រាជធានីភ្នំពេញ ៖
អគ្គិភ័យបានឆាបឆេះលំនៅឋានប្រជាពលរដ្ឋនៅតាមជួរមាត់ទន្លេសាប
កញ្ជ្រោលអណ្តាតភ្លើងសន្ធោសន្ធៅ
និងខ្ជាក់ផ្សែងខ្មៅអាប់ខ្មួលខ្មាញ់ឡើងទៅលើអាកាសវេហាស៍ដែល
មើលទៅគួរឱ្យតក់ស្លុត
និងបង្កឱ្យមានការភ្ញាក់ផ្អើលយ៉ាងខ្លាំង
កាលពីវេលាម៉ោង១១និង៣០នាទី ថ្ងៃត្រង់ ថ្ងៃទី៣១ សីហា ២០១២
នៅក្រុម១ និងក្រុម៩ សហគមន៍អ្នកក្រីក្រជ័យមង្គល
ស្ថិតក្នុងភូមិក្រោយគោ សង្កាត់គីឡូម៉ែត្រលេខ៦
ខាងជើងស្ថានីយទូរទស្សន៍ CTN ខណ្ឌឫស្សីកែវ ។
ពេលនេះ ប៉ូលិស ប៉េអឹម
និងមន្ត្រីអាជ្ញាធរមូលដ្ឋានរាប់សិបនាក់
បានចេញអន្តរាគមន៍ចាត់ចែងសណ្តាប់ធ្នាប់, សំរួលចរាចរណ៍,
ការពារសន្តិសុខ ចោរកម្ម
និងហៅរថយន្តពន្លត់អគ្គិភ័យទៅបង្ក្រាបអណ្តាតភ្លើង
ខណៈសំឡេងរញៀវខ្ញៀវខ្ញារ ស្រែកហៅគ្នាឱ្យជួយជញ្ជូនអីវ៉ាន់
និងសំឡេងកញ្ចែរបស់សមត្ថកិច្ចសំរួលសណ្តាប់ធ្នាប់ ។
រយៈពេល៣ម៉ោងក្រោយមក ទើបភ្លើងរលត់ទាំងស្រុង
ក្រោយការបាញ់ទឹកពន្លត់យ៉ាងសកម្មរបស់សមត្ថកិច្ច
និងប្រើរថយន្តពន្លត់អគ្គិភ័យជាច្រើនគ្រឿងមកពីជាច្រើន
ស្ថាប័ន ។
តាមមន្ត្រីប៉ូលិសបានឱ្យដឹងថា
អគ្គិភ័យនេះបានលេបត្របាក់ផ្ទះអស់៣២ខ្នងដែលនេះជាតួលេខ
ដំបូង ហើយការខូចខាតនេះត្រូវបានគេវាយតម្លៃថា
ធំដុំគ្រាន់បើ
បើទោះណាទីកន្លែងនេះសំបូរទៅដោយលំនៅឋានអ្នកក្រីក្រក៏ដោយ...
ចំណែកឯការរងរបួសវិញ គឺមានស្រីម្នាក់រលាកភ្លើងតិចតួច
និងមន្ត្រីប៉ូលិសម្នាក់រន្ធត់ចិត្តខ្លាំងពេក រហូតដួលសន្លប់
ប៉ុន្តែមិនរលាកភ្លើងទេ
ហើយក៏មិនមានអ្នកណាស្លាប់ដោយសារភ្លើងដែរ ។
កន្លែងកើតហេតុខាងលើត្រូវបានមន្ត្រីអាជ្ញាធរ
និយាយឱ្យដឹងថា
ផ្ទះភាគច្រើនសង់អំពីឈើប្រក់ដំបូលស័ង្កសីជាប់ៗគ្នា
រាងរកេតរកូត ផ្លូវចូលមានស្ថានភាពបត់បែន
តូចចង្អៀតនៅលើដីចំណីមាត់ទន្លេ
ពិបាកដល់រថយន្តពន្លត់អគ្គិភ័យចូលទៅបាញ់ទឹកពន្លត់ ។
គេសង្កេតឃើញរថយន្តពន្លត់អគ្គិភ័យបន្លឺស៊ីរ៉ែនចេញ-ចូលឥតឈប់
ឈរជាច្រើនគ្រឿង
ចូលទៅបាញ់ទឹកពន្លត់ធ្វើឱ្យភ្លើងបានថមថយអំណាច
ហើយឈានទៅរលត់ទាំងស្រុង
កាលពីវេលាម់ោង២និង៣០នាទីរសៀលថ្ងៃដដែល
ដោយប្រើរថយន្តពន្លត់អគ្គិភ័យចំនួន២៤គ្រឿង
និងកាណូតបាញ់ទឹក៣គ្រឿង ហើយបើគិតជាជើងវិញ
គឺបាញ់ទឹកអស់ប្រហែល៤០ជើង។
