អាជ្ញាធរមានសមត្ថកិច្ចកម្ពុជា គ្រោងបណ្ដេញជនជាតិចិន
១៥នាក់នៅសប្ដាហ៍នេះ ទៅកាន់ប្រទេសចិនវិញ
តាមសំណើរបស់រដ្ឋាភិបាលចិន។ ក្រសួងមហាផ្ទៃ និងអគ្គស្នងការនគរបាលជាតិ
បានទទួលសំណើពីស្ថានទូតចិន នៅប្រទេសកម្ពុជា
ដើម្បីបណ្ដេញជនជាតិចិនទាំងនោះចេញ។
លោកឧត្ដមសេនីយ៍ឯក សុខ ផល អគ្គស្នងការរងនគរបាលជាតិ មានប្រសាសន៍ប្រាប់វិទ្យុអាស៊ីសេរី នៅថ្ងៃទី២០ ខែសីហា ឆ្នាំ២០១២។
ក្រសួងមហាផ្ទៃ និងអគ្គស្នងការនគរបាលជាតិ គ្រោងបណ្ដេញជនជាតិចិន ១៥នាក់ ទៅកាន់ប្រទេសចិនវិញ នៅថ្ងៃទី២១ ឬថ្ងៃទី២២ ខែសីហា ឆ្នាំ២០១២ ក្រោយពីអាជ្ញាធរមានសមត្ថកិច្ចកម្ពុជា បានចាប់ខ្លួនជនជាតិចិនទាំងនោះនៅខេត្តកំពង់ស្ពឺ កាលពីថ្ងៃទី១៥ ខែសីហា ឆ្នាំ២០១២ កន្លងទៅនេះ ក្រោមបទជំរិតទារប្រាក់តាមប្រព័ន្ធអ៊ីនធឺណិត (Internet) ទៅគ្រួសារជនជាតិចិន នៅប្រទេសចិន កន្លងមក។
ការបណ្ដេញជនជាតិចិនចំនួន ១៥នាក់ខាងមុខនេះ គឺតាមសេចក្ដីប្រកាសរបស់រដ្ឋមន្ត្រីក្រសួងមហាផ្ទៃ លោក ស ខេង ជាឧបនាយករដ្ឋមន្ត្រី។ ក្រសួងមហាផ្ទៃបានដាក់ឈ្មោះជនជាតិចិន ទាំងនោះក្នុងបញ្ជីខ្មៅ ហាមមិនឲ្យជនជាតិចិនទាំងនោះចូលមកប្រទេសកម្ពុជា ជាថ្មីឡើយ។
នៅក្នុងចំណោមជនជាតិចិនចំនួន ១៥នាក់នោះ គឺមានជនជាតិចិន តៃវ៉ាន់ ១១នាក់ និងជនជាតិចិនដីគោកចំនួន ៤នាក់។
អគ្គស្នងការរងនគរបាលជាតិ លោកឧត្ដមសេនីយ៍ឯក សុខ ផល បានមានប្រសាសន៍ប្រាប់អ្នកកាសែតនៅថ្ងៃទី២០ ខែសីហា ឆ្នាំ២០១២ ថា សមត្ថកិច្ចកំពុងតែរង់ចាំនគរបាលចិន មកទទួលយកជនជាតិចិនទាំងនោះទៅកាន់ប្រទេសចិន វិញ តាមជើងយន្តហោះ។
លោក សុខ ផល៖ «បានទទួលសំណូមពរពីតំណាងស្ថានទូតចិនរួចហើយ គាត់នឹងត្រូវរៀបចំសំបុត្រយន្តហោះឲ្យពួកនេះ ហើយនិងរៀបចំទៅ ប៉ុន្តែសំខាន់ឥឡូវនេះអត់មានបញ្ហាអ្វីស្ទះទេ នៅតែសំបុត្រយន្តហោះយើងអាចអនុវត្តបានហើយ ក្នុងមួយថ្ងៃ ឬពីរថ្ងៃហ្នឹង។ គឺថា លើកនេះជាលើកទី៤ហើយ ប៉ុន្តែលើកទីបួននេះ មានចំនួនតិចជាងគេ។ លើកទី១ ទី២ និងទី៣ គឺថា មានដល់ជាង ៣០០នាក់ សរុបគ្នា ប៉ុន្តែលើកទីបួនហ្នឹងមានតែ ១៥នាក់»។
