ការស្ថាបនាច្រាំងទន្លេ និងស្ពានថ្មី បានរួមចំណែកធ្វើឲ្យតម្លៃដីនៅតំបន់ជ្រោយចង្វារកើនឡើង ។ រូបថត ហុង មិនា
លោក សេន ច័ន្ទរាត្រី អគ្គនាយកក្រុមហ៊ុនអចលនទ្រព្យស៊ីអ៊ីអេ បានលើកឡើងថា តម្លៃដីនៅតំបន់ទាំងនោះឡើងខ្ពស់ដោយសារតែការកសាងច្រាំងទន្លេ ការស្ថាបនាស្ពានជ្រោយចង្វារថ្មី និងការពង្រីកផ្លូវនៅតំបន់នោះ។ តម្លៃដីធ្លីបានហក់ឡើងដល់៧៥០ទៅ១០០០ដុល្លារ បើប្រៀបធៀបទៅនឹងពេលដូចគ្នាកាលពីឆ្នាំមុនមានតម្លៃត្រឹម៤៥០ ទៅ៨៥០ដុល្លារក្នុងមួយម៉ែត្រការ៉េ។
លោកថ្លែងថា៖«តម្លៃ ដីធ្លីរឿងអីមិនឡើងថ្លៃ បើមួយថ្ងៃៗមានអ្នកមកសួរជាច្រើនដង។ លោកបន្ថែមថា៖«ការកសាងស្ពានទី២ បានធ្វើឲ្យប្រជាជនគិតថា តំបន់នោះនឹងមិនស្ទះចរាចរណ៍ទៀតទេ ហេតុនេះការហក់ឡើងនៃតម្លៃដីធ្លីនៅតំបន់នោះជារឿងធម្មតាទេ»។
តំបន់ ភាគខាងកើតស្ពានជ្រោយចង្វារ មានសង្កាត់៥ជាចំណុះដែលមមានសង្កាត់ជ្រោយចង្វារ ព្រែកតាសេក ព្រែកលៀប បាក់ខែង និងសង្កាត់កោះដាច់។
លោក ខាត់ សុវណ្ណ នាយកគ្រប់គ្រងក្រុមហ៊ុន Cam Top Property Group បានយល់ស្របចំពោះការលើកឡើងរបស់លោក ច័ន្ទរាត្រី ដោយលោកនិយាយថា តម្លៃអចលនទ្រព្យនៅតំបន់នោះបានឡើងខ្ពស់ជាងការរំពឹងទុក គឺពីមុនគេអាចទិញបានក្នុងតម្លៃពី៥០០ទៅ៧០០ដុល្លារ ប៉ុន្តែបច្ចុប្បន្នតម្លៃបានហក់ឡើងរហូតដល់៧០០ ទៅ១០០០ដុល្លារក្នុងមួយម៉ែត្រការ៉េ។
លោក សុវណ្ណ ថ្លែងថា៖«តម្លៃដីធ្លី និងផ្ទះបានកើនឡើងខ្ពស់មិនត្រឹមតែតំបន់ជ្រោយចង្វារនោះទេ ប៉ុន្តែនៅខណ្ឌចំការមន ទួលគោកនិងដូនពេញ ក៏កើនឡើងដែរ»។
លោក ស៊ឹង ប៊ុណ្ណា ប្រធានក្រុមហ៊ុន ប៊ុណ្ណា រៀលធីគ្រុប និងជាប្រធានសមាគមអ្នកវាយតម្លៃអចលនទ្រព្យកម្ពុជា អះអាងថា តម្លៃដីធ្លីនៅតំបន់នោះបានឡើងតាំងពីដើមឆ្នាំ ដោយសារតម្រូវការកើនឡើង ព្រោះប្រជាជនបានផ្តោតទៅលើគម្រោងទីក្រុងរណបជ្រោយចង្វារថ្មីរបស់ ក្រុមហ៊ុន OCIC ការកសាងសណ្ឋាគារសុខា ច្រាំងទន្លេ និងការកសាងទីក្រុងរណបថ្មី របស់លោក លី យ៉ុងផាត់។
លោក ប៊ុណ្ណា បានថ្លែងថា៖«ការដោះដូរពិតប្រាកដមានកំណើនជាង១០ភាគរយតែប៉ុណ្ណោះ ប៉ុន្តែភាសារបស់អ្នកលក់ គឺគាត់កាត់ថ្លៃខ្ពស់ ប៉ុន្តែទន្ទឹមនឹងនោះបើមានតម្រូវការ គឺគេទិញក្នុងតម្លៃទីផ្សារតែប៉ុណ្ណោះ»។
លោកបានបន្តថា តម្លៃដីធ្លីនៅតំបន់នោះចែកចេញជាពីរ គឺទី១ នៅតាមបណ្តោយផ្លូវជាតិលេខ៦ ពីគល់ស្ពាន រហូតទៅដល់សាលាកសិកម្មព្រែកលៀប ដីមានតម្លៃចន្លោះពី២០០ដល់៥០០ដុល្លារក្នុងមួយម៉ែត្រការ៉េ ប៉ុន្តែសម្រាប់ផ្លូវនៅតាមជួរមាត់ទន្លេឆ្ពោះទៅកាន់សណ្ឋាគារសុខា ដីមានតម្លៃចន្លោះពី៥០០ទៅ៨០០ដុល្លារក្នុងមួយម៉ែត្រការ៉េ។
លោក គឹម បូរី អគ្គនាយកបច្ចេកទេសនៃក្រសួងសាធារណការ និងដឹកជញ្ជូន បានបដិសេធមិនប្រាប់ថា ការសាងសង់ស្ពានរហូតមកដល់ពេលនេះបានប៉ុន្មានភាគរយ ហើយនៅពេលណាការសាងសង់ស្ពានជ្រោយចង្វារទី២ នឹងត្រូវបញ្ចប់នោះទេ៕
