ខេត្ដតាកែវ ៖
ស្ដ្រីម្នាក់ជាម្ចាស់បំណុលបានរងរបួសបែកក្បាលធ្ងន់ធ្ងរ
ខណៈទៅទារលុយពីកូនបំណុលដែលបានខ្ចី
តែត្រូវកូនបំណុលវាយមួយអង្រែបុកគ្រឿងចំក្បាលបណ្ដាលឱ្យរបួសធ្ងន់
។
ករណីហិង្សារកូនបំណុលវាយម្ចាស់ បំណុលកើតឡើងកាលពីវេលាម៉ោង៤ល្ងាចថ្ងៃទី១២ ខែសីហា ឆ្នាំ២០១២ នៅភូមិសីហា ឃុំចំបក់ ស្រុកបាទី ខេត្ដ តាកែវ។ ស្ដ្រីរងរបួស និងជាម្ចាស់បំណុល ឈ្មោះ ជា សុខុន អាយុ៣០ឆ្នាំ រស់នៅ ភូមិ-ឃុំកើតហេតុខាងលើ ។
ស្ដ្រី ជា សុខុន បានឱ្យដឹងថា ជនសង្ស័យជាកូនឈ្មោះ ព្រាប នារី ហៅទូច អាុ៣៩ឆ្នាំ ជាកសិករ រស់នៅភូមិ-ឃុំជា មួយគ្នា ។ ម្ចាស់បំណុលបានឱ្យដឹងថា ស្ដ្រីជាកូនបំណុលខាងលើនេះបានខ្ចីប្រាក់ របស់គាត់ចំនួន៥៨ម៉ឺនរៀល ដែលបាន ខ្ចីអស់រយៈពេលជាង២ឆ្នាំមកហើយ ។ស្ដ្រីរងរបួសបានឱ្យដឹងទៀតថា នៅថ្ងៃកើតហេតុរូបគាត់ទៅទារប្រាក់ពីកូន បំណុលឈ្មោះ ព្រាប នារី ហៅទូច នេះ តែត្រូវស្ដ្រីបង្ករបួសស្នាមបានប្រើពាក្យ ជេរបញ្ចេរហើយថានឹងមិនសងប្រាក់ដែល ខ្លួនជំពាក់នោះទេ ។ មិនតែប៉ុណ្ណោះបាន ទាញអង្រែបុកគ្រឿងវាយទៅលើក្បាល គាត់បណ្ដាលបែកហូរឈាមតែម្ដង ។
ស្ដ្រីម្ចាស់បំណុលបានឱ្យដឹងថា នៅថ្ងៃទី១៣ ខែសីហា ឆ្នាំ២០១២ ក្រោយមានអំពើហិង្សារូបគាត់បានដាក់ពាក្យ បណ្ដឹងចូលទៅនគរបាលផ្នែកព្រហ្មទណ្ឌ ស្រុកបាទី ដើម្បីឱ្យជួយអន្ដរាគមន៍កោះ ហៅជនបង្ករបួសស្នាមមកដោះស្រាយ។នៅចំពោះមុខនគរបាលស្ដ្រីបង្ករបួស ស្នាមជាកូនបំណុលបានសារភាពថា ពិតជាបានយកអង្រែបុកគ្រឿងវាយទៅលើ ស្ដ្រីម្ចាស់បំណុលប្រាកដមែន ។
លោក ឃុត ឡូ អធិការរងស្រុកបាទី ទទួលបន្ទុកផ្នែកព្រហ្មទណ្ឌបានឱ្យដឹងថា នៅក្នុងបណ្ដឹងស្ដ្រីរងគ្រោះទាមទារឱ្យស្ដ្រី បង្ករបួសស្នាមសងជំងឺចិត្ដ៣.៥០០ដុល្លារ ប៉ុន្ដែស្ដ្រីបង្ករបួសស្នាមសុំសម្រួលត្រឹម ៦០ម៉ឺនរៀល ទើបដំណោះស្រាយមិនត្រូវ បានបញ្ចប់នោះទេ ។ លោកបានបន្ដថា សំណុំរឿងបង្ករបួសស្នាមខាងលើនេះ នឹង ត្រូវបញ្ជូនបន្ដទៅស្នងការដ្ឋាននគរបាល ខេត្ដតាកែវដើម្បីដោះស្រាយបន្ដទៀត ។
តាមប្រភពព័ត៌មានបានឱ្យដឹងដែរថា ទន្ទឹមនឹងដំណោះស្រាយមិនបានរំលត់ សំណុំរឿងនោះប្ដីស្ដ្រីបង្ករបួសស្នាមឈ្មោះ ពន មុន្នី បានសុំធានាប្រពន្ធ (ស្ដ្រីបង្ក របួសស្នាម) ឱ្យនៅក្រៅឃុំបណ្ដោះអាសន្ន ហើយក៏មានការឯកភាពពីស្ដ្រី រងគ្រោះជាម្ចាស់បំណុលផងដែរ ។
ប្រភពបានបន្ដថា នៅក្រោយពីការ ធានាស្ដ្រីបង្ករបួសស្នាមឱ្យនៅក្រៅឃុំ នេះរហូតមកទល់នឹងពេលនេះគេបានដឹង ថា ស្ដ្រីបង្ករបួសស្នាម និងប្ដីព្រមទាំងកូន ផងនោះបាននាំគ្នាគេចខ្លួនចេញពីផ្ទះមិន ដឹងថាទៅទីណានោះឡើយ ។
អធិការស្រុកបាទីលោក ងាន់ សារី បានឱ្យដឹងថា ករណីហិង្សានេះវាអាចនឹង ឈានទៅដល់ផ្លូវតុលាការ ហើយប្ដីដែល ធានាចំពោះជនបង្ករបួសស្នាមឱ្យនៅ ក្រៅឃុំ ក៏នឹងត្រូវមានទោសផងដែរ ប្រសិនបើមិនចូលខ្លួនមកដោះស្រាយជា មួយនឹងស្ដ្រីរងគ្រោះជាម្ចាស់បំណុលទី នោះ ។ លោកបញ្ជាក់ថា មុននឹងក្រោយនឹងមិនអាចគេចខ្លួនបានទេ ដ៏រាបណាដី និងផ្ទះមិនអាចនាំរត់ទៅជាមួយបាននោះ៕
