ្យក្រុមហ៊ុនបរទេស ជាពិសេសក្រុមហ៊ុនវៀតណាមរហូតដល់ទៅ ៩៩ ឆ្នាំ ធ្វើឲ្យប្រជាពលរដ្ឋកាន់តែច្រើនឡើង កាន់តែធ្លាក់ខ្លួនក្រីក្រ ដោយសារតែបាត់បង់ដីធ្លី សម្រាប់ធ្វើស្រែចម្ការ ហើយនាំគ្នាធ្វើចំណាកស្រុក និងការដឹកនាំប្រទេសដោយបក្សទោលតែមួយ និងមនុស្សដដែលៗ ដែលជាដំណើរឆ្ពោះទៅរក«របបផ្តាច់ការ»។
លោក បានបញ្ជាក់ថា៖ «យើងមិនឲ្យកម្ពុជា ធ្លាក់ចូលទៅក្នុងរណ្តៅឡើយ យើងនឹងសង្គ្រោះកម្ពុជា។ វៀតណាម និងចិន ជាប្រទេសកុម្មុយនីស្ត ប៉ុន្តែគេបានផ្លាស់ប្តូរថ្នាក់ដឹកនាំរបស់ពួកគេ។ ចំណែកកម្ពុជា មិនទាន់ផ្លាស់ប្តូរអ្នកដឹកនាំនៅឡើយទេ គឺដឹកនាំដោយមនុស្សដដែលៗ»។
បន្ទាប់ពីទទួលបានសារពីមេដឹកនាំ គណបក្ស សមាជិកដែលបានប្រមូលផ្តុំកាលពីម្សិលមិញ បានសន្យាវិលត្រឡប់ទៅវិញ និងធ្វើការផ្សព្វផ្សាយនៅថ្នាក់មូលដ្ឋាន អំពីការបង្រួបបង្រួមគ្នារវាងគណបក្សប្រឆាំងទាំងពីរ។
លោក យូស សារឿន មេឃុំព្រែកតាសា ខេត្តព្រៃវែង បានថ្លែង៖ «ខ្ញុំនឹងពន្យល់ប្រជាជន ថាតើការបង្រួបបង្រួមគឺដើម្បីអ្វី»។
លោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្រ្តី បានហៅការគិតរបស់លោក សម រង្ស៊ី ថាជាគំនិតក្មេងខ្ចី។ លោក បានបន្ថែមថា៖ «គាត់បានមើលមកខ្មែរជាអាយ៉ងសហរដ្ឋអាមេរិក ឬអាយ៉ងវៀតណាម។ នេះជាកំហុសធ្ងន់ធ្ងរណាស់»។
លោក គល់ បញ្ញា នាយកប្រតិបតិ្តនៃអង្គការ ខុម ហ្វ្រែល ដែលជាអង្គការឃ្លាំមើលការបោះឆ្នោត នៅកម្ពុជា បានថ្លែងថា រឿងក្តីលោក សម រង្ស៊ី មិនអាចដោះស្រាយបានទេ ក្រៅពីការសម្រុះសម្រួលផ្លូវនយោបាយ ព្រោះវាកើតឡើងដោយសារអ្នកនយោបាយមានគំនិតផ្ទុយគ្នា៕ TK
