ខេត្តប៉ៃលិន ៖ នេះជាលើកទី២ហើយដែលបុរសជាកសិករនៅក្នុងខេត្តប៉ៃលិន បានទទួលរងរបួសដោយសារគ្រាប់មីនសេសសល់ក្នុងដីចម្ការផ្ទុះត្រូវក្នុងថ្ងៃបន្តបន្ទាប់ ខណៈដែលគាត់នាំប្រពន្ធ និងប្អូន៤នាក់ទៅកាប់ព្រៃនៅទីនោះ ដោយបុរសរងគ្រោះបានរបូតដៃធ្លាក់កាំបិតខ្វែវទៅលើមីនស្គរ ផ្ទុះខ្ទាតអំបែងត្រូវរបួសមួយកំណាត់ខ្លួនផ្នែកខាងមុខឡើងលើ ។ ហេតុការណ៍ផ្ទុះមីននេះបានកើតឡើងកាលពីវេលាម៉ោង៨និង៤០នាទីព្រឹកថ្ងៃទី១៨ សីហា ២០១២ ស្ថិតនៅចម្ការក្នុងភូមិអូររអិល ឃុំស្ទឹងកាច់ ស្រុកសាលាក្រៅ ។ ជនរងគ្រោះឈ្មោះស្រែង ម៉ុន ភេទប្រុស អាយុ៣៥ឆ្នាំ ជាកសិកររស់នៅភូមិកើតហេតុខាងលើ ។
ប្រភពព័ត៌មានពីប្រពន្ធជនរងគ្រោះឈ្មោះតុង ណាំ អាយុ៤៧ឆ្នាំ បានឱ្យដឹងថា ដោយខ្វះដីដាំដំណាំបន្ត ទើបនៅមុនថ្ងៃកើតហេតុប្អូនប្រុសម្នាក់របស់គាត់បានទៅសុំឱ្យពួកគាត់មកជួយកាប់ព្រៃក្នុងចម្ការ ។ ហើយដោយឃើញប្អូនរកឈ្នួលមិនបាន និងចង់ជួយកាប់ឱ្យប្អូនផង ទើបនៅថ្ងៃកើតហេតុវេលាម៉ោង៧ព្រឹកទាំង២នាក់ប្តីប្រពន្ធ និងបងប្អូន៤នាក់ទៀតបាននាំគ្នាទៅជួយកាប់ព្រៃនៅក្នុងចម្ការរបស់ប្អូនប្រុសម្នាក់ឈ្មោះចក់ អាយុ៤១ឆ្នាំ ដែលបានទិញតពីគេកាលពីយូរមកហើយ។ ប្រភពបន្តទៀតថា ពួកគាត់ឈរកាប់ព្រៃនៅក្បែរៗគ្នាចម្ងាយប្រហែលជា៥ម៉ែត្រពីប្តីរបស់គាត់ លុះកាប់បានប្រហែលជាង១ម៉ោង ស្រាប់តែប្តីរបស់គាត់របូតដៃធ្លាក់កាំបិតខ្វែវទៅខាងមុខ ធ្វើឱ្យចុងរបស់វាប៉ះចំគ្រាប់មីន បណ្តាលឱ្យផ្ទុះលាន់ឮយ៉ាងខ្លាំង ។ គ្រាន់តែឮសូរផ្ទុះដូច្នេះភ្លាមប្អូនទាំង៤នាក់របស់គាត់ដែលកំពុងតែឈរកាប់ ក៏បានទម្លាក់កាំបិតចោល រួចនាំគ្នារត់ទៅមើលឃើញប្តីរបស់គាត់កំពុងតែឈរភាំងស្មារតី ដោយរងរបួសទ្រូង និងមុខចាប់ពីពាក់កណ្តាលខ្លួនឡើងទៅលើ។