ភស្តុតាងដែលនគរបាលជាតិកម្ពុជា បានរឹបអូសបានមានដូចជា បណ្ដាញទូរស័ព្ទ និងបណ្ដាញអ៊ីនធឺណិត ដែលគេបានទាក់ទងទៅប្រទេសចិន និងកោះតៃវ៉ាន់ ដើម្បីគំរាមជំរិតទារប្រាក់។
បច្ចុប្បន្នអាជ្ញាធរមានសមត្ថកិច្ចកម្ពុជា កំពុងតែឃុំខ្លួនជនជាតិចិនទាំង ១៥នាក់នោះ នៅឯនាយកដ្ឋានអន្តោប្រវេសន៍ នៅជាយទីក្រុងភ្នំពេញ រង់ចាំការបណ្ដេញចេញ។
ក្រុមសន្តិសុខបានហាមឃាត់មិនឲ្យវិទ្យុអាស៊ីសេរី ថតរូបភាព និងហាមសួរសំណួរនានាទៅជនជាតិចិនទាំងនោះ នៅក្នុងមន្ទីរឃុំឃាំង៖ «ខាងអាស៊ីសេរី គាត់មកចង់ដឹងព័ត៌មាន ១៥នាក់ ឥឡូវខ្ញុំឲ្យគាត់អង្គុយចាំនៅខ្ទុះហ្នឹង (កន្លែងរង់ចាំ) ប៉ុន្តែគាត់ចង់ដើរឆ្វែល ...ខ្ញុំមិនអនុញ្ញាតឲ្យបើមេមិនទាន់សហការផងហ្នឹង។ អ៊ីចឹងបងអង្គុយចាំនៅខ្ទុះ ...ខ្ញុំតេហៅជំនាញ។ ចាំមេអនុញ្ញាតចាំបងអញ្ជើញចូលទៅ ខុសខ្ញុំ។ ឥឡូវបងទៅក្រៅសិន ជជែកគ្នានៅក្រៅ»។
នេះមិនមែនជាលើកទីមួយទេដែលប្រទេសកម្ពុជា ចាប់ជនជាតិចិន ជំរិតទារប្រាក់ជនជាតិចិនគ្នាឯង។
ក្រសួងមហាផ្ទៃ និងអគ្គស្នងការនគរបាលជាតិកម្ពុជា កាលពីខែមិថុនា ឆ្នាំ២០១១ កន្លងទៅនេះ បានប្រកាសបណ្ដេញចេញជនជាតិចិនដីគោក និងចិនតៃវ៉ាន់ សរុប ១៦៧នាក់ ក្រោមបទជំរិតទារប្រាក់តាមប្រព័ន្ធអ៊ីនធឺណិត ពីប្រទេសកម្ពុជា ទៅកាន់ប្រទេសចិន។
រហូតដល់ខែឧសភា ឆ្នាំ២០១២ កន្លងទៅនេះ ក្រសួងមហាផ្ទៃ និងអគ្គស្នងការនគរបាលជាតិ បានបណ្ដេញជនជាតិចិនដីគោក និងចិនតៃវ៉ាន់ សរុបចំនួន ៥០នាក់ទៀត ក្រោមបទជំរិតទារប្រាក់តាមប្រព័ន្ធអ៊ីនធឺណិត ពីប្រទេសកម្ពុជា។
ការចាប់ខ្លួនជនជាតិចិន ចំនួន ១៥នាក់សប្ដាហ៍កន្លងទៅ គឺជាករណីថ្មីបំផុតមួយទៀតនៅឆ្នាំ២០១២ នេះ៕
